Luka 7
7
Yesu da gbe le Roma-ʋakplɔla aɖe ƒe dɔla ŋu
(Mat 8.5-13)
1Esi Yesu gblɔ nya siawo katã na ameawo vɔ la, eyi ɖe Kapernaum. 2Aʋakplɔla aɖe nɔ dua me. Eƒe dɔla si nye ame vevi nɛ la nɔ dɔ lém, ɖo kudo nu. 3Esi wòse Yesu ŋkɔ la, edɔ Yudatɔwo ƒe amegãwo ɖo ɖe egbɔ hele ebiam be wòava da gbe le yeƒe dɔla la ŋu. 4Esi amedɔdɔawo va Yesu gbɔ la, woɖe kuku nɛ vevie gblɔ be: “Edze be nàwɔ esia na aʋakplɔla la, 5elabe elɔ̃ míaƒe dukɔ la. Eyae tu míaƒe ƒuƒoƒea na mí.” 6Yesu yi kpli wo. Esi wògogo aƒea la, aʋakplɔla la dɔ xɔlɔ̃awo ɖo ɖe Yesu gbɔ gblɔ be: “Aƒetɔ, mègaxaɖe fu na ɖokuiwò o, elabe medzem be nàge ɖe nye aƒeme o, 7eya ta nyemebu ɖokuinye hã be medze, be mava gbɔwò o. Ke gblɔ nya ɖeka, ne nàna nye dɔla la ƒe lã me nasẽ. 8Elabe nye hã mele amegãwo te, eye asrafowo le nye hã tenye. Ne megblɔ na ame sia be, ‘Yi!’ la, eyina, eye ne megblɔ na kemɛa be, ‘Va!’ la, evana, eye ne megblɔ na nye dɔla la be, ‘Wɔ esia!’ la, ewɔnɛ.” 9Esi Yesu se esia la, ewɔ nuku nɛ, eye wòtrɔ ɖe ameha siwo le eyome la ŋu gblɔ be: “Mele egblɔm na mi be nyemekpɔ xɔse sia tɔgbe le Israel-vidzidzi aɖeke me gɔ̃ hã kpɔ o.” 10Kaka amedɔdɔawo nade aƒea me la, wokpɔ be dɔla la ƒe lã me sẽ.
Yesu fɔ ahosi aɖe vi ɖe tsitre
11Eteƒe medidi o,#7.11: Mawunyagbalẽ xoxo aɖewo gblɔ be: Esi ŋu ke la. Yesu yi ɖe du aɖe, si woyɔna be Nain la me, eye eƒe nusrɔ̃lawo kple ameha gã aɖe nɔ eyome. 12Esi wògogo dua ƒe agbo nu la, wotsɔ ame kuku aɖe do go yina ɖiɖi ge. Enye vi ɖeka hɔ̃ na nɔa, si nye ahosi. Ameha gã aɖe tso dua me nɔ ahosia yome. 13Yesu kpɔ ahosi la, eye eƒe nu wɔ nublanui nɛ. Tete wògblɔ nɛ be: “Mègafa avi o.” 14Yesu te va amekukutsɔnu la gbɔ, eye woka asi eŋu. Amekukutsɔlawo tɔ, eye Yesu gblɔ na ame kukua be: “Ɖekakpui, mele egblɔm na wò be fɔ!” 15Tete ame kukua fɔ bɔbɔ nɔ anyi, hede asi nuƒoƒo me, eye Yesu tsɔe de asi na nɔa. 16Vɔvɔ̃ lé ameawo katã, eye wokafu Mawu gblɔ be: “Mawu ƒe gbeƒãɖela triakɔ aɖe va do ɖe mía dome! Mawu ve eƒe dukɔa nu!” 17Yesu ŋu nya sia ɖi hoo le Yudea kple nuto mawo katã me.
