Marcos 3
3
Jesusan anun ñu mëëtima nëtën aín mëcën bamacë uni pëxcüa
(Mt 12.9-14; Lc 6.6-11)
1Anua judíos unicama timë́ti xubunu cuantëcëni ca Jesús anu atsíancëxa. Anu atsíncëbë ca uni achúshi aín mëcën amo ꞌicë bamacë anu ꞌiacëxa. 2Usa ꞌicë ca anu ꞌicë fariseo unicaman anun ñu mëëtima nëtën caraisa uni pëxcuia quixun ami manánuxun iscatsi quixun Jesús bërúancëxa. 3Bërúancëxunbi ca aín mëcën bamacë uni Jesusan cacëxa:
—Nirucuatsini ca nëri ut.
4Cacëxa ucëbëtan ca Jesusan fariseo unicama cacëxa:
—¿Anun ñu mëëtima nëtën cara unin ñu upí ꞌati ꞌic? ¿Cara ñu upíma ꞌati ꞌic? ¿Anun ñu mëëtima nëtën cara unin uni itsi ꞌinsíncë ꞌaquinti ꞌic? ¿Cara bamatanun isëshiti ꞌic?
Quixuan cacëxbi ca quiáma ꞌicën. 5Quiáma atu ñachai nishi masá nuituquin ca Jesusan —uisa cupí cara ënë unicama axa ꞌinsíncë uni ënëmi sinanima —quixun sinánquin aín mëcën ñucë uni cacëxa:
—Ca mëshpat.
Cacëx mëshpatishi ca mëpëxcüacëxa. 6Usocëbë chiquíquiani cuanx ca fariseo unicama axa Herodesmi sináncë unicamabëtan Jesús ñui, uisoxun ꞌati cara quiax ꞌësë́nancëxa.
Baca cuëbí unicama timëcamëꞌëo
7Usacëbë ca Jesús parúmpapanu cuancëxa, cuancëbë ca aín ꞌunánmicë unicamaxribi abë cuancëxa. ꞌImainun ca ꞌaisamaira uni Galilea mecamanuaxa ucë acamax a nuibiani anu Jesús ꞌicë anu timë́acëxa. 8ꞌImainun ca Jesusan ñu ꞌaia ñuiquin chanioia cuacë ꞌaish amanuax amanuax timë́cuatsini ai, Judea me, Jerusalén ëma, Idumea me, Jordán baca ꞌucë manan ꞌicë me, ꞌimainun Tiro, Sidón a ëma rabë́ ꞌurama ꞌicë mecamanuaxribi, camáxbi anu timëcamëꞌëocëxa. 9Usa ꞌain ca Jesusan aín ꞌunánmicë unicama cacëxa, ꞌaisamaira uni tsitsíruquin chacati rabanan manë nunti mëníoxunun quixun. 10An ꞌitsa uni pëxcucë cupía —ꞌën ticacëxuinshi ca ꞌëribi pëxcuti ꞌicë —quixun sinani, ꞌinsíncë unicamax anuxun a ticanux tsitsírucëbëtan ca usaquin Jesusan aín ꞌunánmicë unicama cacëxa. Cacëxun ca ꞌaxúancëxa. 11Usaria isi aín bëmánon cuani rantin puruni tsóbuti munuma banaquin ca ñunshin ꞌatimanën ꞌibuacë unicaman ñunshin ꞌatimanën quimicëxun Jesús cacëxa:
—Mix camina Diosan Bëchicë ꞌain.
12Cacëxun ca Jesusan cacëxa:
—ꞌËx cana Diosan Bëchicë ꞌai quixun asérabi uibi caxunma ca ꞌat.
Aín ꞌunánmicë uni ꞌinúan Jesusan mëcën rabë́ ꞌimainun rabë́ uni caísa
(Mt 10.1-4; Lc 6.12-16)
13Usaquin cabiani matánu cuanxuan, anuxun ainan ꞌinun uni caísquin, achúshi achúshi cuëncëx ca abë ꞌinux Jesúsnu cuancancëxa. 14Usaquin ca Jesusan mëcën rabë́ ꞌimainun rabë́ uni caísacëxa, abë ꞌiti ꞌimainun unia Nucën Papa Diosan bana ñuixuntanun xuti. 15Caístancëxun ca atu anun uni ñucë pëxcüanan ñunshin ꞌatimacamaribi uninua chiquínun aín cushi ꞌináncëxa. 16Usa ꞌain ca Jesusan mëcën achúshi ꞌimainun rabë́ uni caísacëxa. A caíscë unicama ax ca ꞌiacëxa achúshinëx Simón cacë ꞌicëbia Jesusan Pedro caquin anëcë. 17ꞌImainun ca Zebedeonën bëchicë Jacobobë aín xucën Juan ꞌiacëxa. A uni rabë́ ca Jesusan Boanerges caquin anëacëxa. Boanerges quicë banax ca caná banacësari banacë quicë ꞌicën. 18Raírinëx ca Andrés, Felipe, Bartolomé, Mateo, Tomás acama ꞌiacëxa. Bëtsix ca Alfeonën bëchicë, Jacobo, ꞌiacëxa. Raírinëx ca Tadeo ꞌimainun Simón, axa judíos unibun rabanan nëëti banacë, aribi ꞌiacëxa. 19Bëtsix ca Judas Iscariote, an Jesús uni ꞌinan, a ꞌiacëxa.
Ñunshin ꞌatimanën cushínsa Jesusan ñu ꞌaia quiáxa uni quia
(Mr 12.22-32; Lc 11.14-23; 12.10)
Usaquin abë niti unicama caísbianquin buani ca Jesús anua ꞌicë xubunu cuantëcëancëxa. 20Cuanbia ꞌaisamaira uni amiribishi timë́tëcëan ca atubë banaquin Jesúsbëtan aín ꞌunánmicë unicaman piama ꞌicën. 21Usai ꞌia cuabiani ca aín aintsi ꞌibu ax —sapi ca ñunshíanxa —quiquiani Jesús bitsi cuancëxa. 22Usa ꞌain ca Jerusalénuax ucë an Moisésnën cuënëo bana ꞌunáncë unicama quiacëxa:
—Ënë unibë ca ñunshin ꞌatimanën ꞌapu, Beelzebú ꞌicën. Usa ꞌixun ca Beelzebúnën ꞌamicëxun ñunshin ꞌatima uninua chiquinia.
23Ax ca ñunshin ꞌatimañu ꞌicë quiáxa Jerusalénuax ucë unicama quia cuaxun ca Jesusan cuënxun cacëxa:
—¿Uisa ꞌaish cara Satanás axbi: Ca chiquit, quiti ꞌic? 24Ësa ca. Achúshi menuxuan an ꞌapu ꞌimicë unibunën cushicaman bëtsi bëtsi oquin sináncë ꞌain ca a menu bucucë unicama ꞌitsa ꞌaíshbi upitax bucui bëtsibë bëtsibë nuibananíma ꞌacánani cëñutia. 25Usaribiti ca unicamax aín aintsibë nuibananíma mëëanani tsuáqui nëtëtia. 26Mitsux camina quin, ñunshin ꞌatimanën ꞌapu Satanás, Beelzebúribi cacë, an ꞌamicëxun isana ñunshin ꞌatima chiquinin. Usaími mitsux ꞌë ñui quicë ꞌaínbi ca ñunshin ꞌatimanën ꞌapúan ñunshin ꞌatima raíri chiquíncëbë an ꞌamicëxuan ñu ꞌati ñunshin ꞌatima ꞌaíma ꞌiti ꞌicën. Usa ꞌain ca ñunshin ꞌatimanën abë ñunshin ꞌatima chiquinima. 27Ësa ca. Ui unínbi ca cushi uni, aín xubunu atsínxun aín ñu bicuanima. Aín ꞌibu a pain nëaxun cuni ca aín ñu bicuanti ꞌicën. Usaribi oquin cana ꞌën aín ꞌapusama cushiira ꞌixun ñunshin ꞌatima chiquinin. 28Asérabi cana mitsu cain, Nucën Papa Diosan ca unin ꞌatima ñu ꞌacë camabi tërë́nti ꞌicën, amia ꞌatimati banacëribi. 29Usa ꞌaínbi ca axa aín Bëru Ñunshin Upí ñui ꞌatimati banacë uni aín ꞌucha Nucën Papa Diosan tërënima, ax ca usabi tërë́ntimoi ꞌia.
30—Ax ca ñunshin ꞌatimañu ꞌicë —quiáxa quicë cupí ca Jesusan usaquin cacëxa.
Jesusan ca amia sináncë unicama aintsioia quicë bana
(Mt 12.46-50; Lc 8.19-21)
31Usa ꞌain ca unia bana ñuixuncëbë uquin aín titabëtan aín xucë́antun ëmánxun Jesús isa unun quixun anu ꞌicë uni camiacëxa. 32Camicëxun ca a nëbë́tsioratia tsócë unicaman Jesús cacëxa:
—Min titabë ca min xucë́antu ëman ꞌicën. Ca mi istisa tania.
33Cacëxun ca Jesusan cacëxa:
—¿Uicamax cara ꞌën tita ꞌimainun ꞌën xucë́antu ꞌic?
34Usai quiquin bariaráquin isquin ca a rapasu tsócëcama cacëxa:
—Axa ꞌëbë tsócëcama, ënëx ca ꞌën tita ꞌimainun ꞌën xucë́antu ꞌicën. 35Uicaman cara Nucën Papa Dios cuëëncësabi oquin ꞌaia, acamax ca ꞌën xucën ꞌimainun ꞌën chirabacë ꞌimainun ꞌën tita ꞌicën.
Pašlaik izvēlēts:
Marcos 3: cbrPB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1978, 1995, 2008, 2022 Wycliffe Bible Translators, Inc. All rights reserved.