Mateo 27
27
Pilato Jesús ꞌináncan
(Mr 15.1; Lc 23.1-2; Jn 18.28-32)
1Pëcaracuatsincëbë ca judíos sacerdotenën cushicamabë ampan caniacëcë unicamax timë́ax Jesús ꞌacatsi quiax ꞌësë́nancëxa. 2Usai quitancëxun nëaxun ca Poncio Pilato, a nëtënu ꞌicë unicaman cushi, anu buáncëxa.
Usaía Judas bama
(Hch 1.18-19)
3Usa ꞌain ca Judas, an Jesús uni bimicë, ax Jesúsa ꞌanuxun bicancë isi sinanatëcëancëxa. Sinanabiani anuxun Nucën Papa Dios rabiti xubunu cuanxun ca anu ꞌicë judíos unibunën cushicama treinta curíquia biixancë a ꞌinántëcëancëxa. 4ꞌInánquin ca cacëxa:
—ꞌËn cana ñancánbi ꞌuchañuma ꞌicëbi a uni mitsu ꞌinan. Usa ꞌaish cana ꞌëx ꞌuchañuira ꞌain.
Cacëxunbi ca cacancëxa:
—A ñu cananuna nun ꞌunaniman. Ax ca min ꞌuchabi ꞌicën, minbi camina mëníoti ꞌain.
5Usoquian cacancëxun curíquicama anuxun Nucën Papa Dios rabiti xubunuxun pubiani cuanx ca Judas axbi tëtsë́qui bamacëxa. 6Judasnëan pubiancë a curíqui bitsi ca judíos unibunën cushicamax canani quiacëxa:
—Anun uni itsin ꞌaminun uni cupíocë ꞌaish ca ënë curíquinëx anu curíqui nancë ñu anu nainsama ꞌicën.
7Usai cananxunbi sinántëcënxun ca a curíquinënbi an me ñutëocë uni aín me maruaxa, a mex isa amanuax ucë uni bamaia anu maínti ꞌiti ꞌicë quixun sinánquin. 8Bërí nëtë́nribi ca unix a me ñui quia —a mex ca uni ꞌaminuxun cupíocë curíquinën biá ꞌicë —quiax. 9-10Usai ca ꞌiti ꞌicë quixuan Nucën Papa Diosan cacësabi oquin ca Jeremíasnën ësaquin cuënëocëxa: “Treinta curíqui judíos unibunëan Jesús atu ꞌinánun uni itsi ꞌináncë, a curíqui bitëcënquin ca anua mapú ꞌicë me a maruaxa. Usoquin Nucën ꞌIbu Diosan ꞌë cacësabi oquin cana cuënëoin”.
Jesúsa Pilato ꞌináncan
(Mr 15.2-5; Lc 23.3-5; Jn 18.33-38)
11Usoxun ca judíos unima ꞌaíshbi anu ꞌicë unicaman cushi, Pilato cacë, anu Jesús buáncancëxa. Buania ca Pilatonën cacëxa:
—¿Mix caramina judíos unicaman ꞌapu ꞌain?
Cacëxun ca Jesusan cacëxa:
—Asérabi cana ꞌëx a ꞌain, minmi cacë, usa.
12Judíos sacerdotenën cushicamabëa ampan caniacëcë unicamax Pilatomi manáncëbëbi ca Jesús banama ꞌicën. 13Usaía judíos unibunëx quicëbëtan ca Pilatonën Jesús cacëxa:
—¿Mimia manáncania caramina cuatiman?
14Cacëxbi banaquinma ca Jesusan a ñuia quicë bana achúshirabi —usama ca —quixun cáma ꞌicën. Ax banaiama oquin —¿uisa uni cara ënëx ꞌic? —quixun sinani ca Pilato ratúacëxa.
Jesús ca bamati ꞌicë quixuan Pilatonënribi ca
(Mr 15.6-20; Lc 23.13-25; Jn 18.38–19.16)
15Anun chamiti ñucëñunma ꞌacë pán piti nëtëa sënë́ncëma pain ꞌain ca Pilátonën usabi oquin ꞌacë ꞌixun a uni chiquínuan judíos unibunën ñucácë, a sipunua chiquínti sináncëxa. 16Usa ꞌain ca anu sipuacë unicama a achúshi ꞌiacëxa Barrabás cacë, camabi unían uisa uni cara ax ꞌicë quixun ꞌunáncë. 17-18—Nutsi ami nishquin ca judíos unibunën Jesús ꞌënu bëaxa —quixun ꞌunánquin Jesús chiquíntisa tanquin ca Pilatonën judíos unibunën ꞌapucamaxa timëtia cacëxa:
—¿Mitsux cuëëncëbëtan carana ui uni mitsu chiquínxunti ꞌain? ¿Carana Barrabás chiquínti ꞌain? ¿Carana Jesús, Cristo cacë, a chiquínti ꞌain?
19Pilatoa anuxun uni manania cuati, anu ꞌain ca aín xanun achúshi uni xuquin Pilato ësoquin camiacëxa:
—Ënë uni cupí cana masáquin namáan. Ax ca ꞌuchañuma ꞌicën. Usa ꞌain camina a ꞌanun uni ꞌinántima ꞌain.
Ësaquian aín xanun camicë banaribi sinánquin ca Pilatonën Jesús chiquíntisa tancëxa.
20Pilátonën —¿ui carana chiquínti ꞌai? —quixun ñucácëxbi ca judíos sacerdotenën cushicama ꞌimainun ampan caniacëcë unicamax anu ꞌicë judíos unicama timëcamëëocë a tsuaquirumi quiacëxa, —Camáxbi cananuna quiti ꞌain, Barrabas chiquíanan ca Jesús ꞌati ꞌicën. 21Usa ꞌain ca Pilatonën —¿ënë uni rabë́ carana uinu ꞌicë mitsu chiquínxunti ꞌai? —quixun ñucátëcënquin cacëxun —Barrabás camina nu chiquínxunti ꞌai —quixun cacëxa. 22Cacëxun ca Pilatonën cacëxa:
—¿Barrabás chiquíanan Cristo cacë ënë ꞌën uisoti caramina cuëënin?
Cacëx ca quicancëxa:
—Bamatanun ca i curúsocënu matás.
23Quicania cuaquin ca Pilatonën cacëxa:
—¿Añu ñu ꞌaisama cara ꞌax?
Cacëxbi ca unicama munuma cuëncëni quitëcëancëxa:
—Bamatanun ca i curúsocënu matás.
24Usa ꞌain ca mëníoisama ꞌinun sharati unicama tsuáquirumisari ꞌia isi, atun ismainunbi, ꞌumpaxan mëchucaquin ca Pilatonën cacëxa:
—Ënë uníxa bamacëbëbi ca ꞌën ꞌuchama ꞌicën. Mitsux cuëënxun camina ꞌati ꞌain.
25Cacëxun ca anu ꞌicë unicaman cacëxa:
—Ca nun ꞌucha ꞌimainun nun rëbúnquicamananribi ꞌiti ꞌicën. 26Quicëbëtan ca Pilatonën Barrabás chiquíanan suntáru rishquimitancëxun i curúsocënu matásnun quixun atu ꞌináncëxa.
27Usomitancëxuan ꞌináncëxun ca suntárucaman anua Pilato ꞌicë xubu mëúa ꞌicë anu Jesús buáncëxa. Buánxun ca suntárucaman raíri timëacëxa. 28Timëxun ca Jesús ax isa ꞌapu ꞌicë quixun ꞌusánquin aín chupa pëmixun chupa minanën pucucësa a pañumianan 29muxa mañuti otancëxun mañumianan aín mëcën mëqueua tuínun tsati ꞌináncëxa. Usotancëx aín bëmánon rantin puruni tsóbuquin ca ꞌusánquin cacëxa:
—Judíos unicaman ꞌapu camina mix ꞌain. 30Caía raírinëx ami tushuquimainun ca raírinënribi a ꞌináncë tsati bitëcënquin anun matáxcacëxa. 31Usoquin ꞌusántancëxun ca a pañumicë chupa pëmianan aín chupa pañumitëcëancëxa. Pañumitancëxun ca i curúsocënu matásti buáncëxa.
Jesús i curúsocënu matáscan
(Mr 15.21-32; Lc 23.26-43; Jn 19.17-27)
32Jesús buani cuanquinbi ca suntárunën Cirene cacë ëmanu ꞌicë uni, Simón cacë, a mëraquin cacëxa:
—Min camina anu Jesús matásti i curúsocë ënë ꞌiábianti ꞌain.
Cacëxun ca a unin buánxuancëxa. 33Buáncëbëtan Jesús buaunx ca Gólgota cacë menu bëbacancëxa. Gólgota quicë, ax ca mapuxosa qui quicë ꞌicën. 34Anuxun ca vino mirra mucairacëñun mëscucë a isa xëanun quixun Jesús ꞌináncëxa. ꞌInáncëxunbi ca tantancëxun ꞌaisama tancëxa.
