O Gagagapalag 2
2
1Naŋ me wesu vunvun o qoŋ Pentekost, ineira nol me vug nom sara tuwale alo vatiu tuwale. 2Wa gaplot me siwo ma vunana o nuŋiu tama o nuŋ laŋ maremare we vus ma, wa me ge ura o ima nol neira we putepute alolona. 3Naŋ me ŋaŋalue ma muneira o garameai ŋaŋ we vilevilewora, tama o av, wa me rowo pute val avunara. 4Wa neira nol me liwat mun o Vui we Roŋo, wa me vava raka mun o gato we seasea tam o Vui me ge si neira a vava lue.
5Naŋ me toga galtag a Jerusalem ira Israel we kokor goro o lea, nan amaira val sul ŋaŋ a marama. 6Naŋ me roŋotag o liŋe nuŋnuŋ iloke, o sul me vug tuwale, wa me tama mun neira, ape we roŋotag neira we vava val liŋara gegese. 7Wa o malarowo me ge ineira, wa neira me mamakei gese, we varvava wa, Ilo, gate ta Galilea gese ira gene ŋaŋ iloke we vavava? 8Wa inina nol we roŋotag gasavai val liŋanina me wota ma ti alolona? 9Ra ta Parthia, ra ta Media, wa ira ta Elam, wa iragai we toga a Mesopotamia, a Judea, a Kapadokia, a Pontus, a Asia, 10a Phrugia, a Pamphulia, a Misraim, wa a tavala Libua arivtag a Kurene, wa ira salavano ta Rom, ra ta Judea, wa ira proselut, 11ra ta Krete, wa ira ta Arabia, nina we roŋotag neira we gaganag val liŋanina o vasasa ŋaŋ mon God? 12Wa neira nol we mamakei, we nonom varuarua, wa varvaris neira wa, O sava o ike? 13Wa o tuaniu me aresag, we vet wa, Ira gene iloke me uravag o wine neremot.
14Naŋ i Peter, wa ira numei tuwale we tira raka, ti vava eleele, ti usur mun neira wa, Ragai, ra ta Judea, wa kamiu nol we togatoga a Jerusalem, tur gilala momiu o ike, wa tur tiŋqoro nok o vavae. 15Ape ra gene gai iloke gate malesulesu, tama kam we nonom, pa o masao qoŋ vires vatoliu iloke; 16pa iloke o gene me ligog ti we tuai mun Joel o prophet wa,
17Alo qoŋ ŋaŋ a tagir te tamaike, amon God we vava,
Na te liŋ at nan nok o Vui avune visogoi nol,
Wa ira nanatumiu o rereata wa o retavine te ligoligog,
Wa ira lumagav anamiu te ilo o taqaŋiu ŋaŋ,
Wa ira tamaragai anamiu te qoreqore.
18We nun, pa na te liŋ at nan nok o Vui avune rowrowovag ŋaŋ anak o mereata wa o tavine alo qoŋ ŋaŋ ilone,
Wa neira te ligoligog.
19Wa na te gaganag o vasasa ŋaŋ alo tuka avunana,
Wa o vaglala ŋaŋ alo tano alalaŋana;
O nara, wa o av, wa o as ti totowo.
20Wa amoa o loa te ris siliga nia,
Wa o vula te ris nara nia,
Wa naqoŋin Lord ilone we liwoa wa we leŋas qara wesu.
21Wa te tamaike, valsei te loglog nasasan Lord te vaesua apena.
