मत्ती 14
14
बप्तिस्मा दिने यूहन्नाको हत्या
1त्यस बेला देशका एक चौथाइ भागका शासक हेरोदले येशूको विषयमा विवरण सुने। 2तिनले आफ्ना भारदारहरूलाई भने, “यिनी त बप्तिस्मा दिने यूहन्ना हुन्; जो मरेकाबाट जीवित भएका छन्, त्यसकारण तिनीद्वारा शक्तिशाली कामहरू भइरहेका छन्।”
3हेरोदले आफ्नो भाइ फिलिपकी पत्नी हेरोदियासको कारणले, यूहन्नालाई पक्रेर अनि बाँधेर झ्यालखानामा राखेका थिए, 4किनकि यूहन्नाले तिनलाई यसो भनेका थिए: “तपाईंले उसलाई राख्नु उचित छैन।” 5हेरोदले यूहन्नालाई मार्न चाहेका थिए, तर तिनी मानिसहरूदेखि डराउँथे, किनकि तिनीहरूले यूहन्नालाई एक अगमवक्ता भनी मान्थे।
6हेरोदको जन्मदिनमा हेरोदियासकी छोरीले पाहुनाहरूका निम्ति नाचेर हेरोदलाई यति धेरै खुशी पारी 7कि, तिनले उसले जे मागे पनि दिनेछु भनी शपथ खाएर वचन दिए। 8आमाले सिकाएअनुसार त्यसले भनी, “यहीं मलाई एउटा थालमा बप्तिस्मा दिने यूहन्नाको शिर दिनुहोस्।” 9राजा दुःखित भए, तर आफ्नो शपथ र भोजमा बसेका पाहुनाहरूका निम्ति उनले त्यस विन्तीलाई पूरा गरिदिने आज्ञा दिए, 10अनि झ्यालखानामा यूहन्नाको शिर काट्न लगाए। 11तिनको शिर एउटा थालमा ल्याएर त्यस केटीलाई दिइयो, उसले त्यो आफ्नी आमाकहाँ लगी। 12यूहन्नाका चेलाहरू आएर तिनको शरीर लगे, अनि त्यो गाडिदिए। अनि तिनीहरूले गएर येशूलाई भनिदिए।
येशूले पाँच हजारलाई खुवाउनुभएको
13जब येशूले यो घटना सुन्नुभयो, तब उहाँ डुङ्गामा चढेर त्यस ठाउँबाट सुटुक्कै एउटा एकान्त ठाउँमा जानुभयो। यो सुनेर शहरहरूबाट भीडहरू उहाँलाई पछ्याउँदै पैदलै गए। 14जब येशू उत्रनुभयो अनि उहाँले एउटा ठूलो भीडलाई देख्नुभयो; उहाँ तिनीहरूप्रति दयाले भरिनुभयो अनि तिनीहरूका रोगहरूलाई निको पार्नुभयो।
15साँझ पर्नलाग्दा चेलाहरूले उहाँकहाँ आएर भने, “यो एउटा सुनसान ठाउँ हो, अनि अबेला हुँदैछ। भीडहरूलाई बिदा गर्नुहोस्, र तिनीहरूले गाउँतिर गएर आफ्ना लागि केही खानेकुराहरू किनून्।”
16येशूले जवाफ दिनुभयो, “तिनीहरूलाई जान खाँचो छैन। तिमीहरूले नै तिनीहरूलाई केही खान देओ।”
17तिनीहरूले जवाफ दिए, “यहाँ हामीसित त पाँचओटा रोटी र दुईओटा माछा मात्र छन्।”
18उहाँले भन्नुभयो, “ती मकहाँ ल्याओ।” 19अनि उहाँले मानिसहरूलाई हरियो चउरमा बस्ने आदेश दिनुभयो। ती पाँच रोटी र दुई माछा लिएर स्वर्गतिर हेरेर उहाँले धन्यवाद दिनुभयो अनि रोटी भाँच्नुभयो। तब ती चेलाहरूलाई दिनुभयो, अनि चेलाहरूले मानिसहरूलाई दिए। 20तिनीहरू सबैले ती खाए र अघाए, अनि चेलाहरूले उब्रेका टुक्राहरू बाह्र डालाभरि उठाए। 21ती खानेहरूको संख्या स्त्रीहरू र केटाकेटीहरूबाहेक पुरुषहरू मात्र लगभग पाँच हजार थिए।
येशू पानीमाथि हिँड्नुभएको
22येशूले भीडलाई बिदा गर्नुहुँदा उहाँले चेलाहरूलाई डुङ्गामा चढेर झट्टै उहाँभन्दा अघि पारिपट्टि जान लाउनुभयो। 23उहाँले भीडलाई बिदा गरिसक्नुभएपछि, उहाँ एकलै प्रार्थना गर्न एउटा पहाडमा जानुभयो। रात पर्दा उहाँ त्यहाँ एकलै हुनुहुन्थ्यो, 24तर डुङ्गा जमिनदेखि धेरै टाढा पुगिसकेको थियो, बतास उल्टो बहेकाले छालहरूले त्यसलाई हुत्याइँदैथियो।
25बिहान तीन बजेतिर येशू समुद्रमाथि हिँड्दै तिनीहरूतिर जानुभयो। 26जब चेलाहरूले उहाँलाई तालमाथि हिँडिरहनुभएको देखे, तिनीहरू डराए। अनि तिनीहरू, “यो ता भूत हो” भनी डरले चिच्याए।
27तर येशूले तुरुन्तै तिनीहरूलाई भन्नुभयो: “साहस गर! म नै हुँ। नडराओ।”
28पत्रुसले जवाफ दिए, “प्रभु यदि तपाईं नै हुनुहुन्छ भने मलाई तपाईंकहाँ पानीमा आउन अह्राउनुहोस्।”
29उहाँले भन्नुभयो, “आऊ।”
तब पत्रुस डुङ्गाबाट ओर्लेर पानीमाथि हिँड्दै येशूतिर आए, 30तर जब तिनले बतास देखे, तब तिनी डराए अनि, डुब्न लाग्दा, “प्रभु, मलाई बचाउनुहोस्!” भनी चिच्याए।
31येशूले तुरुन्तै आफ्नो हात पसारेर तिनलाई पक्रनुभयो अनि भन्नुभयो, “हे अल्पविश्वासी, तिमीले किन शङ्का गर्यौ?”
32अनि जब उहाँहरू डुङ्गामा चढ्नुभयो, बतास शान्त भयो। 33तब डुङ्गामा हुनेहरूले “साँच्चै तपाईं परमेश्वरको पुत्र हुनुहुन्छ” भने, अनि उहाँलाई दण्डवत् गरे।
34तिनीहरू पारि पुगेपछि गनेसरेतमा उत्रे। 35अनि जब त्यहाँका मानिसहरूले येशूलाई चिने, तिनीहरूले छेउछाउका सबै इलाकाहरूमा खबर पठाए। मानिसहरूले आफ्ना सबै रोगीहरू उहाँकहाँ ल्याए। 36अनि रोगीहरूलाई उहाँको वस्त्रको किनार मात्र छुन दिनुहोस् भनी उहाँलाई विन्ती गरे, अनि जतिले उहाँलाई छोए तिनीहरू सबै निको भए।
Pašlaik izvēlēts:
मत्ती 14: NCV
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
पवित्र बाइबल, नेपाली समकालीन संस्करण™
प्रतिलिपि अधिकार © 1998, 2006, 2021 Biblica, Inc.
अनुमतिसहित प्रयोग गरिएको छ। सम्पूर्ण अधिकार विश्वव्यापी रूपमा सुरक्षित रहनेछ।
Nepali Contemporary Version™, New Testament
Copyright © 1998, 2006, 2021 by Biblica, Inc.
Used with permission. All rights reserved worldwide.