KEJADIN 7
7
Banjir si mbelin
1Nina TUHAN man Nuah, “Bengketlah kam ras kerina keluargandu ku bas kapal e. Sada kam nari ngenca i bas doni enda erbahan si mehuli Kuakap. 2Buat pitu pasang tep-tep erbage rubia-rubia si la ipantangken rikutken aturen agama. Tapi rubia-rubia si pantangen buat sepasang saja tep-tep erbage. 3Buat ka perik pitu pasang tep-tep erbage. Enda ibahan gelah tep-tep erbage rubia-rubia ras perik-perik la lesap, janah gelah ertambah-tambah ka ia pagin i doni enda. 4Pitu wari nari Kupesusur me udan empat puluh wari empat puluh berngi dekahna, gelah ikernepkenna kerina si nggeluh si enggo Kujadiken.” 5Kasa kai si iperentahken TUHAN, kerina ilakoken Nuah.
6Sanga banjir si mbelin e jadi i doni enda umur Nuah 600 tahun. 7E maka bengket me Nuah ras ndeharana, anak-anakna ras permainna ku bas kapal e, gelah ola ia mate ibahan banjir e. #Mat 24:38-39; Luk 17:27
8-9Bage pe tep-tep pasang rubia-rubia ras perik-perik subuk pantangen ras si la pantangen, kerina bengket ras Nuah ku bas kapal e, sue ras si iperentahken Dibata.
10Pitu wari kenca si e, jadi me banjir si mbelin e.
11Asum umur Nuah 600 tahun, i bas wari sepuluh pitu bulan si peduaken, talang me kerina ulu lau si mbelang i teruh taneh, ras kerina pintu lau si mbelin i datas langit. #2Pet 3:6 12E maka reh me udan meder empat puluh wari empat puluh berngi dekahna ku doni enda. 13I bas wari e me Nuah ras ndeharana bengket ku bas kapal e rikut pe ras telu kalak anakna dilaki, Sem, Ham, Japet, ras teluna permainna. 14Ikut pe ku bas kapal e, tep-tep erbage rubia-rubia si melemuk ras si meliar, kitik ras mbelin, bage pe tep-tep erbage perik-perik. 15Kasa kai si nggeluh, bengket kerina tep-tep pasang ku bas kapal e ras Nuah, 16bagi iperentahken Dibata. Kenca Nuah bengket, ipintu TUHAN pintun kapal ndai.
17Banjir si mbelin e enggo empat puluh wari dekahna, e maka enggo kenca cukup bagesna lau e, terangkat me kapal e seh bombang. 18Lau ndai terus erbagesna, e maka kapal ndai bombang-bombang i babo lau. 19Erkiteken lau e erbagesna, tampuk deleng si meganjangna pe gedap ibahanna. 20Lau tambah denga terus seh pitu meter enggo ganjangen asa tampuk deleng-deleng. 21Kasa kai si nggeluh i bas doni mate; perik-perik, rubia-rubia, jelma, kerina mate. 22Kasa kai si erkesah si lit i bas doni enda mate kerina. 23Ikernepken TUHAN kerina si nggeluh i bas doni enda – manusia, rubia-rubia bage pe perik-perik. Nuah ras si ikut i bas kapalna e ngenca tading. 24Seratus lima puluh wari dekahna lau lalap la surut-surut.
Pašlaik izvēlēts:
KEJADIN 7: BTX
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Batak Karo Bible © Indonesian Bible Society, 2003.