22Ragai ra nanat Israel, tur tiŋqoro o vavae ŋaŋ iloke: I Jesus ta Nasaret, o tanun God me gaganag luea mun kamiu, mun o gagapalag we mana, wa mun o vasasa wa o vaglala ŋaŋ, God me ge ti munia alo vatitnamiu, tama kamiu we gilala momiu; 23me ukeg veta ineia, tama God me vonog vasarig ti, wa me lolomaran moai tuai apena, pa kamiu me tauria, me woso teterpania, me ge mateia mun napanera tanun variava: 24wa God me ge raka kel ineia, me ul o vivtig matea, ape gate lai ran sin taur qaloa. 25Ape i David we vava ape ineia wa,
Na me ilo vagae i Lord goro nanagok;
Ape neia alo matuak, nan nau wa matureture:
26O manigiu iloke natoqak me malakalaka, wa nagarameak we masekeseke apena;
Wa navisogok mulaŋ te mapsag maros nerei;
27O manigiu ko tete loloqoŋ vitag naatak a Panoi,
Wa ko tete ukeg i Roŋo anama ni ilo o naru.
28Ko me gaganag lue mun nau o matesale esu;
Wa ko te ge nau na uravag o masekeseke mun nanagoma.
29Ragai, ratasik, na te wawaŋ lue lai mun kamiu ape David, o qeteg veve, si ni me mate veta, wa me saloa, wa naqaraŋina qale toga amen nina gai niŋa ma alo qoŋ nake iloke. 30Pa ineia o prophet, wa we gilala mona si God me vatavata vagogonag munia, sin te vapteg isei nawoturiana talo visogoi, ni pute avune tano maranaga nona; 31pa ni me ilo vaglala moai apena, ti vet ape tavaraka kel non i Christ, si gate loloqoŋ vitagia a Panoi, wa navisogona gate ilo o naru. 32I Jesus iloke, God me ge raka kelua, wa ikamam nol we gaganag we tira apena. 33Pa me lav rakatia sage alo pane matuan God, wa ni me la paso mona nan o Mama o Vui we Roŋo ni me ligog ti apena, ni qara liŋ siwo o ike kam we ilo, wa we roŋotag nake iloke. 34Ape i David gate mule kalo i vawo tuka, pa ni me vava mona wa,
I Lord me vava mun i Lord inau wa,
Ka pute alo matuak,
35Nau gai map siwo nom o tavalalea ŋaŋ mun tano ververesag ape raŋoma.
36O manigiu o ike iragai nol talo iman Israel a gilala mantag si God me vatira i Jesus iloke, kamiu me woso teterpania ti, sin Lord wa sin Christ.
37Naŋ neira me roŋotag o ike, nalolora qara tatige apena, we vava mun Peter tara sala we sea wa, Ragai ratasimam, kamam te ge o sava? 38Naŋ i Peter muneira wa, Tur nomleas, tur la valval o vasugroŋo alo sasan Jesus Christ, ape nomvitag napugamiu; wa kam te la momiu o sogov Vui we Roŋo. 39Ape o vavae ligoligog iloke mun kamiu, wa mun iranatumiu, wa mun ragai nol arasu ti, i Lord God inina te suwarera ma. 40Wa ni me gaganag weswes, wa me tiasira mun o vavae we sea we qoqo, ti vet wa, Vaesu kamiu nan o taraŋiu sipasipa iloke. 41Naŋ irasei me taur goro non o vavae, me vasugroŋo neira; wa alo qoŋ ilone tama o atai tar vagotol me tuanra. 42Wa ineira me goara taso, we kata maremare ape liŋara sala, wa ape nor o pultuwale, ape tuqetuqe bread, wa ape tataro.
43Wa o gogolo me ge o val atai: wa me ge o vasasa wa o vaglala we qoqo mura sala. 44Wa ira nomtup nol me toga pulpul, wa pular o savasava me pulara tuwale. 45Wa me wolreag gar o tano wa pular o savasava, wa me tirag val rasei tama isei me maros ran. 46Wa neira me goara nom sara tuwale valqoŋ alo vatine we roŋo, wa we tuqe o bread alo imara, we taur goro masekeseke gar o sinaga mun o toqai we vasartag, wa we varean God; wa o sul nol we lolowia ineira. 47Naŋ i Lord me tuan saratuwale valqoŋ irasei te esu kel ti.
Pašlaik izvēlēts:
O Gagagapalag 2: MOTA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament was published by the British and Foreign Bible Society in 1931.