Marcos 12
12
Bana itsi ñuicësoquin Jesusan an naë bërúancë unicama ñuia
(Mt 21.33-46; Lc 20.9-19)
1Bana itsi ñuicësoquin ca Jesusan, a usoquin unin ꞌati ñuiquin, ënë banaribi ꞌapucama ñuixuancëxa:
—Ësa ca. Achúshi unin ca aín naënu uvas ꞌapáxa. ꞌApáxun cënëtancëxun ca anuxun uvas baca biti xaxu quinioquin naëaxa. ꞌAnan ca anuxun naë bërúanti xuburibi manámiira chaioruquin ꞌaxa. ꞌAtancëxun bëtsi uni aín naëa bërúanxunun quixun ami ëbiani ca ꞌura ꞌicë menu ꞌi cuanxa. 2Cuantancëxun ca uvas bimicëbëtan abëa ꞌicë an ñu mëëmicë uni achúshi xuquin caxa:
—An naë bërúancë unicamanu cuantancëxun camina ꞌënan ꞌiti a mësúa ꞌë bëxúnun mi ꞌinánun cati ꞌain. 3Cacëx cuanxa bëbaiabi ca an naë bërúancë unicaman mëëtancëxun ñuñuma cuantëcëntanun xuaxa. 4Usaquian ꞌan ca naë ꞌibun aín ñu mëëmicë uni itsi xutëcëanxa. Xucëx cuanxa bëbaiabi ca aribi an naë bërúancë unicaman macuëxquin bëtsi bëtsi oquin ꞌatimati banaquin ñu caxa. 5Usocëbëtan amiribishi xucëbi ca bëtsiribi ꞌaxa. A ꞌacan ca bëtsi xutancë xutancëxun raíriribi xuaxa. Xutiabi ca raíri ꞌatimonan raíriribi ꞌacanxa.
6Usoquin aín unicama xuquinbi ca aira nuibacë aín bëchicë a xucëma ꞌicën. Xuxunmabi ca —ꞌën bëchicë ënë ca usaribi oquin ꞌaquinma upí oquin biquin aín bana cuati ꞌicë —quixun sinánquin aira xuaxa. 7Usoquin sinánquin xucëx cuanxa bëbacëbë ca an naë bërúancë unicama canani quiaxa: Aín papáxa bamacëbë ca aín bëchicë ënëx naë ꞌibu ꞌiti ꞌicën. Usa ꞌain cananuna nux naë ꞌibu ꞌinuxun ënë ꞌati ꞌain. 8Canantancëxun ꞌatancëxun ca naë ꞌuri racáncanxa.
9Usoquian aín bëchicë ꞌacë cara naë ꞌibun a unicama uisoti ꞌicë quixun cana mitsu cain. Aín naënu cuanxun a unicama ꞌatancëxun ca bëtsi uni aín naëa bërúanxunun quixun cati ꞌicën. 10¿Nucën Papa Diosan bana cuënëo ësai quicë, a caramina mitsun iscëma ꞌain?,
An maxax xubuacë unían biquinma racáncë ꞌaíshbi ca a maxax bërí amia xubu cushicë ꞌicën, itá upímia xubu cushicë usaribiti. 11Usaía ꞌinun ca Nucën Papa Diosan ꞌimiaxa. An usoquin mëníocëx ca nun nu iscëx upíira ꞌicën.
¿Usoquian cuënëo bana a caramina mitsun iscëma ꞌain?
12An naë bërúancë unicama ñuicëbë ca judíos ꞌapucama atubi ñui isa quia quixun ꞌunani Jesúsmi nishacëxa. Nishquin ꞌatimonuxun biisa tanquinbi —ꞌitsa unin ca aín bana cuatia, usa ꞌain ca a unicamax numi nishti ꞌicë —quixun sinani atumi racuë́quin Jesús ëbiani riquiancëxa.
Unían ꞌapu curíqui ꞌinan
(Mt 22.15-22; Lc 20.20-26)
13Usaquiani cuanxun ca atun cushicaman uisai cara Jesús quiaxa quixuan atu cacëx ami manáncatsi quixun, an Jesús cëmëxun ñucánun fariseo uni raíri ꞌimainun Herodesnën uni raíriribi xuacëxa. 14Xucëx cuanxun ca Jesús cacëxa:
—Cananuna ꞌunanin, min banax ca asérabi ꞌicën. Uisai cara Nucën Papa Diosan uni ꞌiti ꞌicë quixun camina cëmëquinma asérabi ñuin, unían min a bana ñuia cuati cuëëncëbëtanmabi. Min sináncëx ca camabi uni bëtsibëtan sënën ꞌicën. Usaquin sinánquin camina camabi ñuñu ꞌimainun ñuñuma unicama ꞌimainun ꞌapuburibi uisai cara Nucën Papa Diosan uni ꞌiti ꞌicë quixun ñuixunin. Usa ꞌixun camina nu cati ꞌain, ¿Nucën Papa Dios asérabi nun cushi ꞌain cara Romanu ꞌicë ꞌapu, César, a curíqui buánmiti asábi ꞌic? ¿Cara asábima ꞌic? ¿Caranuna curíqui ꞌinánti ꞌain? ¿Caranuna ꞌinántima ꞌain?
15Cacëxun ca Jesusan —uisai caraisna qui quixun ꞌëmi manánuxun cuacatsi quixun ca ꞌë ñucatia —quixun ꞌunánquin cacëxa:
—ꞌËmi manánuxun ꞌëx caraisna uisai qui cuacatsi quixun camina ꞌë usoquin cain. Uisa cara isnun ca ꞌapu buánmiti manë curíqui achúshi ꞌë bëxun.
16Cacëxuan bëia isquin ca Jesusan cacëxa:
—¿Uin bëmañan tanquin ꞌacë cara ënëx ꞌic? ¿Uin anë cara cuënëocë ënëx ꞌic?
Cacëxun ca atun cacëxa:
—Ax ca Romanu ꞌicë ꞌapu, Césarnën bëmánan tanquin ꞌacë ꞌimainun Césarnën anë ꞌicën.
17Usaquin cacëxun ca Jesusan cacëxa:
—Ami mitsun ꞌatia César cuëëncë a ñu camina ꞌati ꞌain, axa mitsun ꞌapu ꞌain. ꞌAnan camina ami mitsun ꞌatia Nucën Papa Dios cuëëncë a ñu ꞌati ꞌain, axa mitsun Papa Dios ꞌain.
Usaquian cacëxun cuati ca bëtsi unin banasama ca ënën bana ꞌicë quiax sináncasmai ratúcancëxa.
Uni baísquiti ñui quicë bana
(Mt 22.23-33; Lc 20.27-40)
18Usa ꞌain ca Jesúsnu saduceo unicama cuancëxa. Saduceo unicaman ca —bama ꞌaish ca uni baísquitima ꞌicë —quixun sináncëxa. Usaquin sináncë ꞌaish anu cuanxun ca Jesús ñucáquin cacëxa: 19—Nun ꞌunánun ca Moisésnën ësai quicë bana cuënëocëxa, uni achúshinëxa bëchicëñuma ꞌaish bamacëbëtan ca aín xucënan aín casunancë xanu bixun, ami bacë bëchiti ꞌicën. Usoquian ꞌacëx ca aín bëchicë ax aín xucënan bëchicësa ꞌiti ꞌicën. 20Usa ꞌain cananuna mi ñucatin. Uni achúshi ca mëcën achúshi ꞌimainun achúshi ꞌanácañu ꞌiacëxa. Usa ꞌixun ca atun apan an xanu biacëxa. Biaxbi ca bacë bëchiaxmabi bamacëxa. 21Baman aín xucënan casunancë xanu biaxbi ca aín xucën axribi bacë bëchiaxmabi bamacëxa. Usaribiti ca a xanu biaxbi aín xucën bëtsíxribishi bamacëxa. 22Usa ꞌain ca xucën camáxbi a xanu biaxbi bacë bëchicëñuma ꞌinun bamacëxa. Acamaxa bamai cëñúan ca a xanúxribi bamacëxa. 23Camaxunbi ca a xanu biacëxa. ¿Usa ꞌain cara anun unicama baísquiti nëtën acama uinu ꞌicë́xira aín bënë ꞌiti ꞌic?
