YOHANE 1
1
Ta rito leri endliweke nyama.
1Eku sunguleni Rito a ri ri kona, Rito a ri ri ni Xikwembu, kutani Rito a xi ri Xikwembu. 2Rito lero a ri ri eka Xikwembu eku sunguleni. 3Swilo hinkwaswo swi endliwile hi rona, kutani exikarhi ka swilo leswi endliweke, a ku na xilo lexi endliweke handle ka rona. 4Vutomi a byi ri eka rona, kutani vutomi a byi ri ku vonakala ka vanhu. 5Ku vonakala ku voninga munyama, kambe Munyama a wu ku amukelanga.
6Ku humelele munhu la rhumiweke hi Xikwembu, vito ra yena a a ri Yohane. 7A a tile ku va mbhoni, leswaku a vula timhaka ta ku vonakala leswaku hinkwavo va pfumela ha yena. 8A a nga ri yena ku vonakala, kambe a a rhumiwile leswaku a ta va mbhoni ya ku vonakala.
9A ku ri kona ku vonakala lokunene loku voningaka munhu un'wana ni un'wana la tumbulukaka la emisaveni.
10Rito a ri ri emisaveni, kutani misava yi endliwile hi rona, kambe misava a yi ri tivanga. 11Ri tile ekaya ka rona, kambe varikwavo a va ri amukelanga. 12Kambe hinkwavo lava nga ri amukela, ri va nyikile matimba ya ku endliwa vana va Xikwembu, va nga lava pfumelaka hi vito ra rona; 13lava nga velekiwangiki hi ngati, ni loko ku ri hi ku rhandza ka nyama, kumbe hi ku rhandza ka munhu, kambe va velekiwile hi Xikwembu.
14Kutani Rito ri endliwile nyama, ri akile exikarhi ka hina, kambe hi hlalele ku vangama ka rona, ku nga ku vangama ka N'wana la nga swakwe, la humaka eka Tatana, a tele tintswalo ni vunene.
15Yohane a n'wi vula vumbhoni, a huwelela, a ku: “Hi yena loyi ndzi nga n'wi vula loko ndzi te: ‘La taka endzhaku ka mina, u ndzi rhangele, hikuva a a ri emahlweni ka mina.’ ” 16Kutani hi amukele hinkwerhu tintswalo ehenhla ka tintswalo, ti huma eku taleriweni ka yena. 17Hikuva nawu wu nyikiwile hi Muxe; kambe tintswalo ni vunene swi humelele hi Yesu Kriste. 18Xikwembu a xi voniwanga hi munhu ni siku ni rin'we; N'wana la nga swakwe, la nga exifuveni xa Tatana, hi yena loyi a nga hi tivisa xona.
Ta vumbhoni bya Yohane Mukhuvuri.
19Hi byo lebyi vumbhoni bya Yohane, siku Vayuda va rhumeke vaprista ni Valevhi, va huma eYerusalema, va ya n'wi vutisa, va ku: “Wena, u mani xana?” 20A vula erivaleni, a nga kanetanga, a tivula, a ku: “A hi mina Kriste.” 21Kutani va n'wi vutisa, va ku: “U mani-ke? U Eliya xana?” A ku: “A ndzi yena.” “Kumbe u muprofeta xana?” A hlamula, a ku: “E-e.” 22Kutani va ku eka yena: “U mani xana, hi ta tiva ku hlamula lava hi rhumeke? U ri yini loko u tivula?” 23 A ku: “Mina ndzi rito ra la huwelelaka emananga, leri nge: Lunghisani ndlela ya Hosi hilaha muprofeta Esaya a nga vula hakona.” 24Lava ngi va rhumiwile a va ri Vafarisi. 25Va tlhela va n'wi vutisa, va ku: “Loko u nga ri Kriste, u nga ri Eliya, u nga ri muprofeta, u khuvulela yini-ke?” Yohane a va hlamula, a ku: 26“Loko ndzi ri mina ndzi khuvula hi mati, kambe un'wana u kona exikarhi ka n'wina, loyi mi nga n'wi tiviki; 27hi yena la taka endzhaku ka mina, loyi a ndzi rhangeleke, loyi ndzi nga faneriki ku tshunxa tinghole ta tintanghu ta yena.”
28Timhaka teto ti humelele eBetaniya entsungeni wa Yordani laha Yohane a nga khuvula kona.
29Siku leri tlhandlamaka, Yohane loko a vona Yesu a ta eka yena, a ku: “Vonani Xinyimpfana xa Xikwembu, lexi susaka xidyoho xa misava. 30Hi yena loyi ndzi n'wi vuleke, ndzi ku: ‘Endzhaku ka mina ku ta wanuna la ndzi rhangeleke, hikuva a a ri kona emahlweni ka mina.’ 31Na mina a ndzi nga n'wi tivi, kambe ndzi tile ku khuvula hi mati leswaku a ta kombisiwa Israele.”
32Yohane a engeta a vula vumbhoni bya yena, a ku: “Ndzi vonile Moya wu xika hi le tilweni, wu fana ni tuva, wu ta tshamisa ehenhla ka yena. 33Na mina a ndzi nga n'wi tivi, kambe la ndzi rhumeke ku khuvula hi mati u ndzi byerile, a ku: ‘Loyi u nga ta vona Moya wu xikela eka yena, wu tshamisa ehenhla ka yena, hi yena la khuvulaka hi Moya lowo Kwetsima.’ 34Kutani ndzi swi vonile, kambe ndzi vurile vumbhoni bya mina leswaku loyi i N'wana wa Xikwembu.”
Ta vadyondzisiwa lavo rhanga.
35Siku leri tlhandlamaka, Yohane a a yimile kambe ni vadyondzisiwa va yena vambirhi. 36Kakuloko a vona Yesu a hundza, a ku: “Vonani Xinyimpfana xa Xikwembu.” 37Vadyondzisiwa volavo vambirhi, loko va n'wi twa a vula sweswo, va landza Yesu. 38Yesu, kuteloko a rhendzelekile, a va vona va n'wi landza, a ku eka vona: “Mi lava yini?” Va ku eka yena: 39“Rabi” (hileswaku Mufundhisi) “u tshama kwihi?” A ku eka vona: “Tanani, mi ta vona.” Va ku ya, va ya vona laha a tshamaka kona; kutani va xwa siku rero na yena; a ku lava ku va nkarhi wa khume.
40Andriya, makwa Simoni Petro, a a ri un'wana wa lavambirhi lava tweke Yohane loko a vurisa sweswo, kutani va landza Yesu. 41Yena a rhanga a kuma Simoni makwavo, a ku eka yena: “Hi kumile Mesiya” (hileswaku Kriste muhlawuriwa). 42Kutani a n'wi yisa eka Yesu. Yesu, kuteloko a n'wi langutile, a ku: “U Simoni n'wana Yona; u ta thyiwa Kefasi” (hileswaku Petro).
43Siku leri tlhandlamaka, a rhandza ku ya eGaleliya, kutani a kuma Filipi, a ku eka yena: “Ndzi landze.” 44Filipi a a ri munhu wa le Betsayida, muti wa va Andriya na Petro. 45Filipi a kuma Nataniele, a ku eka yena: “Hi vonile loyi Muxe a tsaleke timhaka ta yena enawini, ni vaprofeta va ti tsarile; i Yesu wa Nazareta, n'wana Yosefa.” 46Nataniele a ku eka yena: “Xana xilo lexinene xi nga huma eNazareta xana?” Filipi a ku eka yena: “Tana u ta swi vona.” 47Yesu a vona Nataniele loko a ta eka yena, kutani a n'wi vula, a ku: “Vonani Muisraele wa xiviri, loyi ku nga riki na ku kanganyisa eka yena.” 48Nataniele a ku eka yena: “U ndzi tiva ha yini?” Yesu a n'wi hlamula, a ku: “Filipi a nga si ku vita, ndzi ku vonile u ri ehansi ka nkuwa.” 49Nataniele a hlamula, a ku eka yena: “Rabi, u N'wana wa Xikwembu, u Hosi ya Israele.” 50Yesu a hlamula, a ku eka yena: “U pfumela hi leswi ndzi nga te eka wena: Ndzi ku vonile ehansi ka nkuwa; u ta vona leswikulu ku tlula leswi.” 51A engeta a ku eka yena: “Kunenenene ndzi ri eka n'wina: Ku sungula sweswi, mi ta vona tilo ri pfuriwile, ni tintsumi ta Xikwembu ti ri karhi ti tlhandluka, ti va ti xikela ehenhla ka N'wana wa munhu.”
Pašlaik izvēlēts:
YOHANE 1: TSO29
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.