I YOHANE 1
1
Pau anu gagiomo mia
1:1-18
1Amba-ambano onaemo Pau; Pau atuu meronga saru Ondae Ue Ala ka Pau atuu Ondaemo Ue Ala. 2Ondae amba-ambano meronga saru Ondae Ue Ala. 3Luwuakoano Ondae mokogagio ka ba nahi Ondae nahina maupo te'asa anu gagiomo inso a luwuno anu pinokogagiomo. 4I laro-Do hinao tuwua ka tuwua atuu onaemo mewineno mia. 5Mewine atuu mewanta a laro wongi-wongiano ka wongi-wongiano atuu nahi pabawaio. 6#Mat. 3:1; Mrk. 1:4; Luk. 3:1-2 Haweomo asa mia tinena-Do Ue Ala, neeno i Yohane; 7onae hawe gagi sakosii sumakosiio mongkona mewine atuu, ka dogagi mpompe'ala-ala luwu mia hangano onae. 8Onae komba mewine atuu, sine onae asalakono sumakosiio mongkona mewine atuu. 9Mewine anu menteeano, anu wantahio sompo mia, kontongaa-Do hawe i wawontolino.
10Kongko Iramo i wawontolino ka wawontolino Ondae mokogagio, sine wawontolino nahi to'ori Ira. 11Hawe Ira a mia-Do, sine mia-Do atuudo nahi domentarima Ira. 12Sine luwuno mia anu tumarima Ira Dopoweeako ira pabawa ka domegagi ana-Do Ue Ala, onaemo ondae anu mpompe'ala-ala a nee-Do; 13Mia anu mempine'anaako komba inso a rea ke inso a ngkoroi, komba mbo'u po'eheno koroi hangano po'eheno aasa tama, tendeano inso ndi Ondae Ue Ala.
14Pau atuu gagiomo mia, ka mo'ia i oloto, ka tomengkitaomo maramba-Do, onaemo marambaa anu Dowineeako gagi Ana-Do i Ama Anu Asa-asa, buke pompehohawa ka menteea. 15I Yohane mesakosii mongkona Ondae ka mebooli, ipotae, ”Ondaemo andio, anu tinooku tempono kupotae: Umarino ongkue Ira hawe anu mese'elungi aku, hangano napi kukongko Ondae kongko Iramo.” 16Hangano inso a bukeako-Do luwuto mpontarima kitamo pe'aroa hangano pe'aroa; 17hangano songka Taura inso ndi Musa, sine pe'aroa ka menteea hawe inso ndi Ondae i Yesu Kerisituu.
18Nahina maupo te'asa mia anu horikumita Ira Ue Ala; sine Ana-Do Ue Ala Anu Asa-asa, anu kongko a mpo'awia-Do i Ama, Ondaemo anu mokomengkaa Ira.
Ponsakosiino i Yohane mongkona koroino onaeno
1:19-28
(Mat. 3:1-12; Mrk. 1:1-8; Luk. 3:3-6, 15-17)
19Ka ndiomo ponsakosiino i Yohane tempono to Yahudi inso i Yerusale mpontena ba opia ira sando mpesomba ka to Lewi ndi onae ka domensikenoo, ”Isemake omue?” 20Imangakuakono ka nahi pegaupi, ipotae, ”Ongkue komba i Mesia.” 21#Win. 18:15; 18; Mal. 4:5 Ka do'amba mensikenoo, ”Tewala kanatuu, isemake omue? I Elia?” Ka isangki, ”Naahi!” ”Omueke nabi anu ta hawe?” ka isangki, ”Naahi!” 22Onaemo ka dompotaeakono, ”Isemake omue? Hangano asalakono kami mesangki ira anu mentena kami. Hapake potaemu mongkona koroimu?” 23#Yes. 40:3 Isangki ira, ”Ongkuemo suarano mia anu meboo-booli i pada one: Pokoleoako Iramo i Ue sala! Kana anu ipauomo Nabi Yesaya.”
24Ka i olodo mia anu mentinena atuu hinao ba opia ira to Parisi. 25Mpesikeno ira ndi onae, dompotae, ”Tembio ka upobaho, tewala omue komba i Mesia, komba i Elia, ka komba nabi anu ta hawe?” 26I Yohane sumangki ira, ipotae, ”Ongkue mobahoako uwoi; sine i tonga-tongamiu mentade Ira anu nahi imento'ori Ira, 27onaemo Ondae, anu hawe lembui sekono ongkue. Maupo kumaleako Ira onggono sapatu-Do nahi pototoku.” 28Gagiano atuu i Betania anu i asatowano koro Yarade, a mpobahoano i Yohane.
I Yohane metiso ndi Ondae i Yesu
1:29-34
29Tisomono i Yohane kumita Ira i Yesu aiwa ndi onae ka ipotae, ”Kita Iramo Ana bimba-Do Ue Ala, anu umoninio halano wawontolino. 30Ondaemo anu tinooku tempono kupotae: Umarino ongkue Ira hawe asa mia, anu mese'elungi aku, hangano kongko iramo se'eluno ongkue. 31Ka maupo ongkue amba-ambano nahi kuto'ori Ira, sine onaemo ka kuhawe ka mobahoako uwoi, ka dopinokomengkaa a nto Isaraeli.”
32Ka i Yohane mesakosii, ipotae, ”Kukitaomo Penaa metii inso i langi kana marapatii, ka mo'ia i wawo-Do. 33Ka maupo ongkue nahi kuto'ori Ira, sine Ondae, anu tumena aku mobahoako uwoi, mepau Iramo ndi ongkue: Tewala ukitao Penaa atuu metii i wawono asa mia ka mo'ia i wawo-Do, Ondaemo atuu anu Ira mobahoako Penaa Mempori. 34Ka kukita Iramo ka mesakosii: Ondaemo andio Ana-Do Ue Ala.”
Ana guru-Do i Yesu anu amba-ambano
1:35-51
35Tisomo i Yohane mentade mbo'u i tu'ai saru orua mia ana guruno. 36Ka mansano kumita Ira i Yesu telalo, ipotae, ”Kita Iramo Ana bimba-Do Ue Ala!” 37Ana guru orua ira atuu rumongeo hapa anu pinauno atuu, ka do'amba lumako tumonda Ira i Yesu. 38Sine mewolili Ira i Yesu i bungku-Do. Dokitao, nine dotonda Ira ka Do'amba motaeako ira, ”Hapake inungkemiu?” Dopotae ndi Ondae, ”Guru, isuake Ipo'ia?” 39Dopotaeako ira, ”Aiwamo ka ikitao.” Aiwa iramo ka dokitao ba isua Dopo'ia, ka oleo atuu mo'ia ira meronga saru Ondae; tempo atuu bara'ura langku opaa. 40Asa mia i olodo mia orua ira anu rumongeo pauno i Yohane ka do'amba tumonda Ira i Yesu onaemo i Andarea, pepaekompono i Simo Peturu. 41I Andarea amba-ambano tepohaweakono i Simo, pepaekompono, ka ipotaeakono, ”Kintepohaweako Iramo i Mesia (pengkonaano: i Kerisituu).” 42Iwawao ndi Ondae i Yesu. Mengkita Ira i Yesu ndi onae ka Dopotae, ”Omue i Simo, anano i Yohane, konineeako i Kepa (pengkonaano: Peturu).”
43Tisomono Ondae i Yesu mo'asao aroa-Do Ira lumako i Gelilea. Dotepohaweakono i Pilipu, ka Dopotaeakono, ”Tonda Akumo!” 44I Pilipu atuu inso i Besaida, kotano i Andarea ka i Peturu. 45I Pilipu tepohaweakono i Natanae ka ipotaeakono, ”Kintepohaweako Iramo, anu pinauno i Musa a wunta Taura ka pinaudo nabi, onaemo Ondae i Yesu, anano i Yusupu inso i Nasare.” 46Motae i Natanae ndi onae, ”Nde ta koa hinake anu moiko hawe inso i Nasare?” 47Motae i Pilipu ndi onae, ”Aiwa ka ukita Ira!” Dokitao i Yesu i Natanae aiwa ndi Ondae, ka Do'amba mepau mongkona onae: Kitao, ndiomo asa to Isaraeli ntu'u, nahi molengku aroano! 48Motae i Natanae ndi Ondae, ”Kana'umpe ka Ito'ori aku?” Dosangkio i Yesu, ”Napi poboiko i Pilipu, Kukitakomo a ntoto ngkeu ara.” 49Motae i Natanae ndi Ondae, ”Guru, Omiu Ana-Do Ue Ala, Omiu Mokoledo to Isaraeli!” 50Sumangki Ira i Yesu, Dopotae, ”Kupauakomu: Hangano Kukitako a ntoto ngkeu ara, onaemo ka upompe'ala-ala? Kokumita ira anu lalu langkai sekonopo atuu” 51#Teg. 28:12 Ka Do'amba i Yesu motaeakono, ”Kupauakomu, menteeano kokumitao langi te'ungkahi ka mala'eka-Do Ue Ala ira mpetii ka mpewuatako ndi Ana Manusia.”
Pašlaik izvēlēts:
I YOHANE 1: XMZ
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
LAI 2021