Yohanes 17
17
Yesu do gbe ɖa ɖe eƒe nusrɔ̃lawo ta
1Esi Yesu gblɔ nya siawo vɔ la, ewu mo dzi kpɔ dziƒo gblɔ be: “Tɔ́, ɣeyiɣia de. Do Viwò la ɖe dzi ale be Viwò la hã nado wò ɖe dzi. 2Elabe èna ŋusẽe ɖe amegbetɔƒomea katã dzi be wòana agbe mavɔ ame siwo katã nètsɔ nɛ la. 3#Nya 15.3.Agbe mavɔ lae nye be woanya wò, Mawu Nyateƒetɔ ɖeka hɔ̃ la kple Yesu Kristo si nèdɔ ɖa la. 4Nye la, mewɔ dɔ si nède asi nam be mawɔ le xexea me la wu enu, eye to eme la, meɖe wò ŋutikɔkɔe fia. 5Azɔ Tɔ́, tsɔ ŋutikɔkɔe si mekpɔ le gbɔwò hafi xexea me nava dzɔ la ɖe nye ŋutikɔkɔe fia le wò ŋutɔ ŋkuwò me.
6 “Meɖe wò fia ame siwo nètia ɖa tso xexea me, eye nètsɔ wo nam la kɔtɛe. Tɔwòwoe wonye ya, ke ètsɔ wo nam. Wolé wò nya la me ɖe asi pɛpɛpɛ. 7Wonya azɔ be nu sia nu si nètsɔ de asi nam la tso gbɔwò. 8Metsɔ nya si nède asi nam be matsɔ ayii na wo la hã na wo, eye woxɔe. Wonya be gbɔwòe metso nyateƒe, eye woxɔe se be wòe dɔm ɖa. 9Nye la, mele kuku ɖem ɖe wo ta. Nyemele kuku ɖem ɖe xexea me ta o, ke boŋ ɖe ame siwo nètsɔ nam la ta elabe tɔwòwoe wonye. 10Nye nuwo katã nye tɔwò, nenema ke tɔwòwo katã hã nye tɔnye, eye woɖe nye ŋutikɔkɔe fia to wo dzii. 11Azɔ la, megbɔna gbɔwò. Nyemegale xexea me o, ke woawo ya woli. Tɔ́ kɔkɔe, wò ŋutɔ tsɔ wò ŋusẽ si nènam la kpɔ wo ta be woazu ɖeka, abe ale si nye kple wò míele ɖekae ene. 12#Ps 41.9; Yoh 13.18. Esi menɔ wo gbɔ la, mekpɔ wo ta le wò ŋkɔ si netsɔ nam la me. Medzɔ wo ŋu ale gbegbe be wo dometɔ aɖeke mebu o, negbe ame si wòle be wòatsrɔ̃ godoo la ko, bene mawunya nava eme. 13Ke azɔ la, megbɔna gbɔwò. Megblɔ nya siawo le xexea me bene woawo hã nakpɔ dzidzɔ, abe ale si nye hã mele ekpɔmee la ene. 14Nye la, megblɔ wò nya la na wo, ke esi wometso xexea me o abe ale si nye hã nyemetso xexea me o ene ta la, xexea me lé fu wo. 15Nyemele biabiam be nàɖe wo ɖa le xexea me o, ke boŋ be nàkpɔ wo ta dedie tso vɔ̃ɖitɔ la si me. 16Esi nyemetso xexea me o ta la, woawo hã wometso xexea me o. 17Wɔ wo kɔkɔe le nyateƒe la me; wò nya la nye nyateƒe. 18Medɔ wo ɖo ɖe xexea me, abe ale si wò hã nèdɔm ɖo ɖe xexea mee ene. 19Le woawo ta la, mewɔ ɖokuinye kɔkɔe bene woawɔ woawo hã kɔkɔe le nyateƒe la me.
20 “Nyemele esia biam na woawo ɖeɖe ko o, ke boŋ mele ebiam na ame siwo axɔ dzinye se to nya si woagblɔ na wo la hã me. 21Meɖe kuku, wɔ wo woazu ɖeka. Tɔ́, nà be woawo hã nanɔ mía me, abe ale si nèle menye eye nye hã mele mewò la ene, ale be xexea me naxɔe se be wòe dɔm ɖa. 22Nye la, metsɔ ŋutikɔkɔe si nètsɔ nam la na wo, be woawo hã woazu ɖeka, abe ale si mía kple wò míele ɖekae ene. 23Nye la, mele wo me eye wò hã nèle menye, be woazu ɖeka ade blibo keŋ ale be xexea me nanyae be wòe dɔm ɖa eye nèlɔ̃ wo, abe ale si nèlɔ̃m ene. 24“Tɔ́, medi be ame siwo nètsɔ nam la hã nanɔ afi si mele la kplim bene woakpɔ ŋutikɔkɔe si nètsɔ nam, elabe èlɔ̃m hafi woɖo xexea me gɔme anyi. 25Tɔ́ Dzɔdzɔetɔ, xexea me menya wò o, ke nye ya menya wò eye ame siawo hã nya be wòe dɔm ɖa. 26Mena wodze si wò kɔtɛe eye mana woagadze si wò ɖe edzi wu, ale be lɔlɔ̃ si nètsɔ nam la, nanɔ wo me eye nye hã manɔ wo me.”
Pašlaik izvēlēts:
Yohanes 17: EB14
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
EƲEGBE BIBLIA © The Bible Society of Togo, 2014.