Luka 10
10
Yesu dɔ ame bla adrẽ vɔ eveawo
1Nu siawo megbe la, Aƒetɔ la tɔ asi ame bla adrẽ vɔ eve#10.1: Mawunyagbalẽ xoxo bubu aɖewo hã gblɔ be ame bla adrẽ. bubuwo dzi, eye wòdɔ wo eveveve, do ŋgɔ ɖo ɖe du kple kɔƒe siwo me eya ŋutɔ gbɔna toto ge la me. 2#Mat 9.37, 38. Egblɔ na wo be: “Nu si ŋe ge woala la sɔ gbɔ, ke dɔwɔlawo mesɔ gbɔ o, eya ta miɖe kuku na Aƒetɔ la be wòaɖo nuŋelawo ɖe eƒe agblea me. 3#Mat 10.16. Miheyi. Mele mia dɔm abe alẽviwo ene ɖo ɖe amegãxiwo dome. 4Migatsɔ gakotoku loo, alo nubiakotoku alo afɔkpa ɖe asi o, eye migado gbe na ame aɖeke le mɔ dzi o. 5Aƒe sia aƒe si me miege ɖo la, gbã la, mido gbe na wo be: ‘Ŋutifafa nenɔ aƒe sia me.’ 6Ne ŋutifafame aɖe le aƒea me la, miaƒe ŋutifafa anɔ eyama dzi; ke ne ɖeke meli o la, miaƒe ŋutifafa la agbugbɔ va na mi. 7#Kor I, 9.14; Tim I, 5.18. Minɔ aƒe ma ke ko me. Miɖu nu si wowɔ, eye mino nu si wona mi la, elabe dɔwɔlae woxea fetu na. Migadzo le aƒe ɖeka me yi bubu me o. 8Du ɖe sia ɖe si me woxɔ mi le la, miɖu nu si woana mi, 9eye mida gbe le dɔnɔ siwo le dua me la ŋu. Miɖe gbeƒã be, ‘Mawu ƒe fiaɖuɖu la gogo mi!’ 10#Dɔw 13.51. Ke ne mieyi ɖe du aɖe me, eye dua me tɔwo mexɔ mi o la, mido go ɖe dua ƒe ablɔ dzi ne miagblɔ na wo be, 11#Mat 10.7-14; Mar 6.8-11; Luk 9.3-5.‘Miaƒe dumeké kekeake si lé ɖe afɔ ŋuti na mí hã la, míeʋuʋui kɔ ɖi na mi.’ Gake minya esia be Mawu ƒe fiaɖuɖu la ɖo vɔ. 12#Mos I, 19.24-28; Mat 11.24; Mat 10.15. Mele egblɔm na mi be abɔbɔ na Sodom gbe ma gbe, wu ale si wòanɔ na nenem du ma.”
Du siwo mexɔ se o
(Mat 11.20-24)
13 #
Yes 23.1-18; Xez 26.1—28.26; Yoel 3.4-8; Amos 1.9, 10; Zax 9.2-4. “Baba na wò Korazin! Baba na wò Betsaida hã! Elabe nenye Tiro kple Sidon duwo mee nukunu siwo va eme le mia dome la dzɔ le la, anye ne woata akpanya, asi afi xoxoxo atsɔ afia be yewotrɔ dzime. 14Ke woakpɔ nublanui na Tiro kple Sidon duwo le Mawu ƒe ʋɔnudɔdrɔ̃ la me wu miawo. 15#Yes 14.13-15. Azɔ wò Kapernaum hã, ɖe nèbuna be wodo ye ɖe dzi bubutɔea? Woate wò ɖe to yi ɖe anyigba gɔme le tsiẽƒe ke!”
16 #
Mat 10.40; Mar 9.37; Luk 9.48; Yoh 13.20. Yesu gblɔ na eƒe nusrɔ̃lawo be: “Ame si ɖo to mi la, nyee wòɖo toe, eye ame si gbe mi la, nyee wògbe; ke ame si gbem la, ame si dɔm ɖo ɖa lae wògbe.”
Nusrɔ̃la bla adrẽ vɔ eveawo gbugbɔ va
17Ame bla adrẽ vɔ eveawo gbugbɔ va kple dzidzɔ gã, eye wogblɔ be: “Aƒetɔ, gbɔgbɔ vɔ̃wo gɔ̃ hã naa ta, ne míeyɔ wò ŋkɔ.” 18Yesu gblɔ na wo be: “Mekpɔ Satana abe dzikedzo ene, wòge tso dziƒo. 19#Ps 91.13. Kpɔ ɖa, mena ŋusẽ mi be miaɖo afɔ da kple dziɖegbe kpakple futɔ la ƒe ŋusẽ ɖe sia ɖe dzi, eye nu vevi aɖeke mawɔ mi o. 20Azɔ la, migakpɔ dzidzɔ be gbɔgbɔwo ɖo to mi o; ke boŋ mikpɔ dzidzɔ be woŋlɔ miaƒe ŋkɔwo ɖi le dziƒo.”
Yesu kpɔ dzidzɔ
(Mat 11.25-27; 13.16-17)
21Le gaƒoƒo ma me la, Gbɔgbɔ Kɔkɔe la do dzidzɔ na Yesu ŋutɔ, eye wògblɔ be: “Tɔ́, dziƒo kple anyigba ƒe Aƒetɔ, meda akpe na wò be nèɖe nu siwo le ɣaɣla ɖe nunyalawo kple nugɔmeselawo la fia ɖevi suewo. Ẽ, Tɔ́, elabe nenemae dze ŋuwò.”
22 # Yoh 3.35;
Yoh 10.15. “Tɔ́nye tsɔ nuwo katã de asi nam. Ame aɖeke menya ame si nye Vi la o, negbe Tɔ́ la ko, eye ame aɖeke menya ame si nye Tɔ́ la hã o, negbe Vi la kple ame si ke Vi la lɔ̃ be yeaɖee afia la ko.”
23Azɔ Yesu trɔ ɖe eƒe nusrɔ̃lawo ɖeɖe gbɔ hegblɔ na wo dzaa be: “Woyra mi ŋutɔ be miele nu siawo teƒe kpɔm. 24Le nyateƒe me la, Mawu ƒe gbeƒãɖela kple fia geɖewo di be yewoakpɔ nu si kpɔm miele, gake womekpɔe o. Wodi be yewoase nu si sem miele la, gake womesee o.”
Lododo le Samariatɔ si kpɔ nublanui na ame aɖe la ŋu
25 #
Mat 22.35-40; Mar 12.28-34. Sefiala aɖe tsi tsitre di be yealé Yesu le nya me. Ebia Yesu be: “Nufiala, nu ka mawɔ be manyi agbe mavɔ dome?” 26Yesu ɖo eŋu nɛ hebia be: “Nu ka se la gblɔ, eye ale ke nèse egɔmee?” 27#Mos V, 6.5; Mos III, 19.18. Ŋutsua ɖo eŋu be: “Lɔ̃ Aƒetɔ wò Mawu kple wò dzi blibo kple wò luʋɔ blibo kple wò ŋusẽ katã kpakple wò susu katã, eye nàlɔ̃ hawòvi, abe ale si nèlɔ̃ ɖokuiwò ene.” 28#Mos III, 18.5. Yesu gblɔ nɛ be: “Eɖo eŋu nyuie. Wɔ nu siawo, ekema anɔ agbe.”
29Ke sefiala la di be yeafia be yeƒe biabia la le eteƒe, eya ta ebia Yesu be: “Ame kae nye hanyevi?” 30Yesu gblɔ nɛ be: “Gbe ɖeka la, ŋutsu aɖe ɖi abu tso Yerusalem yina ɖe Yerixo, eye wòge ɖe adzodalawo si me. Wovuvu awu le eŋu, ƒoe wòku afã kple afã, eye wogblẽe ɖi hedzo. 31Eva va eme be nunɔla aɖe va to mɔ ma ke dzi yina. Esi wòkpɔ ŋutsua la, edze to akpa bubu dzo. 32Nenema ke nunɔlawo ƒe kpeɖeŋutɔ aɖe hã va ɖo afi ma. Esi wòkpɔ ŋutsua la, eya hã dze to akpa bubu dzo. 33#Kron II, 28.15. Ke Samariatɔ aɖe, si le mɔ zɔm la va ke ɖe amea ŋu le mɔƒoa me. Esi wòkpɔe la, eƒe nu wɔ nublanui nɛ. 34Ete ɖe eŋuti, kɔ ami kple wain ɖe eƒe abiawo me hebla wo. Emegbe la, ekɔ amea da ɖe eya ŋutɔ ƒe lã si dom wòle la dzi yi amedzrodzeƒe aɖe, eye wòkpɔ edzi. 35Esi ŋu ke la, Samariatɔ la tsɔ klosaloga eve na amedzrodzeƒea dzikpɔla la hegblɔ nɛ be: ‘Kpɔ dɔnɔa dzi, eye ne ègagblẽ nane ɖe edzi ɖe eta la, ne metrɔ va la, maxee na wò.’ ” 36Yesu wu enu hebia sefiala la be: “Le wò susu nu ɖe, ame etɔ̃ siawo dometɔ kae va zu ame si ge ɖe adzodalawo si me la havi?” 37Sefiala la gblɔ be: “Ame si kpɔ nublanui nɛ lae.” Yesu gblɔ nɛ be: “Wò hã heyi, ne nàwɔ nenema ke.”
Yesu ɖi tsa de Marta kple Maria gbɔ
38 #
Yoh 11.1. Yesu kple eƒe nusrɔ̃lawo nɔ mɔ zɔm gbe ɖeka, eye wova ge ɖe kɔƒe aɖe me. Nyɔnu aɖe, si ŋkɔe nye Marta la, xɔe ɖe eƒeme. 39Nɔvinyɔnu aɖe nɔ Marta si, si ŋkɔe nye Maria. Nyɔnu sia bɔbɔ nɔ Aƒetɔ la ƒe afɔnu henɔ eƒe nyawo sem. 40Marta ya tsi dzi ɖe amedzroawo dzi kpɔkpɔ ŋuti, eya ta wòva gblɔ na Yesu be: “Aƒetɔ, ènya be nɔvinye gblẽ subɔsubɔdɔ la ɖe nye ɖeka dzinyea? Gblɔe nɛ ne wòava kpe ɖe ŋunye.” 41Ke Aƒetɔ la gblɔ nɛ be: “O, Marta, ètsi dzi le hloloe tsom le nu geɖe ŋuti loo! 42Nu ɖeka koe hiã. Maria tia nu nyuitɔ, si ame aɖeke mele xɔxɔ ge le esi o.”
Pašlaik izvēlēts:
Luka 10: EB14
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
EƲEGBE BIBLIA © The Bible Society of Togo, 2014.