Genese 30
30
Rahela i Lea ila ve akoremari hoa
1Rahela eavape are Iakobo v'ila akoremari au eraila, la hoa are mariapo ve ukai ve ikikakare leipe; are Iakobo maeape: “Araro hela akoremari aikiaraki, ara apaki ave.” 2Iakobo Rahela hihiri lei mariape: “Ara va Aualari hovea ka, ave aeroa kokaukape la Aualari, kai ave akoremari eraki hoa le hereavape la Aualari.” 3Rahela arero maeape: “Arave horova mari Biliha ma; a arero koarakive; are arave oropa ve akore epakilai, ara areve oki ve akoremari koarakilai.” 4Kahara, are areve horova mari Biliha avarape; Iakobo arero koarape. 5Biliha ero eavi a Iakobo ve akore le epape. 6La hoa Rahela maeape: “Aualari araro heheavape; are arave oharo iapai akore hekai le avikiara.” Laelave are arero rare Dana rare itavape. 7Rahela ve horova mari Biliha aeka ero eaveape, kai Iakobo ve akore ae epape. 8La hoa Rahela maeape: “Ara va heraho eapapo ila, mariapo hahari hovea lei heaorapape;” laelave are arero rare Napatali rare itavape.
9Lea eavape, areve ero hoa karia leipe la hoa, are areve horova mari Silipa Iakobo ve uva hovea avarape. 10Kahara, Lea ve horova mari Silipa Iakobo ve akore epape. 11Lea maeape: “Hoa veveke ma!” laelave are arero rare Gada rare Gada rare itavape. 12Lea ve horova mari Silipa Iakobo ve akore aea kara epape. 13Lea maeape: “Iki veveke! ehovea uavila araro ikiveveke rare itavakilai.” Are arero rare Asera rare itavape.
Reubena ve Upi
14Wheat hae ikaeape la hoa, Reubena oru leia kora elele rare upi uku koarape, are arero areve lou Lea ve leia aiaupe. La hoa Rahela Lea maeape: “Ikiheroe hela, ave akore ve la upi uku araro aikiaraki.” 15Aka are arero maeape: “A va arave vila hareavape va eharu hekai iele ha? Ma hoa a v'ikivere arave akore ve upi kara hareavakive ha?” Rahela maeape: “Heroe, ma oroa Iakobo a i hareho uavakilai, ave akore ve upi ve kavale.” 16Hailaea hoa Iakobo oru ve kihoaupe la hoa, Lea hoai arero koarai mari maeape: “A va ara i hareho uavakilai, arave la akore ve la upi ve kavale la.” Laelave are la oroa are i hareho uavape. 17Aualari Lea ve oharo iapape; are ero eavi Iakobo ve akore aea epape, areve akoremari 5 ila la. 18Lea maeape: “Aualari araro kavale veveke leipe, ehovea ara arave horova mari arave vila avarape”; laelave are arero rare Isakara rare itavape. 19Lea aeka ero eav iape kai Iakobo ve akore aea epape, akoremari 6 ila la: 20Lea maeape: “Aualari araro eva mekakure aikiarape, ehovea ara areve akoremari 6 ila erape”; laelave are arero rare Sebulona rare itavape. 21Aireaki are mari hekai epape, are arero rare Dina rare itavape.
22Aualari Rahela iki alalape. Aualari areve oharo iapai arero lei eroila leipe. 23Are ero eavi ape, akore epai mariape: “Aualari arave makiri le hareavi.” 24Are arero rare Iosepa rare itavape, kai mariape: “Iehova araro akore aea kara avikiarakilai.”
Iakobo ve horova ve kavale
25Rahela Iosepa epape la hoa, Iakobo Labana maeape: “Araro hela paraeakive, ara va elare oki i ita ila aukilai. 26Ara ave horova leipe hoa ve uavila i akoremari ila aikiarakive, kai araro paraeakilai, ehovea a v'ore ara ave horova haela veveke leipe.” 27Aka Labana maeape: “A hela arave oharo iapai, ara ore leipe, Iehova a v'ila araro lei veveke leipe; 28ave ikivere kavale kimaeaki, ara avarakilai.” 29Iakobo arero maeape: “Ara ave horova leipe la mai a havahu ore; arave oki ve ave boromakau i mamoe ila mekaka leivahaeape. 30Ara va avakepe la hoa ave eharu oaria ka, aka arave hoa ere maeakoko leivahaeape; arave oki oaria ve Aualari aro lei veveke leipe. Aka ara havahu ve lalava kara leahau lei eapapo leikilai ha?” 31Are maeape: “Ara aro le kavale avarakilai ha?” Iakobo maeape: “A araro eharu aikiara va ka. A va arave ma oharo la iapakilava, ara va ave mamoe hiru oaria aeka kiva leivahaeakilai, 32ara mahau hare ave mamoe hiru ve aru ve aukilai; maea karoro karoro aea maea hohoa ila, aea maea uruka ila, la mamoe mere oaria ara hareavakilai, aeka maea karoro karoro ila aea maea hohoa ila la nanikosi kara, ara hareavakilai; arave kavale eharu la. 33Laria, arave mai ehoe aireaki hihika leikilai, a va arave kavale eharu heheavaki la hoa. Maea karoro karoro aka hohoa karia la nanikosi, aea maea uruka karia la mamoe, e arave leia ve la eavakilava, e la eharu korea rare arilai.” 34Labana maeape: “Veveke. Ave la oharo hovea. Elavaila leivahaeakilai.” 35Aka la hare maea karoro karoro i hohoa ila la nanikosi mea, aea maea karoro karoro i hohoa ila la nanikosi abu, Labana hareavape; maka houhuka ila oaria, aeka uruka ila la mamoe kara, Labana hareavi elare akoremari aiarape. 36Are hare ilehoila ve hahi hovea aupe, are i Iakobo ila ve aru ve heaikiapo la; Labana ve mamoe hiru kepea Iakobo kiva leivahaeape.
37Kahara, Iakobo kora lahua lahua ve mai kaika kailape, kai ereve iilu lei karoro karoro leipe; kaika ve maka houhuka hihika levahaeape. 38Are la mai kaika mamoe hiru ve oropa ve, ma ve la huhu maeamaea, mamoe ma lape la ita: ereve ma lape hoa ereve ero leipe hoa va la, 39laelave mamoe i nanikosi ila kaika oropa ve ero leivahaeape, laelave mamoe i nanikosi ila maea karoro karoro i hohoa ila huhue erape. 40Iakobo mamoe mere lahua hareavape, kai mamoe hiru oaria, Labana ve hohoa i uruka ila la mamoe ve oropa ve aipevahaeape; are havahu ve mamoe hiru are lahua korukaiavahaeape; are erero Labana ve la hiru au koperereaila. 41Aheke iele la mamoe mea abu koarape la hoa Iakobo mai kaika mamoe oropa ve ma huhu ureve paparaehape, ere kaika oropa ve ero leivahaeape, 42mahuka la mamoe are lahovea au leivahaeaila. Laelave, mamoe mahuka Labana ve, mamoe aheke va Iakobo ve. 43Laelave la haela erohoho havahu leipe, areve mamoe i nanikosi ila ve hiru oaria, horova haela i horova marita ila oaria, kamela i asini ila kara oaria.
Pašlaik izvēlēts:
Genese 30: ORO
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Published by the British and Foreign Bible Society 1963-1972