मर्कुस 1
1
बप्तिस्मा देलाहार यहुन्नाइ कर्ल पर्चार
(मत्ति ३:१-१२; लुका ३:१-१८; यहुन्ना १:१९-२८)
1परमेस्वरक् बेटायक येसु खिरिस्टक् खुसिक् खभर यरङ् करिहिन् सुरु भेलकुन्। 2यसैया अगमबक्ताक् कागतै परमेस्वरे बाज्ल कहिन् यन्हिं लेख्ल रहेला–#मलाकि ३:१
“दिठाउ, मुँइ तोरा पैंदा तियार काराबाक्नि,
मोरा खभर पुर्यालाहारलाइ तोरा आगारि-आगारि पाठाम्ना।”
3उखास लाग्दो ठाँओइ एकजेना बर्के स्वरे यन्हिं बाजिहिन् हाँख्रातिहि रहैस्,#यसैया ४०:३
“पर्भुक् आबाक् पैंदा तियार काराहो,
ओहिं हिंठ्बाक् गोर्याटोलक् सोझो काराहो!”
4यि खभर पुर्यालाहार सेहे बप्तिस्मा देलाहार यहुन्ना रैल्हक्। ओहिं मानुसलकलाइ बप्तिस्मा देइतिहि उखास लाग्दो ठाँओइ देख्वार पोर्लोक्। ओहिं मानुसलकलाइ यन्हिं बाजिहिन् पर्चार कर्लक्, “तोहोराखर्ह्वा जम्माहिं पस्चताप करिहिन् पाप कर्बा छारह आउँ बप्तिस्मा लेहो, तसौ परमेस्वरे तोहोरा पापलक् छेमा करिदेहेर्ला।” 5पुराय यहुदिया देसक् आउँ यरुसलेम सहरक् सेब्भ्रोउ मानुसलक् यहुन्नाक्ठालाइ आइलुहुन्। उखर्ह्वाइ आफ्नि-आफ्निक् पाप मानिलेहिन् आइलाहार जट्का जम्माहिंलाइ यहुन्नाइ यर्दन बाज्ल खोलाइ बप्तिस्मा देलाहा।
6यहुन्नाइ उँटक् रौंक्भटे बानाल लुगा पेहेरइ, आउँ ठेक्नाइ छालाक् पेटि बाँर्है, तसौ सलह आउँ बन्याँ मधुक् रस खाओइ।#२ राजा १:८ 7ओहिं मानुसलकलाइ यन्हिं बोलेथ्, “मोराइसम् पाछु एकजेना आइतिहि रहैस्, उसेहे मोराहुसौ सक्तिसालि रहैस्। मुँइ ता चाकरक् परौ ओक्राक् चप्पलक् फित्ता फुक्लाबाहुलाइ नाँसोहाम्। 8मुँइ तोहोरानि पानिसम् बप्तिस्मा देल धर्मेहेंर्ला, तर ओहिं ता तोहोरानि पबित्र आत्माइसम् बप्तिस्मा देहेर्ला।”
येसुक् बप्तिस्मा आउँ पापै फसाबाक् परिछ्या
(मत्ति ३:१३-१७; ४:१-११; लुका ३:२१-२२; ४:१-१३)
9उहे समइमा येसु गालिल इलाकाक् नासरत बाज्ल सहरक्भटे आइलक्, आउँ ओहिं यहुन्नाक् हाथक्भटे यर्दन बाज्ल खोलाइ बप्तिस्मा लेलक्। 10पानिक्भटे बाहार निस्केहे बिट्के येसुइ स्वर्गो उँद्रिजाइल आउँ पबित्र आत्मा घुग्घुक् रुपइ आफ्निक् उप्रै नाभ्टे आइल देख्लक्। 11तसौ स्वर्गोक्भटे यरङ् एक्टा आवाज सुन्लुहुन्, “तुँइ मोरा पियारो छाउरा रहस्ला, तोरासङ्हिं मुँइ एकदमें खुसि रहम्ना।”#उत्पति २२:२; भजनसङ्ग्रह २:७; यसैया ४२:१; मत्ति १२:१८; मर्कुस ९:७
12ओक्राक्पाछु तुरुन्ते पबित्र आत्माइ येसुलाइ उखास लाग्दो ठाँओइ जाबाय पोर्लाहार बाजिहिन् लेगालकुन्। 13ओछि सैताने चालिस दिनसम्म ओक्रानि पापै फसाबाक् परिछ्या कर्लकुन्। ओछि बन्याँ जिवा-जन्तुलकौ रैल्हुहुन्, आउँ स्वर्गोदुतलके ओक्रानि सिहार-सुसार कर्लिहिंक्।
येसुइ चारजेना जलहर्यालकलाइ हाँख्रालाहा
(मत्ति ४:१२-२२; लुका ४:१४-१५; ५:१-११)
