YOHANE 7
7
Ta ku ala ka vamakwavo va Yesu ku pfumela eka yena.
1Endzhaku ka sweswo, Yesu a fambafamba eGaleliya, a nga rhandzi ku tshama eYudiya, hikuva Vayuda a va lava ku n'wi dlaya.
2Kambe nkhuvo wa Vayuda wa Mitsonga a wu ri ekusuhi; 3kutani vamakwavo va ku eka yena: “Suka la, u ya eYudiya, vadyondzisiwa va wena na vona va ta vona mitirho leyi u yi endlaka. 4Hikuva a ku na munhu la endlaka nchumu exihundleni loko a rhandza ku tiviwa; loko u endlisa sweswo, tikombise eka misava.” 5Hikuva na vona vamakwavo a va nga pfumeri eka yena. 6Hilaha Yesu a nga ku eka vona: “Nkarhi wa mina a wu si fika; kambe nkarhi wa n'wina wu kona hi masiku. 7Misava yi nga ka yi nga mi vengi, kambe mina ya ndzi venga hikuva ndzi vula vumbhoni leswaku mitirho ya yona yi bihile. 8N'wina tlhandlukelani enkhubyeni wolowo, mina a ndzi tlhandlukeri enkhubyeni wolowo, hikuva nkarhi wa mina a wu si hetiseka.” 9Kuteloko a va byerile timhaka teto, a titshamela eGaleliya.
Ta Yesu loko a dyondzisa etempeleni, enkhubyeni wa Mitsonga.
10Kambe vamakwavo loko va tlhandlukile, na yena a tlhandlukela enkhubyeni, ku nga ri eku vonakaleni, kambe a famba exihundleni. 11Kutani Vayuda a va n'wi lava enkhubyeni, va ku: “Loyi, u kwihi?” 12Kutani ku hambana a ku ri lokukulu ehenhla ka yena exikarhi ka ntshungu. Van'wana va ku: “I munhu lonene”; van'wana va ku: “E-e, kambe u xisa vanhu.” 13Hambiswiritano, a ku vanga na munhu la n'wi vulaka erivaleni hikwalaho ka ku chava Vayuda.
14Loko ku ri exikarhi ka nkhuvo, Yesu a tlhandlukela etempeleni, a ya dyondzisa kona. 15Kutani Vayuda va hlamala, va ku: “Xana loyi u tiva ha yini Matsalwa, kasi a nga dyondzanga?” 16Yesu a va hlamula, a ku: “Dyondzo ya mina, a hi ya mina, kambe i ya la ndzi rhumeke. 17Kungakuloko munhu a rhandza ku endla ku rhandza ka Xikwembu, u ta tiva dyondzo ya mina leswaku xana yi huma eka Xikwembu, kumbexana ndzi vulavula ndzi tisungulela swa mina. 18La tisungulelaka swa yena u tilavela ku dzunisiwa, kambe la lavaka ku dzunisiwa eka la n'wi rhumeke, hi yena loyi a nga wa ntiyiso, kutani ku homboloka a ku kona eka yena. 19Xana Muxe a nga mi nyikanga nawu xana? Hambiswiritano, a ku na un'we xikarhi ka n'wina la hlayisaka nawu. Mi lavela yini ku ndzi dlaya?” 20Vunyingi byi n'wi hlamula, byi ku: “U ni demona, i mani la lavaka ku ku dlaya?” 21Yesu a va hlamula, a ku: “Ndzi endlile ntirho wu ri wun'we, kutani mi hlamele hinkwenu ha wona. 22Muxe u mi nyikile ku yimba (a hileswaku ku hume eka Muxe, kambe ku humile eka vakokwana va khale), kutani mi yimbisa munhu hi Savata! 23Xana leswi munhu a yimbisiwaka hi Savata, leswaku nawu wa Muxe wu nga tluriwi, mi ndzi karihelela yini loko ndzi hanyisile munhu miri wa yena hinkwawo hi Savata? 24Mi nga avanyisi hi nghohe ntsena, avanyisani hi ku avanyisa loku lulameke.”
