Maalʉko 7
7
ɄYeesu akhaana ɨmanyizyo zya Bhafalisaayo
(Mataayo 15:1-9)
1-4Ɨnsiku ziila, aBhafalisaayo na Bhayahuudi abhamwabho bhonti saga bhahalyanga ɨshalye sinta asamvye afume mu makhooholo, ahwizushe amiiho ga bhagoosi bhaabho sha gahali. Lwa bhaafuma hu lembuka, bhahasamvyaga nasʉʉti shɨ‑ɨhwanziwa, nka bhalya hamo. Nantele, bhahizuhaga amiiho gaabho agamwabho aminji agɨ mandɨ, nanshi ahwozye ɨmpɨndɨ, amafulila nɨ vyɨlɨɨlo ɨvyɨ shaaba.
Isiku limo, aBhafalisaayo na bhamanyizyi abhɨ ndajizyo zya Moose bhamo bhahɨnza afume hwi‑ibooma ɨlyɨ Yelusaleemu, bhahamʼmʉngaanila ʉYeesu. Bhahabhalola abhasundwe bha Yeesu bhamo bhalya ɨshalye sinta asamvye shɨ‑ɨhwanziwa mu miiho gaabho. 5Ɨpo aBhafalisaayo na bhamanyizyi abhɨ ndajizyo zya Moose bhahamʼmʉzɨɨlɨzya ʉYeesu bhahaga, “Yeenu abhasundwe bhaaho saga bhahwizuha amiiho ga bhagoosi bheetu, lyoli bhalya hu nyoobhe ɨnyaavu?” 6ɄYeesu ahabhaamula ahaga, “Amwɨ muli bhagulugulu. ɄNgʉlʉbhɨ ahayanjile lyoli ashilile hwa nʼkuwi waakwe ʉYesaaya hu nongwa yeenyu huje,
‘Abhantu ɨbha bhahuntendeha anɨ mwi‑ilomu lwene,
lyoli amooyo gaabho gali hutali naanɨ.
7Bhahumpuuta anɨ lwene,
pɨpo ga bhamanyizya miiho ga bhantu,
saga miiho ga Ngʉlʉbhɨ.’ ”#Bhaazya Yesaaya 29:13.
8ɄYeesu ahajendeelela hubhabhʉʉzye huje, “Amwɨ muleha ɨndajizyo zyakwe ʉNgʉlʉbhɨ, muhwizuha amiiho ga bhantu. 9Muli na madala aminza aga‑akhaane ɨndajizyo zyakwe ʉNgʉlʉbhɨ huje, nka mwizuhaje amiiho geenyu! 10ɄNgʉlʉbhɨ ahalajiziizye ashilile hwa Moose huje, ‘Ʉnʼtinihaje ʉso nʉ bhɨɨnyu.’#Bhaazya Afume 20:12; ɨNyiizuho 5:16. Nantele, ahajile, ‘Ʉmuntu wowonti wa‑ahunʼniga ʉyise waakwe awe ʉnyina waakwe, ɨhwanziwa huje afwanje.’#Bhaazya Afume 21:17; ɨMbombo ɨzya Bhalaawi 20:9. 11Leelo amwɨ, mumanyizya muyiga, ‘Shinza lwene nkashele ʉmuntu ahumʼmʉʉzya ʉyise waakwe awe ʉnyina waakwe huje, “Ɨvintu ɨvi nɨnzaga huhwavwe, ɨshi vyabha Kolibani,” ’ hwa huje mpeesya hwa Ngʉlʉbhɨ. 12Amanyizye ɨsho, muhumʼmɨɨha huje, saga amʼmwavwaje nahamo ʉyise waakwe awe ʉnyina waakwe. 13Shɨɨsho sha mugalulanya izwi lya Ngʉlʉbhɨ huje, amwɨ mubhajiiye hwizushe amiiho geenyu mwɨmwɨ. Nantele, mubhomba nyinji lwene zya zilɨngɨɨne nɨ‑ɨzi.”
Ɨmbiibhi zyonti zifuma mu mwoyo
(Mataayo 15:10-20)
14Ɨpo ʉYeesu ahabhʉngaanya ɨmpʉga ya bhantu nantele huje, “Mubhantu amwɨ mwenti ntejelezyaji, nantele muzyaganyaaje zyɨ‑ɨyanga. 15Nahamo ahantu ha hahunʼtʉʉha ʉmuntu na humʼpeele ʉwaavu, lyoli zya zifuma hu mwoyo gwa muntu zya zihumʼpeela ʉmuntu ʉwaavu. 16Ʉmuntu wowonti wa‑ahwʉmvwa, azyaganyaaje na‑alembe mwɨ‑ɨgo ga nabhamanyizya.”#7:16 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani.
17Lwa wayileha ɨmpʉga ya bhantu na‑atʉʉshe mu nyumba, abhasundwe bhaakwe bhahamʼmʉʉzya huje, ayiilule ɨshifwani shiila. 18Ɨpo ahaga, “Ɨshi amwɨ saga muli nɨ njeele ɨzya hushimanye ɨshifwani shiila? Saga mulola huje, ahantu ɨho hahunʼtʉʉha ʉmuntu saga hagamʼpeela ʉwaavu? 19Ɨshalye saga shikhomaana nʉ mwoyo, shishizanya lwene mu vyanda na hwepe mu mʼbɨlɨ.” Ayanje ɨsho, ʉYeesu ahalolesyaga huje, ɨshalye shonti shɨtɨshɨlɨɨlwe alye.#7:19 ɨshalye shonti shɨtɨshɨlɨɨlwe alye Mu ndajizyo zya Moose, aBhaizilaeeli saga bhahɨtɨshɨlwaga alye ɨvyalye vimo nanshi ɨngʉlʉbhɨ nɨ haawa. Bhaazya ɨMbombo ɨzya Bhalaawi 11. 20Ɨpo ahonjeezya huje, “Zya zifuma hu mwoyo gwa muntu, zya zihumʼpeela ʉmuntu ʉwaavu. 21Hwa huje muuhati mu mwoyo mwa mufuma ɨnsɨɨbho ɨmbiibhi, ʉbhembusu, 22ʉwiibha, ʉgoji, ʉweegu, ʉwiimi, ʉbhiibhi, ʉgulugulu, ʉkwelengusu, ʉmwone, ɨndigo, amabaado nʉ kwesu. 23Ɨmbiibhi zyonti ɨzi zifuma muuhati mu mwoyo gwa muntu zya zihunʼneetela ʉmuntu ʉwaavu.”
Ʉlwɨtɨho ʉlwa nʼshɨ ʉmo wa saga Nʼnyahuudi
(Mataayo 15:21-28)
24ɄYeesu na bhasundwe bhaakwe bhahasogola mu mukowa ʉgwɨ Galilaaya, bhahabhala mwi‑ibooma ɨlyɨ Tiilo. Huhuula ahʉʉbha mu nyumba aje, nʉʉmo ʉmuntu wa‑amanye huje, alɨɨho. Leelo, abhantu bhahabha sha bhanʼnolile. 25-26Huhuula hwahali nʉ nʼshɨ ʉmo wa saga ahali Nʼnyahuudi, lyoli ahali wɨ shifumo ɨsha Bhasilofoyiniike mu nsi ɨyɨ Siiliya. Ʉmwalɨ waakwe ahali ni‑ipepo. Ʉnʼshɨ ʉyo lwa wʉmvwa huje, ʉYeesu ali pa pɨɨpɨ, ahamʼmwɨnzɨla, ahasugamila pa manama gaakwe. Ahanʼnaabha huje, amʼmwefwe ʉmwalɨ waakwe ipepo liila. 27ɄYeesu ahamʼmʉʉzya ahaga, “Saga shinza ahweje ɨshalye sha bhaana na‑aponyezye ɨmbwa. Abhaana bhangute nasʉʉti.”#7:27 Alɨngaane na miiho ga Bhayahuudi, aBhayahuudi bhahahwilolaga huje, bhasangalusu ashile abhantu abhanjɨ ɨbho bhahabhalolaga huje, bhaavu nanshi ɨmbwa. Mu shifwani ɨshi, ʉYeesu ahubhakholanya aBhayahuudi na bhaana, nantele ahubhakholanya abhantu bha saga Bhayahuudi nɨ mbwa. 28Ɨpo ʉnʼshɨ ʉla ahamʼmwamula ʉYeesu huje, “Mwɨnɨ, lyoli zyʉ‑ʉyanga zili shɨɨsho. Leelo, abhaana lwa bhalya, ɨmbwa zyope zisebheelezya ɨvyalye vya vilagala pa nsi pa meeza.” 29ɄYeesu ahamʼmwamula huje, “Ɨpo wayanga shinza. Ɨshi sogolaga, ipepo limʼmwepile ʉmwalɨ waaho.” 30Ʉnʼshɨ ʉla ahaweela hu khaaya, ahamʼmwaga ʉmwalɨ waakwe aponile, alambalɨɨye pa shitala, mwinza lwene, ipepo ɨlyo limʼmwepile.
ɄYeesu ahumʼponia ʉnʼdinde
31Lwʉnʉʉlwo ʉYeesu ahasogola na bhasundwe bhaakwe mwi‑ibooma ɨlyɨ Tiilo, ahashilila hu Siidoni, ahaweela hu nsʉmbi ɨyɨ Galilaaya, hu mabooma ishʉmi aga hu Dekapooli.#7:31 Amabooma ishʉmi aga hu Dekapooli gahahwitabhaalaga. Abhantu abhinji abhɨ mabooma ɨgo saga bhahali Bhayahuudi, nantele ɨnjango yaabho yahali Shiyunaani. 32Ʉhwo hwahali nʉ muntu ʉmo ya‑ahali nʼdinde, nantele mʼbwibwi. Abhantu bhamo bhahanʼneeta hwa Yeesu. Bhahanʼnaabha ʉYeesu amʼmɨɨshɨle ɨnyoobhe huje, amʼponie. 33ɄYeesu ahamʼmwefwa pa mpʉga ya bhantu, ahabhala nawo mwene panshɨnjɨ. Ahamʼmɨɨha ɨnsamba zyakwe mu makutu ga muntu ʉla. Ahaswɨla amatɨ pa hasamba haakwe, ahamʼpotozya pa lumɨlɨ. 34Aheenya hu mwanya, ahanʼsaajila, ahamʼmʉʉzya ahaga, “Efaata!” Hwa huje, “Iguha!” 35Pɨnɨɨpo, ʉmuntu ʉla ahiiguha amakutu, ahanda ayanje na hwʉmvwe shinza lwene.
36ɄYeesu ahayikhajiilizya ɨmpʉga ya bhantu huje, bhagandi humʼmʉʉzye ʉmuntu nʉʉmo zya‑abhombile. Ahabhakhaanaga, leelo bhahonjelaga haani ayanje zyɨzyo hwonti. 37Bhahabha nɨ nswigo ɨngoosi haani. Bhahayangaga bhahagaga, “Zyonti zya‑abhombile, nyinza. Ahubhaponia abhantu bha saga bhahwʉmvwa huje, bhʉmvwaje amakutu, bha saga bhayanga huje, bhayangaje!”
Pašlaik izvēlēts:
Maalʉko 7: SBK
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2022, Wycliffe Bible Translators, Inc. All rights reserved.