John 5
5
1Paso nan, o lakalaka nora ta Judea; wa i Jesus me mule kalo i Jerusalem. 2Wa o qilo a Jerusalem ape tano sheep; we log o vavae ta Hebrew apena si Bethesda, o paito tavelima apena. 3Wa ira mageregere ŋaŋ we tar we risa alo iloke, ira matapei, wa ira qagesu, wa irasei o rurus apena, we toga nerei we ge tikotiko o pei. 4Apen o angel we siwo ma ilo qilo alo tuan masao qoŋ, ti ge tikotiko o pei; paso nan, isei qe taqel moai siwo ilo pei me matikotiko ti, ni te esu nan o sava gopae tea me qaloa ti. 5Wa i tuara tanun aia me mageregere ti o tau saŋavul tol o numei laveatol veta. 6I Jesus me iloa we risa, pa ni we gilala ape ni me gopa tuai, ti vet munia wa, Ko we maros we esu? 7Naŋ i gopae ti valuia wa, Lord, tagai o tanun amenau si a lav nau ilo qilo alo tikotiko pei; pa nau we mule, pa isei we sea we taqel moai inau siwo. 8Naŋ i Jesus ti vet munia wa, Tavaraka, la raka natanoepama, mule atalia. 9Wa o tanun ilone me esu gaplot, ti la raka natanoepana, ti mule. Wa o qoŋ ilone o qoŋ mapsag.
10Naŋ ira ta Judea we vava mun i gene me esu ti wa, O qoŋ mapsag qarig, gate tira ape lea si ka la raka natanoepama. 11Pa ni me valuira wa, I vaesuk me vet munau wa, La raka natanoepama, mule atalia. 12Naŋ ineira we varusia wa, Isei ilone me vet tamaine muniko wa, La raka natanoepama, mule? 13Pa i gene me esu ti gate gilala isei ineia; apen i Jesus me taviro, o sul alo vatine. 14Galewora i Jesus we ilo suaria alo vatine we roŋo, ti vet munia wa, Ilo, ko me esu; pa nipea ganganor mulaŋ, nan o sava we tatas nan we tuai wa qalo ko. 15Wa o tanun we vareag, ti gaganag mura ta Judea si i Jesus i vaesuna. 16O manigiu ilone ira ta Judea me gege i Jesus, wa we sikesike si a ge mateia, ape ni me ge tamaine alo qoŋ mapsag. 17Pa i Jesus me valui gorora wa, I Tamak we mawmawui gai niŋa ilokenake, wa nau we mawmawui mok. 18O manigiu ilone ira ta Judea me sikesike aneane nan amoa si a ge mateia, ape ni gate sirigavtag gese o lea ape qoŋ mapsag, pa ni me log ran God was i tur Tamana, me ge ineia we sar apen God.
19Naŋ i Jesus ti valuira ti vet wa, We nun, we nun, nau we vava mun kamiu wa, O Natui gate ge lai matapuna o sava, nava o gene ni we ilo o Mama we ge; ape o gene ŋaŋ ni te ge, o Natui te ge mona tamaine. 20Ape o Mama we tape o Natui, wa we gaganag munia o gene ŋaŋ nol ni we ge mona; wa ni te gaganag munia o gagapalag ŋaŋ we poa nan o ike, si kamiu a mamakei apena. 21Ape tama o Mama we ge raka kel ira mate wa we ge esura, tamaine gina o Natui we ge esu rasei ni we maros. 22Ape o Mama gate veveg mona o tanun, pa me ukeg o lea veveg nol mun o Natui: 23si o tanun ŋaŋ a nom mava o Natui, tama ineira we nom mava o Mama. Isei qe tete nom mava o Natui, ni gate nom mava o Mama me vatraŋia ma. 24We nun, we nun, nau we vava mun kamiu wa, Isei qe tiŋqoro mok o vavae, wa we nomtup i gene me vatraŋ nau ma, me taur veta o esu galava, wa tete niŋa lai ape lea veveg, pa me lagau lue veta nan o matea ilo esu. 25We nun, we nun, nau we vava mun kamiu wa, O masao qoŋ we rasu ma, wa me wesu veta, wa ira mate te roŋotag naliŋan Natun God, wa irasei we roŋotag te esu. 26Ape tama amen o Mama o esu alo ineia kel, tamaine mulaŋ gina ni me vasoal mun o Natui si o esu amaia alo ineia kel. 27Wa ni me vasoal munia o mana si amona te veveg, ape neia i Nat tanun. 28Tur pea mamamakei ape gene iloke; ape o masao qoŋ we rasu ma wa ineira nol alo qaraŋa ŋaŋ te roŋotag naliŋana, 29wa te rowolue ma; irasei me gagapalag we wia ilo tavaraka esu, wa irasei me gagapalag ganganor ilo tavaraka veveg.
30Na tete ge lai matapuk o sava: nau we veveg tama nau we roŋotag; wa mok o lea veveg we taniniga; ape na gate sikesike o gene nau we maros, nava o sava i gene me vatraŋ nau ma we maros. 31Si na qe gaganag kel we tira ape nau, mok o vavae gaganag ilone gate nun. 32I gene we sea we gaganag we tira ape nau; wa nau we gilala ape vavae ni we gaganag we tira ape nau si we nun. 33Kamiu me vatraŋ rasei sur i John, wa ni me gaganag we tira ape nun. 34Nava o vavae gaganag nau we lav mok gate amon o tanun; pa nava nau we vava tamaike si kamiu a esu apena. 35Ineia o pul we lawalawa, we siŋasiŋa; wa ikamiu me maros we toga malakalaka wia o tuan qoŋ alo non o marmararan. 36Nava o gene we gaganag we tira amenau we poa nan o vavae non i John, ape o gagapalag ŋaŋ o Mama me vatraŋ nau si na ge paso, o gagapalag ŋaŋ nake nau we ge, iloke ŋaŋ we gaganag we tira apenau si o Mama me vatraŋ nau ma. 37Wa o Mama me vatraŋ nau ma, ni me gaganag mona we tira ape nau. Kamiu gate roŋotag naliŋana ran ma, wa kamiu gate ilo natarapena. 38Wa ikamiu gate taur mon o vavae we goara alo ikamiu, apen kamiu gate nomtup i gene ni me vatraŋ ma. 39Kamiu we sikesike waririag alo raverave ŋaŋ, apen kamiu we nonom si kamiu we la o esu galava alo ilone ŋaŋ; wa ilone ŋaŋ nane we gaganag we tira ape nau. 40Wa kamiu gate maros we mule ma sur nau si kamiu a la momiu o esu. 41Nau gate lav mok o ronoga amen o tanun. 42Nava nau we gilala ikamiu si tagai amen kamiu o tapeva mon God alo lolomiu. 43Na me van ma alo sasan Mama, wa kam gate lav vasgot nau; si isei we sea qe van matapuna ma alo tur sasana, kam te lav vasgot ineia. 44Kamiu te nomtup lai gasavai, we varlavlav o ronoga amen valval kamiu, wa ikamiu gate sikesike o ronoga amen God ma i tuwale wora. 45Turpea nononom si na te tila kamiu mun o Mama; i gene apena we tila, i Moses nake, kamiu we sov ape neia. 46Ape si kam qe nomtup i Moses, kam te nomtup nau, ape ni me rave ape nau. 47Nava si kam qe tete nomtup mon o raverave, te nomtup gasavai mok o vavae?
Pašlaik izvēlēts:
John 5: MOTA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament was published by the British and Foreign Bible Society in 1931.