متّی 10
10
بارہاں رسُول
1وَل یسُوع آپنڑے بارہاں شاگرداں کُوں کولھ سڈ تے اُنہاں کُوں بدرُوحاں کُوں کڈھنڑ تے سبھ بیماریاں تے تکلیفاں کنُوں شِفا ڈیوݨ دا اِختیار بخشیا۔ 2بارہاں رسُولاں دے ناں ایہ ہِن۔ پہلا شمعون جیہڑا پطرس اکھویندے تے اُوندا بِھرا اندریاس، زبدی دا پوتر یعقُوب تے اُوندا بِھرا یُوحنّا، 3فِلپُس تے بَرتُلمائی، توما تے متّی محصُول گِھننڑ آلا، 4حلفئی دا پوتر یعقُوب تے تدّی، شمعون قنانی تے یہُوداہ اِسکریُوتی جئیں اُونکُوں پکڑوا وی ڈِتا۔
بارہاں رسُولاں دی ذمہ داری
5یسُوع اِنہاں بارہاں کُوں بھیجیا تے اُنہاں کُوں حُکم ڈے تے آکھیا، ”غیر قوماں دو نہ وَنجائے تے سامریاں دے کہیں شہر ءچ داخل نہ تھیوائے۔ 6بلکہ اِسرائیل دے گھرانڑے دیاں گُم تھیّاں بھیڈاں دے کولھ وَنجائے۔ 7ٹُردے ٹُردے ایہ تبلیغ کرائے جو اسمان دی بادشاہی نیڑے آ گئی ہے۔ 8بیماراں کُوں شِفا ڈیوائے۔ مُردیاں کُوں زندہ کرائے۔ کوڑھیاں کُوں پاک صاف کرائے۔ بدرُوحاں کُوں کڈھائے۔ تُہاکُوں مُفت مِلے، مُفت ڈیوائے۔ 9آپنڑے کمر بند ءچ نہ سونا چاندی رکھائے نہ پیسے۔ 10نہ رستے کیتے تھیلا گِھنائے نہ ڈُو ڈُو چولے نہ جُتی تے نہ سوٹی کیوں جو مزدُور آپنڑی مزدُوری دا حقدار ہے۔
11تُساں جیہڑے وی شہر یا وستی ءچ داخل تھیوائے تاں پتہ کرائے جو کیہڑا اُوندے ءچ لائق ہے تے جئیں تئیں اُتھوں روانہ نہ تھیؤ، اُتھائیں ٹِکائے۔ 12تے گھر ءچ داخل تھیندے ہوئے سلام ولائے۔ 13جے او گھر لائق ہوسی تاں تُہاڈا سلام اُونکُوں پُج ویسی، تے جے لائق نہ ہوسی تاں تُہاڈا سلام تُہاڈے اُتے وَل آسی۔ 14جے کوئی تُہاکُوں قبول نہ کرے تے تُہاڈے گالھیں نہ سُنڑے تاں اُوں گھر یا شہر کنُوں روانہ تھیندے ہوئے آپنڑے پیراں دی دُھوڑ اُتھائیں چِھنڈک ڈیوائے۔ 15مَیں تُہاکُوں سچ آدھا ہاں جو عدالت دے ڈینہہ سدُوم تے عمُورہ دے علاقے دا حال اُوں شہر دے حال کنُوں زیادہ برداشت دے لائق ہوسی۔
آوݨ آلیاں تکلیفاں
16ڈیکھو مَیں تُہاکُوں بھجیندا ہاں جِینویں بھیڈاں کُوں نہراں ءچ۔ اِیں واسطے تُساں نانگاں وانگُوں ہوشیار تے کبوتراں وانگُوں بھولے بنڑو۔ 17پر لوکاں کنُوں خبردار رہوائے کیوں جو او تُہاکُوں پکڑ تے عدالتاں ءچ پیش کریسن تے آپنڑے عبادت خانیاں ءچ تُہاکُوں کوڑے مریسن۔ 18تُساں میڈی وجہ کنُوں حاکماں تے بادشاہاں دے سامنڑے حاضر کیتے ویسو تاں جو اُنہاں، تے غیر قوماں کیتے گواہی ہووے۔ 19پر جِیں ویلے او تُہاکُوں پکڑواوݨ تاں فِکر نہ کرائے جو اساں کِینویں تے کیا آکھوں کیوں جو جیہڑا کُجھ آکھنڑا ہوسی اُوں ویلے تُہاکُوں ڈسا ڈِتا ویسی۔ 20کیوں جو آکھنڑ آلے تُساں نئیں بلکہ تُہاڈے اسمانی باپ دا رُوح #10:20 یعنی رُوح القُدس جیہڑا خُدا آپنڑے لوکاں دی مدد تے راہنمائی کیتے عطا کریندے۔ہوسی جیہڑا تُہاڈے ءچوں بُولیسی۔
21بِھرا کُوں بِھرا تے پِیُو آپنڑے پوتر کُوں قتل کیتے پکڑویسی۔ تے بال آپنڑے ماء پِیُو دے خلاف کھڑے تھی تے اُنہاں کُوں مروا ڈیسن۔ 22تے میڈے ناں دے سببّوں سبھ لوک تُہاڈے نال دُشمنڑی رکھیسن پر جیہڑا آخر تئیں برداشت کریسی اُوہو نجات پیسی۔ 23پر جِیں ویلے لوک تُہاکُوں ہِک شہر ءچ ستاوݨ تاں ڈُوجھے شہر کُوں بھج وَنجائے کیوں جو مَیں تُہاکُوں سچ آدھا ہاں جو اِیں کنُوں پہلے جو تُساں اِسرائیل دے سارے شہراں ءچ نہ پِھر گِھن سو، اِبنِ آدم آ ویسی۔
24شاگرد آپنڑے اُستاد کنُوں وڈا نئیں ہوندا تے نہ ای نوکر آپنڑے مالک کنُوں۔ 25شاگرد کیتے کافی ہے جو او آپنڑے اُستاد وانگُوں تے نوکر کیتے ایہ جو او آپنڑے مالک وانگُوں ہووے۔ جِیں ویلے اُنہاں گھر دے مالک کُوں شیطان#10:25 متن ءچ بعل زبُول لِکھیا ہے جیہڑا بدرُوحاں دے سردار دا ناں ہا۔ آکھیا تاں اُوندے گھر آلیاں کُوں کیوں نہ اکھیسن۔
کئیں کنُوں ڈرنڑا چاہیدے
26بس اُنہاں کنُوں نہ ڈرو کیوں جو کوئی چیز ڈھکی ہوئی نئیں جیہڑی کھولی نہ ویسی، تے کوئی چیز لُکی ہوئی نئیں جیہڑی ظاہر نہ کیتی ویسی۔ 27جیہڑا کُجھ مَیں تُہاکُوں اندھارے ءچ آدھا ہاں تُساں اُونکُوں سوجھلے ءچ آکھو۔ تے جیہڑا کُجھ تُساں کَن ءچ سُنڑدے ہیوے کوٹھیاں اُتے اُوندی تبلیغ کرو۔ 28اُنہاں کنُوں نہ ڈرو جیہڑے جِسم کُوں تاں قتل کر سگدے ہِن پر رُوح کُوں نئیں۔ بلکہ اُوں کنُوں ڈرو جیہڑا جِسم تے رُوح ڈوہائیں کُوں دوزخ ءچ سَٹ سگدے۔ 29کیا ہِک سِکے ءچ ڈُو چِڑیاں نئیں وِکدیاں؟ تے اُنہاں ءچوں ہِک وی تُہاڈے باپ دی مرضی دے بغیر زمین اُتے نئیں ڈھے سگدی۔ 30بلکہ تُہاڈے سر دے وال وی گِنڑے ہوئے ہِن۔ 31بس ڈرو نہ۔ تُہاڈی قدر تاں بہُوں ساریاں چِڑیاں تُوں وی زیادہ ہے۔
مسیح کُوں قبول تے رَد کرنڑاں
32بس جیہڑا کوئی لوکاں دے سامنڑے میڈا اِقرار کریسی مَیں وی آپنڑے باپ دے سامنڑے جیہڑا اسمان اُتے ہے اُوندا اِقرار کریساں۔ 33پر جیہڑا کوئی لوکاں دے سامنڑے میڈا اِنکار کریسی مَیں وی آپنڑے اسمانی باپ دے سامنڑے اُوندا اِنکار کریساں۔
صُلح نئیں بلکہ تلوار
34ایہ نہ سمجھو جو مَیں زمین اُتے صُلح کراوݨ آیا ہاں۔ صُلح کراوݨ نئیں بلکہ تلوار چلاوݨ آیا ہاں۔ 35کیوں جو مَیں اِیں کیتے آیا ہاں جو پوتر کُوں پِیُو کنُوں، دِھی کُوں ماء کنُوں، تے نُونہہ کُوں سس کنُوں اَنج کراں۔ 36تے بندے دے دُشمنڑ اُوندے گھر دے لوک ای ہوسن۔
37جیہڑا کوئی آپنڑے پِیُو یا ماء کُوں مَیں کنُوں زیادہ پیار کریندے او میڈے لائق نئیں، تے جیہڑا کوئی آپنڑے پوتر یا دِھی کُوں مَیں کنُوں زیادہ پیار کریندے او میڈے لائق نئیں۔ 38تے جیہڑا کوئی آپنڑی صلیب چا تے میڈے پِچُھوں نئیں ٹُردا او میڈے لائق نئیں#10:38 یعنی مسیح دی خاطر ڈُکھ چاوݨ تے مرݨ کیتے تیار ہووے۔۔ 39جیہڑا کوئی آپنڑی جان بچیندے او اُونکُوں ونجیسی تے جیہڑا میڈی خاطر آپنڑی جان ونجیندے، او اُونکُوں پیسی۔
اجر
40جیہڑا تُہاکُوں قبول کریندے، او میکُوں قبول کریندے، تے جیہڑا میکُوں قبول کریندے او میڈے بھیجنڑ آلے کُوں قبول کریندے۔ 41جیہڑا نبی کُوں نبی سمجھ تے قبول کریندے اُونکُوں نبی دا اجر مِلسی، تے جیہڑا نیک کُوں نیک سمجھ تے قبول کریندے اُونکُوں نیک بندے دا اجر مِلسی۔ 42تے جیہڑا اِنہاں چھوٹیاں ءچوں کہیں کُوں میڈا شاگرد مَن تے ہِک پیالہ ٹھڈا پانڑی ای پِلیسی تاں مَیں تُہاکُوں آدھا ہاں او آپنڑا اجر ہرگز نہ ونجیسی۔“
Pašlaik izvēlēts:
متّی 10: SKRV
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Modern Central Saraiki Bible © 2024 Strategic Resource Group