35Usaía ꞌia anu matástancëxun ca suntárunën anuaxa Jesús bamanun i curúsocë nitsíancëxa. Nitsíntancëx ca uin cara isa aín chupa bëtsi bëtsi biti ꞌicë iscatsi quixun ñuratsu pain niquin tantancëx Jesusan chupa mëtíquiacëxa. Usa ꞌain ca a Nucën Papa Dios quicë bana uni ñuixuncë uni quiásabi ꞌiacëxa, ësai quicë: “ꞌËn chupa ca ñuratsu pain niquin tantancëx mëtíquiaxa”. 36Bitancëx anu tsóxun ca unínma Jesús i curúsocënua nampatia quixun bërúancëxa. 37Bërúanquin ca Jesusan maxcá manámi, uisa ꞌicë cara bamamiaxa quixun cuënëocë bana matásacëxa, ësai quicë: “Ënëx ca Jesús, judíos unibunën ꞌapu, a ꞌicën”.
38Jesús ꞌacësaribi oquian suntárunën i curúsocënu matáscë ca an ñu mëcamacë uni rabë́ ꞌiacëxa. Bëtsíxa aín mëqueu ꞌimainun ca bëtsi Jesusan mëmiu ꞌiacëxa. 39Usa ꞌain ca anua matáscë anun cuanquin a isi tëncëti ami ꞌatimati banaquin, 40unicaman Jesús cacëxa:
—Mix camina: ꞌËn cana anuxun Nucën Papa Dios rabiti xubu rurupatancëxun rabë́ ꞌimainun achúshi nëtë́inshi amiribishi nitsínruquin ꞌatëcënti ꞌai quiax quian. Usa ꞌaish ca min cushínbi ië́t. Mix Nucën Papa Diosan Bëchicë ꞌaish ca ië́nux i curúsocënuax ꞌibút.
41Usaribiti ca sacerdotenën cushicamabë an Moisésnën cuënëo bana ꞌunáncë unicama ꞌimainun fariseo unicama ꞌimainun ampan caniacëcë unicama, acamax Jesús ñui ꞌatimati banai, ami cuai ësai canancëxa: 42—An uni raíri ië́micësaribi oi ië́tibi ca ië́tima. Ax ca Israel unicaman ꞌapu ꞌicë quixúnu nun ꞌunánun bërí i curúsocënuax ꞌibutibi ca ꞌibutíma. 43Ax isa aín Bëchicë ꞌaish Nucën Papa Diosmi catamëtia ca quiaxa. Ax asérabi anun cuëëncë ꞌixun ca Nucën Papa Diosan bërí ië́mitsianxa, usa ꞌaínbi ca ië́mima.
44Usaribi oquin ca aribia i curúsocënu matáscë an ñu mëcamacë uni rabëtanribi Jesús ꞌatimaquin ñuiacëxa.
Jesús bama
(Mr 15.33-41; Lc 23.44-49; Jn 19.28-30)
45Usa ꞌain ca bari xamárucëbëbi me bëánquiacëxa. Bëánquiax ca rabë́ ꞌimainun achúshi hora bari pëquitëcëancëxa. 46Usai ꞌicëbë bari pëquitëcëntishi ꞌain ca Jesús munuma cuëncëni quiacëxa: “Elí, Elí, lama sabactani”. Usai quicë bana, ax ca —ꞌën Papa Dios, ꞌën Papa Dios, ¿uisa cupí caramina ꞌë ëan? —qui quicë ꞌicën. 47Usai quia cuëncënia cuati ca anu ꞌicë unicama raírinëx quiacëxa:
—A unin ca unun quixun Elías cuënia.
48Usaía ꞌicëbë abácuatsini uquin ca anu ꞌicë uni achúshinën tsatimia xapu rëmencë a bimi baca cachacëmi chabóxun Jesús cucúcaquian xëanun ꞌamiacëxa. 49Usoquian ꞌináncëbëbi ca raírinëx quiacëxa:
—Mëëxunma ca ën, Elías cara a ië́mi aia isti.
50Usa ꞌain ca munuma cuëncë́ntëcënishi Jesús bamacëxa. 51Jesús bamacëbë ca Nucën Papa Diosan ꞌimicëx anuxun a rabiti xubu mëu anun bëpáncë chupa aín manámiucüaxbi shimúqui amo rabë́ ꞌinun tuquiacëxa. Usai ꞌicëbëa me shaíquicëbë ca maparacamaxribi tuquibuacëxa. 52Tuquimainun ca mapara quiniocë anu uni bamacë mëníocëcama axribi turabëacëxa. Turabëcëbë ca anuax Nucën Papa Diosnan ꞌaísha bama unicamax baísquiacëxa. 53Baísqui nirui anua racan anuax chiquítancëx ca Jesúsa baísquicëbë Jerusalénu cuancëxa. Cuancë ca ꞌitsa unin anuxun isacëxa.
54Me shaíquimainuan usai bëtsi ñuribi ꞌia isi ca suntárunën cushibëtan an unínma Jesús i curúsocënua nanpatia quixun a bërúancë suntárucamaxribi ꞌaisamaira racuë́acëxa. Racuëti ca —ënë unix ca asérabi Diosan Bëchicë ꞌiaxa —quiax quiacëxa.
55Jesús ñu ꞌaxúnuxa Galileanuax abë ucë ꞌitsa xanúxribi ca anu ꞌiacëxa, anu ꞌixun ca ꞌura nixun isacëxa. 56Anu ca María Magdalena ꞌimainun María itsi, Santiago ꞌimainun Josénën tita, a rabë́ ꞌimainun Zebedeonën bëchicënën tita, acama ꞌiacëxa.
Jesús bamacë mënío ñui quicë bana
(Mr 15.42-47; Lc 23.50-56; Jn 19.38-42)
57A nëtë bari cuabutia bëbaquishcëbë ca ꞌitsaira ñuñu uni Arimatea ëmanu ꞌicë, José cacë, ax ami sináncë ꞌaish, anuaxa Jesús bamacë anu cuancëxa. 58Cuantancëx anu cuanxun ca Pilato cacëxa:
—Jesús ca bamaxa, cana buántisa tanin.
Cacëxun ca Pilatonën aín suntárucama buántanun ꞌinánun quixun cacëxa. 59Usaquian cacëxun ꞌináncëxun biquin ca Josénën sábana upí, anun rabúnbianquin buánxun 60anua aín aintsi mëníotia bërí naëcë matá tëmú anu Jesús mëníonuxun buáncëxa. Buánxun anu Jesús mëníotancëxun ca taránbianxun maxax cha anun naëcë quini xëpuacëxa. Usobiani ca cuancëxa. 61Usoquian Josénën Jesús mëníoia ca María Magdalena ꞌimainun María itsi an ꞌurama tsóxun isacëxa.
Suntárunëan anu Jesús mëníocë quini bërúan
62Anun ñu mëëtima nëtën ꞌati ñu mëníoti nëtë ꞌinúon ca anun ñu mëëtima nëtën judíos sacerdotecaman cushicamabë fariseo unicama Pilato isi cuancëxa. 63Cuanxun ca cacëxa:
—A cëmë unix ca bamacëma pain ꞌaish: ꞌËx cana bamaxbi rabë́ ꞌimainun achúshi nëtë ꞌicëbë baísquiti ꞌai quiax quiaxa. A bana cananuna sinanin. 64Usa ꞌain camina anua a racáncë quini, a rabë́ ꞌimainun achúshi nëtë inútamainun min suntáru upí oquin mëníomiti ꞌain, aín ꞌunánmicë unicamánma imë́ uxun isa baísquiaxa quinuxun bibianquin buania. Buánxun ca unicama paránti ꞌicën, Jesús isa baísquiaxa quixun. Usaquian paráncëbë ca bëráma ꞌacësamaira oquin parántëcëncë unicama ꞌiti ꞌicën. Usa ꞌain camina a quini upí oquin mëníomiti ꞌain. 65Quia ca Pilatonën cacëxa:
—Ënu ca ꞌën suntárucama ꞌicën. A buánxun camina mitsun cuëëncësa oquin a quini upí oquin mëníomitancëxun bërúanmiti ꞌain.
66Usaquian cacëx cuanxun ca anu Jesús racáncë quini anun xëpúcë maxax cha a unían xëocaia iscatsi quixun ꞌunántiocëxa. Usotancëxun ca an bërúanun quixun suntáru raíri anu ëancëxa.
Pašlaik izvēlēts:
Mateo 27: cbrPB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1978, 1995, 2008, 2022 Wycliffe Bible Translators, Inc. All rights reserved.