Luk 5
5
Zɛzi abɔnɔ bayokwɛ beji ba boho
( Matiye 4.18-22; Maliki 1.16-20)
1Ibwate buya, Zɛzi ajasa o popoko ya itaba ja Zenezalɛti. Ya lupu ja bato jakuba ango kanganga, iyokaka iyɔkɔ ja Zambe. 2Ya ango ayɛnɛ bembongo beba o ibongo ja itaba. Banganga ba zowa bahulasa o bembongo byɛ, bajasa ijɛlɛcɛ kundanda o bakɔ bango. 3Okate, Zɛzi te ahakama ukwa iyate embongo. Embongo mɛnɛ yajasa ya Simɔn. Ya ango ahimwa ango te: «Pamaka na ibongo.» Na ango ihula hinsi ukwa embongo na ihɛlɛcɛ lupu iyɔkɔ ja Zambe. 4Usya ya ango ahijɛsɛ bosɔhokɔ, ya ango asɔhɔ na Simɔn te: «Hizɛcɛ embongo bya lebebe ya mbɔku, usɛ byenanjɛcɛ bakɔ na ibandaka bafɛ.» 5Ya simɔn ahungwɛ neji te: «Lɔnji, bɛhɛ besomba na epundu ya ntula teka banda na fɛ. Nde na bosina bwa omutanda mɛ mabinanjɛcɛ bakɔ.» 6Okate, bango te bananjɛ bakɔ, na ibandaka bafɛ buce, bakɔ bahakasa inyawanaka na bojilo bwa bafɛ. 7Ya bango balejɛ bana nyangwɛ bajasa o iyate embongo iyaka inyamwaka bango, ya bango te baya, na ilozɛcɛ bembongo byahajɛ beba humɔn, byaya kuni lɔbwe. 8Usya Simɔn Pyɛli ayɛnɛ nɛ, ahuma ma bɔngɔ oboho bwa Zɛzi na isɔhɔkɔ te: «Ku emɛ, pamaka na namɛ bosina te majɛ moto wa mesɛmbɛ.» 9Simɔn na ba bango ango bajasa, bɔngɔ te bwa banda bango, na bosina bwa njanga mwa bafɛ mwa bango abandasa. 10Na bana ba Zebede, Zaki na Za, baji bana nyangwɛ ba Simɔn bayɛnɛsɛ etɛ mɛnɛ. Zɛzi asɔhɔ na Simɔn te: «Teka lɔngɔ, ijaka na ijaka, nsombu mwa omakabeka, habe minɛ mwa bafɛ, nde mwa ibandaka bato.» 11Bango te bahunwana na bembongo bya ibongo na isɛmɛcɛ, na ijikaka bemba byɛ byahajɛ ya bango bahinjɛ Zɛzi.
Zɛzi ahaka moto wa bejima
(Matiye 8.1-4; Maliki 1.40-45)
12Usya Zɛzi ajasa o iyate betafɛlɛ ya njenja mɔngɔ ya Ngalile, ndomana apwa okate, nyɔlɔlɔ na bejima, usya ya ango ayɛnɛ Zɛzi, afa nyo oboho bweji, molo na hehe na ibɔndɔkɔ te: «Ku amɛ wɛnɛ onɔnɔ okungwaka imɛ.» 13Zɛzi asambɛ obɔ na ibandaka ango, ya ango asɔhɔ na neji te: «Menɔnɔ! Kungubwaka!» Ibujɛkɔ bejima te byamanya ango nyo. 14Zɛzi awɛ moto mɛnɛ nceko te: «Teka tanda na moto, lwako hɛlɛcɛ nyo na we mwa bebuwa. Ete owɛ ebuwa ya Moyizi akwɛlɛsɛ, ihɛlɛcɛ te oyonga.» 15Kuma ya Zɛzi ya landakasa buce. Lupu ja bato jasɔnɔkɔsɔ iyokaka ango, na ihakaka manyo ma mango na bembanganya. 16Nde, Zɛzi adambwakasa nyo usya teka bato, ilwaka ibɔndɔngɔkɔ.
