G%E9nesis 4
4
A Caín xaq a Abel
1I achi xumin rib' ru' rixoqil chi al Eva. Ire xk'aqtajik, te'uri xalax jun ralab' chi xuya pub'i a Caín, i al Eva le xub'ij: “Ru' utob'al i Ajwal xwalaj jun walab'.” 2Te'uri xalax chik ukab' ralab' xuya pub'i Abel. Are xek'iyik, i Abel le xu'an uchak che i yu'uj chij xwiri i ratz chi a Caín xu'an uchak che i tikanik.
3X-on panoq, i a Caín le xuk'am b'i usipon chwach i Ajwal, i sipon le are uwach i tikon chi utikom chwach ulew. 4Xaq i Abel xeuk'am b'i nab'e taq kak'al uchij chi lik je chomiq xaq lik je ti'ojib' chkixol i kachi'il, xeuporoj chwach i Ajwal. I Ajwal lik utz xril uk'ux a Abel xaq keje usipon, 5xwiri keje ti xril che uk'ux a Caín xaq che usipon; rumali, i a Caín le xpe roywal xaq xqaj uk'ux. 6Are uri i Ajwal xub'ij che a Caín: “¿B'uchak petnaq awoywal xaq qajnaq ak'ux? 7We ka'an i utz, kalukb'a ti uri apalaj xaipa kat-e wi; xwiri we ka'an ti utz, i mak atzalal katuk'ak'alij pacha jun itzel chikop yijil chachapik, xwiri yet kattiki ni chupek'ik i mak atzalal le”. Keje ile xub'ij i Dios che a Caín.
8Xwiri a Caín xub'ij che ucha' chi Abel: Jo pa malkatik pa taq es. Are je o chik pa taq es, i a Caín x-e chrij ucha' i xukamsaj.
Uk'oqoxik a Caín
9Are uri i Ajwal xutz'onoj che a Caín:
—¿Ipa o wi acha' chi Abel?
Ire xula' uwach:
—Weta'am taj ¿Xatab'a yin in chajal che incha'?
10I Ajwal Dios xub'ij che:
—¿B'uchak xakamsaj acha'? Man i ukik'el acha' ksik'in li pulew chutz'onoxik atb'al tzij chwe Yin, rumali to' ti kkanaj keje ile. 11Rumal ile, wo'or lik nim i k'oq kaweqaj chwach i jyub' ta'aj, man i jyub' ta'aj xatz'ij ru' ukik'el acha' chi xakamsaj. 12Are kattikan chwach i ulew, i atikon k-on ti chik utz xaq to' kat-e b'i chwach i jyub' ta'aj lik arewi katuxlan taj.
13I a Caín xub'ij che i Ajwal Dios:
—Lik nim i tojpen xaya pinwi chi kintiki ti chuch'ijik. 14Wo'or kinawesaj b'i che ulewi, xaq kinawesaj chawach yet. To' kink'achir na, xaq to' kin-e b'i uri chwach i jyub' ta'aj; xaq lik kinuxlan ti chik, k-antaj na chi xapachin kinriqawik, kinukamsaj na —xcha.
15Xwiri i Ajwal xub'ij che:
—Keje ti kak'ulmaj ile, man xapachin katukamsaj, wuqub' mul uri kutoj ni umak.
Are uri i Ajwal xukoj jun ilb'al re che a Caín, man xapachin kriqawik, kukamsaj taj. 16I a Caín xel chwach i Ajwal, xek'iji che ulew Nod ub'i, prelb'al ij che i Edén.
Umuq uxikin ma Caín
17I ma Caín xumin rib' ru' rixoqil, i rixoqil le xk'aqtajik, are uri xalax a Enoc; ma Caín ktijin chuyakik jun nim laj tinimit are xalax uk'ojol le, rumali xuya pub'i i tinimit le Enoc, pacha ub'i uk'ojol. 18Ma Enoc xuk'uwalij a Irad, ma Irad xuk'uwalij a Mehujael; ma Mehujael xuk'uwalij a Metusael xaq ma Metusael xuk'uwalij a Lamec. 19I ma Lamec le xeutunb'a keb' ixoqib' ru'; ub'i i jun al Ada, i jun chik al Zila. 20I ati Ada xalax nab'e ralab' xkiya pub'i a Jabal, i a Jabal le are pacha kiqajaw konojel ni'pa to' wu'waq kachoch chi xaq kekik'itsaj i chikop. 21I a Jabal le o jun ucha', a Jubal ub'i, ire le xaq are pacha kiqajaw konojel i keyinaw i arpa xaq i su'. 22Xaq i ati Zila xalax jun ralab', xkiya pub'i a Tubal Caín; ire le ajch'ayol ronojel taq chakb'al ch'ich' xaq anch'ich'. I a Tubal Caín le o jun ranab' al Naama ub'i.
23I ma Lamec xub'ij chke rixoqil chi ati Ada xaq ati Zila:
“Wixoqil, chita pe wach kinb'ij chiwe:
Yin xinkamsaj jun achi rumal xinusoko
xaq xinkamsaj jun k'ojol ala rumal xu'an k'ax chwe.
24We wuqub' mul k-ani ni uk'exel che i winaq chi kukamsaj ma Caín,
wuqlajuj oxwinaq (77) mul uri k-ani ni uk'exel che i winaq chi kinukamsaj yin.” Xcha.
Urox rak'al ma Adán xaq ati Eva
25Ma Adán xumin chik rib' ru' rixoqil, are uri rixoqil le xalax chik jun ralab', xuya pub'i a Set, ire xub'ij: “Man i Dios xuya chik jun walab' puk'exel Abel chi xkamsax rumal a Caín chi ratz, rumali kinya pub'i a Set.” Xcha.
26X-on panoq ma Set xuk'uwalij jun rak'al, xuya pub'i, a Enós. Are uri i winaq xkijeq li ukuxtaxik unataxik ub'i xaq ukojik u'ij i Ajwal Dios.
Pašlaik izvēlēts:
G%E9nesis 4: ACHICUB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© Biblia Achí de Cubulco, Derechos reservados de Sociedad Bíblica de Guatemala