मर्कुस 11
11
यरुसलेमनाइ येसुकर पर्बेस
(मति २१:१-११; लुका ९:२९-३८; युहन्ना १२:१२-१५)
1जब येसु र होक्र चेलालत यरुसलेम नजिककर जइतुन डाँरानाइ हक्ल बेथफागे र बेथानिया बाज्नार ठउँनाइ आइपुग्ला, तब येसुन आफ्ने दुइटाइ चेलाल्काइ इन्खा बाजिके पाठाइल्याक, 2“तोरा अगाडिकर गाउँनाइ जाउबे र पोस्लेसात तोराल्किन अखनसम्म कोइ पुनि बइचढ्ल गधाकर एउटो बछेडा बाँदिधर्ल भेट्टाइनार आछो। होलाइ फुकाइके इछि आनो। 3यदि कुन्नुल्किन तोराल्काइ ‘ह्य केति गर्लाइ?’ बाजिके सोद्ल्या भने, ‘पर्भुलाइ हेक्र खाँचो पर्लाछि, र होइनिन चाने फर्काइदिनार आछ’ बलइ।”
4अनि होलत जाइला र येसुन बल्ल जिन्खाए बाटकर छेउनाइ हक्ल घरकर दइलो अगाडि बछेडालाइ बाँदिधर्ल भेट्टाइला, र होलाइ फुकाइ लाग्तिन 5उछि ठडाइलाइ कोइ-कोइ मान्छेल्किन होल्काइ सोद्ला, “तोराल्किन बछेडालाइ किनारे फुकाइ लाग्लाइ हँ?”
6येसुन होल्काइ बल्लठि होल्किन बाज्ला, र उछिराइ मान्छेल्किन लाकाइ दिल्याक। 7होल्किन बछेडालाइ येसु हक्लनाइ आन्ला र आ-आफ्ने ओड्ना लुगा बछेडाकर ढाडनाइ ओछ्याइला अनि येसु होनाइ चड्ले। 8धेराइ मान्छेल्किन आफ्ने लुगा फुकालिकइ बाटनाइ ओछ्याइला र आने कत्ताल्किन चाइ सेउला काटिके बाटनाइ ओछ्याइला। 9अनि येसुकर अगि र पछि हिन्नाराइ मान्छेल्किन इत्तिके बाज्तिन जयजयकार गरइ लाग्ला,
“होसन्ना!#११:९ होसन्ना हेक्र अर्थ परमेसोरकर जयजयकार हक्दिक बल्ल हो।
परमपर्भुकर नाउँनाइ आइनार धन्यकर हो।#भजन ११८:२५-२६
10हाम्रो पुर्खा दाउद राजाकर आइ लाग्ल राज्य धन्यकर हक्दिक!
परमधामनाइ परमेसोरलाइ होसन्ना!”
11येसु यरुसलेम आइपुग्ल पछि मन्दिरभित्र पस्ले। येसुन मन्दिरकर वरिपोरि मजसिन हेर्ले, ढिलो हक्ल हुदान बारेउटाइ चेलाल्काइ लिके येसु बेथानियानाइ जाइले।
नेभाराकर गाछलाइ सराप
(मति २१:१८-१९)
12अर्को दिन होलत बेथानियाबान यरुसलेम फर्कितिन येसुलाइ भोक लागल्ते। 13ह्व बेला नेभारा पाक्नार समय हक्ल बइरल्ति। येसुन अलि ओभर झ्याम्म पर्ल एउटो नेभाराकर गाछ देख्ले। उछिका कतइ फल आछि कि बाजिके हेरइ जाइले। तर उछि पुग्तिन येसुन गाछनाइ पाता मात्र देख्ले। 14येसुन ह्व गाछलाइ बलल्ते,“अबसिन ह्य गाछबान कुन्नुल्किन पुनि फल खाइ जुन पाइदिखन।” ह्य बाज्ल येसुराइ चेलाल्किन सुन्ला।
येसु मन्दिरनाइ जाइल
(मति २१:१२-१७; लुका १९:४५-४८; युहन्ना २:१३-२२)
15फेरि येसु चेलाल्कोसिन यरुसलेमनाइ आइपुग्ले र मन्दिरभित्र पसिके उछि किनबेच गर्नाराइ सेब्बाइ बेपारिल्काइ निकाल्याक। अनि पइसा साट्नाल्को टेबुललत र परेवा बेच्नाल्को मुढालत पल्टाइदिल्याक। 16येसुन मन्दिरकर चात्रानाइ कुनुकाइ पुनि केइ कुरो किनबेच गरइ बइदिल्याक। 17ह्व पछि येसुन मान्छेल्काइ सिछ्या दितिन बल्-ल्याक,“केति धर्मसास्तरनाइ इत्तिके लेख्ल बइने, ‘मोर घर सेब्बाइ जातिल्को लागि पार्थनाकर घर हक्नार आछि।’ तर तोराल्किन ता ह्यलाइ चोर डाकाल्को ओडार बानाइलाछो।”#यस ५६:७; यर ७:११
18ह्य कुरो मुख्य पुजारि र धर्म-गुरुल्किन सुन्ला। अनि होल्किन येसुलाइ मार्नार उपाय हेरइ लाग्ला, तर होलत येसुसिन डाराइतेला। किनारइभने येसुकर सिछ्या सुनिके मान्छेल्को भिड छक्क पर्तेला।
19साँझ पर्लपछि येसु आफ्ने चेलाल्कोसिन यरुसलेम सहरबान निस्किके जाइले।
नेभाराकर गाछबान सिछ्या
(मति २१:२०-२२)
20अर्को दिन ब्यान पइलेकर बाट जाइतिन खेर होल्किन ह्व नेभाराकर गाछलाइ जरेसुदा मरिसक्ल देख्ला। 21येसुन ह्व गाछलाइ बल्ल कुरो सम्जिकइ पत्रुसिन येसुलाइ बलल्ते, “रब्बि, हेर ते, तुइनिन सराप दिल गाछ ता मरल्तिसइ।”
22येसुन चेलाल्काइ बल्-ल्याक,“परमेसोरनाइ बिस्वास गरो। 23साँच्चि मुइ तोराल्काइ बल्छु, कुन्नुल्किन आफ्ने मननाइ सङ्का नगरिके आफिन बाज्ल कुरो पुरा हक्छि बाजिके बिस्वास गरिके ह्य डाँरालाइ ‘उखलिके तुइ समुन्द्रनाइ खस’ बाज्लो भने, ह्व कुरो पुरा हक्नार आछि।#मति १७:२०; १को १३:२ 24होइहुदान मुइ तोराल्काइ बल्छु, तोराल्किन पार्थनानाइ जे माङ्छो ह्व पाइसक्नाइ बाजिके बिस्वास गरो, र तोराल्किन माङ्ल कुरो पाइनार आछो। 25जब तोरा पार्थना गरइ लाग्छो, कुनुल्को बिरुद्दनाइ केइ आछि भने छेमा गर्देइ। तब स्वर्गनाइ बस्नार तोराल्को परमेसोर ब्वान पुनि तोराल्को अपराधलत छेमा गर्दिनार आछ। 26[तर छेमा बइगर्लो भने, स्वर्गनाइ बस्नार परमेसोर ब्वान पुनि तोराल्को अपराधलत छेमा गर्नार बइने।”]#मति ६:१४-१५#११:२६ धेरइ जसो भर्पर्दो सोरोतनाइ ह्य पद लेख्ल बइपाय।
येसुकर अधिकार बारे परस्न
(मति २१:२३-२७; लुका २०:१-८)
27येसु आफ्ने चेलाल्कोसिन फेरि यरुसलेमनाइ आइले। येसु मन्दिरनाइ हेथउने-होथउने हिनिधर्तिन मुख्य पुजारिलत, धर्म-गुरुलत र मुख्य अगुवालत येसु हक्लनाइ आइला, 28र होल्किन येसुलाइ सोद्ला, “तुइ कछ्यान अधिकार पाइके ह्य कामलत गर्तिन आछस? ह्य काम गर्नार अधिकार तुइलाइ कुनिन दिल्यास?”
29येसुन होल्काइ बल्-ल्याक,“मुइ पुनि तोराल्काइ एउटो कुरो सोद्छु, मुइलाइ जबाफ देओ, अनि मुइनिन कछ्यान अधिकार पाइके ह्य काम गर्तिन आछु, ह्व तोराल्काइ बल्नार आछु। 30लु बाजो, युहन्नान बप्तिस्मा दिनार अधिकार कछ्यान पाइले? परमेसोरबान हो कि मानुसबान?”
31ह्य सुनिके होलत आफि-आफिनाइ इत्तिके बाजइ थाल्ला, “अब हाइ केति बाज्नार? परमेसोरबान बाजु भने ‘तोराल्किन युहन्नालाइ किनारे बिस्वास बइगर्लो?’ बाजिके होइनिन सोदिहाल्छइ। 32मानुसबान बाजु भने किनिखे बाज्नार?” इन्खा बाजइ होलत डाराइला, किनारइभने सेब्बाइ मान्छेल्किन युहन्नालाइ अगमबक्ता हो बाजिके मान्तेला। 33होइहुदान होल्किन येसुलाइ बल्ला, “हाइलाइ था बइने।”
अनि येसुन होल्काइ बल्-ल्याक,“उसने मुइ कुनकर अधिकारिन ह्य काम गर्छु, मुइ पुनि तोराल्काइ बइबलु।”
Pašlaik izvēlēts:
मर्कुस 11: MAJH
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2024 (Active), Mother Tongue Translators Society and Wycliffe Bible Translators, Inc. All rights reserved.