UBWANDILO 3
3
Umundu ikutula inongwa
1 #
Buset 12.9; 20.2 Loli nifinyamana fyosa ifi Untwa Kyala apelile injoka yo yakindile ubukomu. Popapo yilinkundalusya unkikulu, “Ngimba Kyala atile mungalyaga iseke sya mipiki gyosa igya mungunda?” 2Umwene unkikulu alinkwamula ku njoka alinkuti, “Tubagile ukulyapo iseke sya mipiki gyosa igya mu ngunda; 3loli gwene gu mpiki ugu guli pakati pa ngunda, go Kyala atile, Mungisakulyaga iseke syake, nalinga ko kugupalamasya, ukuti mungisakufwa.” 4Iyene injoka yilinkumbula unkikulu yilinkuti, 5“Nakamo, mutisakufwa, mukaya momumo; namanga Kyala amenye itolo ukuti linga mulile, amaso ginu gisakwiguka, mwisakuyaga bo ba bakyala itolo ukusimanya inunu nimbibi.” 6Lelo bo unkikulu agubwene umpiki ukuti nnunu pakulya, kangi gwakugakyela amaso pakuguketa, nukuti gubagile ukumpa umundu amahala, popapo alinkwegako simo iseke alinkulya; alinkumpako simo na yu ndume; yope alinkulya. 7Popapo amaso gabo bo babili galinkwiguka, balinkwimanya ukuti bakafwala nakamo; balinkusona amani ga nkuyu, go galinkuya fisepe fyakufwala.
8Popapo balinkupilika undindo bo Untwa Kyala ikwenda mugunda nkabalilo ka mayolo, bo ilisuba libotile; popapo umundu yula nunkasi balinkwibilila mmipiki gya mungunda ukuti Kyala aleke ukubabona. 9Umwene Untwa Kyala alinkunkolela umundu alinkuti, “Uli kugu?” 10Umwene alinkuti, “Mbilike undindo bo kwenda mu ngunda, lelo natilaga, papo ngafwele nakamo; po lelo ndinkwibilila.” 11Popapo Untwa Kyala alinkundalusya alinkuti, “Ywani akubulile ukuti ukafwala nakamo? Ngimba ulileko iseke sya mpiki ugu nakukomelisye ukuti ungisakulyaga?” 12Umundu yula alinkwamula alinkuti, “Unkikulu uyu gwalimbele ukuti ayege mwinangu, yo ambele iseke sya mpiki, ndile.” 13#2 Kor 11.3; 1 Tim 2.14Popapo Untwa Kyala alinkundalusya unkikulu alinkuti, “Syo sya fiki isi ubombile?” Unkikulu alinkwamula alinkuti, “Injoka yisyobile, popapo nendile nukulya.”
Kyala ikusosola isya lufundo
14Popapo Untwa Kyala alinkuyibula injoka alinkuti,
“Papo ubombile sisisi,
po ugunigwe ukufikinda ifitimigwa fyosa,
nifinyamana fyosa ifya ndisu;
lilino kwendelaga pa lwanda,
kangi mbumi bwako bosa kulyaga lu lufumbi.
15 #
Buset 12.17
Nikubikaga ikilugu pakati pamyako nunkikulu,
na pakati pa banduyungu lwako nabanduyungu lwake;
isakukutayaniaga untu,
kangi nanugwe gwisakumfulasyaga ikitende.”
16Umwene unkikulu yo Untwa Kyala alinkumbula alinkuti,
“Nisakukupaga ubutolwe bu bwingi nkabalilo kakupapila abana;
pope indumbula yako yisakulabilaga ku kundumego,
umwene yo isakukulagilaga ugwe.”
17 #
Hib 6.8
Yope Adamu Untwa Kyala alinkumbula alinkuti,
“Papo ulitike ilisyu lya nkasigo,
ulile iseke sya mpiki,
ugu nakukanisye ukuti, ‘Ungisakulyaga,’
umfu gugunigwe panongwa yako,
mbumi bwako bosa gwisakufyagilaga ifyakulya fyako mu nkwiyula.
18Umfu gwisakukumekesyaga imifwa nimitulatula;
kangi gwisakulyaga ifi fikumela ndisu.
19Gwisakulyaga ifindu ifi ubombile namafuku ga mingi,
ukwisakufika papo kwakugomokelaga kumfu,
buno ko kuno gwafumile;
namanga ugwe uli mfu itolo,
kumfu ko gwisakugomokelaga.”
20Umundu yula, yo yu Adamu, alinkumpa unkasi gwake ingamu ya Eva, papo umwene ali yo nna gwa bandu bosa, abumi. 21Untwa Kyala alinkutendekesya imyenda gya fipapa gyo alinkumfwika Adamu nunkasi gwake.
Adamu na Eva bikukagigwamo mu ngunda
22 #
Buset 22.14
Popapo Untwa Kyala alinkuyoba alinkuti, “Keta, lilino umundu afwene itolo nanuswe, ukusimanya inunu nimbibi, lumo abagile ukwisa kwapako iseke sya mpiki gwa bumi, ukuti alyepo kangi ende nukuya nubumi bwa bwila na bwila.” 23Popapo Untwa Kyala alinkunsosyamo umundu mu ngunda gwa Edeni, ukuti akalimege umfu ugu afumileko. 24Po lelo alinkunkagamo umundu yula; kubusokelo bwa isuba kwa ngunda gwa Edeni, ko alinkubabikako abakerubi nulubo lwa moto ulu lukusanukila kosakosa; ukwigala injila iyi yikulabila ku mpiki gwa bumi.
Pašlaik izvēlēts:
UBWANDILO 3: NNBII
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
BAIBULO INONGWA INUNU © Bible Society of Malawi, 2017.