Lukas 9
9
Yesus moutus koduo bolas murid-Nyo oca' sia' mongajar huatan monyamani ponyakit
(9:1-6)
(Mat. 10:5-15; Mrk. 6:7-13)
1 Pas ari nantai, Yesus mongumpulan koduo bolas murid-Nyo. Sio moonji'i kuaso ko sia' pakai' monundukng boko roh jahat huatan monyamani boko ponyakit. 2Lalu, Sio moutus sia' pakai' monyamani boko urakng ongko momboritoan kabar mongonaꞌi Koraja'an Allah. 3Kato Yesus ko sia', “Jangan mombaba' la'apo pan pakai' dipojalatan; tungkah, tas, pomakatn, duit, pakai'an posalitan. Padohan dibaba'am somuonyo nantai.
4Sopo ja' inyo monorima' kaitn dalapm rumahnyo, bodiapmcam di santai sampai kaitn botula' doi' tompat nian.#9:4: Yesus co honda' boko rasul-Nyo botula' doi' rumah ko rumah monggoyap tompat inyo palikng nyamanam. 5Apo aman kaitn ditula' boko urakng disobuah kota, koluar ja'am doi' kota nian. Borosihi jam dobu doi' tampo kaki kaitn.#9:5: Aman urakng Yahudi bojalatn di doerah urakng bukai Yahudi, sia' momborosihi dobu doi' tapa' kaki pakai' tando cado bokocucu'an. Sampai ko dobu pan, co nyiant hubukan agatn sia'. Nian pakai' momporingant'i sia' inyo tajahan dihukupm Allah, obai monula' posatn mongonaꞌi Koraja'an Allah inyo kaitn sampaian.” 6Jadi boko murid Yesus botula' ko boko laman, momboritoan Kabar Boi' mongonaꞌi Koraja'an Allah, monyamani urakng boponyakit di mono-mono.
Herodes bingung sopo Yesus nantai
(9:7-9)
(Mat. 14:1-12; Mrk. 6:14-29)
7Herodes, rajo doerah Galilea, mondingaꞌ mongonaꞌi somuo inyo tojadi.#9:7: Somuo inyo tojadi rotinyo somuo mujisat inyo dilabuhan Yesus agatn boko rasul-Nyo Io bingung obai ado inyo bopandir Yohanes Pombaptis udah bobali' hidup agi'. 8Ado jam inyo bopandir Nabi Elia datakng agi'.#9:8: Buku Boko Rajo 2 mongisahan Nabi Elia co kalo mati. Allah mombaba' io ko sorugo agatn koreta kuda inyo boapi. Jadi urakng Yahudi pocayo nononyo io paca'an datakng agi' ko dunia. Ado urakng bukai inyo bopandir salah siku' nabi bukainyo doi' joman komai udah bobali' hidup agi'. 9Apo Herodes bopandir, “Aku udah monyiuh urakng momonggal kopala' Yohanes. Jadi, sopo urakng ni'in sobondarnyo? Aku udah mondingaꞌ banyaꞌ kisah mongonaꞌi Io.” Ongko Herodes moncubo honda' botomu agatn Yesus.
Yesus bulah mujisat timpu moonji'i pomakatn ko lima' ribu urakng
(9:10-17)
(Mat. 14:13-21; Mrk. 6:30-44; Yoh. 6:1-14)
10Boko rasul Yesus bobali'. Sia' mongisahan ko Sio somuo inyo sia' labuhan timpu bojalatn ko boko laman nantai. Ongko, Yesus botula' bosamo boko rasul-Nyo, monuju ko kota Betsaida, bogoyap tompat inyo langunt oca' bayo ado sia' ja'am. 11Apo boko urakng banyaꞌ mongotohu'i ko mono Sio botula', lalu mombodapan. Yesus monorima' sia', mongajar sia' mongonaꞌi Koraja'an Allah, monyamani sia' inyo boponyakit.
12Watu matoari mula'i tonggolapm, koduo bolas murid mondataki Yesus ongko bopandir, “Tompat ni'in jouh. Jadi, siuh boko urakng banyaꞌ ni'in botula' ko boko laman inyo dampikng si'itn. Sia' ulih bogoyap pomakatn ongko ponoluntukan siku'-siku', obai di si'itn conyiant.”