24Cacëxun ca Jesusan cacëxa:
—Usama ca. Mitsun Nucën Papa Diosan bana cara uisaira quia quixun cuanan aín cushiribi ꞌunánquinma camina usaquin ꞌë ñucatin. 25Bama ꞌaish baísquiquin ca unin xanu bitima ꞌicën, aín ini bëchicë ca unin bënumitima ꞌicën. Usaribi ca naínu ꞌicë ángelcamaxribi ꞌicën. 26Mitsúnmi —bama ꞌaish ca uni baísquitima ꞌicë —quixun sinania cana mitsu cain, ca usama ꞌicën. ¿Caramina Moisésnëan imaxu nëëmëtia isa ñui quicë bana iscëma ꞌain? Imaxu rëquirucënuax banaquin ca Nucën Papa Dios Moisés ësaquin cacëxa: “ꞌËx cana Abraham, Isaac, Jacob acaman rabicë Dios, a ꞌain”. 27A bana cuënëo isquin cananuna ꞌunanin, Nucën Papa Dios, ax ca bama ꞌaísha baísquitima unicaman Diosma ꞌicën. Ax ca camabi aín unicaman rabicë Dios a ꞌicën.
A pain Nucën Papa Diosan bana axa quicësabi oiira ꞌiti
(Mt 22.34-40)
28Usaquian Jesusan suduceo unicama caia ca an Moisésnën cuënëo bana ꞌunáncë uni achúshinën uquin cuacëxa. Cuacëxuan saduceo unicaman ñucácë bana a upí oquin ñuia cuaxun ca an Jesús cacëxa:
—¿Uinu ꞌicë Nucën Papa Diosan bana cuënëo quicësa oíira caranuna ꞌiti ꞌain?
29Quixuan cacëxun ca Jesusan cacëxa:
—Axa quicësabiira oi ꞌiti bana ax ca ësai quia: “Israel unicama, ca cuat. Nucën ꞌIbu Dios ax ca achúshi ꞌicën. 30Min ꞌIbu Diosmi camina asérabi cuëëni cëmëima sinánti ꞌain. Usa ꞌaish camina ami catamëti ax cuëëncësabi oíshi ꞌiti ꞌain”. Ax ca a pain Nucën Papa Diosan bana ax quicësabi oíira ꞌiti a ꞌicën. 31Ënë́xribi ca a banasaribi ꞌicën: “Mixmi bëruancacësaribi oquin camina min aintsicama nuibanan ꞌaquinsa ꞌicë ꞌaquinti ꞌain”. ꞌAíma ca axa quicësabi oía uni ꞌiti ënë bana rabë́saribi bana ꞌicën. 32Usaquian cacëxun ca an Moisésnën cuënëo bana ꞌunáncë unin cacëxa:
—Usa ca. Mixmi quicë bana ax ca asérabi ꞌicën, Nucën Papa Dios, ax ca achúshishi ꞌicën. Bëtsi Dios ca ꞌaíma ꞌicën. 33Cëmëima asérabi cuëëni, ax cuëëncësabi oi ꞌi ami sinánan unin axa bërúancacësaribi oquin aín aintsicama nuibanan ꞌaquinsa ꞌicë ꞌaquincëbë ca Nucën Papa Dios cuëënia, judíos unían aín ꞌucha cupí ꞌaracacë ñuina rëxun xarocëbëa ꞌicësamaira oi.
34Usaquian a bana ñuiquin cacëxun ca Jesusan a uni cacëxa:
—Nucën Papa Diosan uni ꞌiisa camina ꞌain.
Usaquian a uni caia cuaxun ca ui unínbi ñucátëcëanma ꞌicën.
Uin rëbúnqui cara Cristo ꞌicë quicë bana
(Mt 22.41-46; Lc 20.41-44)
35Anuxun Nucën Papa Dios rabiti xubunuxun bana ñuixuni ca Jesús quiacëxa:
—¿Uisa ꞌaish cara an Moisésnëan cuënëo bana ꞌunáncë unicamax quia, Cristo ax ca Davitan rëbúnqui ꞌicë quiax? 36Nucën Papa Diosan Bëru Ñunshin Upitanbi ca David ësaquin quimiacëxa:
Nucën ꞌIbu Diosan ca ꞌën ꞌIbu caxa, “axa mimi nishcë unicama ꞌën mi ꞌibuamimainun camina mix ꞌëbë ꞌapu ꞌaish ꞌën mëqueu ꞌiti ꞌain”.
37Usai qui ca David ax —Cristo, ax ca ꞌën ꞌIbu ꞌicë —quiax quiacëxa. ¿Ësaia quiá ꞌain cara Cristo uisax Davitan rëbúnqui ꞌiti ꞌic? Usaía quia ca ꞌaisamaira ꞌixun unin cuëënquin cuacëxa.
Jesusan an Moisésnën cuënëo bana ꞌunáncë unicama ñuia
(Mt 23.1-36; Lc 11.37-54; 20.45-47)
38Cuatia ca bana ñuixunquin Jesusan ësaquin atu cacëxa:
—An usaía judíos unicama ꞌinun Moisésnën cuënëo bana ꞌunáncë unicamax ꞌicësaribiti camina ꞌitima ꞌain. Atux ca chupa chaxcë́ pañuax niti cuëëanan anuxun ñu marucë anuxuan unin —ax ca nun cushi ꞌicë —quixun sinánquin mëcën ꞌinánquin biti cuëënia. 39Usai ꞌianan ca anu judíos unicama timë́ti xubunu unicamabë timëti, anua aín cushicamax tsóti a anu tsotishi cuëënia, ꞌianan ca pi timë́xun anu aín cushicama tsóti anu tsónuxun caisia, atusaribi ꞌicatsi quixun. 40Usai ꞌianan ca casunamëcë xanun ñu bicuanquin cëñuia. Cëñuanan ca ax isa upí ꞌicë quixuan unin sinánun quiax, ꞌuran pain Nucën Papa Diosbë banaia. Usa unicama ca Nucën Papa Diosan, axa usai ꞌicëma uni ꞌacësamaira oquin ꞌuchoti ꞌicën.
Xanu casunamëcënëan Nucën Papa Dios curíqui nanxúan ñui quicë bana
(Lc 21.1-4)
41Usaquin anuxun Nucën Papa Dios rabiti xubunuxun unicama catancëx ca Jesús anu curíqui nanti ñu ꞌurama ami bësui tsóbuacëxa. Tsóxun ca anu nanti ñu anua unicaman curíqui nania isacëxa. Iscëxun ca ꞌaisamaira curíquiñu unicama an ꞌitsa curíqui nancëxa. 42Nancëbë uquin ca xanu casunamëcë ñuñuma, anribi manë curíqui rabë́ratsu nancëxa, axa cupímara ꞌicëbi. 43-44Nancëbëtan cuëncë́xa aia ca Jesusan aín ꞌunánmicë unicama cacëxa:
—ꞌItsaira curíquiñu unicaman ca anun ñu maruquian tëxëocë curíqui anu curíqui nanti ñunu ꞌaruaxa. Usa ꞌaínbi ca xanu casunamëcë ënën asérabi cuëënquin ꞌaisa tanquin anúan ñu marutibi ꞌaíma ꞌitánun aín curíquicamaishi ꞌaruaxa. Usa ꞌain cana asérabi mitsu cain, curíquiñu unicaman ꞌacësamaira oquin ca a xanun aín curíqui ꞌinánxa.
Pašlaik izvēlēts:
Marcos 12: cbrPB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1978, 1995, 2008, 2022 Wycliffe Bible Translators, Inc. All rights reserved.