Marcos 13
13
Anuxun Nucën Papa Dios rabiti xubu upíira upí ñui quicë bana
(Mt 24.1-2; Lc 21.5-6)
1Anuxun Nucën Papa Dios rabiti xubunuaxa cuania ca aín ꞌunánmicë uni achúshinën Jesús cacëxa:
—Ca is, ënë xubux ca maxax ꞌacë ꞌaish upíira upí ꞌicën.
2Cacëxun ca Jesusan cacëxa:
—Ënë xubu camina maxax ꞌacë ꞌaish chaira isin. Usa ꞌaínbi ca ënë xubucama aín maxáxcamaribi rurupacë ꞌiti ꞌicën.
Mecama cëñúti nëtë ꞌiisama pain ꞌain bëtsi bëtsi ñu ꞌiti bana
(Mt 24.3-28; Lc 21.7-24; 17.22-24)
3Usaquin cacëx abë cuanquin ca anuxun Nucën Papa Dios rabiti xubu ꞌuria ꞌicë matá, Olivos, anu tsóbutia Pedro, Jacobo, Juan, Andrés, acaman, unia ꞌaíma ꞌain, atúxëshi abë ꞌixun Jesús cacëxa: 4—¿Uínsaran cara mixmi quicësabi oi anuxun Nucën Papa Dios rabiti xubu ënëx aín maxáxcama rurupacë ꞌiti ꞌic? ¿Anúan usai ꞌiti nëtë ca ꞌuramacuatsinia quixun ꞌunánuxun caranuna uisa ñu ꞌia isti ꞌain? A camina nu ñuixunti ꞌain.
5-6Usaquian aín ꞌunánmicë unicaman ñucácëxun ca Jesusan anun ax utëcënti nëtë ñuixunquin ësaquin cacëxa:
—ꞌItsa unin ca, ꞌëx cana Cristo ꞌai, quiax quiquin ꞌitsaira uni paránuxun ꞌaia. Usoquian mitsuribi paránti rabanan camina bërúancati ꞌain. 7Mitsun camina uni itsían —bëtsi menu ꞌicë unicamax ca bëtsibë ꞌacánania quixun ñuia cuanuxun ꞌain. Cuanan camina —raíri unicamaxribi ca raíribë ꞌacánania —quixun ñuia cuatíbi racuë́tima ꞌain. Usaía ꞌicëbëbi ca ënë mecama cëñúcëma pain ꞌiti ꞌicën. 8Bëtsi menu ꞌicë unicamax ca bëtsi menu ꞌicë unicamabë nishánani ꞌacánanti ꞌicën. ꞌImainunribi ca bëtsi menu ꞌicë ꞌapun suntárucama bëtsi menu ꞌicë suntárucamabë ꞌacánanti ꞌicën. Bëtsi bëtsi mecama ca shaíquinuxun ꞌaia. Bëtsi bëtsi nëtënu ꞌicë unicamax ca a piti ñuñuma ꞌinuxun ꞌaia. Usoquin pain tëmëratancëxunbi ca ꞌëx utëcëncëbëtainra, unin an ꞌacësamaira oquin tëmëranuxun ꞌaia.
9ꞌËmi sináncëma uni raírinën ca ꞌapucamanu ami manánuxun mitsu buánti ꞌicën. Usonan ca anua judíos unicama timë́ti xubucamanuxun mitsu manë xon rishquiti ꞌicën. Mitsúnmi ꞌën bana uni ñuixuncë cupí ca unin mitsumi nishqiun judíosma unicaman ꞌapunu mitsu buánti ꞌicën, ami mitsu ñui manánuxun. Usai ca ꞌiti ꞌicë quixun ꞌunanx camina usaía ꞌicëbë ratútima ꞌain. Usocëxunbi camina a ꞌapucama ꞌë ñuiquin bana ñuixunti ꞌain. 10Usaía ꞌicëma pan ꞌain ca camabi menuxun uisai cara uni Nucën Papa Diosnan ꞌiti ꞌicë quiáxa quicë bana unin ñuixunti ꞌicën. 11A unicaman mitsu ꞌapunu buáncëxun camina racuë́quin —uisai carana quiti ꞌai —quixun sinántima ꞌain. Mitsúxmi banacëbëtanshia Nucën Papa Diosan mitsu sinánmicë banan camina cati ꞌain. Nucën Papa Diosan Bëru Ñunshin Upitan sinánmicëx camina quiti ꞌain. 12ꞌËmi sináncëma unin ca axa ꞌëmi sinania oquin aín xucë́nbi an uni ꞌaminun quixun ꞌapu ꞌinánti ꞌicën. Usaribi oquin ca aín papan ami nishquin aín bëchicëbi an uni ꞌaminun ꞌapu ꞌinánti ꞌicën. ꞌImainun ca usaribi oquin aín bëchicënën ami nishquin aín papabi an uni ꞌaminun ꞌapu ꞌinánti ꞌicën. 13Mitsúxmi ꞌëmi catamëcë cupí ca unicamax ꞌëmi sináncëma ꞌaish mitsumi ꞌi nishnuxun ꞌaia. Usa ñu ꞌicëbëtanbia ꞌëmi sinánquin ëncëma unicamax ca ꞌën Papa Diosan nëtënu ꞌëbë ꞌiti ꞌicën.
14Usaquin caxun ca Jesusan ësaquinribi aín ꞌunánmicë unicama cacëxa:
—An Nucën Papa Dios quicë bana unicama ñuixuncë uni, Danielnëan a ñuiquin cuënëo uni ax ca ꞌatimaira ꞌicëa unin timacë ꞌaíshbi aín suntárucamabë uti ꞌicën. Aí ca ax anua ax ꞌitima anu ꞌiti ꞌicën. An ënë bana iscë uni an ca uisai quicë cara quixun ꞌunánti ꞌicën. Usai ꞌicëbë ca unicama ami racuëti Judea menu ꞌicë ëmacamanuax abáquiani matánu cuanti ꞌicën. 15Aín xubu ëman ꞌicë unicamaxribi ca abánuxun, aín ñu pain bitsi aín xubunu atsíntëcënima ashiti cuanti ꞌicën. 16ꞌImainun ca aín naënuxuan ñu mëëcë unicamaxribi abánuxun aín chupa bitsi, aín xubunu cuaníma aín naënuaxëshi abáti ꞌicën. 17Usaía ꞌicëbë ca xanu tuñucama ꞌimainun aín tuá ꞌicúcë xanucamaxribi abáquiani cuani nuibacanuxun ꞌaia. 18Usaími mitañu ꞌitin rabanan camina Nucën Papa Dios ñucáti ꞌain. 19Usai ꞌi ca unicama Nucën Papa Diosan me uniotabacë ꞌaían uínsaranbi ꞌiásamairai tëmërati ꞌicën, amiribishi usai tëmëratëcëntimoi. 20Anúan paë tanquin tëmërati nëtë́xa cëñúcëbëma ca usabi ꞌi camabi uni bamati ꞌicën. Usa ꞌaínbi ca Nucën Papa Diosan, ainan ꞌinun an caíscë unicama nuibaquin, atu cupí anúan unin paë tanquin tëmërati nëtëcama sënë́nmiti ꞌicën.
21Anúan usoquin unicaman tëmërati nëtë ucëbëtan unin mitsu —ca is, ënu ca Cristo ꞌicë —quixun canan —ca is, unu ca Cristo ꞌicë —quixun cacëxunbi camina —asérabi ca —quixun sinántima ꞌain. 22Anúan usoquin unicaman tëmërati nëtë ucëbëtan ca unin ax asérabi ama ꞌixunbi —ꞌëx cana Cristo ꞌai —quixun paránti sinánquin unicama canuxun ꞌaia. Usaribiquin ca uni raírinën cëmëquin —ꞌën cana Nucën Papa Dios quicë bana unicama ñuixunin —quixun unicama canuxun ꞌaia. Canan ca unicama paránti sinánquin, uni itsían ꞌacëma ñu ꞌanuxun ꞌaia. ꞌAquin ca Nucën Papa Diosan unicamaribi paránti sinánuxun ꞌaia. 23Usai ꞌicëma pan ꞌaínbi ꞌën mitsu cacë ꞌaish camina a ñucama usai ꞌicëbëbi ratútima ꞌain. ꞌIanan camina unínma mitsu parania bërúancati ꞌain.
Anúan Jesús utëcënti nëtë ñuicë bana
(Mt 24.29-35, 42-44; Lc 21.25-36)
24Catancëxun ca Jesusan ësaquinribi aín ꞌunánmicë unicama cacëxa:
—Usaía tëmërai anun uni bënë́ti nëtëcama ꞌicëbë ca bari bëánquinuxun ꞌaia, ꞌuxë́nribi ca pëcanuxunma ꞌaia. 25ꞌIsparibi ca rëucunuxun ꞌaia, naícamëꞌëo shaíquicëbë ca anua ꞌicë ñucamaxribi shaíquinuxun ꞌaia. 26Usaía ꞌicëbëtan ca uni ꞌinux Nucën Papa Diosnuax uá, ꞌën nëtë cuin mëúxun ꞌën cushin pëcabëtsinia unicaman isnuxun ꞌaia. 27ꞌËx uquin cana ꞌën ángelcama xuquin ꞌënan ꞌinun ꞌën caíscë unicama camabi menua, naínuaribi ꞌëbëa ꞌinun timë́minuxun ꞌain.
28Ënë ñu camina ꞌunanin, higuera i ax ca baricuatsincëbë aín pëchi rëucubutancëx amiribishi corutëcënia. Usaría ꞌia isquin camina —ca baritiacuatsinia —quixun ꞌunanin. 29Usaribitia ꞌën mitsu ñuixuncë ñucamax ꞌicëbëtan camina ꞌunánti ꞌain, anun ꞌëx utëcënti nëtë ca ꞌurama ꞌicë quixun. 30Asérabi cana mitsu cain, ënë nëtënu bucucë unicamax bamacëma pain ꞌain ca ꞌën mitsu ñuixuncë banacama quicësabi oi ꞌiti ꞌicën. 31Naí, me acamax ca cëñúti ꞌicën, ꞌaínbi ca ꞌën banaxa nëtë́timoi usabi ꞌain camabi ñu ꞌëx quicësabi oi asérabi ꞌiti ꞌicën.
32Añu nëtë́inra carana ꞌëx utëcënti ꞌain, uínsarainra cara usai ꞌiti ꞌicë quixun ca uínbi ꞌunanima. Naínu ꞌicë ángelcamanbi ca ꞌunanima, ꞌëx Nucën Papa Diosan Bëchicë ꞌixunbi cana ꞌënribi ꞌunaniman. Nucën Papa Diosan cuni ca ꞌunania. 33Mitsun uínsaran carana uti ꞌai quixun ꞌunáncëma ꞌaish camina camabi nëtën ꞌën uni ꞌaish ꞌëmi sinánquin ꞌëx uti caínti ꞌain. 34Ca ësa ꞌicën. Uni achúshinën ca aín xubunuax amanu cuanuxun an ñu mëëxuncë unicama cuënxun, —utëcëntamainun camina upí oquin ñu ꞌati ꞌai —quixun canan an xëcuë bërúancë uniribi aín xubu bërúainra onun quixun caia. Usaquin cabiani ca ꞌura cuania. 35A unicaman ca uínsaran cara an atu ñu mëëmicë uni uti ꞌicë quixun ꞌunanima. Usaribiquin camina mitsun ꞌëx uti ꞌunaniman. Carana bëbaquíshcëbë uti ꞌain, carana imë́ naëx uti ꞌain, carana ꞌatapa bënë banacëbë uti ꞌain, carana pëcaracëbëa bari urucëbë uti ꞌai quixun camina ꞌunaniman. Usa ꞌain camina camabi nëtën ꞌëmi sinánquin ꞌëx uti caínti ꞌain, 36uquin atuna ꞌëmi manúcë mitsu mërain, usa ꞌain. 37Ësaquin ꞌën mitsu cacësaribi oquin cana axa ꞌëmi catamëcë unicamaribi cain, camina ꞌëmi sinánquin ꞌëx uti caínti ꞌai quixun.
Pašlaik izvēlēts:
Marcos 13: cbrPB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1978, 1995, 2008, 2022 Wycliffe Bible Translators, Inc. All rights reserved.