Marcos 4
4
Bana itsi ñuicësoquin an ñu ꞌapácë uni ñuicë bana
(Mt 13.1-9; Lc 8.4-8)
1Amiribishi ca Jesusan parúmpapa cuëbíxun unicama ꞌunánmiacëxa. ꞌUnánmicëbëa ꞌaisamaira uni a nëbë́tsiorati timë́cëbë ca Jesús parúmpapa cuëbía bëspúcë manë nuntinu ꞌiruax tsóbuacëxa. Anua tsómainun ca unicama masinu parúmpapa cuëbí bucüacëxa. 2Bucubucë ca Jesusan ꞌitsa bana ꞌunánmiacëxa. ꞌUnánmiquin ca bana itsi ñuicësoquin ñuiquin ësaquin cacëxa: 3—Ca cuat, ꞌën mitsu ñuixunmainun. An ñu bëru ꞌapácë uni ca aín naënu ꞌapáquin ñu bëru sacai cuanxa. 4Sacacëx ca raírinëx anúan uni nicë me irunu nipacëaxa. Nipacëcë isbëtsini uxun ca ñuina pëchiñunën ꞌeaxa. 5Raírinëx ca maparañu menu nipacëaxa. Nipacëax ca me cëxtúma ꞌain bënëtishi coxa. 6Coóxbi ca uruquian barin xarocëx aín tapun ꞌaíma ꞌain, chushiaxa. 7Raírinëx ca muxañu menu nipacëaxa. Nipacëax coi ca ꞌiruaxa. ꞌIruxunbi ca muxan abë coquin mapurucëxun tuacëma ꞌicën. 8Usa ꞌaínbi ca raíri ñu bëru ax me upínu nipacëaxa. Nipacëax coi canitancëxun ca upí oquin tuaxa. Tuacëx ca raíri aín bimi ꞌitsamashi, treintaishi ꞌiaxa, raírinëxribi ca aín bimi ꞌitsa, sesenta, ꞌiaxa, raírinëxribishi ca aín bimi ꞌitsaira, cien, ꞌiaxa. 9An aín pabitan ënë bana cuacë unin ca aín nuitunënbi sinánquin cuati ꞌicën.
Uisa cupí cara Jesusan bana itsi ñuicësoquin bana ñuiacëxa quicë bana
(Mt 13.10-17; Lc 8.9-10)
10Usaquin cacë́xa raíri unicama cuancëbë atux bërúxun ca a rapasu ꞌicë unicamabëtan aín ꞌunánmicë unicaman Jesús cacëxa:
—Uisa cupí caramina bana itsi ñuicësoquin unicama bana ñuixuni quixun camina nu cati ꞌain.
11Cacëxun ca Jesusan cacëxa:
—Uni itsían ꞌunaniamabi camina mitsun Nucën Papa Diosan sinánmicëxun an ꞌunánmicë ñu ꞌunanin. Usa ꞌaínbi cana uni raíri ꞌëmi sinántisama tancë cupí bana itsi ñuicësoquin bana ñuixunin. 12ꞌËn ꞌaia isquinbi ca atun ꞌën cushi Nucën Papa Diosan ꞌë ꞌináncë a sinanima. Atun pabitan ꞌën ñuixuncëxun cuaquinbi ca uisai quicë cara quixun ꞌunanima. Usai ꞌi ca acamax atun ꞌucha tërë́nun Nucën Papa Diosmi sinanatima. Usaía atux ꞌinun cana bana itsi ñuicësoquin bana ñuixunin.
