Marcos 9
9
1Cui'ne Jesús ca'quëña:
“Nuñerepa cayë, mësarute. Mësaru acohua'i iye maca pa'icohua'i ju̱'ima'pë pa'ija̱'cohua'i a'ë, ma'tëmo te̱'te ñama'pë pani.”
Jesús Ti̱ñe Pa'i Po̱nëse'e
(Mt 17.1-13; Lc 9.28-36)
2Seis mu'seña tëto saisi maca Jesupi Pedrore, Jacobore cui'ne Juanre sai saëña, ai cu̱tihuëna. Ja̱rona i̱ ju'i ca̱ cui'ne i̱ tsia ti̱ñe pa'i po̱nëña. 3Miacorepa iye yeja ca̱ña jo̱ja ti̱'añe peoji, ja̱re coa sësë pe̱, poja'iyeje̱ poja'ico po̱nëoña, i̱ ju'i ca̱ ye'hue pa'iorepa. 4Ja̱ maca ñareña, Elíasre cui'ne Moisésre Jesús ja̱'re nëcajë cocare cajëna.
5Ja̱ maca Pedropi Jesure caëña:
“Ye'yaquë, ¿de'oyerepa i̱ño pa'iye'ni, mai? Toaso̱ a'ri huë̱'ña neñu'u. Më'ë huë'e, Moisés huë'e, cui'ne Elías huë'e neñu'u.”
6Ja̱je Pedro cani ti cuasama'ë capi, tsoe quëquë huesë sitopi. Si'ahua'i i̱ ye'yacohua'i cato quëquë huesësicohua'i pateña. 7Ja̱ maca ma'tëmopi sirio i̱ohua'i quë'rona nëca mequëna, asajëna, yë'ose'e pi̱siña:
“Iquë cato yë'ë mamaquë api. I̱ni ai sihuaquë pa'iyë. I̱ cayere asajë̱'ë.”
8Ja̱ jeteyo'je coa Jesuse'e te'i paquëña.
9Ai cu̱tihuëpi cajequë Jesús i̱ ye'yacohua'ire caëña, yecohua'ire mësaru ñase'e quëama'pë, yë'ë ju̱'isiquëpi huëisi maca quëajë̱'ë, caëña. 10Ja̱je caëna, i̱ohua'ise'e yahue de'huase'ere pareña. Ja̱je pajë coa sa̱'ñe se̱teña, i̱quere caë'ni, ju̱'isiquëpi huëisi maca quëajë̱'ë caquë. 11Ja̱je pa'ina, Jesure se̱teña:
“¿Me yo'ojë cua̱ñese'e ye'yacohua'i Elíaspi du'ru daiye pa'iji, caye'ni?”
12Cajëna, i̱pi sehuouña:
“Nuñerepa du'ru daija̱'quë api. Dani si'aye ne de'huaja̱'quë api. Cui'ne ¿me caquë'ni, toyase'e yë'ë Pa̱i Mamaquë aye? Ai yo'oja̱'quë api. Cui'ne pa̱ije i̱te coeja̱'cohua'i a'ë, caji. 13Ja̱je pa'iquëta'are yë'ë cayë tsoe Elías daji'i. I̱ni pa̱i i̱ohua'i yëyeje̱ yo'ohuë, toyase'e cayeje̱ pa'ye.”
Huatire Jesús Etose'e
(Mt 17.14-21; Lc 9.37-43)
14Jeteyo'je co'ireña, i̱ ye'yacohua'i pa'i hue̱'ñana. Dani jai pa̱i pa'ijëna, ñareña. Ñajëna, cui'ne i̱ ye'yacohua'i ja̱'re co̱ni sa̱ñope cajë pateña, cua̱ñese'e ye'yacohua'ipi. 15Ja̱je cacohua'ipi Jesure ñani se je̱oni huë'huëni pëpareña, de'oquëre pa'ni cuasajë.
16Ja̱ maca Jesupi i̱ohua'ire se̱quëña:
“¿I̱quere sa̱'ñe yo'ojë care'ni, ja̱ohua'i ja̱'re?”
17Se̱ina, i̱ohua'i ja̱'re pa'isiquëpi sehuouña:
“Ye'yaquë yë'ëpi dahuë, huati quë'ini, yë'ë mamaquëre cama'quëni më'ëni ña cua̱ñosi'i caquë. 18Huatipi i̱te de'oye pa'ina, ne ta̱oquë yo'oji. Yo'oquëna, siri yë'opoja̱'a mëaquë cui'ne cu̱ji qui̱'coquë yo'oji. Ja̱je yo'oquë tutu peoquë de'o huesëji. Më'ë ye'yacohua'ire eto saocaijë̱'ë, caquë se̱ni jujahuë, ne ti̱'añe peojëna.”
19Caquëna, Jesupi caëña:
“¡Maija'quëpi necaiquë api cuasama'cohua'i! ¿Mësaru ja̱'re yë'ë tsoe aquëpi pa'iyë? ¿Je ja'ye tsoerepa mësarute quëcoquë co̱cai pa'ija̱'quë a'ni, ja̱je huesëto? Dajë̱'ë, tsihua'ëre.” 2 20Caëna, darena, huatipi Jesure ñani, hue'hue dahuë nequëna, sa ta̱ni tearoja̱ni siri yë'opoja̱'a etoquë yo'ouña.
21Ja̱je yo'oquëna, ñani Jesús caëña, pëca ja'quëre:
“¿Je ja'ye tsoe ja̱je yo'oquë pa'iquë'ni?”
Caquëna, pëca ja'quëpi caëña:
“Tsihua'ë pa'inë aquë api. 22Yequere toana, tsiayana huani je̱osi'i, caquë yo'oquë api, jaiye. Ja̱je pa'ina, më'ëpi yëquëre oi co̱caijë̱'ë, de'hue.”
23Caquëna, Jesupi caëña:
“Më'ëpi neñe pa'iji, cuasaquë pa'ito neñe pa'iji, si'aye.”
24Caquëna, tsihua'ë pëca ja'quëpi cuiña:
“Neñe pa'iji, cuasayë. Co̱caijë̱'ë, ai jerepa ja̱je cuasa ja̱'ñere.”
25Ai jerepa jai pa̱i tsi'si daijëna, ñani huatire caëña:
“Huati asama'quë cui'ne cama'quë, yë'ëpi më'ëre cayë, etajë̱'ë. Iquë tsihua'ëre je̱oni sani cui'naëni cacaye pa̱jë'ë.”
26Caquëna, huatipi cuini yeque hue'hue dahuë se ne co̱uña. Neni ju̱'ise'eje̱ pa'ire je̱oni saquëña. Ja̱re ñani yecohua'i ju̱'isiquë pa'iji, careña. 27Ja̱je cajëna, Jesupi i̱te jë̱tëna tse̱ani naë huëo nëcouña.
28Ja̱ maca Jesús huë'ena cacaëna, i̱ ye'yacohua'ipi se̱teña:
“¿Me yo'ojë yëquë huatire eto saoye pa̱re'ni?”
29Cajëna, Jesupi caëña:
“Ñeje pa'i huatire cato coa a̱ima'pë cui'ne Maija'quëre se̱ñepi eto saoye pa'iji.”
Ti̱jupë Jesús Capi, I̱ Ju̱'iñe Ayere
(Mt 17.22-23; Lc 9.43-45)
30Ja̱ropi saijë Galileaja̱'a tëto sateña. Pa̱ije huesëjëna, sasi'i cuasaëña, Jesús. 31Ja̱ mu'se cato Jesús i̱ ye'yacohua'ini quëaquë cuquëña. Yë'ë Pa̱i Mamaquë cato tse̱a cua̱ñosiquë pa'ija̱'quë a'ë. Ja̱ohua'ipi huani je̱oja'cohua'i a'ë caëña. Cui'ne caëña, toaso̱ mu'seña pa'i maca ju̱'isiquëpi huëija̱'quë a'ë. 32Ja̱je quëaquëna, i̱ ye'yacohua'i asa ti̱'añe pa̱reña. Pa̱jëta'a se̱ni asaye pa̱reña, ca'rajë.
Nepi Jerepa Do'i Pa'iquë
(Mt 18.1-5; Lc 9.46-48)
33Capernaum daripëna ti̱'ani huë'ere pa'i maca Jesupi se̱quëña:
“¿I̱quere mësaru ma'a daini sa̱'ñe yo'ojë care'ni?”
