John 10
10
1We nun, we nun, nau we vava mun kamiu wa, Isei qe tete van pata ilo geara sheep ape mategeara, pa we kalo we sea ilolona, ineia i palu wa i vuspalu. 2Panava isei we vanpata ape mategeara ineia i altag goro o sheep ŋaŋ. 3I ilo goro mategeara ti waka munia; wa o sheep ŋaŋ we tiŋqoro naliŋana; wa ni we log valval sase sheep pulana, wa ni we takira i varea. 4Wa alo ni we vure lue pulan o sheep, ni we tursalemoa ineira; wa o sheep ŋaŋ we tataga ineia, o manigiu neira we gilala naliŋana. 5Nava neira gate tataga o salavano, pa neira te toa nania: o manigiu neira gate gilala naliŋara salavano. 6I Jesus me vava muneira o vavae tenegag iloke; nava neira gate lolomaran o sava ni me vet muneira.
7O manigiu o ine i Jesus ti vet mulaŋ muneira wa, We nun, we nun, nau we vava mun kamiu wa, Inau o mategeare sheep. 8Irasei nol me van moai inau ineira ira palu wa ira vuspalu; nava o sheep ŋaŋ gate tiŋqoro ineira. 9Inau o mategeara; isei we van pata alo inau ni te esu apena, wa te van pata wa te van lue, wa te ilo suar o valis. 10I palu we van gese ma si a palu, wa si a vus, wa si a ge mate: na me van ma si neira a taur mora o esu, wa si neira a taur tuan. 11Inau i altag goro we wia; i altag goro we wia we map siwo naesuna o manig sheep ŋaŋ. 12Nava i gene rusag, ineia gate i tur altag goro, wa o sheep ŋaŋ gate pulana, pa ni ta ilo o qoe kurkur we mule ma, ni te ukeg o sheep, pa ti toa, wa o qoe kurkur te takul ineira, te ge saleŋa o sheep ŋaŋ. 13I gene rusag we toa, ape neia i gene rusag, wa ni gate nonom aneane ape sheep ŋaŋ. 14Inau i altag goro we wia; wa na we lolomaran ira gene anak, wa ira gene anak we lolomaran nau, 15tama o Mama we lolomaran nau, wa nau we lolomaran o Mama; wa nau we map siwo naesuk o manig sheep ŋaŋ. 16Wa pulak o tuan sheep mulaŋ pa gate talo geara iloke; namok ran si na takira mulaŋ ma, wa neira te roŋotag naliŋak; wa te vavtig sheep tuwale wa i altag goro i tuwale. 17O manigiu iloke i Tamak we tape inau, ape nau we map siwo naesuk si na la kalo mulaŋ. 18Isei gate lareag nan nau, pa nau we map matapuk siwo. Inau we mana si na map siwo, wa nau we mana si na la kalo mulaŋ. Na me la o lea vatraŋ iloke amen Tamak.
19Naŋ me qeteg raka mulaŋ o vile wora amaira ta Judea o manigiu o vavae ŋaŋ iloke. 20Ra tuanira we qoqo we vava wa, O vui we tatas amaia, wa ni we lelera; ape sa kam we tiŋqoroa? 21Naŋ o tuaniu wa, O vavae ŋaŋ iloke gate mon o tanun o vui we tatas we gege ineia; o vui we tatas te ge lik lai namatara matapei?
22Wa o lakalaka ape we varoŋo o ima me wesu a Jerusalem, pa o rara. 23Wa i Jesus me mule kelkel alo vatine we roŋo, alo malmaluima me log non Solomon. 24Wa ira ta Judea we sasalev waliogia, we vava munia wa, O qoŋ ti nivisa ko te ge ikamam a nom varuarua? Ko ta i Christ, ka wawaŋ lue mun kamam apena. 25Naŋ i Jesus ti valuira wa, Na me gaganag veta ti mun kamiu, wa ikamiu gate nomtup; o gagapalag ŋaŋ nau we ge alo sasan Tamak, iloke ŋaŋ gina we gaganag we tira apenau. 26Pa kamiu gate nomtup; apen kamiu gate talo sheep napulak, tama na me vava veta ti mun kamiu. 27Pulak o sheep ŋaŋ we tiŋqoro naliŋak, wa nau we gilala ineira, wa neira we tataga inau: 28wa nau we la muneira o esu galava; wa neira tete mate tagea ti tuai ti tuai, wa isei tete wosag lai neira nan napanek. 29I Tamak qa me sogov neira ma munau, ni we liwoa nan ra gene nol, wa isei tete wosag lai neira nan napanen Tamak. 30Ikara i Tamak i tuwale. 31Wa ira ta Judea me la kalo mulaŋ o vat si a patuŋia. 32Naŋ i Jesus ti valuira wa, Na me la lue mun kamiu o gagapalag we wia we qoqo nan o Mama; pa o sava gagapalag kam we patuŋ nau apena? 33Naŋ ira ta Judea me valui goroa wa, Kamam gate patuŋiko ape gagapalag we wia, nava ape ko we liŋasapur, wa apeniko o tanun we ge keluko si God. 34Naŋ i Jesus ti valuira wa, Gate rave alo nomiu o lea wa, Na me vava was, Kamiu ira god ŋaŋ? 35Ni ta log god iragai o vavae mon God me rowolue surira, (wa tete ul savrag lai o raverave), 36kamiu we vava apen i gene God me varoŋo ineia wa me vatraŋia ma ilo marama was, Ko we liŋasapur; ape nau me vava wa, Inau Natun God? 37Na ta tete ge o gagapalag mon Tamak, turpea nomtup nau. 38Pa si na we gege ran, si kam qe tete nomtup inau, tur nomtup o gagapalag ŋaŋ; si kamiu a gilala wa we lolomaran si o Mama alo inau wa inau alo Mama. 39O manigiu ilone neira me sike mulaŋ si a tauria, wa ni me vanreag nan napanera.
40Wa ni me mule mulaŋ at tavala Jordan ilo vatine i John me vasugroŋo moai ti aia, wa ni me togatoga aia. 41Wa o tanun ŋaŋ we tar me mule suria, we vava wa, I John gate ge ilo o vaglala, pa o gene ŋaŋ i John me vava apen i gene iloke we nun. 42Wa we qoqo me nomtupua aia.
Pašlaik izvēlēts:
John 10: MOTA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament was published by the British and Foreign Bible Society in 1931.