LUKA 18
18
Xifaniso xa muavanyisi lowo biha.
1Naswona, Yesu a va byela xifaniso ku kombisa leswaku vanhu va fanele ku khongela hi mikarhi hinkwayo, va nga tshuki va karhala.
2A ku: “Emutini wun'wana a ku ri ni muavanyisi loyi ngi a nga chavi Xikwembu, ni vanhu a a nga vuri nchumu ha vona. 3Kambe a ku ri ni wansati wa noni emutini wolowo la nga ta eka yena, a ku: ‘Ndzi avanyisela eka la ndzi tengisaka.’ 4Kambe a ala hi masiku. Kambe ndzhaku a tianakanya, a ku: ‘Hambi ndzi nga chavi Xikwembu, ndzi nga vuri nchumu ha munhu; 5hambiswiritano, leswi noni leyi yi ndzi karhataka, ndzi ta n'wi avanyisela, a nga ha tshuki a tshama a ndzi pandzisa nhloko.’ ” 6Kutani hosi yi ku: “Yingisani lexi vuriwaka hi muavanyisi la nga lulamangiki. 7Loko xi ri Xikwembu, xana xi nga ka xi nga avanyiseri vahlawuriwa va xona, lava vitanaka eka xona nhlekanhi ni vusiku, hambi xi hlwela ku va rihisela xana? 8Ndzi ri eka n'wina, xi ta hatlisa xi va rihisela. Kambe, kutakuloko N'wana wa Munhu a ta, xana mi ehleketa leswaku u ta kuma ku pfumela ku ri kona emisaveni xana?”
Xifaniso xa mufarisi ni muluvisi.
9A engeta a byela xifaniso lexi eka van'wana lava titshembaka leswaku va lulamile, kambe va sandza van'wana, a ku: 10“Vanhu vambirhi va tlhandlukele etempeleni ku ya khongela. Un'wana a a ri Mufarisi, un'wana muluvisi. 11Mufarisi a a yimile hitlhelo rin'wana a khongerisa sweswo, a ku: ‘Xikwembu, ndza ku khensa hikuva a ndzi fani na vanhu van'wana, va nga makhamba ni swidyohi ni vaoswi, ku kota munhu loyi wa muluvisi. 12Ndzi titsona swakudya kambirhi hi vhiki rin'wana ni rin'wana, ndzi humesa ku avanyisa ka khume ka swilo hinkwaswo leswi ndzi swi fuweke.’ 13Kambe muluvisi a a yime ekule, a chava ni ku tlakusela mahlo ya yena etilweni; kambe a tiba xifuva, a ku: ‘Xikwembu, ndzi twele vusiwana, mina ndzi nga mudyohi.’ 14Ndzi ri eka n'wina: Yeloyi, u ngirimele endlwini ya yena, a hlayiwile la lulameke ku tlula mufarisi; hikuva un'wana ni un'wana la titlakusaka u ta tsongahatiwa, kambe la titsongahataka, u ta tlakusiwa.”
Ta Yesu loko a katekise vana.
15Kutani va n'wi tisela vana lavatsongo leswaku a va khumba; kambe vadyondzisiwa va yena, loko va swi vona, va va tshinya. 16Kambe Yesu a va vita, a ku: “Tshikani vana va ta eka mina, mi nga tshuki mi va sivela, hikuva ku fuma ka Xikwembu ku va eka lava fanaka na vona. 17Kunene ndzi ri eka n'wina, la nga amukeriki ku fuma ka Xikwembu kukotisa n'wana, a nga ka a nga ngheni kona.”
Ta jaha leri fuweke.
18Kutani hosana yin'wana yi n'wi vutisa, yi ku: “Mufundhisi lonene, ndzi ta endla yini ku va ni ndzhaka ya vutomi lebyi nga heriki?” 19Yesu a ku eka yena: “U ndzi vulela yini lonene? A ku na lonene loko a nga ri un'we ntsena, xi nga Xikwembu. 20 U tiva milawu leyi nge: ‘U nga tshuki u oswa; u nga dlayi, u nga yivi; u nga hembeli munhu, chava tata wa wena ni mana wa wena.’ ” 21Yena a ku: “Ndzi hlayisile leswo hinkwaswo, ndza ha ri ntsongo.” 22Kuteloko Yesu a twa sweswo, a ku eka yena: “Wa ha pfumala xilo xin'we: Xavisa hinkwaswo leswi u nga na swona, u avela swisiwana, hi kona u nga ta va ni xuma etilweni; kutani u ta, u ndzi landzela.” 23Kambe yena, loko a twa timhaka teto, a khomiwa hi tingana ngopfu, hikuva a a ri munhu wa rifuwo lerikulu. 24Kuteloko Yesu a vonile leswaku a ni tingana, a ku: “Swa nonon'hwa eka lava nga ni rifuwo ku nghena eku fumeni ka Xikwembu. 25Swi nga olova leswaku kamela yi nghena hi xuva ra neleta, ku tlula loko mufuwi a nghena eku fumeni ka Xikwembu.” 26Lava swi twaka va ku: “Ku nga hlayiseka mani xana?” 27Kutani a ku: “Leswi hlulaka vanhu, a swi hluri Xikwembu.”
28Kavaloko Petro a ku: “Waswivo, hi tshikile hinkwaswo, hi ku landzela.” 29Kutani a ku eka vona: “Kunene, ndzi ri eka n'wina: A ku na munhu la tshikeke yindlu, ni loko a ri nsati, hambi vamakwavo, kumbe vaveleki va yena, kumbe vana, hikwalaho ka ku fuma ka Xikwembu, 30la nga taka a nga kumi ku tlurisa leswi emikarhini leyi, kutani emikarhini leyi taka u ta nyikiwa vutomi lebyi nga heriki.”
Ta Yesu loko a bvumbha rifu ra yena.
31Kutani a famba hitlhelo ni lava khume na vambirhi a va byela a ku: “Vonani, hi tlhandlukela eYerusalema, kutani hinkwaswo leswi tsariweke hi vaprofeta ehenhla ka N'wana wa Munhu swi ta hetiseka. 32Hikuva u ta nyiketiwa vamatiko, va ta n'wi tseketsela, va n'wi sandza, va n'wi tshwutela hi marhi; 33kutani, kutakuloko va n'wi bile hi mikhavi, va ta n'wi dlaya; kambe u ta pfuka hi siku ra vunharhu.” 34Kambe, loko va ri vona, a va twisisanga nchumu etimhakeni teto; rito leri, a ri fihliwile eka vona, kutani a va ringanisanga leswi a swi vulaka.
Ta ku hanyanyisiwa ka lowo fa mahlo wa Yeriko.
35Kakuloko a tshinelele eYeriko, munhu lowo fa mahlo a a tshamile endleleni a kombela. 36Kuteloko a twa vunyingi byi hundza, a vutisa, a ku: “I yini?” 37Va n'wi byela, va ku: “Yesu wa Nazareta la hundzaka.” 38Kutani a huwelela, a ku: “Yesu, n'wana Davhida, ndzi twele vusiwana!” 39Kutani lava rhangeke emahlweni va n'wi tshinya, va ku a miyela; kambe a engeta a huwelela hi matimba, a ku: “N'wana Davhida, ndzi twele vusiwana!” 40Kutani Yesu a yima, a ku va n'wi tisa eka yena; kuteloko a ri ekusuhi, a n'wi vutisa, a ku: 41“U rhandza leswaku ndzi ku endlela yini xana?” A hlamula, a ku: “Hosi, ndzi ri, ndzi hanyanya.” 42Yesu a ku eka yena: “Hanyanya; ku pfumela ka wena ku ku hanyisile.” 43Kutani a vona kan'wekan'we; a n'wi landza, a ri karhi a dzunisa Xikwembu. Na vona vanhu hinkwavo lava nga swi vona, va dzunisa Xikwembu.
Pašlaik izvēlēts:
LUKA 18: TSO29
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.