Yohanes 8
8
Nyɔnu si wolé, wòle ahasi wɔm
1[Ke Yesu yi ɖe Amito la dzi. 2Esi ŋu ke ŋdi kanya la, Yesu gava mawuxɔ la me, eye amewo katã va egbɔ. Ebɔbɔ nɔ anyi eye wòfia nu wo. 3Agbalẽfialawo kple Farisitɔwo kplɔ nyɔnu aɖe si wolé, wòle ahasi wɔm la, va ɖo ameawo titina. 4Wogblɔ na Yesu be: “Nufiala, wolé nyɔnu sia wòle ahasi wɔm. 5#Mos III, 20.10; Mos V, 22.22-24. Le se la me la, Mose na ŋusẽ mí be míaƒu kpe ame sia tɔgbe. Nu ka gblɔm wò ya nèle le eŋuti?” 6Wobia nya sia Yesu be yewoatee kpɔ ne yewoakpɔ nya aɖe atso enui. Ke Yesu bɔbɔ ɖi eye wòle nu ŋlɔm kple eƒe asibidɛ ɖe anyigba. 7Esi woganɔ nya biamee kokoko la, Yesu fɔ kɔ dzi gblɔ na wo be:#DanGr 13.34. “Mia dometɔ si ŋu nuvɔ̃ mele o la, netsɔ kpe ƒu nyɔnu la gbã.” 8Yesu gabɔbɔ ɖi eye wòle nu ŋlɔm ɖe anyigba. 9Ke esi ameawo se nyaa la, wodzo ɖekaɖeka tso tsitsiawo dzi va se ɖe esime wòsusɔ eya kple nyɔnua ɖeɖe ko ɖi. 10Yesu fɔ dzi eye wòbiae be: Aƒenɔ, ameawo ɖe? Ame aɖeke mebu fɔ wò oa?” 11Nyɔnu la ɖo eŋu nɛ be: “Ao, Aƒetɔ.”
Ale Yesu gblɔ nɛ be: “Ekema nye hã nyemabu fɔ wò o. Heyi, mègawɔ nuvɔ̃ azɔ o.”]#8.11: Kpukpui siawo mele mawunyagbalẽ xoxo gbãtɔ geɖewo me o.
Yesu, xexea me ƒe kekeli
12 #
Nya 7.26; Mat 5.14; Yoh 9.5. Yesu gaƒo nu na ameawo be: “Nyee nye xexea me ƒe kekeli, ame si dze yonyeme la, mazɔ viviti me o.” 13#Yoh 5.31. Tete Farisitɔwo gblɔ nɛ be: “Èle ɖase ɖim le ɖokuiwò ŋuti, eya ta wò ɖaseɖiɖi la menye nyateƒe o.” 14Yesu ɖo eŋu be: “Nenye be meɖi ɖase le ɖokuinye ŋu hã la, nye ɖaseɖiɖi nye nyateƒe, elabe menya afi si metso va kple afi si meyina. Miawo la, mienya afi si metso alo meyina la o. 15Miawo la, miedrɔ̃a ʋɔnu le amegbetɔwo ƒe nukpɔkpɔ nu; ke nye la, nyemedrɔ̃a ʋɔnu ame aɖeke o. 16Evɔ la, ne medrɔ̃ ʋɔnu hã la, nye ʋɔnudɔdrɔ̃ dzɔ, elabe menye nye ɖekae drɔ̃a ʋɔnu o, ke boŋ nye kple ame si dɔm ɖa lae. 17#Mos V, 19.15.Woŋlɔ ɖe miaƒe se la me be, ne ame eve ƒe ɖaseɖiɖi tso nane ŋu sɔ la, ekema woƒe ɖaseɖiɖi la nye nyateƒe. 18Nye la, meɖia ɖase le ɖokuinye ŋu, eye Tɔ́nye si dɔm ɖa la hã ɖia ɖase le ŋutinye.” 19Wobia Yesu azɔ be: “Afi ka tɔ́wò le?”
Eɖo eŋu na wo be: “Mienyam o, eye mienya Tɔ́nye hã o. Ne ɖe mienyam la, anye ne mienya Tɔ́nye hã.” 20Yesu gblɔ nya siawo le nudzɔƒe la, esime wòle nu fiam le mawuƒe la me. Ke ame aɖeke melée o, elabe eƒe ɣeyiɣia mede haɖe o.
Miate ŋu ayi afi si meyina la o
21Yesu gagblɔ na ameawo be: “Nye la, mele dzodzo ge. Miadim eye miaku ɖe miaƒe nuvɔ̃ me. Afi si nye la meyina la, miawo miate ŋu ava o.” 22Tete Yudatɔwo gblɔ be: “Eɖokui wu ge wòala ta wògblɔ be, ‘Miate ŋu ava afi si yim mele la o’ mahã?” 23Yesu gblɔ na wo be: “Miawo la, anyigba sia dzi mietso, ke nye la, dziƒoe metso va. Xexe sia me tɔwoe mienye; ke nye la, nyemenye xexe sia me tɔ o. 24Eya tae megblɔ na mi be miaku ɖe miaƒe nuvɔ̃ me. Ne miexɔe se, be menye ame si menye o la, miaku ɖe miaƒe nuvɔ̃ me.” 25Wobiae be: “Ame ka nènye?”
Yesu gblɔ na wo be: “Megblɔe na mi le gɔmedzedzea me, eya ke gblɔm megale na mi. 26Nya geɖe le asinye ɖe mia ŋu, be matsɔ abu fɔ mi, ke ame si dɔm ɖa la, nyateƒetɔ wònye eye nu si mese tso egbɔ la ƒe gbeƒã ɖem mele na xexea me.” 27Womese egɔme be Tɔ́ la ŋutie Yesu le nu ƒom le na yewo o. 28Eya ta egblɔ na wo be: “Ne miekɔ Amegbetɔ Vi la ɖe dzi la, hafi miadze sii be nyee nye ame si mebe menye la, eye nyemele naneke wɔm le nye ŋutɔ nye ŋusẽ me o. Nu si Tɔ́ la fiam lae megblɔna. 29Ame si dɔm ɖa la li kplim. Megblẽ nye ɖeka ɖi o, elabe mewɔa nu si dzea eŋu ɣe sia ɣi.” 30Esi Yesu gblɔ nya siawo la, ame geɖe xɔ edzi se.
Ablɔɖeviwo kple kluviwo
31Yesu gblɔ na Yudatɔ siwo xɔ edzi se la be: “Ne mieyi edzi lé nya la me ɖe asi la, ekema nye nusrɔ̃lawo mienye vavã. 32Miadze si nyateƒe la, eye nyateƒe la ana be miavo.” 33#Mat 3.9; Luk 3.8. Wogblɔ nɛ be: “Abraham ƒe dzidzimeviwo míenye, eye míenye kluvi na ame aɖeke kpɔ o. Nu ka ta nègblɔ be: ‘Woana miavo?’ ” 34Yesu ɖo eŋu na wo be: “Nyateƒe tom mele na mi, be ame sia ame si wɔa nuvɔ̃ la nye nuvɔ̃ ƒe kluvi. 35Kluvi menɔa aƒeme ɖaa o, ke aƒetɔ vi ya nɔa anyi ɖaa. 36Eya ta ne Vi la na mievo la, ekema mievo vavã. 37Menya be Abraham ƒe dzidzimeviwo mienye, gake miele didim be yewoawum elabe nye nyawo mexɔ dzi na mi o. 38Nu si mekpɔ le Tɔ́nye gbɔ la gblɔm mele, eye nu si miese tso mia tɔ́ gbɔ la, eya wɔm miele.”
39Wogblɔ nɛ be: “Mía tɔ́e nye Abraham.”
Yesu gblɔ na wo be: “Nenye Abraham viwo mienye la, anye ne miawɔ nu abe Abraham ene. 40Ke azɔ la, miedi be yewoawu nye, ame si gblɔ nyateƒe si mese tso Mawu gbɔ la na mi. Abraham mewɔ nenema o. 41Miawo la, miele nu si mia tɔ́ wɔ la wɔm.” Wogblɔ na Yesu be: “Míenye ahasiviwo o. Tɔ́ ɖekae le mía si; eyae nye Mawu.” 42Yesu gblɔ na wo be: “Nenye Mawue nye mia tɔ́ la, anye ne mialɔ̃m, elabe Mawu gbɔe metso va. Nyemeva le nye ŋutɔ nye ŋusẽ me o. Mawue dɔm ɖa. 43Ale ke wɔ miese nu si gblɔm mele na mi la gɔme o? Nye nyawo mesɔ to me na mi o tae. 44#Nya 1.13; 2.24.Mia tɔ́ Abosam tɔwoe mienye, eye miaƒe didie nye be yewoawɔ nu si dzroa mia tɔ́. Eya la, amewula wònye tso gɔmedzedzea me, eye eya kple nyateƒe la mezɔna o, elabe nyateƒe mele eme o. Ne eka aʋatso la, eɖea eƒe dzɔdzɔme fiana elabe aʋatsokala wònye. Eyae nye aʋatsowo katã tɔ́. 45Ke esi wònye nyateƒe lae megblɔna ta la, miexɔa dzinye sena o. 46Mia dometɔ kae ate ŋu abu fɔm be mewɔ nuvɔ̃? Ne meto nyateƒe na mi la, ale ke wɔ miexɔ dzinye se o? 47Ame si nye Mawu tɔ la, sea Mawu ƒe nyawo. Nu si ta miesea Mawu ƒe nyawo o lae nye be mienye etɔwo o.”
Yesu kple Abraham
48Yudatɔwo ɖo eŋu be: “Ne míegblɔ be Samariatɔ nènye, eye gbɔgbɔ vɔ̃ le mewò ɖe, míegblɔe ɖe eteƒe oa?” 49Yesu ɖo eŋu na wo be: “Gbɔgbɔ vɔ̃ mele menye o. Mele Tɔ́nye bum, ke miawo miele vlo domem. 50Ke nyemedia nye ŋutɔ nye kafukafu o. Ame aɖe li, si le edim. Eya lanye ʋɔnudrɔ̃la. 51Nyateƒe tom mele na mi be ne ame aɖe wɔ nye nya dzi la, mele kuku ge gbeɖe o.” 52Yudatɔwo gblɔ nɛ be: “Eme kɔ na mí azɔ koŋ be gbɔgbɔ vɔ̃ le mewò. Abraham ku; Mawu ƒe gbeƒãɖelawo hã ku. Nya ka wònye gblɔm nèle be, ‘Ne ame aɖe wɔ nye nya dzi la, mele kuku ge gbeɖe o.’ mahã? 53Wòe tri akɔ wu mía tɔ́ Abraham, ame si ku laa? Mawu ƒe gbeƒãɖelawo hã ku! Ame ka ƒomevi nèle ɖokuiwò bumee?” 54Yesu ɖo eŋu be: “Ne mekafu ɖokuinye la, nye kafukafu la maɖe vi o. Tɔ́nyee nye ame si le kafuyem. Eyae nye ame si miawo miegblɔ be enye miaƒe Mawu. 55Evɔ la, mienyae o; ke nye la, menyae. Ne megblɔ be nyemenyae o la, mezu aʋatsotɔ abe miawo ke ene. Gake menyae eye melé eƒe nya la me ɖe asi. 56Mia tɔ́ Abraham tso aseye be yeakpɔ nye vava. Ekpɔe hã, eye dzi dzɔe.” 57Yudatɔwo gblɔ nɛ be: “Mèkpɔ xɔ ƒe bla atɔ̃ haɖe o, eye nèbe yekpɔ Abraham mahã?” 58Yesu gblɔ na wo be: “Nyateƒe tom mele na mi be meli xoxoxo hafi Abraham va dzɔ.” 59Tete ameawo fɔ kpe be yewoaƒui; ke Yesu si bè eye wòdo go le mawuƒe la me.
Pašlaik izvēlēts:
Yohanes 8: EB14
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
EƲEGBE BIBLIA © The Bible Society of Togo, 2014.