Lukas 4
4
Rajo Sitatn moncubo'i oca' Yesus bodosa
(4:1-13)
(Mat. 4:1-11; Mrk. 1:12-13)
1Yesus moninggalan sungai Yordan tompat Sio dibaptis. Roh Allah ado di dalapm diri Sio, moirikan Sio ko padakng pasir. 2Watu Yesus ado di santai, somanahan ompat puluh ari Rajo Sitatn moncubo'i oca' Yesus bodosa.
Somanahan watu nantai, Yesus kinyo bopua' la'apo pan. Koponsuahannyo Sio mooso kotakng kolaparan. 3Ongko Rajo Sitatn bopandir ko Yesus, “Aman Kolai bondar-bondar Ana' Allah,#4:3: Ana' Allah = Dalapm ayat ni'in, sotilah husus pakai' Yesus doi' Mazmur 2:7-9, kinyo umum pakai' urakng Kristen sobagai poana'an Allah. siuh am batu ni'in monjadi roti, oca' ado pomakatn pakai' Kolai.”
4Apo Yesus bopandir ko Rajo Sitatn, “Pomandiran Allah inyo ditulis dalapm Buku Suci, ‘Urakng kinyo bayo momontikan pomakatn pakai' kohidupan inyo sobondarnyo.’”#4:4: Doi' Ulangan 8:3
5Lopas nian Rajo Sitatn mombaba' Yesus botula' ko tompat inyo kotakng tinggi, huatan dalapm sopongirap mato Rajo Sitatn mononaian ko Yesus somuo koraja'an di dunia. 6Kato Rajo Sitatn ko Yesus, “Somuo kokuasa'an huatan kodampuan ni'in paca'an ku sorahan ko kolai obai somuonyo ni'in dionju' ko aku, jadi aku ulih moonju' somuonyo ko sopo pan inyo ku pilih. 7Aman Kolai monyombah aku, nononyo aku paca'an moonju' somuo ni'in ko Kolai.” 8Apo Yesus bopandir ko Rajo Sitatn, “Pomandiran Allah inyo ditulis di dalapm Buku Suci, ‘Sombahcam Tuhatn Allah kolai ongko taat'i Sio aja'am.’ ”#4:8: Doi' Ulangan 6:13-15
9Lopas nantai Rajo Sitatn mombaba' Yesus ko kota Yerusalem huatan monyiuh Sio bodiritn di pucu' bubukan Rumah Allah. Io bopandir, “Aman Kolai bondar-bondar Ana' Allah, molansakngcam!#4:9: Biasonyo ado banyaꞌ urakng inyo bokumpul di tongahlamanan Rumah Allah pakai' bodoa huatan moonji'i posombahan. Rajo Sitatn honda' oca' Yesus bodosa agatn mouji kosotiaan Allah. Rajo Sitatn honda' nantai tojadi dipohadapan urakng banyaꞌ. Apo, Yesus kinyo molabuhan la'apo pan kohonda' Rajo Sitatn. 10Kolai co tajahan bodapat pomodih, obai ado pomandiran Allah inyo ditulis dalapm Buku Suci, ‘Allah tajahan monyiuh boko molekat-Nyo molinduki Kolai.’#4:10-11: Doi' Mazmur 91:9-12 11‘Sia' paca'an monangkap Kolai agatn jarinyo oca' kaki Kolai pan kinyo luko kona' batu!’ ”
12Apo Yesus bopandir agi' ko Rajo Sitatn, “Pomandiran Allah inyo ditulis dalapm Buku Suci, ‘Jangan moncubo'i Tuhatn, Allah kolai!’ ”#4:12: Doi' Ulangan 6:16
13Lopas Rajo Sitatn jadi moncubo'i oca' Yesus bodosa agatn bomacapm caro, io moninggalan Yesus huatan monantian watu inyo boi' pakai' moncubo'i Sio agi'.
Yesus hoyu' momula'i pogota'an-Nyo di doerah Galilea
(4:14-15)
(Mat. 4:12-17; Mrk. 1:14-15)
14Lopas nian, Yesus pulakng ko doerah Galilea, bisi agatn kuaso Roh Allah. Kabar mongonaꞌi Sio tosebar di doerah Galilea nantai. 15Sio mongajar diboko rumah sombayakng di santai. Ongko somuo boko urakng momuji Sio.
Boko urakng di laman Yesus monula' Sio
(4:16-30)
(Mat. 13:35-58; Mrk. 6:1-6)
16 Di doerah Galilea nantai, Yesus datakng ko Nazaret, tompat Sio dibosaran. Watu ari Sabat,#4:16: Ari Sabat = Ari Sabtu, husus torahat ongko sombayakng pakai' urakng agama Yahudi. Sio mansu' ko rumah sombayakng ubo biasonyo. Ongko, Sio bodiritn, maju ko muka' pakai' mombaco doi' Buku Suci.#4:16: Pomandiran Allah inyo ditulis ulih Musa, boko nabi, huatan boko urakng bukai dipilih-Nyo, tulisannyo di dalapm korotas bogulukng 17Buku nabi Yesaya dionju' ko Sio. Sio mombuka'nyo, ongko monomuan boko ayat inyo honda' dibaco-Nyo.#4:17: Doi' Yesaya 61:1-2a
Ni'inan boko ayat inyo dibaco-Nyo,
18“Roh Tuhatn Allah ado di Aku,
obai Sio momilih Aku pakai' monyampaian kabar boi' ko boko urakng jaro;
Sio moutus Aku pakai' mongabaran
19boko urakng tahatan, tajahan dilopasan;
boko urakng buto, tajahan moniant;
Sio moutus Aku pakai' mombebasan boko urakng inyo didorako'i.#4:19: Porotian boko ayat ni'in ado makna jasmani ongko rohani. ‘Boko urakng jaro’ moumpamoan boko urakng inyo rondah hati, bosandar ko Allah. ‘Boko urakng tahatan’ moumpamoan boko urakng inyo dikuaso'i ulih boko iblis. Boko urakng buto moumpamoan boko urakng inyo bolupm mongoroti kohonda' Allah. ‘Boko urakng didorako'i moumpamoan boko urakng inyo ajab sonsaro obai dosa.’ Sio moutus Aku pakai' momboritoan, ninam watu Tuhatn moniant'an kasih-Nyo.”
20Yesus monutup huatan moonju' buku nantai ko potugas rumah sombayakng. Huatan Sio dudu' mongajar. Somuo urakng di dalapm rumah sombayakng nantai borotian Sio.
21Huatan Sio mula'i mongajar sia'. Kato-Nyo, “Pas ari ni'in, watu kaitn mondingaꞌnyo, tulisan nabi Yesaya nantai udah digonapi.”
22Somuo urakng inyo ado di santai bopandir, “Sio urakng boi'.” Sia' hiratn mondingaꞌ pomandiran Sio inyo kotakan corodi'. Kato sia', “Padohal Sio ni'in ana' Yusuf mo!”
23Ongko kato Yesus ko sia', “Pasti kaitn paca'an momadahan pobaso ni'in ko Aku, ‘Uai dokter, nyamani bo diri kolai siku'.’ Kohonda'nyo kolai mombutian kuaso Kolai di tompat asal kolai ni'in agatn mujisat, samo samaꞌan mujisat inyo koi dinga' inyo udah kolai labuhan di Kapernaum.”
24Ongko Yesus bopandir agi', “Dinga'an bo sobondarnyo conyiant nabi inyo dirogo'i di tompat asalnyo siku'. 25Buti nyata doi' joman nabi Elia komai. Ado musipm lapar-barau di somuo nogori obai conyiant hujatn somanahan tigo tohutn sotongah. Watu nantai ado banyaꞌ boko botina' balu di tanah Israel. 26Apo Allah monyiuh Elia botula' ko botina' balu inyo bukainyo urakng Israel di laman Sarfat, dampikng kota Sidon. 27Butinyo agi' doi' joman nabi Elisa komai. Ado banyaꞌ boko urakng Israel tokona' ponyakit kulit inyo bogola'i, apo conyiant siku' pan doi' sia' inyo dinyamani. Ongkah Naaman am urakng doi' nogori Siria, io kinyo urakng Israel. Ongkah io am inyo dinyamani.”
28Mondingaꞌ pandir Yesus nantai somuo urakng dalapm rumah sombayakng nantai kotakng godi. 29Sia' bodiritn molulukng Sio koluar doi' kota nantai, huatan mombaba' Sio ko konambikng bukit tompat kota sia' di bangun. Tujuan sia' honda' mombuakan Sio doi' pucu' konambikng nantai. 30Apo Yesus bojalatn morongko urakng banyaꞌ nantai huatan moninggalan sia'.