13Apo Yesus bopandir, “Kaitn ja'am moonji'i sia' pomakatn!”
“Co mungkitn,” kato boko rasul-Nyo, “Koi bayo ado lima' pingkai' roti ongko duo iku' ikatn. Pasti kinyo cukup, cuali koi botula' momboli pomakatn pakai' somuo urakng ni'in!” 14(Ado kiro-kiro lima' ribu lolaki bujakng ongko urakng tuho.)#9:14: Ado boko botina' ongko boko bobia' kocit jam, apo kinyo tomansu' hitukan. Ongko, Yesus bopandir ko sia', “Siuham boko urakng ni'in dudu' bokolompok, kiro-kiro lima' puluh urakng sokolompok.” 15Jadi, boko murid-Nyo molabuhan inyo dipandiran Yesus. Somuo urakng banyaꞌ nantai dudu' bokolompok.
16Lopas nian, Yesus monguti' lima' pingkai' roti huatan duo iku' ikatn nantai, monongadah ko langit, moucap'an torima' kasih ko Allah. Ongko Sio momingkai'-mingkai' roti ongko ikatn nantai, moonju'nyo ko boko murid-Nyo oca' dipombagian ko boko urakng banyaꞌ nantai. 17Sia' somuonyo makatn sampai konyang. Lopasnyo boko murid Yesus mongumpulan kolobihannyo agatn kobudu', ado duo bolas kobudu' kotakng bisi!
Rasul Petrus mongatoan Yesus nantai Rajo Inyo Dijanjian Allah #9:18: Lukas 9:18-27 ado tigo bagian inyo kotakng pontikng, apo hubukan di antaronyo kotakng dampikng bondar. Rasul Petrus mongaku'i Yesus nantai Rajo Inyo Dijanjian Allah. Boboropo urakng inyo kinyo pocayo, paca'an mombunuh Yesus. Somuo murid Yesus gola' hala rela ajab sonsaro jam
(9:18-21)
(Mat. 16:13-20; Mrk. 8:27-30)
18Pas ari nantai, Yesus bodoa sonsiku'an. Bayo ado boko murid-Nyo di tompat nantai. Lalu, Yesus botakutn ko sia', “Kuji urakng banyaꞌ, sopo Aku ni'in?”
19Timbas sia', “Ado inyo bopandir Duatn nantai Yohanes Pombaptis. Ado jam inyo bopandir Nabi Elia. Ado urakng bukai inyo bopandir salah siku' nabi bukainyo doi' joman komai inyo udah bobali' hidup agi'.”
20Yesus botakutn, “Apo monurut kaitn siku', sopo Aku ni'in?”
Petrus monimbas, “Duatn nantai Rajo Inyo Dijanjian Allah.”
21Ongko Yesus kotakan morarakng sia' momadahan nantai ko sopo pan obai bolupm watunyo.#9:21: Aman Yesus monjadi tolalu tokonal, Sio kinyo paca'an dapat monjadi'i tugas inyo udah dionji'i Allah ko Sio. Tiat cam ayat 22. Nono, lopas Sio huas doi' komatian, Yesus monyiuh boko murid-Nyo (ongko kito jam) pakai' mongabari boko urakng bukai mongonaꞌi Sio (Matius 28:18-20, Lukas 24:46-48, Kisah 2:36, 3:18, 4:26, 10:39-43).
Yesus momadahan mongona'i ajab sonsaro inyo paca'an dialapi-Nyo
(9:22)
(Mat. 16:21; Mrk. 8:31)
22Yesus pan bopandir, “Ana' Monsio gola' ajab sonsaro. Io paca'an ditula' ulih boko pomimpitn banso kito, boko imam kopala', boko guru agama. Io paca'an dibunuh apo tigo ari lopas nian paca'an bobali' hidup agi'.”