Zɛzi ayonjɛ ekata
( Matiye 9.1-8; Maliki 2.1-12)
17Ibwate buya, Zɛzi ajasa ihɛlɛcɛ Iyɔkɔ ja Zambe , bafalizɛ na melɔnji mya nceko, bajasa mehinsi, bayengasa bya mamboka mahajɛ ma njenja mɔngɔ ya Ngalile, Zude na Zɛluzalɛmi. Tuma ya Ku yahɛlubwɛsɛ na iyonjɛcɛ membɛlu. 18Bato te baya na ebungulukata ukwa cipɔyi, bahakasa ikweyaka neji o katɔ ya elongwɛ oboho bwa Zezi. 19Nde, bango teka peko ya ikweyaka, bosina bwa lupu ja bato, ya bango ba beta ukwa mwaza, batuba itulu na ihulɛcɛ mbɛlu o katɔ ya elongwɛ na ebungu o lebebe ya bato na oboho bwa Zɛzi. 20Usya ango ayɛnɛsɛ ibukwɛ ja bango, ya Zɛzi asɔhɔ na mbɛlu te: «Mesɛmbɛ myɔbɛ myekungwana.» 21Melɔnji mya nceko na ba-Falizɛ batemanga na isɔhɔkɔ te: «Otɛ moto alowa Zambe otɛ beza? Aji na pizo ya iyɛnɛcɛ soso ya mesɛmbɛ habe Zambe amɛnɛ?» 22Zɛzi ayebakasa matemange ma bango, asɔhɔ na bango te: «Ya byatemanga o melema mya bihi nɛ nde? 23Yajɛ teka buji isɔhɔkɔ te: “Mesɛmbɛ myɔbɛ myekungwana,” ice isɔhɔkɔ te : “Tɛmɛcɛ ete ojonga”? 24Nde mahaka te byayebace te: Mwana moto aji na pizo o hehe ya iyɛnɛcɛ soso ya mesɛmbɛ.» Ya ango asɔhɔ na ekata te: «Matanda ɔbɛ yemwaka! Tombɛcɛ ebungu ɔbɛ ete olwa bya itona jɔbɛ!» 25Ibujɛkɔ, moto wɛ te ayemwa oboho bwango atombɛ ebungu eji ya ango ajakasa na ilwaka bya itona jeji alwa kumɛ Zambe. 26Bato bahajɛ ayecɛ, na ikumɛcɛ Zambe. Bajasa na bɔngɔ buce na isɔhɔkɔ te «Bɛhɛ beyɛnɛ mwɛnhɛ bemba bya ngambala.»
Zɛzi abanga Levi
( Matiye 9.9-13; Maliki 2.13-17)
27Ombiya mɛnɛ, Zɛzi apwa na iyɛnɛcɛ nkwe mwa bokula, mwa jinɔ te Levi, hinsi usya ango akwa bokula, asɔhɔ neji te: «Hinjɛcɛ imɛ.» 28Levi te ajika bemba bweji byahajɛ ayemwa na ihinjɛcɛ Zɛzi. 29Levi awɛ ango maja buce bya Elongwɛ eji, yajasa na bakwe babokula buce, na ibate bato ijaka maja bango na ango. 30Bafalizɛ na melɔnji mya Nceko, bajasa bango ango, bakakwakasa ango, na isɔhɔkɔ na bayokwɛ ba Zɛzi te: «Ya byaja na iwanka bihi na bakwe babokula na bato bamesɛmbɛ bende?» 31Zɛzi ahungwɛ na bango te: «Bato baji na manyo ma mbɛ, bahake moto ehakaka bango, nde, baponga bango bahaka moto ehakaka bango. 32Mata ya ibangaka bato hongɛcɛ bejɛmi bya ango, nde mamuya bosina bwa bato bamesɛmbɛ, bosina bwa bango behongɛcɛ bejemi byango.»
Zɛzi asɔhɔ jambo ja ikaci
(Matiye 9.14-17; Maliki 2.18-22)
33Ba Falizɛ basɔhɔ na Zɛzi te: «Bayokwɛ ba Za, bango bebeka ikaci na membɔndu, na bayokwɛ baho bango abeka yumɛnɛ, nde ibɔbɛ baja, na iwanka.» 34Zɛzi ahungwɛ na bango te: « buya bwa boba, byanyɛni loma bato bamuya o elɛsi yaboba ibekaka ikaci, amubana aka bango ango? 35Nde elɔmɔ ya ango aya, usya amubana emanyaka, isi mɛnɛ ya bango bebekaka ikaci.» 36Zɛzi asɔhɔ na bango imwate lembya te: « moto teka anyeni yuwa eluku ya kanda ya ihɛŋwu na ilataka na kanda mya ka, na bosina te kanda mwa ihɛŋwu mwa kusi, hangwɛ na kanda mwa ka. 37Moto teka anyeni howa maku ma ihɛŋwu o mambongo maka, bosina te maku ma ihɛŋwu ma toko pota mambongo maka, ete maku mahoya na mbongo ihemanaka. 38Himama! Maku ma ihɛŋwu bahujɛ o mambongo ma ihɛŋwu. 39Nde, awan maku maka, mwahake minɛ iwanka mihɛŋwu, okate asɔhɔ te maku maka mango ma mbɛ.»
Pašlaik izvēlēts:
Luk 5: KOQ
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES