I YOHANE 7
7
Ondae i Yesu lumako i Yerusale a oleo langkai Laika Lewe
7:1-13
1Umarino atuu Ondae i Yesu melempa sumompoo wita Galilea, nahi Dobehe mo'ia mpiha i Yudea, hangano i ra'ai to Yahudi mpo'ungke sala ka dompepate Ira. 2#Ima. 23:34; Win. 16:13 Tempo atuu rangkuomo oleo langkaido to Yahudi, onaemo oleo langkai Laika Lewe. 3Onaemo ka dompotae pepaekompo-Do i Yesu ndi Ondae, ”Pelungkamo inso i ndi'ai ka lakomo i Yudea, ka domengkitao koa ana guru-Miu luwuno anu wineweu-Miu. 4Hangano nahina maupo te'asa mia moweweu hapamo koa a ntewuniano, tewala ineheno domentuduo mia hadio. Tewala Iweweu ira anu kanatuu teto'ori Komiumo a wawontolino.” 5Hangano maupo pepaekompo-Do isa'a nahi dompe'ala-ala Ira. 6Ka Dosangki ira i Yesu, ”Napi haweako tempo-Ku, sine tempomiu hinao mpiha. 7Wawontolino nahi poko'o'aliaakomiu, sine i'o'aliaa-Kune, hangano mesakosii Aku mongkona onae, nine luwuno inanggano mosa'o. 8Imelakomo omiu a mpogawea atuu. Napi Aku lumako i tu'ai, hangano napi haweako tempo-Ku.” 9Kanandiomo pau-Do ndi ondae, ka mo'ia Iramo i Galilea.
10Sine umarido melako pepaekompo-Do i Yesu a gawe atuu, lumako Ira koa mbo'u i tu'ai, nahi Dopepopokita sine menongko-nongkoako. 11To Yahudi me'ungke Ira a gawe atuu ka dompotae, ”Isua Iramo?” 12Ka hadio teronge petanga-tanga i olodo mia hadio mongkona Ondae. Hinao anu motae, ”Ondae mia moiko.” Hinao mbo'u anu motae, ”Naahi, Dopopo'oo ira palili.” 13Sine nahina maupo te'asa mia anu sapa pauo manasa mongkona Ondae hangano domedoitoako ira to Yahudi.
Ponsakosii-Do i Yesu mongkona koroi-Do
7:14-24
14Tempono da kontongaado mpogawe, Ondae i Yesu mewinso a Raha-Do Ue Ala ka Do'amba mompaguru i tu'ai. 15Ka mengkohali-hali iramo to Yahudi ka dompotae, ”Kana'umpeke mia andio ka Doponto'ori kanandio nahi Dopepaguru!” 16Sumangki Ira i Yesu ndi ondae, ”Pompaguru-Ku komba inso a ngkoroi-Ku Ongkue-Ku, sine inso ndi Ondae anu tumena Aku. 17Ba isema anu behe weweuo po'ehe-Do, onae ta tumo'orio pompaguru-Ku andio ba te'inso ndi Ondae Ue Ala, ke pepau-Ku inso a ngkoroi-Ku Ongkue-Ku. 18Ba isema mompau pauno onaeno, onae mo'ungke pelangkaino onaeno, sine ba isema anu mo'ungke pelangkai-Do anu tumenao, onae mentee ka nahina anu nahi mentee ndi onae. 19Kombake i Musa anu moweeakomiumo songka Taura? Sine nahina maupo te'asa mia i olomiu anu weweuo songka Taura atuu. Tembio ka impo'ungke-ungkeako komiu mpepate Aku?” 20Mesangki ira mia hadio atuu, ”Ipewinsoki-Komiu onitu nsa'o; isemake mo'ungke-ungkeako ta mepate Komiu?” 21Sumangki Ira i Yesu, ”Butu aasa wineweu-Ku mengkohali-hali komiumo luwu. 22#Teg. 17:10; Ima. 12:3 Gaagi: I Musa pakosio ka impetindi – menteeano petindi atuu komba inso ndi Musa, sine inso a uempu'uto – ka omiu mpotindi mia a oleo Saba! 23#Yoh. 5:9 Tewala asa mia tinindi a oleo Saba, ka simelaloo Songkano i Musa, tembio ka imentekudaa-Kune, hangano Kupokotompao asa ngkoroino mia a oleo Saba. 24Si mpobitara montonda hapa anu tengkita, sine impobitaramo a moleoa.”
Teposisalaa mongkona insoa-Do i Yesu
7:25-36
25Ba opia mia i Yerusale mpotae, ”Kombake Ondae andio anu ira mpepateo? 26Ka kitaomo, nahi Donanta-nanta mepau ka nahi dompompauako Ira hapa-hapa. Nde doto'oriomo ntu'u petewawatoke, nine Ondaemo i Kerisituu? 27Sine mongkona mia andio tomento'orio i sua insoa-Do, sine ba Dohawe i Kerisituu, nahina maupo te'asa mia anu tumo'orio insoa-Do.” 28Tempono Dopompaguru i Kerisituu a Raha-Do Ue Ala, mebooli Ira, ”Lano imento'ori Aku ka imento'orio i sua insoa-Ku; sine hawe-Ku komba po'ehe-Ku Ongkue-Ku, sine Dotena Aku anu mentee anu nahi imento'ori Ira. 29Ongkue Kuto'ori Ira, hangano Ongkue hawe inso ndi Ondae ka Ondaemo anu tumena Aku.”
30Dome'ungkeakono ka dompokorako Ira, sine nahina maupo te'asa mia anu dumanggi Ira, hangano napi haweako tempo-Do.
31Sine i olodo mia hadio atuu hadio anu mpe'ala-ala Ira ka dompotae, ”Ba Dohawe i Kerisituu, nde ta hadioopoke Dopoweweu kinohali-haliako sekonopo anu Doweweuomo Ondae andio?” 32Domerongeo to Parisi dompetanga-tangaakono mia hadio luwuno atuu mongkona Ondae, ka onaemo pu'uno petewawado sando mpesomba ka to Parisi mentena ira anu mpodagai Raha-Do Ue Ala ka domerako Ira. 33Motae Iramo i Yesu, ”Saraimo koa Kupo'ia meronga omiu ka umarino atuu Aku lumako ndi Ondae anu tumena Akumo. 34Komiu me'ungke Aku, sine nahi komiu mehawe Aku, hangano nahi komiu mpoko'aiwa a mpo'ianga ba i sua Kupo'ia.” 35To Yahudi atuudo mpepau-pau pada ondaedo, ”I suake Ira lumako, ranta nahi kita mpokohawe Ira? Onaeke tinoo-Do Ira lumako ndi ondae anu mpo'ia a mpelakopia, i olodo to Yunani, ka Dopaguru ira to Yunani? 36Hapake pengkonaano pau anu pinau-Do andio: Komiu me'ungke Aku, sine nahi komiu mehawe Aku, ka: Nahi komiu mpokohawe a mpo'ianga ba i sua Kupo'ia?”
Uwoi pu'uno tuwua
7:37-44
37 #
Ima. 23:36
Ka a oleo pokotompa, onaemo oleonomo ntu'u porame-ramea atuu, mentade Ira i Yesu ka Dopebooli, ”Ba isema mokoranga, ka i'aiwa ndi Ongkue ka ipo'inu! 38#Yeh. 47:1; Sak. 14:8 Ba isema me'ala-ala Aku, kana anu pinau a Wunta Mempori: Inso i laro aroano ta waa uwoi tuwu.” 39Anu tinoo-Do onaemo Penaa anu ira mentarimao anu mpompe'ala-ala ndi Ondae; hangano Penaa atuu napi hawe, hangano Ondae i Yesu napi Dopinokomaramba.
40Ba opia mia i olodo mia hadio, anu mperorongeakono pau atuu, mpotae, ”Ondae andio mentee ntu'u nabi anu ta hawe.” 41Anu mehano mpotae, ”Ondae andio i Mesia.” Sine anu mehano mbo'u mpotae, ”Naahi, i Mesia nahi Ira hawe inso i Galilea! 42#Mik. 5:1 Hangano pinau a Wunta mempori, nine i Mesia inso a inuleno i Daudi ka inso i inia Beteleme, po'iangano i Daudi i ndi'upua.” 43Ka Gagiomo teposisalaa i olodo mia hadio hangano Ondae. 44Ba opia mia i olodo mingki rumako Ira, sine nahina maupo te'asa mia anu mosia dumanggi Ira.
I Nikodemu umala-alaako Ira i Yesu
7:45-52
45Ka luwuno anu mpodagai atuu melako a mpetewawado sando mesomba ka to Parisi, anu mpotaeako ira, ”Tembio ka nahi imewawa Ira?” 46Mesangki ira anu mpodagai atuu, ”Napi hori hina mia mepau kana mia atuu!” 47Mesangki ira to Parisi atuu, ”Nde omiu mbo'uke mempinopo'oo? 48Hinaoke te'asa mia i olodo petewawa anu me'ala-ala Ira, ke te'asa mia i olodo to Parisi? 49Sine mia hadio andiodo anu nahi domponto'ori songka Taura, ntetotonaa iramo!” 50#Yoh. 3:1-2 I Nikodemu, asa mia inso ndi ondae, anu i ndi'upua horiomo aiwa ndi Ondae, motaeako ira, 51”Nde ihukuo songka Tauratoke asa mia, se'eluno napi rinonge ka se'eluno napi domento'orio mia hapa anu Doweweuomo?” 52Mesangki ira, ”Nde omue mbo'uke to Galilea? Paresaomo Wunta Mempori ka kotumo'orio nine nahina nabi anu hawe inso i Galilea.”
Beine anu monsosabo
7:53–8:11
53Ka do'amba mpekule, singge mia lumako a rahano,
Pašlaik izvēlēts:
I YOHANE 7: XMZ
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
LAI 2021