Luka 14
14
Yesu da gbe le ŋutsu aɖe ŋu
1Dzudzɔgbe aɖe la, Yesu yi nuɖuƒe le Farisitɔwo ƒe amegãwo dometɔ ɖeka ƒeme, eye amewo nɔ ŋudzɔ nɛ. 2Wotsɔ ame tete aɖe da ɖe Yesu ŋgɔ. 3Yesu bia sefialawo kple Farisitɔwo be: “Ele se nu be woada gbe le ame ŋu le Dzudzɔgbe loo, alo mele sea nu oa?” 4Ke wozi kpi. Tete Yesu lé ame tete la, eye wòda gbe le eŋu hedo mɔe wòdzo. 5#Mat 12.11. Yesu trɔ ɖe ameawo gbɔ bia be: “Ne mia dometɔ aɖe vi, alo nyi ge ɖe vudo me le Dzudzɔgbe la, ɖe mahee ado goe enumake oa?” 6Womete ŋu ɖo nya sia ŋu o.
Ɖokuibɔbɔ kple dɔmenyowɔwɔ
7Esi Yesu kpɔ ale si ame kpekpewo le bubunɔƒewo tiam la, edo lo na wo be: 8#Lod 25.6, 7. “Ne ame aɖe kpe wò yi srɔ̃ɖe ŋkekenyui ɖuƒe la, mèganɔ bubunɔƒe le kplɔ̃a ŋu o, elabe ate ŋu anɔ eme be wokpe ame aɖe si nye bubume wu wò la hã vɛ, 9ekema ame si kpe mi vɛ la ava gblɔ na wò be: ‘Tsɔ wò nɔƒe na ame sia.’ Ekema àyi ɖe nɔƒe mlɔetɔ nɔ ge kple ŋukpe. 10Eya ta ne wokpe wò va nuɖuƒe la, yi ɖanɔ nɔƒe mlɔetɔ le kplɔ̃a ŋuti boŋ be ne ame si kpe wò vɛ la va la, wòagblɔ na wò be, ‘Xɔ̃nye, yi ɖe kplɔ̃ta.’ Esia ade bubu ŋuwò le ame siwo katã le kplɔ̃a ŋuti kpli wò la ŋkume. 11#Mat 23.12; Luk 18.14. Elabe ame sia ame si do eɖokui ɖe dzi la, woabɔbɔe ɖe anyi, eye ame si bɔbɔ eɖokui ɖe anyi la, woadoe ɖe dzi.”
12Yesu gblɔ na ame si kpee la hã be: “Ne èɖo ŋdɔ alo fiẽ kplɔ̃ la, mègayɔ xɔ̃wòwo, nɔviwòwo, wò ƒometɔwo alo aƒelika kesinɔtɔwo bene woawo hã nagava kpe wò, ahaɖo eteƒe na wò o. 13Ke ne èle azã ɖum la, yɔ ame dahewo, nuwɔametɔwo, bunɔwo kple ŋkuagbãtɔwo 14bene nàkpɔ yayra, elabe naneke mele wo si woatsɔ aɖo eteƒe na wò o; ke Mawu aɖo eteƒe na wò le ame dzɔdzɔewo ƒe tsitretsigbe.”
