Marcos 8
8
Jesupi Cuatro Mil Pa̱ire A̲oñe
(Mt 15.32-39)
1Ja̱re ja̱ mu'se jai pa̱i tsi'sireña, tsi'sisicohua'ipi a̱iñe peoreña. Peojëna, Jesupi i̱ ye'yacohua'ire soini caëña:
2“Teaye pa̱i mañare ñañë, yë'ë ja̱'re tsoe tres mu'seña a̱iñe peocohua'ipi pa'ijëna. 3Ja̱je a̱ima'cohua'ini jëjo saoquë pa'ito jopo ma'ana dahuëra ju̱'ija'cohua'i pa'ini, yecohua'ipi so'opi daisicohua'ipi pa'iyë.”
4Caquëna, i̱ ye'yacohua'ipi careña:
“¿Me i̱ño cato hueroni a̱oñe'ni, pa̱ije peo hue̱'ña?”
5Cajëna, Jesupi se̱quëña:
“¿Je so̱ pan paye'ni, mësaru?”
Se̱ina, careña:
“Siete pan payë.”
6Cajëna, asani pa̱ire cua̱ñeiña, tayahuëna ja'rujë̱'ë caquë. Ja̱ maca siete pan i̱ni Maija'quëre de'oji caquë pëpani. Ja̱ jeteyo'je i̱ ye'yacohua'ina huahueni i̱sipi. I̱sina, ja̱ohua'ipi pa̱ire se a̱ohuë. 7Tsiaya hua'ireje̱ pahuë. Pajëna, Jesupi cui'ne ja̱ohua'ireje̱ yo'oni huahueni i̱ ye'yacohua'ina i̱sina, se a̱ohuë. 8Si'a pa̱i a̱ni sihuacohua'i paë'ë, siete do'rohuë̱a nëapi, a̱ni jujase'e. 9Ja̱ a̱isicohua'i cato cuatro mil paë'ë. Ja̱ maca Jesupi i̱ohua'ire saiyë cani 10saji'i, i̱ ye'yacohua'i ja̱'re co̱ni yohuëja̱'a Dalmanuta yejana.
Pa̱i Yo'o Ti̱'a Ma'ñere Yo'ojë̱'ë Cajë Se̱ñere
(Mt 16.1-4; Lc 12.54-56)
11Fariseo pa̱ipi dani Jesure sa̱ñope careña. I̱te neñañu'u cajë se̱teña, pa̱i yo'o ti̱'a ma'ñere ma'tëmo ayere ne i̱ñojë'ë cajë. 12Se̱jëna, ai ëja yë'eni caëña:
“¿Me neñu'ju iye pa̱i ja̱je se̱ñe'ni pa̱i yo'o ti̱'a ma'ñere yo'o i̱ñojë'ë cajë? Care payë, mësarute i̱ñoñeje peoji, te'oreje̱.”
13Ja̱je cani je̱oni, cui'naëpi yohuëna aya mëni jaira je te̱'tena saquëña.
Fariseo Pa̱i Co'ayere Neñe
(Mt 16.5-12)
14Pan hua̱nëyeni saë'ë, a̱i ja̱'ñe peocohua'i, coa te'e panpë maca sahuë. Ja̱ose'e yohuë paquëña. 15Pa'ina, Jesupi i̱ohua'ire cua̱ñeiña. De'hua ñajë'ë, fariseo pa̱i o'sa cui'ne Herodes pa̱i o'sana co̱'me huesëye caquë.
16Ja̱je caquëna, i̱ ye'yacohua'ipi sa̱'ñe careña: pan peocohua'i datena caji.
17Ja̱je cajëna, Jesupi asani caëña, ja̱ohua'ire:
“¿Me yo'ojë pan peoyë, caye'ni? ¿Ja̱ yë'ta'a huesëjë ja̱je caye? ¿Ai jëa joyore hue'eye, mësaru? 18¿Cui'ne ti ñama'pë pa'iye, cui'ne asama'pë pa'iye, mësaru ca̱joropi? ¿Yë'ë ja̱'rë jaiye pan nese'e cuasaye pa̱ñe? 19Mësarupi ñasicohua'ita'a cinco panpi cinco mil pa̱ire a̱ose'e: ¿a̱ojëna, cui'ne je ja'ye nëaë'ni?”
Caquëna, i̱ohua'ipi sehuoreña:
“Doce do'rohuë̱a nëapi.”
20“¿Cui'ne cuatro mil pa̱ire siete pan pa'ise'epi a̱oto je ja'ye nëaë'ni?”
Caquëna, i̱ohua'ipi careña:
“Siete do'rohuë̱a nëapi.” 21Ja̱je cajëna, i̱pi caëña:
“¿Ja̱ yë'ta'a ja̱je ñasicohua'ita'a cui'ne huesëcohua'i pa'ijë ja̱je cuasaye'ni?”
Jesupi Ñama'quëre Jujuye
22Ja̱ jeteyo'je Betsaidana ti̱'areña. Ti̱'asi maca Jesús quë'rona dareña, ñama'quëni jujucaijë̱'ë cajë. 23Ja̱je cajëna, asani ñama'quë jë̱tëna tse̱ani ca̱jiquë pa̱i daripëpi hue'sena etouña. Copi ñaco ca̱na neni i̱na patoquë, se̱quëña, ¡De'hue ña cua̱ñoquë! 24Caquëna, ñama'quëpi caëña:
“Ñañë, pa̱ire. Ñaquëta'are so̱quë ñëaje pa'yepi cu'iji.”
25Ja̱je caquëna, Jesupi ti̱jupë ñaco ca̱na patoquëna, yureta'a de'oyerepa ñaquë po̱nëni co'yasiquë paquëña. 26Ja̱ maca Jesús huë'ena i̱te jëjo saoquë caëña:
“Pa̱i daripë cacama'ë cui'ne yecohua'ireje̱ quëama'ë pa'ijë̱'ë.”
Pedropi Jesús Ayere Caye
(Mt 16.13-20; Lc 9.18-21)
27Ja̱ jeteyo'je Jesús cui'ne i̱ ye'yacohua'i co̱ni Cesarea cui'ne Filipo yeja pa̱i a'ri darina sateña. Saijëna, ma'ana Jesupi se̱quëña, i̱ ye'yacohua'ire:
“¿I̱queipi yë'ëre caye'ni, pa̱i?”
28Caquëna, i̱ohua'ipi careña:
“Yecohua'ipi më'ëre cayë, Juan oco doquë api. Yecohua'ipi cayë, Elíaspi. Cui'ne yecohua'ipi Maija'quë jëjo daoquë api cayë.”
29Ja̱ maca i̱pi se̱quëña, i̱ohua'ire: “¿Mësaruta'a i̱queipi caye'ni, yë'ëre?”
Caquëna, Pedropi caëña:
“Më'ë cato huasoquë Cristore pa'ë.”
30Ja̱je caëna, Jesupi caëña, ja̱ohua'ire:
“Yecohua'ire quëama'pë pa'ijë̱'ë.”
Jesupi I̱ Ju̱'iñere Quëaye
(Mt 16.21-28; Lc 9.22-27)
31Ja̱ maca ye'ya huëoni ye'yaquë caëña. Pa̱i Mamaquë yë'ë ai yo'oye pa'iji. Aiohua'ipi yë'ëre coeja̱'cohua'i a'ë. Pa̱i ëjaohua'ije̱ coeja̱'cohua'i a'ë. Cui'ne cua̱ñese'e ye'yacohua'ije̱ yë'ëre coeja̱'cohua'i a'ë. Ja̱je coejë yë'ëre huani je̱oja'cohua'i a'ë. Ja̱je huani je̱osicohua'ita'are toaso̱ mu'seña pa'i maca huëija̱'quë a'ë. 32Iye ti̱ñarepa quëaëña. Quëaquëna, Pedro i̱te ti̱rona sani caëña. Ja̱je yo'oto co'aji. Iye cama'ë pa'ijë̱'ë, ca huëoëña. 33Ja̱je caquëna, Jesús co'ye po̱nëni i̱ ye'yacohua'ire ñaëña. Ñani Pedrore tutu caëña:
“Huati ëjaë saijë̱'ë. I̱ño pa'ima'ë. Më'ë cato Diusu cuasayeje̱ cuasama'quë a'ë. Coa pa̱i cuasayere cuasaquë a'ë.”
34Ja̱ maca Jesús i̱ ye'yacohua'ire cui'ne pa̱ire soini caëña:
“Yë'ëni tuñu'u cani co'ye de'oye pa'iyere hua̱nëyejë̱'ë. Ja̱je yo'oni më'ëre que̱ja'core hue'oni tuijë̱'ë, yë'ëre. 35Ja̱je pa'ina, i̱ pa'iye jëasi'i caquë yo'oquëpi coa ne huesoja̱'quë api. Ja̱je pa'iquëta'are yë'ë do'ire cui'ne yë'ë coca do'ire i̱ pa'iye nejosiquëpi pa'iye ti̱'aja'quë api. 36¿Ja̱je pa'ina, i̱quere co̱caiquë'ni, pa̱ipi si'aye iye yeja co'amaña ti̱'asicohua'ipi i̱ohua'i joyore coa nejoto? 37Joyore nejosiquë pani yecore ti̱'añe peoji. 38Yë'ëni cui'ne yë'ë cocare huajëya'ye quëama'quëpi cajë pa̱ini ca'rajë pa̱sicohua'ire, yë'ë Pa̱i Mamaquëpi cui'ne huajëya'ye quëama'quëpi caquë coeja̱'quë a'ë, yë'ë ja'quë de'o tuture papi cui'ne i̱ hui̱ñaohua'i ja̱'re dai maca.”
Pašlaik izvēlēts:
Marcos 8: sey
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2012, Wycliffe Bible Translators, Inc. All rights reserved.