25Kutani vaaki van'wana va Yerusalema va ku: “Xana a hi yena loyi va n'wi lavaka ku n'wi dlaya xana? 26Kasi vonani, a vulavula erivaleni, a va n'wi hlamuri; xana kumbe tihosi ti n'wi tivile kunene leswaku i Kriste hi xiviri xana? 27Kambe loyi, ha n'wi tiva laha a humaka kona, kasi Kriste, siku a taka, a ku na munhu la nga ta tiva laha a humaka kona.” 28Kutani Yesu a tlakusa rito etempeleni, a dyondzisa, a ku: “Ma ndzi tiva, mi tiva ni laha ndzi humaka kona; a ndzi tanga ha mina, kambe la ndzi rhumeke wa tshembeka, kutani a mi n'wi tivi. 29Mina ndza n'wi tiva, hikuva ndzi huma eka yena, ndzi rhumiwile hi yena.” 30Kutani va lava ku n'wi khoma; kambe a ku vanga na munhu la tlakuseke voko ehenhla ka yena, hikuva nkarhi wa yena a wu nga si ta. 31Kambe lavo tala exikarhi ka vunyingi va pfumela eka yena, va ku: “Kutakuloko Kriste a ta, xana u ta endla masingita lama tlulaka lama endliwaka hi loyi xana?” 32Vafarisi va twa hilaha vunyingi byi vulaka timhaka ta yena hi ku n'unun'uta, kutani vaprista lavakulu ni Vafarisi va rhuma malandza ku ya n'wi khoma.
33Kutani Yesu a ku eka vona: “Ndza ha ri na n'wina nkarhinyana, kutani ndzi ya eka la ndzi rhumeke. 34Mi ta ndzi lava, kambe mi nga ka mi nga ndzi voni; ni laha ndzi nga kona, mi nga ka mi nga ti.” 35Hilaha Vayuda va vutisanaka, va ku: “U ta ya kwihi loyi, laha hi nga ta tsandzeka ku n'wi kuma; xana u ta ya eka lava hangalakeke exikarhi ka Vagriki, a dyondzisa Vagriki xana? 36Mhaka leyi a yi vulaka yi ri yini, loko a ku: ‘Mi ta ndzi lava, kambe mi nga ka mi nga ndzi voni, ni laha ndzi yaka kona, mi nga ka mi nga ti’?”
Ta siku ra ku hetela ka nkhuvo.
37Hi siku ra ku hetelela ka nkhuvo, ri nga lerikulu, Yesu a a yimile, kutani a huwelela, a ku: “Kungakuloko munhu a ri ni torha, a a te eka mina, a nwa. 38 La pfumelaka eka mina, ‘milambu ya mati lama khulukaka yi ta pfelela exifuveni xa yena,’ hilaha Matsalwa ma vuleke hakona.” 39Hi rito lero, a a ringanisa Moya lowu lava pfumelaka eka yena va nga ta wu nyikiwa; hikuva Moya a wu nga si va kona, hikuva Yesu a a nga si dzunisiwa.
40Lavo tala exikarhi ka vanhu lava hlengeletaneke, kuteloko va yingisile rito rero, va ku: “Hakunene, loyi i muprofeta.” 41Van'wana va ku: “Loyi i Kriste.” Kambe van'wana va ku: “Kambe xana Kriste a nga huma eGaleliya-ke? 42Xana Matsalwa a ma vuri leswaku Kriste u ta huma erixakeni ra Davhida emutini wa Betlehema, laha Davhida a humeke kona-ke?” 43Kutani mitshungu yi hambana hikwalaho ka yena. 44Kavaloko van'wana va vona va rhandza ku n'wi khoma, kambe a ku vanga na munhu la yisaka mavoko ehenhla ka yena. 45Kavaloko malandza ma tlhelela eka vaprista lavakulu ni ka Vafarisi, kutani vona va ma vutisa, va ku: “A mi n'wi tisanga ha yini-ke?” 46Malandza ma hlamula, ma ku: “A hi si vona munhu la vulavulaka kukotisa munhu loyi, ni siku ni rin'we.” 47Kutani Vafarisi va hlamula, va ku: “Xana na n'wina mi dyeleriwile? 48I mani eka lavakulu ni ka Vafarisi la pfumeleke eka yena xana? 49Kambe vunyingi byebyo, lebyi nga tiviki nawu, ingi byi rhukaniwa!”
50Un'wana wa vona, Nikodema, la tshamaka a ta eka Yesu nivusiku, a ku eka vona: 51“Xana nawu wa hina wu nga avanyisa munhu loko a nga si yingisiwa, ku nga si tiviwa leswi a swi endleke xana?” 52Va hlamula, va ku eka yena: “Xana na wena u Mugaleliya-ke? Xiyaxiya, u ta vona leswaku a ku na muprofeta la humaka eGaleliya.” 53Kutani va tifambela, un'wana ni un'wana endlwini ya yena.
Pašlaik izvēlēts:
YOHANE 7: TSO29
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.