Somuo murid Yesus gola' honda' ajab sonsaro apo tajahan ulih hidup di sorugo
(9:23-27)
(Mat. 16:22-28; Mrk. 8:34–9:1)
23Lopas nian Yesus bopandir ko somuo urakng inyo ado di santai,#9:23: Tontai, Yesus ongko boko rasul-Nyo ja'am ado di tompat nantai. Apo sokarakng, udah banyaꞌ urakng bokumpul agi' honda' mondingaꞌ pomandiran Yesus. “Aman ado di antaro kaitn inyo bondar-bondar honda' monjadi murid-Ku, io gola' moninggalan kohonda' dirinyo siku'. Sotiap ari, io gola' bojago-jago huatan bosodia monanggukng bobatn, ongko bosodia mohadapi ajab sonsaro ongkopan sampai mati. Nian samo ubo urakng inyo dihukupm mati gola' momikul kayu salibnyo.#9:23: Pomorintah Romawi momoso urakng jahat momikul salib sampai ko tompat urakng jahat nantai dihukupm mati. Apo Yesus kinyo bomasud boko murid-Nyo samo samaꞌan urakng jahat inyo dihukupm mati nantai. Posamaꞌannyo ia'an ajab sonsaro obai pocayo Sio. Boko murid-Ku gola' samaꞌan nian jam huatan hala monumpakng la'apo inyo udah Aku labuhan. 24Aku momadahan nian obai kaitn gola' mongoroti mongonaꞌi kohidupan inyo somombondarnyo, kohidupan kokal di sorugo. Urakng inyo momontikan kohidupannyo siku', sobondarnyo kinyo paca'an mondapat'annyo. Apo urakng inyo monyorahan kohidupannyo siku' pakai' tuyut Aku, pasti paca'an mondapat'annyo. 25Ado urakng inyo kinyo honda' monjadi murid-Ku obai honda' mondapat'an somuo hal di dunia ni'in. Sobondarnyo io kinyo botuah. Obai io co ulih bodapat kohidupan somanah-manahnyo di sorugo. 26Samo jam urakng inyo malu tuyut Aku huatan pongajaran-Ku. Ana' Monsio paca'an monula' urakng nantai watu Io datakng bobali' doi' sorugo agatn bisi kuaso Allah Bopai. Io bobali' doi' sorugo diiriki boko molekat suci. 27Dinga'an bo, ado urakng di antaro kaitn somuo di si'itn inyo kinyo paca'an mati sobolupm moniant Koraja'an Allah.”#9:27: Ayat ni'in ulih monunju'an 1) Watu boboropo rasul-Nyo ulih moniant komulia'an-Nyo di gunung (ayat 28-36), 2) Watu Sio mati di kayu salib ongko bobali' hidup agi' damo, 3) Watu Roh Allah moonji'i sia' kuaso (Kis 2).
Boboropo rasul Yesus moniant komulia'an-Nyo
(9:28-36)
(Mat. 17:1-8; Mrk. 9:2-8)
28Dolapatn ari lopas nantai, Yesus noi' ko pucu' bukit pakai' bodoa. Sio mombaba' Petrus, Yohanes ongko Yakobus jam. 29-32Apo di su'utn sia' Petrus ongko pokawalannyo toidu'.
Watu Yesus tongahan bodoa, ponampilan rupo mato-muho-Nyo borubah, mula'i bocohayo ongko pakai'an-Nyo monjadi putih monyilauan. Colanant duo urakng agi' ado di siatn, Nabi Musa ongko Nabi Elia. Kotiat'an nam sia' agatn cohayo doi' sorugo. Sia' bopandir ko Yesus mongonaꞌi komatian-Nyo di kota Yerusalem, boko hal inyo kinyo manah agi' paca'an dialapi-Nyo sosuai agatn kohonda' Allah.
Timpu nian jam, Petrus, Yohanes ongko Yakobus tohuas. Sia' moniant Yesus bocohayo,#9:29-32: Dalapm budaya urakng Yahudi, cohayo samaꞌan ni'in boroti mahluk inyo boasal doi' sorugo. Cohayo nantai monunju'an kokuasa'an sotiap mahluk inyo diutus Allah doi' sorugo. Obai Yesus, Musa ongko Elia diponuhi cohayo doi' sorugo, jadi sia' nantai mahluk inyo diutus Allah doi' sorugo. ongko koduo nabi nantai bodiritn di dampikng-Nyo. 33Watu koduo nabi nantai honda' moninggalan Yesus, Petrus bopandir ko Yesus, “Guru, boi' bondar kito di si'itn. Biaram koi bulah tigo buah potungguan di si'itn, sobuah pakai' Duatn, sobuah pakai' Nabi Musa, sobuah pakai' Nabi Elia.” Apo Petrus kinyo mongoroti agatn pomandirannyo nantai.#9:33: Petrus sonang bondar moalapi kojadian ni'in, mongohonda'i oca' totap moalapi lobih manah agi'. Apo, pado watu nantai io kinyo bopikir tolalu jolas obai pasti sia' doi' sorugo, kinyo pontikng tompat tinggal di dunia. 34Tongahan io bopandir nantai, datakam awatn monutupi sia' somuo. Gola' bondar boko murid Yesus nantai. 35Allah bopandir doi' dalapm awatn nantai, “Ninam Ana'-Ku inyo Ku pilih. Dinga'an cam Pomandiran-Nyo!”
