ወንጌል ዘማቴዎስ 21
21
ምዕራፍ 21
ዘከመ ቦአ እግዚእ ኢየሱስ ኢየሩሳሌም
1 #
ማር. 11፥10-33፤ ሉቃ. 19፥28-48። ወቀሪቦ እግዚእ ኢየሱስ ኢየሩሳሌም በጽሐ ቤተ ፋጌ እንተ ገቦ ደብረ ዘይት ወእምዝ ፈነወ እግዚእ ኢየሱስ ክልኤተ እምአርዳኢሁ። 2ወይቤሎሙ ሑሩ ሀገረ ዘቅድሜክሙ ወይእተ ጊዜ ትረክቡ እድግተ እስርተ ምስለ ዕዋላ ፍትሕዎሙ ወአምጽእዎሙ ሊተ። 3ወእመቦ ዘይቤለክሙ ምንተ ትገብሩ በሉ እግዚኦሙ ይፈቅዶሙ ወበጊዜሃ ይፌንዉክሙ። 4ወዝ ኵሉ ዘኮነ ከመ ይትፈጸም ዘተብህለ በነቢይ። 5#ኢሳ. 62፥11፤ ዘካ. 9፥9፤ ዮሐ. 12፥14። «በልዋ ለወለተ ጽዮን ነዋ ንጉሥኪ ይመጽእ ኀቤኪ ጻድቅ ወየዋህ እንዘ ይጼዐን ዲበ እድግት ወዲበ ዕዋላ።» 6ወሐዊሮሙ አርዳኢሁ ገብሩ በከመ አዘዞሙ እግዚእ ኢየሱስ። 7ወአምጽኡ እድግተ ወዕዋላ ወረሐኑ አልባሲሆሙ ላዕሌሆሙ ወተጽዕነ እግዚእ ኢየሱስ ዲቤሆሙ። 8#2ነገ. 9፥13። ወዘይበዝኁ ሕዝብ ነጸፉ አልባሲሆሙ ውስተ ፍኖት ወካልኣንሂ መተሩ አዕጹቀ እምውስተ ዕፀው ወነጸፉ ውስተ ፍኖት። 9#መዝ. 117፥25-28። ወሕዝብሰ እለ የሐውሩ ቅድሜሁ ወእለሂ ይተልዉ ይጸርሑ ወይብሉ ሆሣዕና ለወልደ ዳዊት ቡሩክ ዘይመጽእ በስመ እግዚአብሔር ሆሣዕና በአርአያም። 10#ዮሐ. 12፥19። ወበዊኦ እግዚእ ኢየሱስ ኢየሩሳሌም ተሀውከት ኵላ ሀገር እንዘ ትብል መኑ ውእቱ ዝንቱ።
11ወይቤሉ አሕዛብ ዝ ውእቱ ኢየሱስ ነቢይ ዘእምናዝሬት ዘገሊላ። 12#ማር. 11፥15፤ ሉቃ. 19፥45፤ ዮሐ. 2፥14። ወቦአ እግዚእ ኢየሱስ ቤተ መቅደስ ወሰደደ ኵሎ እለ ይሠይጡ ወይሣየጡ በቤተ መቅደስ ወገፍትዐ ማእዳቲሆሙ ለመወልጣን ወመናብርቲሆሙ ለእለ ይሠይጡ ርግበ። 13#ኢሳ. 56፥7፤ ኤር. 7፥11። ወይቤሎሙ ጽሑፍ ዘይብል ቤትየሰ ቤተ ጸሎት ይሰመይ ወአንትሙሰ ረሰይክምዎ በኣተ ፈያት ወሰረቅት።
በእንተ ዕዉራን ወሐንካሳን
14ወመጽኡ ኀቤሁ ዕዉራን ወሐንካሳን በቤተ መቅደስ ወአሕየዎሙ። 15ወሶበ ርእዩ ሊቃነ ካህናት ወጸሐፍት መንክረ ዘገብረ ወደቂቅኒ እንዘ ይጸርሑ በቤተ መቅደስ፥ ወይብሉ ሆሣዕና ለወልደ ዳዊት ኢሐወዞሙ አላ አንጐርጐሩ።#ቦ ዘኢይጽሕፍ «አላ አንጐርጐሩ» 16#መዝ. 8፥3። ወይቤልዎ ኢትሰምዕኑ ዘይብሉ እሉ ደቂቅ ወይቤሎሙ እግዚእ ኢየሱስ እወ አልቦሁ አመ አንበብክሙ ዘይቤ «እምአፈ ደቂቅ ወሕፃናት አስተዳሎከ ስብሐተ።» 17ወኀደጎሙ ወወፅአ አፍኣ እምሀገር ወቦአ ቢታንያ ወቤተ ህየ።
በእንተ በለስ እንተ አልባቲ ፍሬ
18ወጸቢሖ እንዘ የዐርግ እግዚእ ኢየሱስ ሀገረ ርኅበ። 19#ሕዝ. 17፥24፤ ኢዩ. 1፥7፤ ዕብ. 6፥8። ወርእየ ዕፀ በለስ በፍኖት ወሖረ ኀቤሃ ይንሣእ ፍሬ እምኔሃ#ቦ ዘኢይጽሕፍ «ይንሣእ ፍሬሃ» ወኢረከበ ውስቴታ ዘእንበለ ቈጽል ባሕቲቱ ወይቤላ ኢይኩን እንከ ፍሬ እምውስቴትኪ ለዓለም ወየብሰት በጊዜሃ ይእቲ በለስ። 20ወርእዮሙ አርዳኢሁ አንከሩ ወይቤሉ እፎ በጊዜሃ የብሰት ዛቲ በለስ። 21#17፥20። ወአውሥአ እግዚእ ኢየሱስ ወይቤሎሙ አማን እብለክሙ እመ ብክሙ ሃይማኖት ወኢትናፍቁ አኮ ክመ ዕፀ ባሕቲቶ ዘትገብሩ አላ ለዝንቱ ደብር ለእመ ትብልዎ ተንሥእ ወተወረው ውስተ ባሕር ይከውን ለክሙ። 22ወኵሎ ዘሰአልክሙ በጸሎት እንዘ ትትአመኑ ትነሥኡ።
ዘከመ ተስእልዎ ካህናት ወረበናት ለእግዚእ ኢየሱስ
23 #
ዮሐ. 2፥18። ወበዊኦ ቤተ መቅደስ እንዘ ይሜህር ቀርቡ ኀቤሁ ሊቃነ ካህናት ወመላህቅተ ሕዝብ እንዘ ይብሉ በመባሕተ መኑ ትገብር ዘንተ ወመኑ ወሀበከ ዘንተ ሥልጣነ። 24ወአውሥአ እግዚእ ኢየሱስ ወይቤሎሙ እሴአለክሙ አነሂ አሐተ ቃለ ወእምከመ ነገርክሙኒ አነሂ አየድዐክሙ በአይ ሥልጣን እገብር ዘንተ። 25ጥምቀቱ ለዮሐንስ እምአይቴ ውእቱ እምሰማይኑ ወሚመ እምሰብእ ወኀለዩ በበይናቲሆሙ ወይቤሉ እመ ንብሎ እምሰማይ ይብለነ በእፎኬ ዘኢአመንክምዎ። 26#14፥5። ወእመሂ ንብሎ እምሰብእ ንፈርሆሙ ለሕዝብ እስመ ከመ ነቢይ ይሬእይዎ ለዮሐንስ። 27ወአውሥእዎ ለእግዚእ ኢየሱስ ወይቤልዎ ኢነአምር ወይቤሎሙ ውእቱኒ አነሂ ኢያየድዐክሙ በአይ ሥልጣን እገብር ዘንተ።
ምሳሌ በእንተ ክልኤቱ አኀው
28ወምንተ ትብሉ አሐዱ ብእሲ ቦቱ ክልኤቱ ደቂቅ አኀው ወይቤሎ ለቀዳማዊ ወልድየ ሑር ተቀነይ ዮም ውስተ ዐጸደ ወይንየ። 29ወአውሥአ ወይቤ ኦሆ እግዚእየ ወኢሖረ። 30ወለካልኡኒ ዘይንእስ ይቤሎ ከማሁ ወአውሥአ ወይቤ እንብየ ወእምድኅረዝ ነስሐ ወሖረ። 31#ሉቃ. 18፥14። መኑ እንከ እምክልኤሆሙ ዘገብረ ፈቃደ አቡሁ ወይቤልዎ ደኃራዊ ወይቤሎሙ እግዚእ ኢየሱስ አማን እብለክሙ ከመ ኃጥኣን ወመጸብሓን ወዘማውያን ይቀድሙክሙ በዊአ ውስተ መንግሥተ እግዚአብሔር። 32#ሉቃ. 6፥29። እስመ መጽአ ኀቤክሙ ዮሐንስ በፍኖተ ጽድቅ ወኢአመንክምዎ ወመጸብሓንሰ ወዘማውያን አምንዎ ወአንትሙሰ ርእየክሙሂ ኢነሳሕክሙ ጥቀ ድኅረ ለአሚን ቦቱ።
ምሳሌ በእንተ ዐጸደ ወይን
33 #
ማር. 12፥1-12፤ ሉቃ. 20፥9-19። ወይቤሎሙ ካእልተ ምሳሌ ስምዑ ብእሲ በዓለ ቤት ተከለ ዐጸደ ወይን ወገብረ ሎቱ ጸቈነ ወከረየ ውስቴቱ ምክያደ ወሐነጸ ማኅፈደ ወወሀቦሙ ለዐቀብት ወነገደ። 34#ኢሳ. 5፥1-10። ወአመ በጽሐ ጊዜ ፍሬሁ ፈነወ አግብርቲሁ ኀበ ዐቀብት ከመ ያምጽኡ ሎቱ እምፍሬ ወይኑ። 35#23፥34-37። ወአኀዝዎሙ እሉ ዐቀብት ለአግብርቲሁ ቦ ዘቀሠፉ ወቦ ዘወገሩ ወቦ ዘቀተሉ። 36#22፥4። ወእምዝ ፈነወ ካልኣነ አግብርተ እለ ይበዝኁ እምቀደምት ወኪያሆሙኒ ከማሆሙ ረሰይዎሙ። 37ወድኅረ ፈነወ ኀቤሆሙ ወልዶ እንዘ ይብል የኀፍርዎ ለወልድየሰ። 38#26፥4። ወሶበ ርእይዎ እሉ ዐቀብት ለወልዱ ይቤሉ በበይናቲሆሙ ነዋ ዝ ውእቱ ወራሲሁ ንዑ ንቅትሎ ወንርከብ ርስቶ። 39#ዕብ. 13፥12። ወነሥእዎ ወአውፅእዎ አፍኣ እምዐጸደ ወይን ወቀተልዎ። 40#ኢሳ. 5፥3-4። ወአመ መጽአ በዓለ ዐጸደ ወይን ምንተ እንከ ይሬስዮሙ ለእሉ ዐቀብት። 41ወይቤልዎ በእኪት ይቀትሎሙ ለእኩያን ወወይኖሂ ይሁብ ለካልኣን ዐቀብት እለ ይሁብዎ ፍሬሁ በበጊዜሁ። 42#መዝ. 117፥22፤ ግብረ ሐዋ. 4፥11፤ 1ጴጥ. 2፥6-9። ወይቤሎሙ እግዚእ ኢየሱስ አልቦሁ አመ አንበብክሙ ውስተ መጻሕፍት «እብን እንተ መነንዋ ነደቅት ይእቲ ኮነት ውስተ ርእሰ ማዕዘንት እምኀበ እግዚአብሔር ኮነት ዛቲ ወነካር ይእቲ ለአዕይንቲነ።» 43በእንተ ዝንቱ እብለክሙ ከመ ትትሀየድ እምኔክሙ መንግሥተ እግዚአብሔር ወትትወሀብ ለካልኣን እለ ይገብሩ ፍሬሃ። 44#ዳን. 2፥34-44። ወዘሰ ወድቀ ዲበ ይእቲ እብን ይትቀጠቀጥ ወለዘሂ ወድቀት ዲቤሁ ተሐርጾ። 45ወሰሚዖሙ ሊቃነ ካህናት ወፈሪሳውያን ምሳልያቲሁ አእመሩ ከመ በእንቲኣሆሙ ይብል፤ 46ወእንዘ ይፈቅዱ የአኀዝዎ ፈርህዎሙ ለሕዝብ እስመ ከመ ነቢይ ውእቱ በኀቤሆሙ።
Pašlaik izvēlēts:
ወንጌል ዘማቴዎስ 21: ሐኪግ
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties