ลูกา 13
13
กือนา บราเลฮ ฮาตี_ ตีงัน ลาฆู บือดูซา
1วะตู อีตู_ อาดา ซือมียา ซือตืองัฮ_ ดูโดะ โตะ อีตู_ จรือตา บรี กะ เยซู ดืองัยํ_ ปาซัน ซือมียา นังฆรี ฆาลิลี_ นู ปีลาด บือเลฮ ซูโรฮ บูนอฮ กูญา_ ตานา กูญา ตืองัฮ อาเมด โกะ บือนาตัก_ มาแรฮ บูนอฮ มือญือมัฮ กะ ตูฮัด. 2กะฆีเตอ เยซู_ ญา มือเลา ตีกัฮ กะ กูญา จะ_ “กาเญา บรีงัจ กะฮามี เลอ? ลูมอฮ ฆาลิลี อีตู เตอ_ กูญา ฌาดี ซือมียา บือดูซา บาญะ_ ลือเบฮ เดะ ลูมอฮ ฆาลิลี นู ซิกอาซิก ซือมูฮา เฆอ_ นู กูญา บือเลฮ กือนา ลาฆู ซูซัฮ โตระ กะฆีเตอ? 3เตด โบะ. ตาปี กู มือญาเระ กะ กาเญา จะ_ ดัฮ กาเญา ฮอย เตด บราเลฮ ฮาตี ปาเระ เตอ_ กาเญา ซือมูฮา นะ ฌาฮานัม_ กะฆีเตอ ฌูฆา เลอ. 4บรีงัจ ลีฮัจ ปูลัก_ ลาปัด บือลัซ อูรัก อีตู_ นู รูมัฮ บือปรัก นู ตีงี_ โซะ ซีโลอัม_ บือเลฮ รูโตฮ_ ตือกัด กูญา มาตี ดัฮ เตอ_ กาเญา บรีงัจ จะ_ กูญา ฌาดี ซือมียา บือดูซา_ ลือเบฮ เดะ ซือมียา ซือมูฮา_ นู ดูโดะ เดะ นังฆรี เยรูซาเลม เฆอ? 5เตด โบะ. ตาปี กู มือญาเระ กะ กาเญา จะ_ ดัฮ กาเญา ฮอย เตด บราเลฮ ฮาตี ปาเระ เตอ_ กาเญา ซือมูฮา นะ ฆาโดฮ ฌาฮานัม_ กะฆีเตอ ฌูฆา เลอ.” เยซู ญา จะ.
ลาฆู ปูโฮด กรายา บูดี นู ฮอย บูวัฮ
6เยซู มือเลา จรือตา_ อาฌัยํ กะฆีนี ปูลัก จะ_ “ซือมียา ซืออูรัก_ ญา อาดา ปูโฮด กรายา บูดี_ ซา ปูโฮด_ ตานัม ตาโรฮ เดะ กือโบด บูวัฮ อางุน นะ ญา. กะฆีเตอ_ ญา มาแรฮ มียา บูวัฮ เดะ ปูโฮด อีตู_ ตาปี ฮอย เตด ดาปัจ. 7กะฆีเตอ_ ญา อูจะ กะ ซือมียา บือกรือฌา ตูงู กือโบด ปูโฮด อางุน อีตู จะ_ ‘นี เลอ_ กู มาแรฮ มียา บูวัฮ_ เดะ ปูโฮด กรายา บูดี อีนี_ ตีฆา ตาโฮด ดัฮ_ ตาปี ฮอย เตด ดาปัจ. กือนา ตือบัก ปรูโตฮ บูวัก เลอ. บูวัจ นามา นะ บรี ตานัฮ ตาวัยํ เปาเปลา?’ 8ตาปี ซือมียา ตูงู กือโบด บูวัฮ อางุน_ ญา ตีกัฮ จะ_ ‘ตกเก เออ_ มีตา บรี ตาโรฮ ซา ตาโฮด ลาฆี เลอ_ บรี กะ กู จาโกน ตานัฮ_ อาเมด บาฌา บอฮ. 9ตาโฮด ฮือลด_ ดัฮ ญา นะ บือฌาดี บูวัฮ_ บาฌิ เลอ. ตาปี ดัฮ ญา ฮอย เตด บือบูวัฮ เตอ_ เกา กือนา ตือบัก ปรูโตฮ ญา บูวัก เลอ.’ ญา จะ.”
เยซู ปือบือลา นีบีนี บลากัก บูโกะ_ เดะ อารี บราดู
10อาดา อารี บราดู กรือฌา ซืออารี_ เยซู ตืองัฮ อาฌัยํ เดะ รูมัฮ บือมุน_ ซา ตือปัจ. 11นี เลอ_ อาดา นีบีนี ซืออูรัก_ นู อาดา ฮาตู มาโซะ_ บูวัจ บรี ฌาดี ปือญาเกะ_ ลาปัด บือลัซ ตาโฮด มาแรฮ ดัฮ. บลากัก นะ ญา บูโกะ_ นะ บือดีรี รือมัก_ เตด บือเลฮ เลอ. 12เยซู เตอ_ ตานา ลีฮัจ ดัฮ_ ญา บลาโลก นีบีนี อีตู_ มือเลา กะ ญา จะ_ “นีบีนี เออ_ ญาวา นะ เกา ลือฆา_ ลือปัซ เดะ ปือญาเกะ นะ เกา ดัฮ เลอ.” 13เยซู ญา ปือเตาะ ตางัน เดะ ญาวา นะ นีบีนี อีตู. ดัดดัด อีตู_ ญา บีกัซ บือดีรี รือมัก บือเลฮ_ ญา มือเลา มือโอจ_ ปูฌี กะ ปือนามา นะ ตูฮัด เดะ อาตัซ.
14ตาปี กือปาลา รูมัฮ บือมุน ญา ซาลัฮ ฮาตี_ กรานา จะ_ เยซู บือเลฮ ปือบือลา ซือมียา_ เดะ อารี บราดู ดัฮ. กะฆีเตอ_ ญา มือเลา กะ โกะ ซือมียา จะ_ “อาดา นัม อารี นู ฌาดี อารี ฆาโดฮ บือกรือฌา. เดะ ดาลับ นัม อารี อีตู เตอ_ กือนา มาแรฮ บรี ปือบือลา ญาวา. ตาปี เดะ อารี บราดู เตอ_ ฌางัน เลอ.”
15ตาปี ตูฮัด เยซู_ ญา ตีกัฮ กะ ซือมียา อีตู จะ_ “เออ กาเญา_ ซือมียา มูคา มาแนฮ_ ฮาตี ฌาฮัจ เลอ. กาเญา ราตา ซือมียา นะ อูฆัย ลือมู_ อูฆัย กูดา บาซา ดือมิ_ เดะ กานัก นะ ญา_ บาวา บือปี บรี มากัด อาเย_ เดะ อารี บราดู_ บูกัด เฆอ? 16ตาปี โซะ นีบีนี นู อีนี_ ญา ฌาดี บือแนฮ นะ อับราฮัม ญา เตอ_ กือปาลา ฮาตู ซีตัด บือเลฮ อีกัจ ตาโรฮ_ ลาปัด บือลัซ ตาโฮด ดัฮ. เตด บือฆูนา เฆอ_ นะ บรี ญา ลือปัซ เดะ โกะ ราตัย อีตู_ เดะ อารี บราดู เตอ?” 17นู เยซู ญา มือเลา กะฆีเตอ_ บูวัจ บรี ลูมอฮ ซือมียา นู ลาวัด ฌางัน ญา_ ปาคัจ จือและ. ตาปี โกะ ซือมียา นู บาญะ_ กูญา ซูกา ฮาตี ซูโงฮ_ ซาเบะ ลาฆู บือซรี ซูโงฮ_ นู เยซู บือเลฮ บูวัจ ดัฮ.
จรือตา อาฌัยํ ปาซัน บีฌี ตาโระ นู ดือมิ เดะ กาวัด
(มัดทัย 13.31-33; มาระโก 4.30-32)
18กะฆีเตอ_ เยซู ญา มือเลา จะ_ “ลาฆู นู ตูฮัด เดะ อาตัซ_ ญา นะ มาแรฮ ปือบือลา ฌาดี ราฌา เตอ_ นะ ฌาดี กะฮามี เลอ? กู นะ ปือซามา ลาฆู อีตู_ ซือรูปา บือกะ ลาฆู นามา บาฌิ? 19เออ_ ญา ซือรูปา กะฆีนี เลอ_ อาดา บีฌี ตาโระ มิดือมิ ซือบีฌี_ นู ซือมียา ซืออูรัก อาเมด ปี ตานัม เดะ กือโบด นะ ญา. กะฆีเตอ_ บีฌี อีตู_ ญา บือตูโมฮ ฌาดี ปูโฮด กายู. โกะ บูโรก เดะ อาตัซ_ ญา ตรือบัก มาแรฮ_ บูวัจ ซารัก เดะ โกะ ฌามัยํ_ ปูโฮด กายู อีตู เลอ.”
จรือตา อาฌัยํ ปาซัน ราฆี
(มัดทัย 13.33)
20เยซู ญา มือเลา ปูลัก จะ_ “กู นะ ปือซามา ลาฆู นู ตูฮัด นะ มาแรฮ ฌาดี ราฌา_ ซือรูปา บือกะ ลาฆู นามา? 21ญา ซือรูปา กะฆีนี เลอ_ อาดา นีบีนี ซืออูรัก_ นู อาเมด ราฆี ซือตืองัฮ_ จาโปยํ เดะ ตือโปก ตีฆา เตง. ญา กือโมก ญาแญะ_ บรี ตือโปก อีตู กือโมก ฮาบิฮ ดัฮ_ ซือมูฮา เลอ.” ญา จะ.
ปีตู นู ซือแปะ
(มัดทัย 7.13-14,21-23)
22ตานา เยซู ตืองัฮ บือฌาลัด ปี กะ นังฆรี เยรูซาเลม_ ญา ลาลู ปี บาญะ นังฆรี_ บาญะ ตูโปะ_ อาฌัยํ กูญา. 23อาดา ซือมียา ซืออูรัก_ ตาญา เยซู จะ_ “ตูฮัด เออ_ ซือมียา นู นะ ฮีโดะ ลือปัซ บาฌิ เตอ_ อาดา กิดีกิ เฆอ?”
เยซู ตีกัฮ กะ กูญา จะ_ 24“กาเญา กือนา ราเฌด มาโซะ ปี_ กะ ปีตู นู ซือแปะ_ ซาเบะ กู มือญาเระ กะ กาเญา จะ_ โกะ ซือมียา บาญะ นะ กือวาซา มาโซะ ปี_ ตาปี มาโซะ เตด บือเลฮ. 25ตานา ตูฮัด รูมัฮ ญา ซูดัฮ บีกัซ_ กาปุซ ปีตู ดัฮ_ กาเญา นะ อาดา บือดีรี โซะ ลูวัยํ_ กือเทาะ ปีตู_ มือเลา จะ ‘จา เออ_ มีตา บูกา ปีตู บรี กะ กามี เลอ.’ ตาปี_ ตูฮัด รูมัฮ นะ ตีกัฮ กะ กาเญา จะ_ ‘กู เตด ตาฮู จะ_ กาเญา ฌาดี ซือมียา ดาตัก ปัจ ดีฮา เลอ.’ 26กะฆีเตอ_ กาเญา นะ อูจะ จะ_ ‘กามี บือเลฮ มากัด_ บือเลฮ โอะ ฌางัน เกา. เกา บือเลฮ อาฌัยํ เดะ ตืองัฮ ฌาลัด นะ ลูมอฮ กามี.’ 27ตูฮัด รูมัฮ อีตู_ ญา นะ มือเลา จะ_ ‘กู จาเระ ดัฮ จะ_ กู เตด ตาฮู นู กาเญา ฌาดี ซือมียา ดาตัก ปัจ ดีฮา. อูโนยํ ปี บูวัก เดะ กู เลอ_ กาเญา ซือมียา นู บูวัจ ปรางัย ฌาฮัจ เตอ.’ 28ตานา กาเญา นะ ลีฮัจ อับราฮัม อีซัก ยาโกบ_ ฌางัน โกะ ลูมอฮ ซือมียา ตูโดฮ ลาฆู นะ ตูฮัด ซือมูฮา_ กูญา อาดา ดูโดะ เดะ ดือนียา บารู อีตู_ นู ตูฮัด ฌาดี ราฌา เตอ_ ตาปี ญาวา นะ กาเญา ตะอาซิก_ กือนา ตูละ บูวัก กะ โซะ ลูวัยํ_ กาเญา นะ มือนาแงฮ_ ตือกาจิ ฆีฆี_ ซาเกะ โตระ เลอ. 29โกะ ซือมียา นะ มาแรฮ ดาตัก เดะ โซะ ตีมอยํ_ โซะ บารัจ เตอ_ นะ มาแรฮ เดะ โซะ บารัจ ดายา_ โซะ ตารา ฌูฆา เลอ_ นะ ดูโดะ มากัด เดะ ดือนียา บารู นะ ตูฮัด. 30นี เลอ_ อาดา ซือมียา โซะ ฮูโฌก ซือตืองัฮ_ นะ ปี ดูโดะ โซะ ปรือดู. ซือมียา โซะ ปรือดู ซือตืองัฮ_ นะ ปี ดูโดะ โซะ ฮูโฌก.” เยซู ญา จะ.
เยซู ซายัก กะ นังฆรี เยรูซาเลม
(มัดทัย 23.37-39)
31เดะ วะตู อีตู_ ลูมอฮ ฟาริซี ซือตืองัฮ_ มาแรฮ มือญาเระ กะ เยซู จะ_ “เกา กือนา บีกัซ ปี โซะ อาซิก เลอ. ซาเบะ จะ_ ราฌา เฮโรด_ ญา อีงัจ นะ บูนอฮ เกา บูวัก.”
32เยซู มือเลา กะ กูญา จะ_ “กือนา ปี มือญาเระ กะ ซือมียา เตด บือฆูนา อีตู จะ_ ลีฮัจ เลอ_ กู โปรฮ โกะ ฮาตู ตรือเบะ ดัฮ_ ปือบือลา ปือญาเกะ เดะ ซือมียา_ อารี อีนี_ มัฮปาฆี ปูลัก เลอ. บารู เดะ อารี นู ตีฆา_ กู นะ บูวัจ บรี ซุจ ฮาบิฮ ดัฮ. 33ตาปี กู ฆาโดฮ นะ บือฌาลัด ปี_ เดะ อารี อีนี_ มัฮปาฆี_ มัฮปาฆี ซา เลอ. ซาเบะ จะ_ เตด บือฆูนา ดัฮ_ นะ บรี ซือมียา ตูโดฮ ลาฆู นะ ตูฮัด นะ กือนา บูนอฮ_ โซะ ลูวัยํ นังฆรี เยรูซาเลม เลอ.
34“โอ กาเญา_ ลูมอฮ เยรูซาเลม เออ_ นู บูนอฮ โกะ ซือมียา ตูโดฮ ลาฆู นะ ตูฮัด_ นู อาเมด บาตู_ ลีปัยํ โกะ ซือมียา นู ตูฮัด ซูโรฮ มาแรฮ มียา กาเญา. บาญะ กาลี เลอ_ กู บือคานะ นะ บือมุน ลูมอฮ กาเญา ตาโรฮ_ ซือรูปา อีโนก ฮายับ นู กรด โกะ อานะ นะ ญา_ บรี ดูโดะ เดะ บาวัฮ ซายะ. ตาปี กาเญา ตีเมา เลอ. 35ลีฮัจ เลอ_ รูมัฮ นะ กาเญา_ นะ กือนา ปือบียัยํ ดัฮ เลอ. กู มือญาเระ กะ กาเญา จะ_ กาเญา นะ ฮอย เตด บือเลฮ ลีฮัจ กู_ ตือดะ กาเญา นะ มือเลา จะ_ ‘ซือลามัจ เลอ_ ซือมียา นู มาแรฮ เดะ ปือนามา นะ ตูฮัด เดะ อาตัซ.’ ”
Pašlaik izvēlēts:
ลูกา 13: ULBIBLE
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties