Luk 22
22
1Wa o lakalaka ape bread vatuga me noga, we log si o rowolagau. 2Wa ira oloolo liwoa tara vatogo me sikesike si a ge mateia gasei; ape neira we gogolo o sul.
3Wa i Satan me mule pata ilo Judas we logia si Iskariot, i tuwale nan ra numei nirua; 4wa ni me mule at me varvava amaira oloolo liwoa tarasei we liwoa goro soldier, si te maniriŋ neia mun neira gasei. 5Wa ineira me qara wa me sora rusag neia apena; 6wa ni me mawui apena, ti sikesike o tano maniriŋ si a maniriŋia asau nan o sul.
7Naŋ o qoŋ bread vatuga me wesu, neira te vus ran o rowolagau alolona. 8Wa ni me vatraŋ i Peter tana John ti vet wa, Ura mule ura ge taurmate mun nina o rowolagau si nina a gana. 9Naŋ rara we vet munia wa, Ko we maros kara ge taurmate avea? 10Naŋ ti vet munrara wa, Ilo, kamurua me kalo pata veta ilo laqlaqe vanua, o tanun we rig o wetov pei te vatatu kamurua, ura tataga neia ilo ima ni we kalo pata ilolona. 11Wa kamurua te vava mun o tagiima wa, I vatogo we vet muniko si, Avea o nin tawu, tamam ira tiŋqoro anak te gana o rowolagau aia? 12Pa ni te gaganag mun kamurua o tawtawuima we poa me wosalag goro veta, ura ge taurmate aia. 13Naŋ irara me mule at, pa me ilo qalo tama ni me vava ti mun rara, wa rara me ge taurmate o rowolagau.
14Wa o masao qoŋ me wesu, ni me pute siwo tara sala amaia. 15Naŋ ni me vet mun neira wa, Nalolok me toron aneane si na gana tuwale o rowolagau iloke amen kamiu, na gate roŋo vivtig tiqa. 16Ape na we vava mun kamiu wa, Na tete ganagana tea iloke, gai tira ran alo marana non God. 17Naŋ ni me taur o lasa, wa me wievavae paso, ti vet wa, Tur lav momiu iloke, tur tiratirag valval kamiu. 18Ape nau we vava mun kamiu wa, Nan ilokenake nau tete un o lig wovine, o marana non God gai rasu ma. 19Wa ni me taur o bread, wa me wievavae paso, ti tuqe wora, qara la mun neira, ti vet wa, Iloke naturiak we la apen kamiu: tur ge tamaike si a nomkel ape nau nia. 20Wa o lasa mulaŋ tamaine, me paso o ganagana, ti vet wa, O lasa iloke o vatavata we garaqa alo narak, we ge sale apen kamiu. 21Pa ilo ma, napanen i gene we maniriŋ nau avawo tano ganagana amen nau. 22Ape we nun i Nat tanun te van at tama me ligog veta ti; pa tur magarosa o tanun ilone namona we maniriŋia. 23Naŋ neira me varsike raka amaira, si isei nan neira te ge tamaike.
24Pa me qeteg raka mulaŋ o varleasag amaira, te nonom apensei nan neira si we raka sage. 25Naŋ ni we vet muneira wa, Ira maranaga nora veve sul ŋaŋ we riga goro ineira, wa we log iragai we liwoa goro amaira si Ra vasgot. 26Pa ikamiu tete tamaine, pa isei we liwoa amen kamiu ni qeteg tam o lumagav, wa isei we moai goro ni tama i gene we lapasag. 27Pa avea we liwoa, i gene we pute ape ganagana si i gene we laplapasag? Pa gate i gene we pute? pa inau alo vatitnamiu tama i laplapasag. 28Wa ikamiu ragai me goara ran ma amen nau alo we galegale ilo inau. 29Wa na we vono mun kamiu o marana tama i Tamak me vono ti mun nau, 30si kam te ganagana we imaima vawo tano ganagana anok alo nok marana; wa kam te pute avawo tano pute maranaga, we veveg o veve saŋavul tuwale o numei nirua ra Israel. 31Naŋ i Lord me vet wa, Simon, Simon, ilo ma, i Satan me paere qalo kamiu, sin aserag kamiu tam o sivui. 32Pa na me tataro apeniko nan nom o nomtup wa tagea, wa aŋaisa ko te nom ris kel ka vatogar ratasima. 33Naŋ neia me vet munia wa, Lord, na me taurmate veta si na mule tuwale amaiko ilo ima rotrot wa ilo matea. 34Naŋ neia wa, Na we vava muniko, Peter, o toa tete kokorako qarig ko gai tala vagatol si gate gilala inau.
35Naŋ ni me vet mun neira wa, Nau me vatraŋ kamiu at o taŋa som wa o tapera wa o sarsaru goro malekai tagai apena, kamiu we maros matila o sava? Naŋ neira wa, Tagai. 36Naŋ ti vet mun neira wa, Pa ilokenake isei o taŋa som apena, ni la, wa o tapera mulaŋ, wa si o gasal ta tagai amensei ni wolreag non o vioviog sin tuvag. 37Ape nau we vava mun kamiu wa, O vavae iloke me rave veta ti te tira ran alo inau si, Me vasogo tuwale ineia amera ganganor; ape o sava ŋaŋ we tira ape nau o ulusui nake apena. 38Naŋ neira wa, Lord, ilo, o gasal nirua iloke. Naŋ neia mun neira wa, Mawia.
39Naŋ ni me rowolue ti mule tama naliŋana nane i tauwe Olivet; wa ira tiŋqoro mulaŋ me tataga ineia. 40Wa me niŋa o tanoi, ni me vet mun neira wa, Tur tataro nan wa mule ilo meregale. 41Naŋ ni me asau nan neira tama we vivir vatuwale o vat; naŋ ti vatieqau ti tataro, 42ti vet wa, Mama, si ko ta maros, ka lareag o lasa iloke nan nau; pa nipea nok o maros, nava nanoma ni lai ran apena. 43Wa o angel me ŋaŋalue mavunana munia we varagaia. 44Naŋ o nonomia me sage vulevulea, wa ni me tataro lalaktera nan amoa, wa non o lalais me tam o wowo nara ti tirtir siwo ilo tano. 45Wa ni me tavaraka nan o tataro, ti mule niŋa ira tiŋqoro anana, ti ilora we matur ape lolowono, 46ti vava mun neira wa, Ape sa kam we matur? Tur tavaraka, tur tataro, nan kamiu wa mule ilo meregale.
47Wa alo ni te vavava ti, ilo, o sul, wa i gene we logia si i Judas, ineia i tuwale nan ra numei nirua, me tursalemoa neira, wa ni me peteŋ i Jesus si a nimnimia. 48Naŋ i Jesus me vet munia wa, Judas, ka maniriŋ i Nat tanun mun o nininim? 49Wa iragai amaia me ilo o sava neira we ge, we vava munia wa, Lord, kamam a vus mun o gasal? 50Wa o tuarasei me vus o rowrowovag anan i moe oloolo ti sal savrag o qoro matua. 51Naŋ i Jesus me valui we vava wa, Tur ukeg nau ape ike nake. Naŋ ni me taŋo naqorona me ge esua. 52Naŋ i Jesus me vava munra oloolo liwoa me rowolue goroa ma ti, wa munra liwoa goro talo vatine we roŋo, wa munra tamaragai ŋaŋ, Kam me rowolue ma tama goro o vus pal mun o gasal wa o kere ŋaŋ? 53Pa inau me toga val qoŋ amen kamiu alo vatine we roŋo, pa kamiu gate kaka napanemiu ape inau; nava namasaoqoŋimiu iloke, wa o mana nake talo silsiliga.
54Naŋ neira me takulia, me sapania, me takia ilo iman i moe oloolo. Pa i Peter me tataga ineia we asau. 55Wa neira me pulaŋ o av alo vatitne tinesara ilone, wa me pute nol siwo, wa i Peter qara pute alo vatitnara. 56Wa o tuara malamala me iloa we pute alo valawar avi; ti pataragia, ti vet wa, Wa i gene iloke mulaŋ amaia. 57Naŋ ni me tala, ti vet wa, Tavine, na gate gilala ineia. 58Wa galewora ti i tuara ti iloa, ti vet wa, Wa iniko mulaŋ tamaira. Nava i Peter me vet wa, Tanun, inau tagai. 59Wa o masao qoŋ tuwale ti viro i tuarasei ti sisgag maremare ivunana, ti vet wa, We nun gai i gene iloke amaia, ape neia o ta Galilea. 60Nava i Peter we vet wa si, Tanun, na gate gilala o sava ko we vava. Wa gaplot alo ni te qale vavava ti o toa ti kokorako; 61wa i Lord me kerevag ris ti sagarag i Peter. Wa i Peter qara lolomaran kel ape vavae mon i Lord, si ni me vet munia wa si, Qarig o toa gate kokorako tiqa, wa ko te tala vagatol inau. 62Wa ni me sere lue ivarea, me taŋi areare.
63Wa iragai we taur i Jesus we porosagia, we towosia; 64wa neira me qoas goro namatana we wosa nanagona, we varusia wa, Ka gaganag mun o liŋe prophet; isei me wosawosa iniko? 65Wa neira me vavavagia vaga qoqo we sea, we liŋasapuria.
66Naŋ me maran o vavtig tamaragai tamaira sul me vug tuwale, ira oloolo liwoa nane tara vatogo ŋaŋ; wa neira me takia ilo nor o vavtig veveg; 67we vava wa, Si iniko i Christ, ka gaganag mun kamam. Nava ni me vet muneira wa, Si na ta gaganag mun kamiu, kamiu tete nomtup. 68Wa si na ta varus kamiu, kamiu tete valui goro inau. 69Pa nan ilokenake i Nat tanun te putepute alo pane matuan God we mana. 70Naŋ neira nol wa, Pa iniko gai tamaine Natun God? Naŋ neia wa, Kamiu we vava was inau. 71Naŋ neira we vava wa, Nina sike mulaŋ o vavae gaganag ape sa? ape nina me roŋotag monina nan naturvalana.
Pašlaik izvēlēts:
Luk 22: MOTA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament was published by the British and Foreign Bible Society in 1931.