14जब बप्तिस्मा देलाहार यहुन्नालाइ झेलखारै हाल्नेसौ येसु गालिल इलाकाइ आइलक्, आउँ परमेस्वरक्भटे आइल खुसिक् खभर पर्चार कर्बा ठाल्लक्। 15ओहिं यन्हिं बाजिहिन् बोल्बा ठाल्लाहा, “अखसौ बेला भेहिन् सिधाल रहेला, परमेस्वरक् राज्जे लज्जिकिहिमा आहिन् सक्ल रहेला। उहेसिहिरे पस्चताप करिहिन् पाप कर्बा छारह आउँ यि खुसिक् खभरै बिस्वास करह।”#मत्ति ३:२
16गालिल तालावक् पाखाइ-पाखाइ घुम्बा जाइल बेलाइ येसुइ सिमोन आउँ ओक्राक् भायक अन्द्रियासलाइ देख्लक्। उबेलाइ उखर्ह्वा जाल फेंक्तिहि रैल्हुहुन् किसाबुने उखर्ह्वा जलहर्या रैल्हुहुन्। 17तसौ येसुइ उखर्ह्वानि बोल्लाहा, “मोरा पाछु लागह, तोहोराखर्ह्वाइ माछा गर्थिहिन् आन्लक् परौ मानुसलकलाइ परमेस्वरक् राज्जेमा आन्लाहार मानुस तोहोराखर्ह्वालाइ बानामेहेंर्ला।” 18ओट्का सुनेहे बिट्के उखर्ह्वा आफ्निक् जाल छारिबानाइ येसुक् पाछु हिंठ्लुहुन्।
19ओछिसौ अज्झ आगारि जाइल बेलाइ येसुइ जब्दियाक् दुइजेना बेटायक याकुब आउँ यहुन्नालाइ देख्लाहा। उखर्ह्वा डोङाइ बसिबानाइ जाल टुङ्रतिहि रैल्हुहुन्। 20येसुइ उहौखर्ह्वानि तुरुन्ते हाँख्रालाहा। तसौ उखर्ह्वाइ आफ्निक् बापेथा जब्दियालाइ काम कर्लाहारलकक्सङ्हिं डोङाहिमा छारिबानाइ येसुक् पाछु हिंठ्लुहुन्।
येसुइ एक्टा भुत लाग्ल मानुसलाइ राम्रो काराल
(लुका ४:३१-३७)
21ओछिसौ येसु उखर्ह्वानि लेइबानाइ कफर्नहुम सहरै जाइलक्। आउँ ओछि पुगेहे बिट्के बिसारिक दिनै सभाघरै पोसिबानाइ ओहिं परमेस्वरक् बचनक् सिच्छा देबा ठाल्लक्। 22येसुक् सिच्छालक् सुनिबानाइ मानुसलक् छक्क पोर्लुहुन्। किसाबुने ओहिं ओर्को धर्म-गुरुलकक् परौ बोइनें तर पुराय अधिकारेसौ सिखालाहा।#मत्ति ७:२८-२९
23उहेबेलाइ उ सभाघर भिट्रै एकजेना भुत लाग्ल मानुसे बर्के चोटे चिच्याहिन् यन्हिं बाज्लक्, 24“हे नासरतक् येसु, हाम्राठालाइ तोरा किवा काम पोर्लो रहेस्ला? किस् तुँइ हाम्रानि नास कर्बा आओइ? मुँइ हजुरलाइ चिन्हम्ना, हजुर ता परमेस्वरक्भटे आइल पबित्र जन रहस्ला।”#मत्ति २:२३
25तर येसुइ ओक्रानि यन्हिं बाजिहिन् हप्कालकुन्, “चुप्लाउ! उ मानुसक्भटे निस्किहिन् जाइहाल्।”
26तसौ तुरुन्ते उ मानुसलाइ लाछाङ्-लिछिङ् काराहिन् डङरङ्य लारालकुन् आउँ उ भुत बर्के चोटे चिच्याहिन् उ मानुसक्भटे निस्किबानाइ जाइलक्। 27यरङ् भेल देखिबानाइ जम्माय मानुसलक् छक्क पोर्लुहुन् आउँ उखर्ह्वाइ यन्हिं बाजिहिन् एक्टाइ ओर्कोलाइ सोर्हा-सोर्ह कर्बा ठाल्लुहुन्, “बोइनें यि कनौ हाँ? यहिं ता लौओ कहिन् पे सिखाबा ठाल्ल धरैस्। यहिं पुरा अधिकारेसम् सिखातिहि रहैस्। ओहिं भुतलकुहुलाइ आग्या करैस् आउँ भुतलके आको ओक्राक् आग्या पालन करट्थ्ला।”
28यरङ् करिहिन् येसुइ कर्ल कामलक् चाँरोय गालिलक् छेंउ-छाओक् चारौपाखा फिंझ्लकुन्।
येसुइ थुप्रोय मानुसलकलाइ राम्रो पार्लाहा
(मत्ति ८:१४-१७; लुका ४:३८-४१)
29तसौ येसु सभाघरक्भटे तुरुन्ते निस्किहिन् याकुब आउँ यहुन्नाक्सङ्हिं सिमोन आउँ अन्द्रियासक् घरै जाइलक्। 30उहेटाकै ओछि सिमोनक् सासेक् जर लागिहिन् थाला पोर्लो रैल्हकुन्, आउँ येसु ओछि आहेबिट्के घरक् मानुसलके यि कहिन् ओक्रानि जानालिहिंक्। 31ओक्राक्पाछु येसुइ ओक्राक् छेंओइ जाइबानाइ हाथ गर्थिबानाइ ओक्रानि उठालुकुन्, तसौ जरे ओक्रानि छारिहाल्लकुन्। आउँ ओहिं येसुलाइ खुवाइ-पियाइ कर्बा ठाल्लकुन्।
32उहे दिनकोक् बियारै मानुसलके रोगि, बेरामि आउँ भुत लाग्ल मानुसलकलाइ येसुक्ठालाइ आन्लुहुन्। 33यरङ् सम्मकि पुराय सहरभोरिहिंक् मानुसलक् उ घरक् अङ्नाइ जउर भेलुहुन्। 34थरि-थरिक् रोग लाग्ल थुप्रोय बेरामिलकलाइ येसुइ राम्रो कारालाहा आउँ थुप्रोय भुतलकलाइ निस्काइदेलाहा। भुतलकलाइ येसु कुन्ग्वा हो बाजिहिन् थाहा रैल्हाहा। उहेसैर्हे ओहिं उखर्ह्वानि साराबा नहिंदेलाहा।
येसुइ सुन्सान ठाँओइ जाहिन् पाराथ्ना कर्ल
(लुका ४:४२-४४)
35बिहान पोर्बाइसौ धेरे आगारि येसु उठिबानाइ सुन्सान ठाँओइ पाराथ्ना कर्बा जाइलक्। 36सिमोन आउँ ओक्राक् सङ्लके सेहे येसुलाइ खोज्ते जाइलिहिंक्। 37येसुलाइ भेंटानेसम् उखर्ह्वाइ बोल्लिहिंक्, “जम्माहिं तोरानि खोज्बाठाल्ल धरेस्ला।”
38यट्का कहिन् सुन्नेसौ येसुइ उखर्ह्वानि बोल्लाहा, “असौ हामि छेंउ-छाओक् ओर्को गाउँलकै जाहुँक्, मुँइ ओच्छुहु खुसिक् खभरलक् सुनाबा पोर्लाहार रहेला, किसाबुने यिहे खातिरे मुँइ आइल रहम्ना।”
39तसौ सेब्भ्रोउ गालिलै रैल्ह सभाघरलकै जाइबानाइ येसुइ खुसिक् खभरलक् सुनातिहि भुतलकलाइ निस्काइदेलाहा।#मत्ति ४:२३; ९:३५
माहारोग लाग्ल मानुसलकलाइ राम्रो पार्ल
(मत्ति ८:१-४; लुका ५:१२-१६)
40एकजेना माहारोग लाग्ल मानुस येसुक्ठालाइ आइबानाइ घुँरा टेकिबानाइ यन्हिं बाजिहिन् बिम्ति कर्लक्, “हजुरे चाहिबुनेमा मोरानि राम्रो काराबा पारस्ला।”
41तसौ यि कहिन् सुनिबानाइ येसुक् हिर्दया दयाइ भोर्लोकुन् आउँ ओहिं आफ्निक् हाथे ओक्रालाइ छुइबानाइ यन्हिं बोल्लोकुन्, “मुँइ चाहाम्ना तुँइ राम्रो भेइहाल।” 42ओट्का बाज्जेहे बिट्के ओक्राक्नि लाग्ल माहारोग राम्रो भेइहाल्लकुन्। 43तसौ येसुइ ओक्रानि यन्हिं बाजिहिन् करा आग्या देइबानाइ ओछिसौ पाठालकुन्, 44“यटे सुन्, तुँइ यि कहिन् कुन्हुँहिलाइ बुन् जानाब्या, तर तुँइ जाइबानाइ आफ्निक्लाइ पुझरिक्ठालाइ देखाउ आउँ तुँइ राम्रो भेल कहिन् मानुसलकलाइ पर्मानक् लागि मोसाइ आर्हाल अनुसार भेंटि चार्हाउ।”#लेबि १४:१-३२
45तर उ मानुस ओछिसौ निस्किबानाइ जाइलक्, आउँ आफ्नि राम्रो भेल बिसइमा जम्मा कहिनलक् देखादान्ति सुनाटे बुल्लाहा। यि कहिने कर्टे येसु फेरि कुन्हुँ सहरै देख्न्या करिहिन् जाबा नहिंपार्लक्, आउँ सुन्सान्न ठाउँलकै बस्ते बुल्लक्। भेटौसुधा मानुसलक्सेहे चारौभटे ओक्राक्नि भेंटाबा आइलिहिंक्।
Pašlaik izvēlēts:
मर्कुस 1: DEWZ
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2024 (Active), Mother Tongue Translators Society and Wycliffe Bible Translators, Inc. All rights reserved.