36Lopas Allah bopandir nantai, kotigo murid Yesus moniant bayo Yesus siku' mo ado di santai. Biar pan sia' moalapi kojadian inyo luar biaso nantai, sia' kinyo momadahannyo ko sopo pan.#9:36: Manah lopas nian, hoyu' sia' mongisahannyo.
Yesus monundukng roh jahat doi' siku' bobia' muda'
(9:37–43a)
(Mat. 17:14-21; Mrk. 9:14-29)
37Kohobu'annyo, Yesus ongko boko murid-Nyo turutn doi' bukit nantai. Timpu nian, datakam boko urakng banyaꞌ monomu'i Yesus. 38Doi' urakng banyaꞌ nantai, siku' lolaki mondorah ko Yesus. Katonyo, “Guru, ongkah siku' ninam ana'ku. Aku minto ko Duatn monyamaninyo. 39Opat ana'ku ni'in disorakng roh jahat. Isu'anu mondorah, bukakng-tubuhnyo bokorikng-korikng sampai nyaonyo boapukng-bobuih. Roh jahat nantai hala monggaian io, kinyo honda' koluar doi' io! 40Udaham aku mominto tulukng ko boko murid Duatn oca' monundukng roh jahat nantai, apo culih sia'.”
41Ongko Yesus bopandir ko somuo sia', “Urakng di joman ni'in sosat ongko kinyo pocayo! Apo ija' manahnyo Aku gola' bosamo agatn kaitn?! Apo ija' manahnyo Aku gola' bosabar agatn kaitn!”
Ongko Yesus bopandir ko Bopai bobia' nantai, “Baba' ana' kolai nantai ko si'itan.”
42Watu bobia' nantai mohampiki Yesus, roh jahat monyorakng bobia' nantai, mohompasannyo ko tanah, bokorikng-korikng bukakng-tubuhnyo. Apo Yesus monundukng roh jahat nantai koluar, lansukng bobia' nantai nyamanam ongko disorahan agi' ko bopainyo. 43aOngko hiratn somuo urakng nantai obai moniant kuaso Allah inyo kotakng nontu.
Yesus momadahan obai Sio tajahan ditangkap, apo boko rasul-Nyo kinyo mongoroti
(9:43b-45)
(Mat. 17:22-23; Mrk. 9:30-32)
43bSomuo urakng nantai ija' tohiratn-hiratn moniant somuo mujisat inyo dipulah Yesus. Tongahan nantai, Yesus bopandir ko boko murid-Nyo, 44“Pondinga'an boboi'. Sokali-kali jangan sampai kaitn tongkolupatn agatn pomandiran-Ku ni'in: Ana' Monsio paca'an ditangkap huatan disorahan ko boko urakng inyo molawatn Sio.”
45Apo boko murid-Nyo kinyo mongoroti pomandiran-Nyo nantai. Allah mombumbutn rotinyo doi' sia', oca' sia' co mongoroti. Sia' gola' botakutn ko Yesus mongonaꞌi roti doi' pomandiran-Nyo.#9:45: Mungkitn boko rasul Yesus mula'i mongoroti obai Sio gola' ajab sonsaro, apo kinyo honda' tohu socaro jolas obai monyodihan.
Monurut Allah, sopo inyo palikng pontikng
(9:46-48)
(Mat. 18:1-5; Mrk. 9:33-37)
46Lopas nian boko murid Yesus mula'i botikakng mongonaꞌi sopo inyo kotakng pontikng di antaro sia'. 47Apo Yesus mongotohu'i pikiran sia'. Jadi, Sio monari' siku' bobia' kocit, monyiuh bobia' nantai bodiritn di sopia'-Nyo.#9:47: Dalapm budaya urakng Yahudi, boko bobia' palikng rondah, kinyo dihormati. Apo di sobolah Yesus boroti tompat inyo tohormat. 48Lalu Yesus bopandir ko sia', “Urakng inyo monorima' bobia' kocit ni'in obai Aku, boroti io monorima' Aku jam. Huatan urakng inyo monorima' Aku, monorima' Allah inyo moutus Aku. Obai urakng inyo palikng kocit monurut monsio, sobondarnyo io inyo palikng pontikng monurut Allah.”
Pongikut Yesus inyo bukai ulih monundukng roh jahat
(9:49-50)
(Mrk. 9:38-40)
49Ongko Yohanes bopandir, “Guru, koi moniant siku' urakng inyo monundukng roh jahat momakai kuaso doi' Duatn. Apo koi morarakng io, obai io bukainyo doi' kolompok kito.”
50Yesus monimbas, “Co ulih kaitn morarakng urakng samaꞌan io, obai urakng inyo kinyo molawatn kaitn boroti momihak ko kaitn.”
Yesus kinyo ditorima' di sobuah laman di doerah Samaria
(9:51-56)
51Watu pakai' Yesus diangkat bobali' ko sorugo mongkitn dampikam. Jadi, Sio momutusan pakai' botula' ko kota Yerusalem. 52Lalu, Sio monyiuh boboropo utusan botula' mondoholu'i Sio. Boko utusan nantai botula' ko sobuah laman di doerah Samaria oca' momposiapan kodatakan-Nyo. 53Apo boko urakng Samaria di laman nantai, bolai' monorima' Yesus, obai nantai Sio paca'an monuju kota Yerusalem.#9:53: Urakng Samaria nantai hasil kawitn campur urakng Yahudi inyo campur agatn urakng inyo bukai Yahudi. Urakng Samaria ongko urakng Yahudi bomusuhan. Apotolagi', tompat urakng Yahudi monyombah Allah ado di kota Yerusalem, apo tompat urakng Samaria monyombah Allah ado di Gunung Gerazim. Jadi, sia' kinyo honda' urakng Yahudi ongko di doerah sia' dalapm pojalatan ko kota Yerusalem.
54Watu boko murid-Nyo, ia'an Yakobus huatan Yohanes mondingaꞌ hal nantai, sia' bopandir, “Tuhatn, honda' cado koi minto Allah mongiripm api doi' sorugo oca' mombonasoan sia'?” 55Apo Yesus mongilikng, monogur sia' obai pikiran ubo nantai kinyo bondar. 56Jadi, sia' botula' ko laman bukai.
Boko syarat pakai' monjadi murid Yesus
(9:57-62)
(Mat. 8:19-22)
57Yesus ongko boko murid-Nyo molajuan pojalatan ko kota Yerusalem. Dalapm pojalatan, ado urakng bopandir ko Yesus, “Aku paca'an hala tuyut Duatn, ko mono pan pojalatan Duatn.”
58 Yesus honda' urakng nantai mongotohu'i aman io monjadi murid-Nyo, io tajahan mohadapi kosulitan. Ongko Yesus bopandir ko io, “Payau ado lubakngnyo. Burukng ado sayakngnyo. Apo Ana' Monsio nyiant ado kodiapan.”
59Lalu Yesus bopandir ko urakng bukai, “Tuyut Aku jam.”
Urakng nantai bopandir, “Aku honda' mo, apo aku ija' momasar bopaiku holu'ai.”
60Apo Yesus bopandir ko io, “Biaram boko urakng inyo mati socaro rohani inyo kinyo pocayo agatn Allah, momasar boko urakng inyo mati socaro jasmani. Apo kolai gola' botula', momboritoan mongonaꞌi Koraja'an Allah di mono-mono.”
61Ado siku' urakng bukai agi' bopandir, “Aku paca'an monjadi murid Duatn, Tuhatn, apo aku gola' pulakng ongko bokotohuan agatn dongan somadikanku holu'ai.”
62Apo Yesus bopandir, “Aman siku' urakng pombajak mongilikng ko bolikat, io kinyo boguno. Samo jam, aman siku' urakng murid-Ku mongilikng ko bolikat, honda' bobali' ko boko hal inyo udah ditinggalan, io kinyo boguno pakai' Koraja'an Allah.”
Pašlaik izvēlēts:
Lukas 9: TBDS
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties