الإنجيل زي ما كتبه مَتَّى 12
12
رب السبت
1و في هداك الوقت مر يسوع بين المَزارع في يوم السبت. و جاعوا تلاميده، فقاموا يقطفوا سنابل القمح وياكلوا. 2و لما شافوهم الفريسيين قالوا له: «شوف تلاميدك يسووا إلا ما يجوز أحد يسوّيه في يوم السبت!» 3و رد عليهم يسوع و قال : «چى ما قريتوا إلا سواه داوُد و الجماعة إلا وياه يوم جاعوا؟ 4كيف دخل بيت الله و أكل خبز التقدمة إلا كان أكله ما يحلّ له ولا لأصحابه لكن كان مخصص للكهنة بس! 5و لو ما قريتوا إن الكهنة يخالفوا شريعة يوم السبت لما يشتغلوا في الهيكل أيام السبت و هالشي ما ينحسب دنب عليهم؟ 6ولكني أقول ليكم: هدا الشخص إلا واقف إياكم هني هو أعظم من الهيكل! 7و لو أنتون فاهمين معنى هالأية:«أنا طالب رحمة مو دبيحة»، چان ما حكمتوا على إلا ما عليهم دنب!». 8لأن إبن الإنسان هو رب السبت!»
9بعدين طلع من هناك و دخل معبدهم، 10و إلا هناك رجال إيده يابسة. و الفريسيين كانوا يمبوا يمسكوا عليه أي غلطة عشان يتهموه، فقاموا سألوه: «يجوز أن المرضى ينشفوا يوم السبت؟» 11و رد عليهم: «إدا أي واحد منكم عنده خروف، و طاح هالخروف في حفرة يوم سبت، فهل بيتركه في الحُفرة ولا بيطلعه؟ 12الإنسان أفضل بواجد من الخروف! عجل يحلّ فعل الخير يوم السبت». 13بعدين قال للرجال: «مد إيدك!»و مد إيده، و رجعت سليمة زي الإيد الثانية.
14لكن الفريسيين، طلعوا و قاموا يتآمروا على يسوع عشان يقتلوه.
عبد الله المُختار
15ويسوع درى بهالشي وانسحب من هناك. و لحقوه جماعات واجد، فشافاهم كلهم، 16وحذرهم من أنهم ينشروا الخبر، 17و تحققت النبوءة إلا أندكرت على لسان النبي إشعياء يوم قال:
18«هدا هو ولدي إلا أخترته، حبيبي إلا فرحت به نفسي! بحطّ روحي عليه، وبيعلن العدالة للأمم. 19لا بشابق أحد ولا بيصرخ، ولا بيسمع أحد صوته في الشّوارع. 20«حزمة قصب مرضوضة ما بيكسر، وفتيلة مدخنة ما بيطفي، لحد ما يحقق العدالة والنصرة على الأرض، 21والشعوب كلها بتعلّق أملها على أسمه!»
يسوع و بعلزبول
22وبعدين جابوا له رجال أعمى وأغتم ساكننه جني، و شفاه وصار يشوف و يتكلّم. 23و إستغربوا الجماعة كلهم، و قالوا: «هدا يمكن هو بن داوُد!» 24لكن الفريسيين، وقتها سمعوا كلامهم قالوا: «هو ما يطرد الجنانوه إلا ببَعل زبول رئيس الجنانوه!» 25ودرى يسوع عن أفكارهم، و قال ليهم: «كل مملكة تنقسم على نفسها تخرب. و كل مدينة أو بيت ينقسم على نفسه، ما يصمد. 26إدا كان الجني يطرد الجني، بيكون أنقسم على ذاته، فكيف بتصّمد مملكته؟ 27و إدا كنت أنا أطرد الجنانوه ببَعل زبول، فتلاميدكم بمن يطردوهم؟ عشان چدي هم يحكموا عليكم. 28و لكن إدا كنت أنا أطرد الشياطين بروح الله، فمعناتها أن ملكوت الله حل عليكم! 29و إلا كيف يقدر أحد يدخل بيت شخص قوي وينهب أغراضه إدا ما ربط الشخص القويّ أول شي بقيود؛ و بعدها بيقدر يبوق بيته! 30إلا مو في صفي، فهو ضدي، واللي ما يجمع الخرفان وياي، فهو يفرقهم. 31عشان چدي أقول ليكم: إن كل خطيئة و كل كفر بينغفر للناس. 32بس إلا يقول كلمة ضدّ إبن الإنسان، بينغفر له. و إلا يقول كلمة ضدّ الروح القدس، ما بينغفر له، لا في هالزمان، ولا في الزمان الجاي.
33لما تكون الشجرة زينة، تنتج ثمر زين؛ و إدا الشجرة كانت فاسدة، بتنتج ثمر فاسد! تنعرف الشجرة، من ثمرها. 34يا أولاد الأفاعي، چيفا تقدروا، وانتون شرانيين، تتكلّموا كلام زين؟ لأن اللسان ينطق من ترسة القلب. 35و الإنسان الصالح، من الكنز الزين إلا في قلبه، يطلع منه كل شي زين. و الإنسان الشرير من الكنز الشرير إلا في قلبه، يطلع منه كل شي شرير. 36لكن أنا أقول ليكم: إن كل كلمة باطلة يتكلم بها الناس، بيتحاسبوا عليها في يوم الأخرة. 37فأنت بكلامك تتبرى، وبكلامك تندان!»
آية يونان
38بعدين الكتبة و الفريسيين،ردّوا عليه و قالوا: «يا معلم، نفسنا نشوف معجزة أنت تسويها!» 39و رد عليهم يسوع و قال: «جيل شرير فاسق يطلب آية، و ما بينعطى آية إلا آية يونان النبي. 40فزي ما بقى يونان في جوف الحوت ثلاثة أيام وليالي، چدي بيبقى إبن الإنسان في جوف الأرض ثلاث أيام وليالي. 41بيوقف أهل نينوى يوم الحساب ويا هالجيل و بيحكموا عليه؛ لأنهم تابوا لما أندرهم يونان. و هني واقف قدامكم إلا هو أعظم من يونان! 42و ملكة الجنوب بتحكم على هالجيل يوم الحساب، لأن هي جت من آخر الأرض عشان تسمع حكمة سليمان. و هني واقف قدامكم إلا هو أعظم من سليمان!»
43و لكن متى ما طلع الروح النجس من إنسان، يهيم في الخرابة يدوّر الرّاحة،و ما يحصل. 44فيقول: أرجع إلى مسكني إلا فارقته! و يرجع يحصله فاضي و مكنس و مزين. 45فيروح، و يجيب وياه سبعة أرواح ثانية أعظم منه، فتدخل كلها وتسكن داك الإنسان، فتكون آخرته أسوأ من حالته الأولى. چدي يكون حال هدا الجيل الشرير!»
أم يسوع وأخوته
46و لما كان يسوع قاعد يتكلم ويا الجماعة، إلا أمه وأخوته كانوا واقفين برا، يمبوا يتكلّموا وياه. 47فقال له واحد من الحاضرين: «هدي أمك وأخوتك واقفين برا يمبوا يكلموك!» 48فردّ عليه و قال: «من هي أمي؟ و من هم أخوتي؟» 49بعدين أشر بإيده على تلاميده، و قال: «هدولين هم أمي وأخوتي: 50لأن كل من يسوي مشيئة أبويي إلا في السماوات هو أخويي وأختي وأمي!»
Pašlaik izvēlēts:
الإنجيل زي ما كتبه مَتَّى 12: QNAV
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Qatifi New Arabic Version © 2024 Strategic Resource Group