लूका 23
23
राजा पिलातुस गी सभा में यीसू नै लिजाणो
(मत्ती 27:1,2,11-14; मरकुस 15:1-5; यूहना 18:28-38)
1जद सगळी पंचायत बानै राजा पिलातुस कनै लेगी। 2बे बिं पर ओ दोस लगाण लागग्या कै ओ लोगां नै भड़कावै हो कै रोम गै महाराजा नै कर कोनी देणो। अर अपणै आपनै परमेसर गो बेटो केवै। अर अपणै आपनै मसी अर यहुदी लोगां गो राजा बतावै। 3जद राजा पिलातुस बिनै पूछयो, “तूं यहुदी लोगां गो राजा है के?” बण जबाब दियो, “तूं आप ई तो बताण लागरयो है।” 4जद राजा पिलातुस मुख्य याजकां नै केयो, मनै ईं आदमी में कोई दोस कोनी लागै। 5पण बे ओर जोर देगे केण लागग्या कै ओ गलील ऊं लेगे यरुसलेम तांई लोगां नै परबचन कर'गे भड़कावै है। 6ओ सुणगे पिलातुस पूछयो, “के ओ गलील गो रेण आळो है?” 7अर जद बिनै ठा लागग्यो कै बो राजा हेरोदेस गै इलाकै गो है तो बण यीसू नै हेरोदेस गै कनै घाल दियो। बिं टेम राजा हेरोदेस फसह गै त्यूंहार पर यरुसलेम में आयेड़ो।
राजा हेरोदेस गी सभा में यीसू नै लिजाणो
8राजा हेरोदेस यीसू नै देखगे भोत खुस होयो क्यूंकै बण यीसू गै बारै भोत कीं सुण्यो। ईंखातर बो यीसू ऊं चमत्कार देखणो चावै हो। 9राजा बिंऊं भोत बातां पूछी। पण बण कीं जबाब कोनी दिओ। 10मुख्य याजकां अर सासतरियां बिं पर बडचड'गे दोस लगाण लागरया। 11जद राजा हेरोदेस आपगै सिपाईयां गै सागै रळगे बिंगी बेजती करी। अर बे सगळा मजाक उड़ाण लागग्या। अर बानै चिलकणा कपड़ा पिरा'गे पाछो राजा पिलातुस कनै घाल दियो। 12बिं दिन ऊं पिलातुस अर राजा हेरोदेस आपसरी में बेली बणग्या क्यूंकै पेलां बे एक दूसरै गा दुसमण हा।
राजा पिलातुस यीसू नै मोत गी सजा दी
(मत्ती 27:15-26; मरकुस 15:6-15; यूहना 18:39–19:16)
13जद पिलातुस मुख्य याजकां, पंचायती नेतावां अर लोगां नै बुला'गे केयो कै, 14थे ईं आदमी नै झिकै जुल्म ऊं मेरै कनै ल्याया हो कै ओ लोगां नै भड़कावै पण मैं थारै सांमणै इंगी जांच करी है अर थे झिकी बात इंगै बारै में केवो बामूं एक ई बात साची कोनी निकळी। 15अर ना ई कोई बात इमै हेरोदेस देखी। झिकी ऊं इनै मोत गी सजा दे सकां। ईंखातर बण पाछो ई इनै मेरै कनै घाल दिओ। 16ईंखातर इंगै मैं कोड़ा मरवागे छोड़ दैयूं। 17(पिलातुस नै हर साल फसह गै त्यूंहार पर एक केदी छोड़णो जरूरी होंतो हो)। 18जद सारा जोर जोर ऊं रोळो मचाण लाग्या कै इंगो काम तमाम करो अर म्हारै खातर इंगी जिग्यां बरअबा केदी नै छोड़दैयो। 19बरअबा सैहर में दंगा अर हत्या गै जुल्म में जेळ में बंद हो। 20पण पिलातुस यीसू नै छोडण गी इच्छा ऊं लोगां नै ओर समझाया। 21पण सारा लोग रोळो मचाण लागग्या कै इनै करूस पर चढाओ, करूस पर चढाओ। 22पिलातुस तीसरी बारी बानै पूछयो, क्यूं अण हिस्यो के माड़ो काम करयो है? झिकै ऊं इनै मोत गी सजा सुणाऊं, क्यूंकै इमै हिसी कोई बात दिखै'ई कोनी। ईंखातर इनै मैं कोड़ा लगुवागे छोड़दैयूं। 23पण लोगां घर नै ई चक दियो कै इनै करूस पर चढाओ। अर पिलातुस नै बांगी बात मानणी पड़ी। 24अर आखिर में पिलातुस हुक्म दियो कै लोग केवै बिंयाई करयो जावै। 25अर दंगा अर हत्या करण आळै बरअबा झिकै गी लोग मांग करा बिनै छोड़ दियो अर यीसू नै बांगै केणै गै अनुसार करण खातर बानै सूंप दिओ।
यीसू नै करूस पर चढाणो
(मत्ती 27:32-44; मरकुस 15:21-32; यूहना 19:17-27)
26जद सिपाई यीसू नै लिजाण लागरया तो बठै समौन नाम गो कुरैन गो रेण आळो आदमी हो झिको गाम कानूं आण लागरयो। बिनै बां यीसू गो करूस चका दियो। अर बिनै यीसू गै लारै लारै ले चाल पड़या। 27जद लोगां गी भीड़ बांगै लारै चाल पड़ी अर बामै भोत सी लुगाईयां ही झिकी छाती कूट कूट'गे दुख करै ही। 28यीसू बां कानी मुड़गे देख्यो अर केयो, “हे यरुसलेम में रेण आळी बेटियो, मेरै खातर ना रोवो। पण अपणै आप अर आपगै टाबरां खातर रोवो। 29क्यूंकै सुणो, कदी बे दिन आसी जद लोग केसी, ‘धन्य है बे लुगाईयां झिकी बांझड़ी है अर बे कूख झिकी टाबर कोनी जन्म्या अर बे मांवां झिकिंया टाबरां नै दूध कोनी पियायो। 30बिं टेम बे लोग प्हाड़ां नै केसी कै म्हारै उपर गिरज्यो अर टिबां नै केसी म्हानै दबाल्यो। क्यूंकै लोग हरय भरय दरखत गै सागै इंया करै तो सूकै दरखतां नै कदी कोनी बकसैगा।’ 31थे सोचो, ‘ऐ लोग मेरै बरगै निरदोस आदमी सागै ई इंया करै तो ऐ दोसी आदमी सागै किंया करसी।’” 32अर दो आदमी झिका अपराधी हा बानै ई यीसू सागै करूस पर चढाण खातर लिजाण लागरया। 33अर बे खोपड़ी नाम गी जिग्यां पर आ ग्या अर बां दोनां आपराधियां गै सागै यीसू नै करूस पर लटका दियो। एक अपराधी बांगै सजै पासै अर दूसरो खबै पासै लटका दियो। 34जद यीसू बोल्यो, “हे पिता परमेसर, आनै माफ कर क्यूंकै ऐ लोग जाणै कोनी कै परमेसर गै बेटै गै सागै ऐ के करण लागरया है।” अर बां सिपाईयां परची गेरगे बिंगा कपड़ा आपसरी में पांती कर'गे बांट लिया। 35लोग खड़या खड़या देखा। अर यहुदी नेता बिंगी मजाक उड़ावा कै अण दूसरा नै तो घणाई बचाया पण जे ओ परमेसर गो चुणेड़ो है तो अपणै आपनै बचाल्यै। 36अर सिपाईयां बी बिंगै मूं में सिरको दे देगे बांगो मजाक उड़ावा। अर केण लाग्या। 37जे तूं यहुदी लोगां गो राजा है तो अपणै आपनै बचा ले। 38बां सिपाईयां एक तख्ती पर दोस पथर लिख्यो अर करूस पर टांग दियो कै “ओ यहुदियां गो राजा है।”
मन बदलण आळो अपराधी
39झिका दो अपराधी बठै लटकाऐड़ा बामूं एक जणो बिंगी बेजती कर'गे केयो, “जे तूं मसी है तो म्हानै अर अपणै आपनै बचा ले।” 40ओ सुणगे दूसरै अपराधी बिनै ललकारयो कै, “तनै परमेसर ऊं डर कोनी लागै के? तनै'ई तो आ'ई सजा मिलण लागरी है। 41आपां नै तो आपणै करेडै़ गी सजा मिलण लागरी है, पण अण हिस्यो काम करयो ई कोनी झिकै ऊं आनै आ सजा मिलै।” 42जद बण केयो, “हे यीसू, जद थारो राज आवै तो मनै याद राखियो।” 43यीसू बिनै केयो, “मैं तनै साची केऊं, तूं मेरै सागै आज'ई सुरग में जावैगो।”
यीसू गा प्राण छोड़णा
(मत्ती 27:45-56; मरकुस 15:33-41; यूहना 19:28-30)
44जद सारै देस में दोफारै ऊं लेगे तीसरै पेर तांई अंधेरो छायो रेयो 45अर सूरज दिखणो बंद हो'ग्यो। अर मिन्दर गो पड़दो बिचाळूं पाटग्यो। 46अर यीसू जोर ऊं बोल्यो, “हे पिता परमेसर, मैं मेरी आत्मा थारै हात में सोपूं।” अर इंया केंतांई प्राण छोड़ दिया। 47जद एक सुबेदार ओ सारो कीं देखगे परमेसर गी बडाई करी। अर केण लागग्यो कै “ऐ सच्चा धरमी आदमी हा।” 48अर लोगां गी भीड़ झिकी बठै देखण खातर भेळी हो'री। ईं घटना नै देखगे सारा लोग रोंता अर छाती पिटतां बठूं उड़ग्या। 49पण यीसू गै जाण पिछाण आळा अर झिकी लुगाईयां बांगै सागै गलील प्रान्त ऊं आई। बे दूर खड़ी सारो कीं देखण लागरी।
यीसू गी लोथ नै नुईं कबर में रखणो
(मत्ती 27:57-61; मरकुस 15:42-47; यूहना 19:38-42)
50जद बठै युसुफ नाम गो एक आदमी आयेड़ो बो यहुदियां गी मोटी पंचायत माऊं ईं हो पण धरमी अर सजन आदमी हो। 51अर बो यहुदियां परदेस गो अरिमितिया नगर गो रेण आळो हो। अर परमेसर गै राज नै अडिकै हो। पण बो मोटी पंचायत गै फेंसलै अर काम ऊं नाराज हो। 52अर बण पिलातुस गै कनै जा'गे यीसू गी ल्हास मांगी। 53अर पिलातुस ल्हास देण ऊं ना कोनी करी बाद में बिं ल्हास नै उतारगे मलमल गै कपड़ा में पळेट दी। अर एक प्हाड़ में बणायेड़ी नूंई कबर में लिजागे रख दी। पेलां बिं कबर में ओर किंगी ल्हास कोनी रखी ही। 54अर बो दिन सब्त गी तैयारी गो दिन हो क्यूंकै सूरज गै डूबतांई सब्त चालू होणाळो हो। 55बे लुगाईयां झिकी बिंगै सागै गलील परदेस ऊं आई बांगै लारै-लारै देखण गेई कै ल्हास नै किसी रीति ऊं रखी है। 56जद बे पाछी आ'गे बिंगी ल्हास पर लेप करण खातर सुरम आळी चिजां अर सेंट तैयार करी। अर सब्त गै दिन रीति गै हिसाब ऊं आं लुगाईयां आराम करयो।
Pašlaik izvēlēts:
लूका 23: BGQ
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2023 (Active), Wycliffe Bible Translators, Inc. All rights reserved. © WIn Publishing Trust