Lododo le fiẽkplɔ̃ gã la ŋuti
(Mat 22.1-10)
15Ame siwo nɔ kplɔ̃a ŋuti kple Yesu la dometɔ ɖeka se nya siawo, eye wògblɔ nɛ be: “Mawu yra ame si aɖu nu le fiaɖuƒea me ŋutɔ!” 16Yesu gblɔ nɛ be: “Ame aɖe ɖo fiẽkplɔ̃ gã aɖe, eye wòkpe ame geɖewo. 17Esi nuɖuɣia ɖo la, edɔ eƒe dɔla ɖo ɖa be wòayɔ ame kpekpeawo be: ‘Miva, elabe nu sia nu sɔ gbe vɔ.’ 18Gake wo katã wodo taflatsɛ. Ame gbãtɔ gblɔ be: ‘Meƒle agble, eye wòle nam be mayi aɖakpɔe ɖa. Taflatsɛ, nyemate ŋu ava o.’ 19Ame bubu be, ‘Meƒle nyi eveve teƒe atɔ̃, meyina wo do ge kpɔ. Taflatsɛ, nyemate ŋu ava o.’ 20Ame bubu ya be, ‘Meɖe srɔ̃ eya ta nyemate ŋu ava o.’ 21Subɔla la gbɔ va hegblɔ nya siawo na eƒe aƒetɔ la. Tete aƒetɔa do dɔmedzoe gblɔ na subɔla la be: ‘Netsɔ, yi ɖe dua ƒe ablɔwo dzi kple kpɔdomeewo, eye nàkplɔ ame dahewo, nuwɔametɔwo, ŋkuagbãtɔwo kple bunɔwo vɛ.’ 22Eteƒe medidi o, subɔla la gbɔ va gblɔ be: ‘Mewɔ nu si nèɖo nam la, gake nɔƒe gali.’ 23Aƒetɔa gblɔ na subɔla la be: ‘Yi ɖe mɔ gãwo dzi, eye nàtsa le kpɔwo megbe. Zi amewo dzi be woava bene nye aƒeme nayɔ. 24Mele egblɔm na mi be ŋutsu siwo mekpe hafi wogbe vava la dometɔ aɖeke maɖɔ nye fiẽnuɖuɖu la akpɔ o.’ ”
Yesu xlɔ̃ nu amewo le fukpekpe si le nusrɔ̃lanyenye me la ŋu
(Mat 10.37-38)
25 Ameha gã aɖe kplɔ Yesu ɖo gbe ɖeka. Etrɔ ɖe wo ŋu gblɔ na wo be: 26#Mat 10.37. “Ne ame aɖe va gbɔnye, eye melé fu tɔ́a kple nɔa, srɔ̃a kple viawo, nɔvia ŋutsuwo kple nɔvia nyɔnuwo, ẽ, ne melé fu eya ŋutɔ ƒe agbe kekeake hã o la, mate ŋu anye nye nusrɔ̃la o. 27#Mat 10.38; 16.24; Mar 8.34; Luk 9.23. Ame si metsɔ eya ŋutɔ ƒe atitsoga hedze yonyeme o la, mate ŋu anye nye nusrɔ̃la o. 28Ne mia dometɔ aɖe ɖoe be yeatu xɔ la, ɖe mebɔbɔ nɔa anyi bua akɔnta le ga si wòagblẽ la ŋu gbã, akpɔe ɖa be yeate ŋu awu xɔa nu o mahã? 29Ne mewɔ nenema o la, aɖo xɔa gɔme anyi, gake mate ŋu atui awu enu o. Ame siwo katã akpɔ xɔ takpoa la, aɖu fewu le eŋuti agblɔ be: 30‘Ame sia dze xɔtutu gɔme, gake mete ŋu wu enu o.’ ”
31 “Ne fia aɖe yina aʋa kpe ge kple fia bubu la, ɖe mebɔbɔ nɔa anyi, bua eŋuti kpɔ gbã, be yeate ŋu atsɔ ame akpe ewo akpe aʋa kple fia si tsɔ ame akpe bla eve gbɔna aʋa kpe ge kple ye o mahã? 32Ne ekpɔ be yemate ŋui o la, ekema esime wògale adzɔge tso egbɔ la, aɖo ame ɖee ahabia tomefafa. 33Le esia ta, mia dometɔ ɖe sia ɖe si megbe nu le nu siwo katã le esi la gbɔ o la, mate ŋu anye nye nusrɔ̃la o.”
Dze si ŋu viɖe mele o
(Mat 5.13; Mar 9.50)
34 “Dze la, nu nyui wònye. Ke ne nu si wɔe wònye dze la do le eme la, nane li woatsɔ adee wòaganye dzea? 35Menyo na anyigba loo, alo aɖukpo hã o! Ɖeko woatsɔe aƒu gbe. Ame si to senu li na la, nesee!”
Pašlaik izvēlēts:
Luka 14: EB14
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
EƲEGBE BIBLIA © The Bible Society of Togo, 2014.