Amedɔdɔwo tso Yohanes mawutsilenamela gbɔ
(Mat 11.2-19)
18Yohanes ƒe nusrɔ̃lawo va ka nya siawo katã ta na Yohanes. Tete wòyɔ wo dome ame eve, 19eye wòdɔ wo ɖo ɖe Aƒetɔ la gbɔ be woabiae be: “Wòe nye ame si wobe ele vava ge loo, alo ame bubue míakpɔ mɔ naa?” 20Esi wova Yesu gbɔ la, wogblɔ nɛ be: “Yohanes mawutsilenamelae dɔ mí ɖe gbɔwò be míabia wò be, ‘Wòe nye ame si wobe ele vava ge loo, alo ame bubue míakpɔ mɔ naa?’ ” 21Ɣe ma ɣi la, Yesu da gbe le dɔléla geɖewo ŋu. Eda dɔ vɔ̃wo, nya gbɔgbɔ vɔ̃wo do goe, eye wòʋu ŋku na ŋkuagbãtɔ geɖewo. 22#Yes 35.5, 6; Yes 61.1. Yesu ɖo eŋu na Yohanes ƒe nusrɔ̃lawo be: “Miheyi ɖagblɔ nu siwo miekpɔ kple nu siwo miese la na Yohanes: ŋkuagbãtɔwo le nu kpɔm, tekunɔwo le azɔli zɔm, kpodɔlelawo ŋuti le kɔkɔm, tokunɔwo le nu sem, wole ame kukuwo fɔm ɖe tsitre, eye wole Nyanyui la gblɔm na ame dahewo. 23Woyra ame si mekpɔ nuɖiaɖia le ŋunye o.”
24Esi Yohanes ƒe amedɔdɔawo dzo la, Yesu ƒo nu le Yohanes ŋuti na ameha la hebia be: “Nu kae miedo go yi gbedadaƒo be yewoaɖakpɔ? Aƒla si le ya ƒom lae loo? 25Nu ka miedo go yi be yewoaɖakpɔ? Sedawu biɖibiɖi dolae loo? Ao. Kpɔ ɖa, ame siwo do sedawu biɖibiɖi xɔasiwo, eye wole agbe ɖum la, le fiasãwo me. 26Nu ka gɔ̃ miedo go yi be yewoaɖakpɔ? Mawu ƒe gbeƒãɖela aɖe yea? Ẽ, magblɔe na mi, ame si miekpɔ la wú Mawu ƒe gbeƒãɖela gɔ̃ hã. 27#Mal 3.1. Eya ŋue woŋlɔ nya ɖi le be:
‘Kpɔ ɖa, mele nye dɔla dɔm ɖa do ŋgɔ,
ame si adzra wò mɔa ɖo le ŋgɔwò.’ ”
28Yesu yi edzi gblɔ be: “Mele egblɔm na mi be amegbetɔ vidzidzi aɖeke mewú Yohanes o. Gake ame si nye suetɔ le mawufiaɖuƒea me la, lolo wu eyama.” 29#Mat 21.32; Luk 3.12. Do ŋgɔ la, ame hahoawo, vevietɔ nudzɔlawo wɔ Mawu ƒe lɔlɔ̃nu, eye wona Yohanes le mawutsi na wo. 30Ke Farisitɔwo kple agbalẽfialawo ya gbe Mawu ƒe aɖaŋuɖoɖo, eye Yohanes mele mawutsi na wo o.
31Yesu yi edzi gblɔ be: “Nu ka gɔ̃ matsɔ asɔ kple dzidzime sia? Nu ka woɖi? 32Woɖi ɖevi siwo bɔbɔ nɔ asi me ko hele gbɔgblɔm na wo nɔewo be:
‘Míeku dzidzɔkpẽ na mi,
ke miegbe ɣeɖuɖu.
Míedo aviha ɖa,
ke miegbe avifafa.’
33 “Yohanes mawutsilenamela va, meɖua nu o, menoa aha o, eye miegblɔ be, ‘Gbɔgbɔ vɔ̃ le eme!’ 34Amegbetɔ Vi la va, ɖua nu, noa nu, eye miawo ke miebe: ‘Mikpɔ nu tsu ɖula, aha tsu nola sia ɖa! Enye nudzɔlawo kple nuvɔ̃wɔlawo xɔlɔ̃.’ 35Evɔ wònye ame siwo katã do tso Mawu ƒe nunya me la ƒe nuwɔna tsoa afia na Mawu hafi.”
Yesu le Simon Farisitɔ la ƒeme
36Farisitɔ aɖe kpe Yesu be wòava ɖu nu kple ye. Esi Yesu ge ɖe aƒea me la, ebɔbɔ nɔ kplɔ̃ ŋuti be yeaɖu nu. 37#Mat 26.7; Mar 14.3; Yoh 12.3. Nyɔnu maɖɔʋu aɖe le dua me. Esi wòse be Yesu le nu ɖum le Farisitɔ la ƒeme la, etsɔ ami ʋeʋẽe si le goe si wotsɔ kpe ɣi tɔxɛ wɔe la me la ɖe asi vɛ. 38Etsi tsitre ɖe Yesu megbe le eƒe afɔ gbɔ hele avi fam. Efa aɖatsi ɖe Yesu ƒe afɔwo dzi, eye wòtsɔ eƒe taɖa tutu afɔawo ŋui. Egbugbɔ afɔawo ŋu, eye wòtsɔ ami ʋeʋẽe la si na wo. 39Esi Farisitɔ si kpe Yesu va nuɖuƒea kpɔ esia la, egblɔ le eɖokui me be: “Ɖe wònye Mawu ƒe gbeƒãɖelae nye ame sia la, anye ne adze sii be nyɔnu sia, si le asi kam ye ŋu la, nuvɔ̃wɔla wònye.” 40Tete Yesu ƒo nu nɛ gblɔ be: “Simon, nya aɖe le asinye medi be magblɔ na wò.” Simon bia Yesu be: “Nufiala, nya kae?” 41Yesu gblɔ nɛ be: “Ame eve nyi fe le ame aɖe ŋu. Ame ɖeka nyi klosaloga alafa atɔ̃ ƒe fe, eye ame evelia nyi bla atɔ̃ ƒe fe. 42Esi naneke menɔ wo si be woatsɔ axe fe lae o ta la, fetɔ la tsɔ wo ame eve la katã ƒe feawo ke wo. Ame eve siawo dometɔ kae nèbu be alɔ̃ fetɔ la wu?” 43Simon ɖo eŋu na Yesu be: “Mebu be anye ame si wòtsɔ ga geɖe kee lae.” Yesu gblɔ na Simon be: “Ebui wòsɔ ɖe edzi pɛ.” 44Yesu trɔ ɖe nyɔnua gbɔ azɔ gblɔ na Simon be: “Èle nyɔnu sia kpɔma? Esi mege ɖe aƒewò me la, mèku tsi nam be maklɔ afɔe o, ke nyɔnu sia fa aɖatsi ɖe nye afɔwo dzi, eye wòtsɔ eƒe taɖa tutu wo ŋui. 45Mègbugbɔ nu nam tsɔ do dzaa nam o, ke tso esime mege ɖe eme ko la, afɔ ŋu ko gbugbɔm eya le nam. 46Mèsi ami ɖe ta nam o, ke nyɔnu sia si ami ɖe nye afɔwo ŋuti. 47Eya ta mele egblɔm na wò be eƒe lɔlɔ̃ gã, si wòɖe fia la nye dzesi be wotsɔ eƒe nuvɔ̃ siwo sɔ gbɔ la kee. Ke ame sia ame si wotsɔ nuvɔ̃ ʋɛ aɖe ko kee la, eƒe lɔlɔ̃ hã nɔna ʋɛ ko.” 48Tete Yesu gblɔ na nyɔnua be: “Wotsɔ wò nuvɔ̃wo ke wò.” 49Ame siwo nɔ kplɔ̃a ŋuti kple Yesu la gblɔ le wo nɔewo dome be: “Ame kae nye ame sia, si tsɔa nuvɔ̃ gɔ̃ hã kena?” 50Ke Yesu gblɔ na nyɔnua be: “Wò xɔse ɖe wò. Heyi le ŋutifafa me.”
Pašlaik izvēlēts:
Luka 7: EB14
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
EƲEGBE BIBLIA © The Bible Society of Togo, 2014.