Uisai quicë cara an ñu ꞌapácë uni ñui quicë bana ꞌicë quixuan Jesusan ñuia
(Mt 13.18-23; Lc 8.11-15)
13Usaquin catancëxun ca Jesusan ësaquinribi cacëxa:
—¿Mitsúnribi caramina an ñu ꞌapácë uni ñui ꞌëx quicë bana, uisai quicë cara quixun cuatiman? ¿ꞌËx bërí quicë bana ënë cuaquinma caramina uisaxun bëtsi banacamaribi ꞌën ñuia cuati ꞌain? 14An ñu bëru ꞌapácë uni asaribi ca an Nucën Papa Diosan bana unicama ñuixuncë uni ꞌicën. 15Anúan uni nicë me iru anu nipacëcë ñu bëru asaribi ca bëtsi bëtsi uni ꞌicën. Usa ꞌixuan Nucën Papa Diosan bana cuacëbëbi bënëtishi uxun ca ñunshin ꞌatimanën ꞌapu, Satanás, an sinánxma ꞌinun a cuacë banacama a manumia. 16Bëtsi bëtsi unix ca maparañu me bëxbá, anu nipacëcë ñu bëru asaribi ꞌicën. Nucën Papa Diosan bana cuati cuëënquin —a bana quicësabi oi cana ꞌiti ꞌai —quixun bënë́nquinshi sinania. 17Usaquin sinánquinbi ca maparañu menu nipacëcë ñu bëru tapun ꞌitsañuma usaribi ꞌixun Nucën Papa Diosan bana ꞌitsama nëtë́inshi sinania. Sinánquinbi ca anbi masáquin sinánan Nucën Papa Diosan bana ꞌacëbë ami nishquian unin ꞌatimocëxun a bana manuquin ënia. 18Muxañu menua nipacëcë ñu bëru usaribi ca bëtsi bëtsi uni ꞌicën. A unicaman ca Nucën Papa Diosan bana cuaquin, 19—a bana quicësabi oi cana ꞌiti ꞌai —quixun sinania. Usaquin sinánquinbi ca atun ënë menu ꞌicë ñuishi sinánan —ꞌitsa ñuñu ꞌaish cana cuëënti ꞌai —quixun sinani ꞌitsa ñuñu ꞌiisa tanan bëtsi ñuribi cuëënia. Usa ꞌaish ca Nucën Papa Diosan bana sináncëxbi ñu bëru ꞌapácëa coiabi chucun mapurucë usaribi ꞌaish bimiñumasa ꞌia. 20ꞌImainun ca bëtsi bëtsi unix me upínua ñu bëru nipacëcësa usaribi ꞌicën. A unicamax ca Nucën Papa Diosan bana cuaquin —a bana quicësabi oi cana ꞌiti ꞌai —quixun aín nuitunën upí oquin sinánquin a bana quicësabi oi ꞌicë ꞌaish, ñu bërúxa me upínuax upiti coi canitancëx upiti bimicësaribi ꞌicën. Raírinëx ca ꞌitsamashi, treinta, bimiñu ꞌia, ꞌimainun ca raírinëxribi ꞌitsa, sesenta, bimiñu ꞌia, ꞌimainun ca raírinëxribishi ꞌitsaira, cien, bimiñu ꞌia.
Nucën Papa Diosan unix ca lamparínsa ꞌicë quicë bana
(Lc 8.16-18)
21Ësaquinribi ca Jesusan cacëxa:
—¿Lamparín bëxun cara unin ñu tëmú an bëpánun nanti ꞌic? ¿Cara anu ꞌuxti tëmú nanti ꞌic? Anu nanquinma ca anu lamparín nanti anu nanti ꞌicën, ¿usa cat? 22Uni itsin isnunma ꞌacë ñucama ꞌimainun uni itsin cuanunma quicë banacama abi ca ꞌunáncë ꞌiti ꞌicën. 23An aín pabitan ënë bana cuacë unin ca aín nuitunënbi sinánquin cuati ꞌicën.
24Usaquin catancëxun ca ësaquinribi Jesusan cacëxa:
—Mitsun cuacë banacama upí oquin cuaquin camina a bana quicësabi oquin ꞌati ꞌain. An ꞌën a ñuixuncë bana uisai quicë cara quixun upí oquin sinánquin axa quicësabi oquin ꞌacë uni a ca ꞌën bana itsiribi Nucën Papa Diosan ꞌunánmiti ꞌicën. 25An ꞌën bana cuaquin a bana quicësabi oquin ꞌacë uni a ca ꞌën bana itsiribia cuanun Nucën Papa Diosan ꞌunánmiti ꞌicën. Usa ꞌaínbi ca an ꞌën bana cuaquinbi sináncëma uni a, an isa ꞌunánxa quixuan sináncë bana a camabi Nucën Papa Diosan manumiti ꞌicën.
Jesusan ñu bëru corucë ñuia
26Ësaquinribi ca Jesusan cacëxa:
—Nucën Papa Diosan axa ainan ꞌiti unicama aín uni ꞌimiti ax ca ësa ꞌicën. Unían naënu ꞌapácëx, 27ca ñu bëru an imë́ ꞌuxtancëx bësutancëxun nëtën ñu ꞌamainun coi cania. Usaria ca uisai ꞌi cara usai cania quixun ꞌunaníma. 28Menuax ca ñu ꞌapácë ꞌiruia. ꞌIrui ca aín rara ax chai cania. Canitancëxun ca tuaia. Tuai ca aín bimi ax xacáñu ꞌaish bëruñu ꞌia. 29Usa ꞌaísha shaínquibutia ca anun biti nëtën aín ꞌibun aín xacá xucapaquin aín bëru bitsia.
Mostaza bëru ñui quicë bana
(Mt 13.31-32; Lc 13.18-19)
30Amiribishi ñuitëcëni ca Jesús quiacëxa:
—¿Nucën Papa Diosan cara ainan ꞌiti unicama uisoquin aín uni ꞌimiti ꞌic? ¿Uisa ñu itsiribi ñui caranuna a ñui quiti ꞌain? 31Ësa ca. Mostaza bëru, menu ꞌapácë, ax ca chamaratsuira ꞌicën, bëtsi ñu bëru chamaratsusamaira ca ax ꞌicën, 32ꞌaíshbi ca ꞌapácëx bëtsi ñu bëru canicësamaira ꞌia. Usa ꞌaísha cani pëñanacëtiira chacëbë ca manan nuáncë ñuina aín pëían tupë́oncënu na otancëx anu bucuia. Usaribiti ca Nucën Papa Diosan unicama ꞌitsamashi pain ꞌiaxbi ꞌitsaira ꞌitánun uatia.
Uisa cupí cara Jesusan bana itsi ñuicësoquin bana ñuixuancëxa quicë bana
(Mt 13.34-35)
33Usoquin ca ꞌitsa oquin Jesusan bana itsi ñuicësoquin anu ꞌicë unicaman cuaisabi oquin bana ñuixuancëxa. 34Bëtsi banánma ca usoquinshi Jesusan unicama ñuixuancëxa, ꞌixunbi ca aín ꞌunánmicë unicama abëa ꞌicë uisai quicë cara a banacama ꞌicë quixun ꞌunánmiacëxa.
Bëchun ꞌimainun suñúan Jesusan nëtë́mia
(Mt 8.23-27; Lc 8.22-25)
35A nëtën ca bari cuabúcëbëa baquíshcëbëtan manë nuntinu tsóxun Jesusan aín ꞌunánmicë unicama cacëxa:
—ꞌUcë manan cuanun ca cuan.
36Cacëxun ca aín ꞌunánmicë unicaman Jesús manë nuntinua tsócë buáncëxa. Baca cuëbí unicama ëbianía Jesús ampan sicaracëti cuancëbë ca raírinëxribi nuntin sicaracëti cuancëxa. 37Cuancëbëbi ca suñúan ꞌicuatsíncëbë parúmpapa bëchuni tucánqui ꞌumpax aín nuntinu ꞌiruacëxa. 38Usai ꞌia oquin ca aín ꞌunánmicë unicaman Jesús manë nunti tsipúnua chupami tëcë́pimëti ꞌuxcë bësúnquin cacëxa:
—¿Cananuna bamai quixun caramina sinaniman?
39Cacëx bësuquinshi ca Jesusan suñúan —ca nëtët —canan parúmpaparibi —ca bucubut —quixun cacëxa. Cacëxëshia suñúan nëtë́ishimainun ca baca bëchúnribi nëtë́acëxa. 40Usoxun ca Jesusan aín ꞌunánmicë unicama cacëxa:
—¿Uisacatsi caramina racuëtin? ¿Nucën Papa Diosan ca asérabi nu bërúanquin ꞌaquinia quixun caramina sinaniman?
41Cacëx ca ratuti racuëti canancëxa:
—¿Uisa uni cara ënëx ꞌic? Suñúnbi, bacánbi ca aín bana cuatia.
Pašlaik izvēlēts:
Marcos 4: cbrPB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1978, 1995, 2008, 2022 Wycliffe Bible Translators, Inc. All rights reserved.