Lukas 14
14
Yesus monyamani siku' urakng boponyakit pas ari Sabat
(14:1-6)
1Timpu Ari Sabat, Yesus makatn sosamo agatn boboropo urakng guru agama Yahudi huatan boboropo urakng pomimpitn agama doi' kolompok Farisi. Sia' makatn di rumah salah siku' urakng pontikng doi' kolompok Farisi nantai. Somuo urakng Farisi ongko guru inyo ado di santai borotian Yesus agatn toliti, pakai' bogoyap kosalahan-Nyo. 2Ntobukan datakng siku' urakng inyo boponyakit ko Yesus. Io kompodihan ponyakit inyo bulah longan ongko kakinyo bongka'. 3Lalu Yesus botakutn ko sia' boko guru agama Yahudi ongko boko urakng Farisi, “Monurut Porintah Allah inyo ditulis Musa dalapm Hukupm Torat, ulih cado monyamani siku' urakng timpu Ari Sabat?” 4Mondingaꞌ Yesus botakutn nantai, sia' somuonyo langunt.
Lalu Yesus molota'an jari-Nyo ko bukakng urakng inyo boponyakit nantai, monyamaninyo, lalu monyiuhnyo pulakng.
5Lalu Yesus bopandir ko sia', “Aman, soumpamonyo, ana' kaitn damo sapi kaitn jatu' ko dalapm lubakng timpu Ari Sabat, pasti kaitn lansukng mongguakngnyo timpu ari nian jam.”
6Sia' totap langunt obai culih monikaki-Nyo.
Boko urakng gola' hala onju'-bori' ongko culih buhau
(14:7-14)
7Yesus borotian boko urakng inyo dihundakng momilih dudu' di boko tompat palikng muka'. Lalu, Sio mongisahan poumpamoan ni'in ko sia'. 8Kato-Nyo, “Aman siku' urakng mohundakng kaitn ko pogai kawitn,#14:8: Koraja'an Allah ulih jam dibandikan agatn pogai. Tiat Lukas 13:29. Urakng Farisi boanggapan obai sia' bisi kodudu'an inyo pontikng dalapm Koraja'an Allah. jangan momilih dudu' di boko tompat buai muka'. Jangan samaꞌan nian obai mungkitn ado urakng bukai inyo lobih pontikng daripado kaitn inyo dihundakng jam. 9Aman urakng pontikng nantai datakng, tuatn rumah tajahan minto kaitn pindah oca' tamu' inyo pontikng nantai ulih dudu' di santai. Kaitn paca'an malu obai toposo dudu' di tompat inyo kotakng bolikat. 10Apo aman siku' urakng mohundakng kaitn ko pogai kawitn, kohonda'nyo kaitn momilih dudu' di tompat inyo palikng bolikat. Mungkitn tuatn rumah tajahan minto kaitn pindah oca' dudu' di tompat inyo kotakng muka'. Ongko, somuo tamu' inyo bukai tajahan mohormati kaitn. 11Labuhancam samaꞌan nian, obai Allah tajahan mongombabahan somuo urakng inyo moncubo moninggian diri. Apo, Allah tajahan moninggian somuo urakng inyo mongombabahan diri.”
12Lopas nantai Yesus bopandir ko urakng Farisi umputn rumah tompat sia' makatn, “Aman kolai moadoan pogai ongko makatn tongah ari damo makatn malapm, jangan mohundakng boko pokawalan, boko somadikan, boko koluarga bosar, damo boko totangga inyo dampu. Jangan mohundakng sia' obai sia' ulih mohundakng kolai agi'. Ongkah nantaiam monjadi balasan inyo kolai tajahan dapat. 13-14Apo, aman kolai moadoan pogai ongko makatn, hundakngbo boko urakng inyo culih mombalasnyo samaꞌan urakng jaro, urakng bokocina'an, urakng lumpuh, urakng buto. Aman kolai bulah ubo nantai, kolai tajahan dapat balasan inyo jouh lobih boi' timpu Allah bulah boko urakng inyo taat ko Sio hidup agi'.”#14:13-14: Somuo urakng paca'an hidup agi' doi' komatian (Tiat Kisah 24:15). Apo ongkah urakng inyo pocayo agatn Yesus paca'an dapat balasan inyo boi'. Urakng inyo kinyo pocayo paca'an dihukupm. Tiat jam 1 Korintus 15.
Allah mohundakng banyaꞌ urakng pakai' monjadi anggota koluarga korajaan-Nyo, apo ado boko urakng inyo monula'-Nyo
(14:15-24)
(Mat. 22:1-10)
15Mondingaꞌ pomandiran Yesus nantai, siku' urakng tamu' bopandir ko Sio, “Diborokati boko urakng inyo tajahan makatn sosamo Allah dalapm Korajaan-Nyo di sorugo.”#14:15: Agatn pomandiran ni'in, urakng ni'in bopikir io tomansu' anggota koluarga Koraja'an Allah. Apo Yesus momakai poumpamoan monggambaran sopo sobondarnyo inyo ulih monorima' hundakan pakai' monjadi anggota koluarga Koraja'an Allah.
16Apo Yesus mongisahan poumpamoan ni'in ko io. Kato-Nyo, “Ado urakng honda' moadoan pogai. Io bulah boko posiapan, ongko mohundakng banyaꞌ urakng. 17Watu honda' mula'i pogai, io monyiuh hulutnnyo pakai' monyampaian posatn ni'in ko boko urakng inyo dihundakng nantai, ‘Huncapm, datakng. Somuonyo udah siap!’#14:16-17: Monurut adat urakng Yahudi duo kali hundakng (potamo sobolupmnyo huatan inyo koduo aman somuo posiapannyo udah siap)
18Apo sia' somuo monula', kapikng momadahan bomacapm alasan pakai' culih datakng ko pogai nantai. Ado inyo bopandir, ‘Maap. Aku hoyu' momboli lakau jadi aku gola' botula' boriso'inyo.’
19Ado inyo bukai bopandir, ‘Maap. Aku hoyu' momboli lima' pasakng sapi inyo gola' diporotian komampuannyo bokorojo.’
20Ado inyo bukai agi' bopandir, ‘Aku hoyu' jadi kawitn, jadi aku culih datakng.’
21Lopas nian, hulutn nantai bobali' pulakng, molaporan somuonyo nantai ko habakngnyo. Habakngnyo godi obai somuo urakng inyo dihundakng bodalih culih datakng. Lalu, io monyiuh hulutnnyo pakai' hagar botula' ko boko jalatn ongko boko sako jalatn di kota pakai' mohundakng boko urakng jaro, urakng bokocina'an, urakng lumpuh, urakng buto. Lalu, sia' somuo datakng ko pogai nantai ongko makatn.
22Lopas nian, hulutn nantai bopandir ko habakngnyo, ‘Habakng, aku udah molabuhan porintah duatn nantai, apo ija' ado tompat logo pakai' banyaꞌ tamu' agi'.’
23Lalu, habakng nantai monyiuh hulutnnyo, ‘Botula'cam ko boko jalatn bosar ongko ko boko sako jalatn di luar kota. Hundakngcam boko urakng doi' su'utn ko pogai ongko makatn jam. Kongkanti'icam sia' pakai' datakng, oca' rumahku bisi. 24Dinga'anbo ni'in: Pasti conyiant siku' pan doi' boko urakng inyo potamo kali ku hundakng nantai paca'an mooso'i la'apo pan inyo udah ku sodia'an pakai' sia'.’ ”#14:16-24: Dalapm poumpamoan ni'in urakng inyo mohundakng nantai molambakan Allah, pogai molambakan Koraja'an Allah, boko tamu' inyo dihundakng potamo (ayat 16-20) molambakan boko urakng Yahudi inyo monula' undakan Allah, boko tamu' kolompok koduo (ayat 21) molambakan boko urakng Yahudi inyo dianggap co boguno, apo monorima' undakan Allah, huatan boko tamu' kolompok kotigo (ayat 23) molambakan boko urakng bukai Yahudi inyo monorima' jam undakan Allah. Tiat Roma 11:11, 25
Urakng gola' bosodia moninggalan somuonyo aman honda' monjadi murid Yesus
(14:25-33)
25Watu Yesus ija' molajuan pojalatan-Nyo ko kota Yerusalem, banya' urakng tuyut Sio. Sio mongilikng ongko bopandir ko sia', 26“Sotiap urakng inyo honda' tuyut Aku culih monjadi murid-Ku aman io lobih mongasihi urakng bukai daripado Aku, ia'an mongasihi indai, Bopai, bini, ana', somadikan apotolagi' dirinyo siku'. 27Urakng inyo honda' tuyut Aku gola' siap mohadapi ajab sonsaro, apotolagi' sampai mati. Nian samo samaꞌan urakng inyo paca'an dihukupm mati, io gola' momikul kayu salibnyo siku'.#14:27: Tiat catatan ponjolasan pakai' Lukas 9:23. Aman io kinyo siap mohadapi ajab sonsaro, io culih monjadi murid-Ku.
28Lalu, aman honda' monjadi murid-Ku, pikiran doholu somuo inyo gola' ditinggalan. Samo sama'an urakng inyo honda' moninjakan sobuah monara. Io gola' tohu duitnyo cukup cadoai pakai' monjadi'i monara nantai. Pasti io paca'an dudu' mohitukng ungkusnyo agatn toliti doholu. 29Aman cado, urakng nantai paca'an mula'i bulah pondasinyo, apo co mampu monjadi'inyo obai duitnyo kinyo cukup. Lalu sotiap urakng inyo moniant hal nantai paca'an boulu'an io. 30Sia' paca'an bopandir samaꞌan ni'in, ‘Tiat urakng nantai! Io mula'i moninjakan apo co mampu monjadi'inyo.’
31Agatn contoh bukai. Soandainyo, siku' urakng rajo inyo bisi sopuluh ribu tontara paca'an boparakng agatn rajo bukai inyo bisi duo puluh ribu tontara. Pasti lobih doholu rajo nantai paca'an dudu' momportimbakan oca' io tohu ulih cado molawatn musuhnyo nantai. 32Aman io mongotohu'i sobolupmnyo sia' culih molawatn musuhnyo nantai, io paca'an mongiripm boko utusannyo pakai' bohoupm oca' bodamai. Rajo molabuhan nantai sobolupm tontara musuhnyo tolalu dampikng. 33Ubo nian jam agatn boko urakng inyo honda' monjadi murid-Ku. Io gola' bopikir soboi'-boi'nyo holu ai obai aman io honda' monjadi murid-Ku, io gola' moninggalan somuo umputnnyo.”#14:33: Yesus kinyo mongatoan somuo murid-Nyo gola' jaro. Apo Sio mongohonda'i somuo murid-Nyo pakai' moutamoan Allah huatan kohonda'-Nyo doholu (Matius 6.33), lalu sia' bosodia moninggalan somuo hal, obai nantai kohonda' Allah pakai' sia'. Tiat jam Lukas 9:57-62, 12:31, 33-34, 18:29-30; Filipi 3:7-9.
Poumpamoan mongona'i garapm inyo kinyo boguno agi'
(14:34-35)
(Mat. 5:13; Mrk. 9:50)
34“Garapm memang boguno. Apo aman garapm monjadi taba'i, co mungkitn dipulah mancitn agi'.#14:34: Garapm inyo murni kinyo tohu hilakng oso mancitnnyo, jadi ado duo tapsiran: 1) Yesus bomasud garapm inyo kinyo murni. Aman monjadi bansah, ulih monjadi taba'i. Garapm ni'in molambakan boko urakng inyo kinyo murni, kinyo bondar-bondar monaati-Nyo. DAMO 2) Yesus momakai gambaran inyo kinyo mungkitn dapat tojadi pakai' monokatan sosuatu inyo sangant luar biaso bolawatan agatn soharusnyo. Sama'an boko kolompok pomimpitn agama Yahudi inyo soharusnyo monaati Allah, apo sobondarnyo kobanya'an sia' kinyo boguno pakai' Allah.
35Garapm nantai kinyo boguno agi' pakai' bulah lakau subur. Kinyo boguno jam pakai' bulah pupuk. Kinyo boguno samo sokali. Jadi, garapm nantai dibuakan ja'.#14:34: Timpu joman Buku Suci, garapm bisi banyaꞌ gunonyo. Garapm digunoan pakai' moonji'i oso pado pomakatn, ulih jam moawetannyo. Garapm dipakai agatn kurbatn bonatakng, mungkitn pakai' molambakan porjanjian Allah agatn umant-Nyo inyo kinyo borubah. Urakng molungku sampah ongko monyimpatn garapm dipucu'nyo pakai' bulah pupuk. Isu'anu garapm molambakan pokawalan damo kocorodi'an. Yesus mongohonda'i boko murid-Nyo monjadi boguno oca' Allah dipuji. Aman murid-Nyo kinyo boguno, paca'an dibuakan samo samaꞌan garapm inyo kinyo mancitn agi'. Aman honda' mongoroti masud doi' pomandiran-Ku, gola' momportimbakan boboi' somuo inyo hoyu' kaitn dinga'.”
Pašlaik izvēlēts:
Lukas 14: TBDS
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties