Marcos 11
11
Jesús Jerusalén Cacase'e
(Mt 21.1-11; Lc 19.28-40; Jn 12.12-19)
1Jerusalén ja'ye macana ti̱'ani Olivos cu̱tihuë je̱'ñerepa daripë̱a Betfagé cui'ne Betania daripë̱are pa'i Jesupi cayaohua'ire i̱ ye'yacohua'ire jëjo saouña.
2Ñeje caquë:
“Je te̱'te a'ri daripëna sani ti̱'a maca mësaru ñaja'cohua'i a'ë, burro po̱sëre papi pa̱ireje̱ hue'ema'quëni, sëasiquëni. Nëina, joyeni dajë̱'ë. 3¿Yecohua'ipi me neñu'ju saye'ni? cacohua'i pa'ito cajë̱'ë: ‘Ëjaëpi cusi'i caquëna, sayë. Cuni tëjini je̱o daija̱'cohua'i a'ë,’ cajë̱'ë.”
4Caëna, sani burrore ti̱'areña, ma'are sëasiquëpi hue'sere nëina, caca sa'ro yë'quë macare. Ñani i̱te joyereña.
5Joyejëna, i̱ti maca pa'icohua'ipi careña:
“¿Me neja'quëni burrore saye'ni?”
6Cajëna, Jesús case'eje̱ careña. Cajëna, de'oji. Sajë̱'ë, careña. 7Carena, Jesús quë'rona burrore dareña. Dani i̱ohua'i ca̱ñapi burro jetena jajereña. 8Mëni ja'runa jai pa̱i i̱ohua'i ca̱ñapi, i̱ sai ma'ana jaje o̱ereña. Yecohua'ipi jaiye ja'o tëteni da o̱ereña, i̱ sai ma'ana.
9Du'ru saicohua'ipi cui'ne jeteyo'je saicohua'ipi sihuajë cuireña:
“De'oquërepa daiji, Maija'quë jëjo daoquë. 10I̱ cua̱ñe maca jerepa de'oye pasio. Mai ñecuë David maca cua̱ñe maca pa'ise'eje̱ Maija'quë ai de'oji.”
11Jerusalénna cacani Maija'quë huë'ena sani cacani si'a huë'e ñani na'i huesëquëna, Betania quë'rona i̱ doce ye'yacohua'i ja̱'re co̱ni saquëña.
Jesupi Higuera So̱quë Yëre Pu̱i Case'e
(Mt 21.18-19)
12Ñatasi mu'se Betaniapi saijëna, Jesure a̱i ëaëña. 13A̲i ëaquëna, so'opi se̱ñaquë, higuera so̱quë yëpi ja'o quë̱i ñëpi nëcaoña. Nëcacona, i̱ti ca̱ pa'ima'quë caquë saquëña. Sani ñaquëna, coa ja'ose'e paquëña, i̱ti quë̱ima'a tëcahuë sëte. 14Pa'ina, Jesús i̱ti ñëre caëña:
“Yureta'a pa̱i o̱cueye peosipi, më'ë quë̱ise'e.”
Ja̱je caquëna, i̱ ye'yacohua'ipi asareña.
Jesupi Maija'quë Huë'ena Tsoa To̱se'e
(Mt 21.12-17; Lc 19.45-48; Jn 2.13-22)
15Ja̱ jeteyo'je Jerusalén ti̱'ani, Jesús Maija'quë huë'ena cacani co'amaña huerojë cui'ne co'amaña i̱sicohua'ire eto saoña. Curiquë cambia mesaña jë'je ta̱ño sauña. Cui'ne su'tere i̱sicohua'i ñu'i sai jë'je ta̱ño sauña. 16Maija'quë huë'ena co'amañare saye ë̱seiña. 17Ë̲seni ye'yaquë caëña:
“Toya pëpë caji: ‘Yë'ë huë'e cato si'a pa̱i Maija'quëre se̱ huë'e hue'yoye pa'iji.’ Ja̱je pa'iquëta'are mësaru cato co'amaña ñacohua'i tu'aro neni yo'oyë.”
18Ja̱je caquëna, asani Maija'quë huë'e ñacaicohua'i ëjaohua'ipi cui'ne cua̱ñese'e ye'yacohua'ipi Jesure huani je̱oñere careña: ¿Me huani je̱oja'cohua'i a'ni? cajë. Yecohua'i cato airepa de'oye ye'yaquë'ni cuasareña. Ja̱ do'ire ëjaohua'ipi Jesure ca'rajë huani je̱oñere careña. 19Ñami de'oquëna, Jesús pa̱i daripëpi ti̱rona saquëña.
Higuera So̱quë Yë Cue̱nese'e
(Mt 21.20-22)
20Ñatasi mu'se nea hue̱'ña saijë ñajëna, higuera so̱quë yë tsoe sucua mañaque cue̱ne huesësicopi pa'iona, ñareña.
21Ñani ja̱ maca Pedro, Jesús case'ere cuasa ñajani caëña, i̱te:
“Ye'yaquë ñajë'ë, më'ë casi ñëre, tsoe cue̱ne huesësico pa'ico.”
22Caquëna, Jesupi i̱ ye'yacohua'ire caëña:
“Nequëre papi cuasajë̱'ë, Maija'quëre. 23Nuñerepa cayë, mësarute. Iye cu̱tihuëre tsiayana jëjo saoye yëni Maija'quëre nequë api cuasani se̱to neñe pa'iji. 24Nuñerepa cayë, Maija'quëre se̱ni i̱sija̱'quë api cuasato i̱siye pa'iji. 25Maija'quëre se̱ maca yequere sa̱ñope yo'oye pacohua'i pa'ini sa̱i de'huacaijë̱'ë, Maija'quë ma'tëmo aquëpi mësaru co'aye tayo yo'ose'e sa̱i de'huacaija̱'quëre. 26Ja̱je pa'iquëta'are mësarupi sa̱i de'huacaima'cohua'i pa'ito mësaru ja'quë ma'tëmo pa'iquëje̱ mësaru tayose'e sa̱i de'huacaiye pa̱sipi.”
Jesús Cua̱ñeñerepa Pa'iye
(Mt 21.23-27; Lc 20.1-8)
27Ja̱ maca Jerusalénna co'ireña. Co'ini Jesús Maija'quë huë'eja̱'a cu'ina, Maija'quë huë'e ñacaicohua'i ëjaohua'ipi cui'ne cua̱ñese'e ye'yacohua'ipi cui'ne aiohua'ipi Jesús quë'rona dani 28i̱te se̱teña:
“¿I̱que cua̱ñeñepi iye më'ë yo'oquë'ni? ¿Nepi më'ëre cua̱ñequë ëjaëre carena, yo'oquëni?”
29Cajëna, Jesupi caëña:
“Yë'ëje̱ mësarute se̱si'i te'ore. Mësarupi yë'ë se̱ñere sehuorena, yë'ëje̱ quëasi'i, yë'ëre cua̱ñequëre jëjo daoquëre. 30¿Nepi Juan i̱ti doquëre jëjo daore'ni, Maija'quë pa̱nita'a pa̱i? Mësarupi sehuojë̱'ë.”
31Ja̱je caëna, sa̱'ñe careña, ñeje:
“Maipi Diusu jëjo daosiquë pa'iji cato i̱pi sehuosipi ‘¿Ja̱je pa'iquëta'are mësaru me yo'ojë i̱te care paji cajë asaye pa̱re'ni?’ 32Cui'ne pa̱ipi cua̱ñesiquë pa'iji cayeje̱ pa̱ñu'u.”
Si'a pa̱i Juanre Maija'quë cocare quëaquë paji'i, cuasa do'ire ca'rajë.
33Ja̱je cani Jesure careña:
“Huesëyë.”
Cajëna, Jesupi caëña:
“Cui'ne yë'ëje̱, yë'ë cua̱ñe tutu quëaye pa̱ñë.”
Pašlaik izvēlēts:
Marcos 11: sey
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2012, Wycliffe Bible Translators, Inc. All rights reserved.