Mateo 20
20
Co'amaña Necohua'i Yo'oyeje̱ Pa'ye Quëase'e
1Ma'tëmo pa'i te̱'te cato jai tsio paquëpi nea hue̱'ñarepa co'amaña necaicohua'ire co'esi'i, cuiya'i tëaja̱'cohua'ire caquë saise'eje̱ pa'ye a'ë. 2Co'amaña necaicohua'ire ti̱'ani te'e mu'se yo'o do'ire te'e ëja ja'hua sa̱isi'i, capi. Ja̱je quëani ne de'huani jëjo saopi, i̱ tsio necaija̱'cohua'ire. 3Nea hue̱'ña nueve pa'i maca etani saji'i. Sai ñaquëna, nema'cohua'ipi jai pa̱i quë'rore coa paë'ë. 4Pa'ijëna, capi, ja̱ohua'ire: ‘Mësaruje̱ sani yë'ë tse̱ tëacaijë̱'ë, sa̱isi'i, i̱ti sa̱iñe pa'iyeje̱’ caëna. Ja̱ maca saë'ë, tëaja̱'cohua'ipi. 5Mu'se jopo pa'i maca tsio aquë etani saji'i. Saisiquëpi tres pa'i maca sani co̱pi, ja̱re cui'ne pa̱ire co'equë. 6Saisiquëpi cui'ne neato cinco pa'i maca, sani co̱pi. Sani ti̱'api, pa̱i coa pa'i hue̱'ñare yo'oma'pë coa nëcacohua'ire. Ñani capi: ‘¿I̱quere yo'ojë si'a mu'se coa pa'iye'ni?’ 7Caquëna, i̱ohua'ipi cahuë, i̱te: ‘Yëquëre yecohua'ije̱ co'amaña nejë'ë cajë cua̱ñese'e peocohua'i a'ë.’ Cajëna, i̱ohua'ire capi: ‘Ja̱je pa'ito sani mësaruje̱ yë'ë co'amañare necaijë̱'ë.’ 8Ñami de'osi maca i̱ti tsio aquëpi co'amaña necaicohua'ire ñacaiquëre soini capi: ‘Co'amaña nesi do'ire sa̱ijë'ë. Jeteyo'je cacasicohua'ini sa̱ijë'ë du'ru sa̱ini jeteyo'je du'ru cacasicohua'ire sa̱ijë'ë.’ 9Caëna, co'amaña nesicohua'ire soiquëna, neato cinco pa'i maca cacasicohua'ipi daë'ë. Datena, te'e mu'se yo'osi do'i ja'ye sa̱ipi. 10Ja̱ jeteyo'je du'ru cacasicohua'ire soiquëna, cuasahuë, jerepa curiquë neja'cohua'i a'ë, cajë. Ja̱je cuasasicohua'ita'are pa̱i ñapere te'e mu'se yo'ose'e ja'ye sa̱ipi. 11Ja̱je sa̱i cua̱ñoni sa̱ñope ca huëohuë, i̱ti co'amaña paquëni, 12ñeje cajë: ‘Icohua'i jeteyo'je cacasicohua'i cato coa te'e hora nehuë. Ja̱je nesicohua'ita'are yëquë si'a mu'se co'amaña nejë, ë̱së uquëna, quëcojë nesicohua'ire sa̱iñe ja'ye sa̱ihuë, më'ë.’ 13Ja̱je cajëna, i̱ti tsio aquëpi sehuopi, ja̱ohua'i aquëre ñeje: ‘Cajei, co'aye yo'oma'ë pa'iyë, më'ëre. ¿Më'ëje pa̱ipi te'e mu'se ne do'ire, sa̱ijë'ë caquë yë'ë ja̱'re co̱ni, ne de'huasiquëta'a? 14Ja̱je pa'ito iye më'ë ne do'i i̱ni saijë̱'ë. Yë'ëpi yëë më'ëre i̱siye ja'ye iquëreje̱ i̱siyë, jeteyo'je cacasiquëreje̱. 15¿Më'ëpi cuasani yë'ë curiquëre, yë'ë yëyeje̱ pa'ye yo'oye peoji, cuasaquë? ¿Pa̱nita'a coa jaiye pasi'i cuasaquëna, pë̱ti ëaye më'ëre nëiquë yë'ëpi pa̱ire oiquëpi yo'oquëna?’ 16Ja̱je pa'ina, jeteyo'je pa'isicohua'ipi du'ru acohua'i pa'ija̱'cohua'i a'ë. Cui'ne du'ru acohua'ipi jeteyo'je pa'ija̱'cohua'i a'ë. Ja̱je pa'ina, jai pa̱i soisicohua'i pa'iyë. Pa'ijëta'are, sahuani jo'ya nesicohua'ipi a'ri ja'i pa̱i pa'iyë.”
Jesús I̱ Ju̱'i Ja̱'ñere Quëaye
(Mr 10.32-34; Lc 18.31-34)
17Jesús Jerusalén ma'are pa'i i̱ doce ye'yacohua'ire i̱ohua'ise'ere ti̱ro sani capi:
18“Mësarupi ñañë, mai Jerusalénna mëi huëoye, Pa̱i Mamaquëre Maija'quë huë'e ñacaicohua'i ëjaohua'ina cui'ne cua̱ñese'e ye'yacohua'ina i̱sija̱'tona, i̱sisi maca ja̱ohua'ipi huani je̱oja'quë api cajë, 19ti̱ pa̱ina i̱sija̱'cohua'i a'ë. I̱sirena, ja̱ohua'ipi i̱te cue'cuejë të'cajë yo'oni, so̱quë sarahuana que̱jajë cajë. Ja̱je yo'osicohua'ita'are toaso̱ mu'seña pa'i maca huëija̱'quë api.”
Jacobo Cui'ne Juan Pëca Ja'co Se̱se'e
(Mr 10.35-45)
20Jesús quë'rona Jacobo cui'ne Juan pëca ja'copi Zebedeo mamajë ja̱'re co̱ni do're ja'ruo, Jesús ña hue̱'ñana necai ja̱'ñere se̱si'i caco. 21Ja̱ maca i̱pi se̱ji'i, i̱ote:
“¿I̱quere yëco'ni, më'ë?”
Caquëna, sehuo, ñeje: “Yë'ë caya mamajëre më'ë pa'i te̱'tena ëjaohua'ire neni më'ë ëja te̱'tena yequëre cui'ne ari te̱'tena ñocaijë̱'ë.”
22Cacona, Jesupi sehuopi:
“Cuasaye peoye huesërepa se̱ñë, mësaru. ¿Mësaru de'hue tëto sani ti̱'añe, yë'ë së̱je co̱no tëto sai ja̱'ñeje pa'ye, cui'ne do cua̱ño ti̱'añe yë'ë do cua̱ño ja̱'ñeje pa'ye?”
Ja̱ohua'ipi cahuë:
“Ti̱'añë.”
23Cajëna, i̱pi capi, ja̱ohua'ire:
“Nuñerepa cayë, ja̱je pa'ijë̱'ë. Mësaru tëto saija̱'cohua'i a'ë, iye së̱je co̱noja'a. Cui'ne yë'ë do cua̱ñose'eje̱ do cua̱ñoja'cohua'i a'ë. Ja̱je pa'iquëta'are ëja te̱'te cui'ne ari te̱'tena ja'ruye cato yë'ëpi i̱siye peoji. Yë'ë ja'quëpi i̱ ne de'huacaisicohua'ina i̱sija̱'quë api.”
24Ja̱je caquëna, diez i̱ ye'yacohua'ipi iyere asani sa̱ñope pë̱ti huëohuë, caya hua'ire. 25Ja̱je sa̱ñope yo'oye pa'ina, Jesupi soini capi, ja̱ohua'ire:
“Mësaru, tsoe ta̱'ñe asayë. Iye yeja pa̱i ëjaohua'i cato si'a co'amaña meñe payë, cui'ne i̱ohua'i huë'ehuë maca acohua'ipi mëñe ëjaohua'ire payë, i̱ohua'ire. 26Ja̱je pa'ye peosipi, mësarute cato. Ai jerepa pa'i pasi'i caquëpi yecohua'ire necaiquë pa'iye pa'iji. 27Cui'ne mësaru aquëpi du'ru aquë pasi'i caquë pani yecohua'ini necaiquëpi jo'yaë pa'iye pa'iji. 28Pa̱i Mamaquëje̱ pa'iohua'i pa'iye pa'iji. Ja̱ë je̱'quë daima'ë paji'i, yecohua'ipi necaija̱jë caquë. Coa ai jerepa necasi'i caquë daji'i, i̱ pa'iye do'ipi jai pa̱i de'oye pa'i ja̱'ñe necasi'i caquë.”
Jesupi Cayaohua'ire Ñama'cohua'ire Jujuse'e
(Mr 10.46-52; Lc 18.35-43)
29Jericó daripëpi etani saijëna, jai pa̱i Jesure tuë'ë. 30Saijëna, ja̱rote cayaohua'i ñama'cohua'ipi paë'ë, ma'a yë'quë macare. Pa'icohua'ipi Jesupi tëtosaiji asani cuihuë:
“Ëjaë, David Mamaquë, yëquë mañare teaye ñani co̱caijë̱'ë.”
31Cajëna, pa̱ipi cuima'pë pa'ijë, cahuë. Ja̱je catoje̱ ai jerepa cuihuë:
“Ëjaë, David Mamaquë yëquë mañare teaye ñani co̱caijë̱'ë.”
32Ja̱ maca Jesús nëcaja̱ni ñama'cohua'ire soini se̱ji'i, ja̱ohua'ire:
“¿I̱quere necaija̱quë cajë yëye'ni, yë'ëre?”
33Caquëna, ja̱ohua'ipi sehuohuë:
“Ëjaë, yëquë ñañere yëyë.”
34Cajëna, Jesupi teaye pa'iohua'ire ñani oi patopi, ñaco ca̱na. Ja̱je patoquëna, i̱ti macapi tsoe ñacohua'i paë'ë. Pa'ijë Jesure tuë'ë.
Pašlaik izvēlēts:
Mateo 20: sey
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2012, Wycliffe Bible Translators, Inc. All rights reserved.