34Caquëna, sehuoma'pë pateña. Nepi jerepa pa'i pa'ija̱'quë a'ni, cajë sa̱'ñe yo'ojë casicohua'ipi ma'a dai maca. 35Pa̱jëna, ja'runi ñu'i doce i̱ ye'yacohua'ire caëña:
“Si'aohua'ire tëto saisiquë pasi'i, cani si'aye yecohua'ire necaiquë jo'yaë pa'iye pa'iji.”
36Ja̱je ca tëjini tsihua'ëre jopore pana nëconi, su'cuani caëña, ja̱ohua'ire:
37“Yë'ëje̱ pa'ire cuasajë tsihuaëre de'oye yo'ocaini yë'ëni yo'oye pa'iji. Yë'ëre de'oye yo'oquë cato yë'ëse'ere de'oye yo'oye peoji, cui'ne yë'ëre jëjo daosiquëreje̱ de'oye yo'ocaiye pa'iji.”
Maire Sa̱ñope Yo'oma'quë Pani Maire Co̱caiquë Api
(Mt 10.42; Lc 9.49-50)
38Ja̱ maca Juanpi caëña:
“Ye'yaquë, yëquë ñahuë, më'ë mamipi caquë huatire eto saoquëre. Ñani yo'oma'ë cajë ë̱sehuë, mai ja̱'re co̱ni cu'ima'quëpi yo'oquëna.”
39Caquëna, Jesupi caëña:
“Ë̲sema'pë pa'ijë̱'ë, yë'ë mamipi cajë pa̱i yo'o ti̱'a ma'ñe yo'ocohua'ire. Ja̱ohua'i cato yë'ëre sa̱ñope cama'cohua'i a'ë. 40Maire sa̱ñope yo'oma'quë cato mai te̱'tere pa'iji. 41Mësaruni yecohua'ipi yë'ë do'ipi cajë oco mañare o̱cuacohua'i pani de'huacaisi co'amaña paja̱'cohua'i a'ë, mësaru Cristo acohua'ini de'oye yo'osi do'ire.
Co'aye Yo'oyena Ta̱iñe
(Mt 18.6-9; Lc 17.1-2)
42Tayo yo'oyena ne ta̱oquëre cato, quë̱na pëpi ñaje tëcana sëani jai tsiayana je̱o dëo'ñe pa'i api, a'ricohua'ipi yë'ëre cuasacohua'ire co'a de'huaquëre. 43Ja̱je pa'ina, cayë më'ë jë̱tëpi tayo yo'oyena saco pa'ito tëto tëajë̱'ë. Ai jerepa de'oji, pa'i hue̱'ñana peo tupëpi cacato toa yejana saiye peoye, 44pecoje̱ ju̱'ima'tona cui'ne toaje̱ yayama'tona. 45Më'ë nëcayopi tayo yo'oyena saco pa'ito tëto tëajë̱'ë. Ai jerepa de'oji, pa'i hue̱'ñana peo tupëpi cacato. Ai jerepa co'aji, caya nëcañoa hue'equëpi toa yejana saito. 46Ja̱ro pecoje̱ ju̱'ima'tona cui'ne toaje̱ yayama'tona. 47Panita'a më'ë ñacoapi tayo yo'oyena saco pa'ito dutani je̱ocojë̱'ë. Ai jerepa de'oji, Diusu cua̱ñe te̱'tena te'e ñacoa hue'equëpi cacato. Ai jerepa co'aji, caya ñacoa hue'equëpi toa yejana saito. 48Ja̱ro pecoje̱ ju̱'ima'tona cui'ne toaje̱ yayama'tona. 49Si'ahua'i toapi ne de'huasicohua'i pa'ija̱'cohua'i a'ë, cui'ne si'aye Maija'quë coa i̱siye cato a̱sipi, ne de'huase'e pasipi. 50A̲sipi i̱o së̱ñere caraja̱isico pani co'aji, hua'i saraye. Ja̱je pa'ina, cayë: Mësaru sa̱i ja̱'ñere ne huesoma'pë pa'ijë̱'ë, pa̱i ja̱'re sa̱ñope yo'oma'pë jo'cua de'oye pa'ijë̱'ë.”
Pašlaik izvēlēts:
Marcos 9: sey
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2012, Wycliffe Bible Translators, Inc. All rights reserved.