Marcos 12
12
Co'acohua'i Yo'oye Ayere Quëaye
(Mt 21.33-46; Lc 20.9-19)
1Ja̱ maca Jesús pa̱i yo'oyeje̱ pa'ye caquë quëaëña, ñeje:
“Paji'i, te'i pa̱i yeja paquë. Ja̱je pa'ipi ta̱pi, cuiya'i. Ta̱ni tu'rihuë tëhuopi. Cui'ne cuiya'i suni de'huaja̱'toje̱ nepi. Cui'ne cuiya'i tsio ë̱më huë'epi tuijë si'a tsio ñaja'core nepi.
Ja̱je si'aye ne tëjini co'amaña necaicohua'ini i̱si nëoni saji'i. 2Tëaye ti̱'asi maca i̱ jo'yare jëjo daopi, co'amaña necaicohua'i quë'rona i̱te cajë necaise'e pa'iji, caquë. 3Ja̱je jëjo daosiquëta'are co'amaña necohua'ipi tse̱ani si'seni i̱sima'pë jëjo saohuë. 4Ja̱je yo'orena, i̱ti tse̱ aquëpi yequëre jëjo saopi. Jëjo saouna, ja̱ëreje̱ quë̱na pë̱api je̱ahuë. Cui'ne si̱opëje̱ a'si quë'ire tea ju̱'ijë yo'oni jëjo saohuë. 5Ja̱je yo'oruje̱ i̱ti tse̱ aquë ja̱ yë'ta'api yequëre jëjo sao co̱pi. Jëjo saosiquëni ja̱ëni coa huani je̱ohuë.
6Jëjo saoquë pequë yureta'a i̱ mamaquëre pani jëjo saopi, yë'ë mamaquëre cato yo'oye peoji caquë. 7Ja̱je caquë jëjo saosiquëta'are co'amaña necohua'ipi ñani ‘iquëpi si'a co'amaña paja̱'quë api huani je̱oni maipi i̱ti tse̱ acohua'i neñu'u,’ cani huani je̱ohuë. 8Ja̱je yo'oni tse̱ani huani je̱oni i̱ ca̱pë hue'sena je̱ocohuë.”
9Ja̱je quëa tëjini Jesús se̱quëña:
“¿Me yo'oja̱'quë a'ni, i̱ti yeja aquë?” Cani caëña, i̱ti yeja aquë cato dani, huani je̱aja'quë api, co'amaña necohua'ire. Huani je̱oni yecohua'ina i̱sija̱'quë api.
10¿Ñama'cohua'i a'ni toya pëpë caye? Ñeje caji:
Quë̱na pë̱a huë'e necohua'i yo'o jujani je̱ocosi quë̱na pëpi
yure cato huë'ehuërepa u̱i quë̱na pë de'oye i̱ti quëco pacorepa.
11Iye cato ëjaëpi ja̱je yo'opi. Ja̱je yo'ose'ere de'oyerepa yo'o u'ni cajë ñañë, mai.
12Casi maca Jesure tse̱añu'u cajë yo'oreña. Jesupi yo'ose'eje̱ pa'ye caquë i̱ohua'i yo'oyere caëna, asani pë̱ijë yo'oreña. Ja̱je yo'ojëta'a tse̱añe pa̱reña, pa̱ini ca'rajë. Ja̱je pa'ina, yo'oma'pë pateña.
Jesure Se̱se'e Pa'i Do'i Sa̱iñere
(Mt 22.15-22; Lc 20.20-26)
13Ja̱ jeteyo'je Jesús quë'rona fariseo acohua'ire cui'ne Herodes acohua'ire jëjo daoreña, ja̱ohua'ipi i̱te neñajajë cajë. 14Ja̱je daisicohua'ipi Jesure careña:
“Ye'yaquë, yëquë asayë, më'ë nuñerepa caquëpi pa'iye, pa̱i cayere asama'quëpi nuñerepa Maija'quë cocare caquëpi pa̱ire si'aohua'ire si'a yë'quë maca caquëpi pa'iye. Ja̱je pa'ina, ¿de'oquë pa'i do'ire romano pa̱i ëjaëna sa̱iñe, pa̱nita'a pa̱ñe?”
15Cajëna, Jesupi tsoe i̱ohua'i coa caye asani caëña:
“¿Me neñu'ju yë'ëre cosojë neñañu'u cajë caye'ni? Dajë̱'ë, curiquë të'quire ñaja'core.”
16Darena, Jesús ñani se̱quëña:
“¿Ne tsia'ni ico? ¿Cui'ne, ne mamire toyasicoa'ni?”
Caquëna, sehuoreña:
“Romano pa̱i ëjaë mamipi toyasicoa.”
17Cajëna, Jesupi caëña:
“I̱ tse̱co pa'ito i̱na i̱sijë̱'ë. Maija'quë tse̱co pa'ito Maija'quëna i̱sijë̱'ë.”
Ja̱je sehuouna, airepa de'oyerepa caë'ni, cuasareña.
Ju̱'isicohua'i Huëiye Pa'iquë Cajë Se̱ñe.
(Mt 22.23-33; Lc 20.27-40)
18Jesure ñañu'u cajë dateña, saduceo pa̱i acohua'ipi. Ja̱ohua'i cato ju̱'isicohua'i huëiye peoji cacohua'i pateña. Ja̱ohua'ipi careña, ñeje:
19“Ye'yaquë, Moiséspi yëquëre toyani je̱oca'a̱ji'i, maja'yëpi huejani mamajëre peoquë ju̱'isiquë pa'ito yo'jeipi huejani mamajëre pacaiye pa'iji, maja'yë do'ire. 20Te'ipi siete mamajë ë̱mëohua'ire paëña. Paquëna, ja̱ohua'i aquë maja'yëpi huejani mamajëre peoquë ju̱ji'i. 21Ju̱quëna, yo'jeipi hua'jeore huejapi. Ja̱ëje mamajëre peoquë ju̱ji'i. Ju̱quëna, yo'jeipi huejani cui'ne yo'opi. 22Ja̱re ja̱jese'e si'a tsëcapë hua'jeore huejajë ju̱ju sahuë, si'aohua'i mamajëre peocohua'i. Ja̱ jeteyo'je i̱oje ju̱co'ë. 23¿Ja̱je pa'ito ju̱'isicohua'i huëi maca ne nëjo pa'ija̱'coa'ni, te'oni siete pa̱irepa huejasico?”
24Cajëna, Jesupi sehuouña:
“Mësaru coa tayo huesëjë cayë, Maija'quë tuturepa cui'ne Maija'quë toya pëpë ñama' do'ire. 25Ju̱'isicohua'ipi huëisicohua'i cato huejaye peoji. Mamajëre i̱siye peoji. Ma'tëmo hui̱ñaohua'ije̱ pa'iohua'i pa'ija̱'cohua'i a'ë. 26¿Ju̱'isicohua'i huëiye ayere, toyase'e mësaru ñama'cohua'i a'ni, Moisés toyase'e ja̱ropi caji, Maija'quë a'ri so̱quë yëpi toaje̱ pa'io tsë̱'isicopi case'ere? ‘Yë'ë cato Abraham Diusu a'ë, Isaac Diusu a'ë, cui'ne Jacobo Diusu a'ë.’ 27Diusu cato ju̱'isicohua'i Diusu peoji, huajëcohua'i Diusupi. Ja̱je pa'iquëta'are mësaru coa tayo huesëni yo'ojë cayë.”
Si'a Cua̱ñese'e Jerepa Pa'ye
(Mt 22.34-40)
28Sa̱'ñe yo'ojë cajëna, Jesupi si'aye tayoma'ë sehuoquëna, asasiquëpi cua̱ñese'e ye'yaquëpi ti̱tani se̱quëña:
“¿Jeco a'ni, du'ru macarepa huëo maca cua̱ñesico jerepa pa'io?”
29Caquëna, Jesupi caëña:
“Du'ru macarepa cua̱ñese'e si'aye jerepa pa'io cato caji: Israel pa̱i asajë̱'ë, mai Ëjaë Diusure. Ja̱ëse'e te'i pa'iji. 30Oijë̱'ë, Ëjaë Diusure si'a më'ë yëyepi, si'a më'ë joyopi, si'a më'ë cuasayepi cui'ne si'a më'ë tutupi. Ja̱je caji, cua̱ñese'e du'ru macarepa aye si'aye jerepa pa'ye. 31Cayaye acoje̱ ja̱re cui'ne pa'io. Ja̱opi caji ñeje: ‘Oijë̱'ë, më'ë quë̱no maca pa'iquëre më'ëja'a co'ye oiyeje̱ pa'ye.’ Yeque jerepa pa'ye peoji.”
32Ja̱je sehuouna, cua̱ñese'e ye'yaquëpi caëña:
“De'oyerepa cahuë, më'ë ye'yaquë. Peore paji, yequë Diusu. Te'i pa'iji, Diusu. Nuñerepa cahuë, më'ë. 33Ja̱je pa'ina, Maija'quëre si'a më yëye oiyepi si'aye më asaye oiyepi cui'ne si'a joyo oiyepi cui'ne si'a tutu oiyepi, cui'ne mai quë̱no maca pa'iquëre co'ye oiyeje̱ pa'yepi, ja̱ oiyepi jerepa pa'ye a'ë, Maija'quëre i̱siye, cui'ne ëojë se̱ñe jerepa.”
34Si'aye nuñerepa caquëna, Jesupi ñani caëña:
“Më'ëre Maija'quë cua̱ñe te̱'te so'ore pa'iye pa̱ji.”
Ja̱je caëna, asani yecohua'ije̱ i̱te se̱ni co̱ñe pa̱reña, si'aye asaquë api cajë.
Ne Mamaquë A'ni, Cristo
(Mt 22.41-46; Lc 20.41-44)
35Maija'quë huë'ena ye'yaquë Jesús caëña:
“¿Me yo'ojë cua̱ñese'e ye'yacohua'i Cristo cato David mamaquë api caye'ni? 36David ja̱re i̱pi capi. Maija'quë joyopi quëaquëna, ñeje capi:
Ëjaëpi capi, yë'ë Ëjaëre:
‘Yë'ë ëja te̱'tena ja'rujë̱'ë,
yë'ëpi më'ëre sa̱ñope yo'ocohua'ire më'ë quë̱o huë'ehuëna të'ya me macaja̱'a.’
37¿Ja̱je pa'ito me Cristo David mamaquë pa'iquë'ni, Davidpi Cristore yë'ë ëjaë hue'yoto?”
Ja̱je caquëna, jai pa̱i tsi'sisicohua'ipi ai yëjë asareña.
Jesupi Sa̱ñope Case'e Cua̱ñese'e Ye'yacohua'i
(Mt 23.1-36; Lc 11.37-54; 20.45-47)
38Jesupi caëña, i̱ ye'ya maca:
“De'hua ñajë'ë, cua̱ñese'e ye'yacohua'i yo'oye ye'yema'pë. Ja̱ohua'i cato tsoa ca̱ña su̱ñani cui'ne pa̱ipi de'oye pëpaja̱jë cajë yo'ocohua'i a'ë. 39Ja̱ohua'i cato de'o ñu'i saire pa̱i tsi'si hue̱'ñana co'eni ja'rucohua'i a'ë, cui'ne de'o hue̱'ñana a̱oje a̱icohua'i a'ë. 40Hua'jeohua'i huë̱'ña jiojë yo'ocohua'i a'ë. Pa̱ipi de'ocohua'ire pa'ë caja̱jë cajë tsoaye Maija'quëre se̱ñë cajë yo'ocohua'i a'ë. Ja̱ohua'i a'ë, i̱ti jerepa si'se cua̱ñoja'cohua'i, ja̱je yo'osi do'ire.”
Peocopi I̱sise'e
(Lc 21.1-4)
41Jesús Maija'quë huë'ere paquëña, Maija'quëna curi i̱si mahuë je̱'ñere pare. Ja̱rote ñu'i ñaquëna, jaiye curi pacohua'i daijë i̱ti mahuëna ayareña. 42Ayajëna, ñaquë ñu'ina, hua'jeo maca curiquë peocopi dani caya cobre të̱'ñare ayaoña, jai do'i peoyere.
43Ja̱je ñani i̱ ye'yacohua'ire soini caëña:
“Nuñerepa cayë, mësarute. Ja̱o hua'jeo co'amaña peocopi si'aohua'i curi ayaye jerepa ayao do'i quë'yerepa. 44Yecohua'i cato i̱ohua'i huero jujase'ere i̱siyë. Ja̱je pa'iquëta'are ico cato peocopi si'a mañare i̱si sao.”
Pašlaik izvēlēts:
Marcos 12: sey
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2012, Wycliffe Bible Translators, Inc. All rights reserved.