Yesus monundukng roh Jahat
(4:31-37)
(Mrk. 1:21-28)
31Lopas nantai Yesus botula' ko kota Kapernaum di Galilea di santai Sio mongajar boko urakng pas Ari Sabat. 32Sio bopandir agatn bisi kuaso. Jadi, sia' hiratn moniant caro Sio mongajar. 33Di santai, di rumah sombayakng ado siku' urakng inyo dirasu'i roh jahat. Roh jahat nantai, bulah urakng nantai mondorah kotakng borakng, 34“Ih! Yesus urakng Nazaret, jangan Duatn mongoncaci' koi. Koi tohu Duatn inyo Suci doi' Allah! Duatn datakng pakai' mombonasoan koi?”
35Yesus mohakap roh jahat nantai, “Bobacap! Koluar cam tangga'i urakng ni'in!” Ongko roh jahat nantai mohompasan urakng nantai jatu' dipohadapan boko urakng banya', lopasnyo koluar doi' urakng nantai apo co ngompodihinyo. 36Boko urakng kotakan hiratn, ongko sia' bopandir ko siku'-monyiku', “Wah! Kotakng nontu bondar pomandiran Sio ni'in. Sio monyiuh boko roh jahat koluar agatn kuaso, huatan sia' tuyut pomandiran-Nyo!” 37Ongko borito mongonaꞌi Yesus todinga' di soluruh doerah nantai.
Yesus monyamani montuho botina' Simon huatan boko urakng bukai jam
(4:38-41)
(Mat. 8:14-17; Mrk. 1:29-34)
38Lopas nantai, Yesus koluar doi' rumah sombayakng huatan botula' ko rumah Simon. Montuho botina' Simon tongahan gorikng bosar. Ongko sia' minto Yesus pakai' monyamaninyo. 39Jadi Yesus mohampiki kotidu'annyo lalu mohakap ponyakit nantai. Timpu nantai jam botina' nantai nyamanam am huatan molayati sia'.
40Watu matoari honda' tonggolapam, boko urakng mombaba' somuo boko urakng boponyakit ko Yesus. Sia' mondorita' obai bomacapm ponyakit. Yesus molota'an jari-Nyo ko bukakng sia' huatan monyamani sia'. 41Yesus pan monyiuh boko roh jahat koluar doi' boko urakng. Ongko boko roh jahat nantai koluar kapikng mondongkakng-mondorah, “Duatn nam Ana' Allah!” Obai boko roh jahat tohu Sio memang Rajo Inyo Dijanjian Allah. Apo Yesus monogur boko roh jahat nantai morarakng koras bopandir obai bolupm watunyo urakng mongotohu'inyo.#4:41: Yesus tohu obai aman Sio mombiaran boko roh jahat mongatoan obai Sio nantai Rajo Inyo Dijanjian Allah, Sio paca'an monjadi sangant tokonal sampai uyuh pakai' monyolosaian polayatan inyo udah Allah onji'i ko Sio. Mono pan co cucu' aman boko roh jahat inyo monyebar kabar boi' mongonaꞌi Yesus.
Yesus mongajar diboko kota di doerah Yudea
(4:42-44)
(Mrk. 1:35-39)
42 Kohobu'annyo watu matoari moncara', Yesus moninggalan kota Kapernaum nantai, botula' ko tompat inyo langunt. Apo banyaꞌ boko urakng monggoyapi Sio. Koponsuahannyo, sia' pan monomuan-Nyo, huatan bousaha oca' Sio jangan moninggalan sia'. 43Sio bopandir ko sia', “Nantai pontikng Aku gola' momboritoan Kabar Boi' mongona'i Koraja'an Allah#4:43: Koraja'an Allah = Sotilah ni'in dipakai pakai' Koraja'an Allah di joman komai, joman Yesus, joman ni'in ongko joman ahir. Tiat Kol. 1:15-20; Luk. 17:20-21; 1Kor. 15:20-28. Koraja'an Allah tomansu' boko warga-Nyo, kota-Nyo, pomorintahan-Nyo, boko poraturan-Nyo, dll. Tiat Luk. 22:28-30; Yoh. 18:36 diboko tompat bukainyo jam. Obai nianam, Aku, diutus Allah ko dunia ni'in.” 44Jadi Sio botula' momboritoan Kabar Boi' nantai di dalapm boko rumah sombayakng di doerah Yudea.
Pašlaik izvēlēts:
Lukas 4: TBDS
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties