JÃ 1
1
Ta kumkajir
(Oo Heb 1:1-3; 1 Jã 1:1-2; 1 Jã 5:13)
1Lo yaɓoodat ta i nõ, ta i nat kɨ Luwah, na ta i Luwah. 2Ta'n non i lo yaɓoodat nat kɨ Luwah. 3Kɨtakula la Luwah ɗan nyag tube ye, kam nyagt'n Luwah ɗa ye, ɗa nya mad kɨɗa kɨkanjã al. 4Kamat kumkajir i tit, na kumkajir i kunj lo deg. 5Kunj ndɨ unj kam tilt, na til ut dɔa al. 6Luwah la de mad kɨ tɔa i Jã. 7De'n non ɗe, i ngemanaj, kɨtakad manaj dɔ kunjt, kad deg tube adɨn kamd Luwah kɨtakulɨn. 8Ĩ kɨɓe kɨ dɔn i kunjɨn non al, na ɗe kɨtakad'n manaj dɔ kunjt. 9Kunjɨn non la i kunj kɨ rota ye, lon ɗe dɔningt ne ndɨ unj dekɨɗen. 10Ta i dɔningt. Luwah ɗa dɔning kɨtakula, na deg kɨ dɔningt gerɨna al. 11Ta'n non ɗe ro degt lon, na deg loa hɔna kɨ rodt al. 12Na deg tube'n hɔna kɨ rodt, na adɨna kamd tɔ ye, ad'd tɔg kɨ ĩ ngan Luwah. 13Ĩgɨn non oojɨnd kɨtakul mosɨ al, ke kɨtakul ndig lo dãro de, ke kɨtakul ndig lo de, na ĩn kɨ kooj kɨtakul ndig lo Luwah tã. 14Ta tel dãro de, hɔlondɨ rojt, j'oo maj loa kɨ tɔitɔi kɨ tit kɨmaj kɨ tɔitɔi lo ngon kɨ kooj kɨɗabe, kɨ ɗe ko ro bɔwt, ɗoosɨ kɨ kamkẽ kɨ rota tɔ. 15Jã manaj, ɗa ko an: Ĩn ɗan la, i de'n m'elta loa m'an: De'n ndɨ ɗe gomt ye, i kɨbo tɔim kɨta i nõ maɗi nõ koojɨmt.
16Jĩ tube kɨ ngah kamkẽ ko kam nyamajgt loa kɨ ngãi ad maj urrj kɨ dɔtdɔt. 17Luwah ad mberkɨnda kɨtakul Moij, na kamkẽ kɨ rota ɗen kɨtakul Jeju Krist. 18De mad kɨ oo Luwah nja kɨɗa goto bat, na ngon kɨ kooj kɨɗabe'n i Luwah, ĩn i kad bɔwt la ad deg gerɨna ye.
Manaj lo Jã ngeɗa deg baptem
(Oo Mat 3:1-12; Mrk 1:1-8; Luk 3:1-18; Jã 5:33-36)
19Juipg kɨ ɓebo Jerusalemt lan ngéjamosɨ kadkarig kɨ Lebiag kad ndɨjen Jã anan: Ĩ nõ a?
20Najkɨma lo Jã la ten: Jã maj ta al, na tɔ tant an: Mĩ Krist al.
21Deg'n non ndɨjena anan: I titbãi a? Ĩ Eli a?
Jã tur an: Mĩ Eli al.
Ndɨjena anan: Ĩ ngekelta kɨ ta Luwaht'n non a?
Jã tur an: Ãã.
22Ndɨjena tɔ anan: Ta ye, ĩ nõ a? Kad kɨ tel kɨ ta mad kɨ tur jad ngélaj. Ĩ kɨbe ye, ta ɗi i ndɨ el dɔ roit?
23El an: Mĩ ndɨ de kɨ ngeko kam dɨlalot kan: I ɗan go ɗob lo Bɨraɓe ad asɨna jerɨr.
Tit'n Ejai ngekelta kɨ ta Luwaht elɨn. 24Parisɨg ĩn ku degt'n hã land. 25Ɗa ndɨjena ta ɓaitɔ anan: Ĩla ĩ Krist al, ke Eli, ke ngekelta kɨ ta Luwah'n non al, a ne kɨtɔɗi i ɗa i ɗan deg baptem a?
26Jã turd an: Mĩ taa, m'ɗa deg baptem kam mant, na de mad ɗa densɨt ne, ĩn i gerɨna al; 27de'n non ndɨ ɗe gomt, na mĩ m'asɨ kad m'tut kɨla sanja loa al.
28Nyag'n non ɗan nya Betanit, gid bah Jurdẽt, lot'n Jã ɗa ɗa deg baptemt.
Jeju i ngon bat lo Luwah
(Oo Mat 3:13-17; Jã 3:28-36)
29Loti got Jã oo Jeju a ɗe kɨ dɔnt, na el an: Oon ngon bat lo Luwah kɨ Nge kun majal lo deg kɨ dɔningt kɔ. 30Ĩla i de'n m'elta loa kete m'an: De mad a ɗe gomt nõ, na tɔim kɨta i kete nõ koojɨmt. 31Mĩ kɨɓe kaa m'gera kete al, na i kɨtakad Israel geran la m'ɗe m'ɗan deg baptem kam mant ye.
32Jã manaj 'nten: M'oo Ndil ɗisɨ ko dɔrãt tit derr be, na ndɨ dɔat. 33M'gera kete al, na Luwah'n lam ɗa deg baptem kam mant la elɨm an de'n a oo Ndil ɗisɨ na ndɨ dɔat nõ la i de'n a ɗa deg baptem kam Ndil kɨkunjɗangt ye. 34M'oo, na m'manaja kad i Ngon Luwah.
Ngéndoog kɨdasa lo Jeju
(Oo Mat 4:18-22)
35Loti got Jã i nõbe ɓaitɔ, nat kɨ ngéndoog lon joo 36na lon oo Jeju a tɔi ye, el an: Oon ngon bat lo Luwah. 37Ngéndoog kɨjoo lo Jã oon dɔ ta'n el, na ndulon go Jeju. 38Jeju mbel kɨ gog, na ood a ndulon gon, eld an: A i sahn ɗi a? Turɨna anan: Rabi, ad i ngendoodeg, i ndɨ ɗen a?
39Eld an: I ɗe oon.
Awɨn oon londia, na ndɨn sia ndɔt'n non mbã lo kɨsɔle.
40Kɨ kɨɗa ku kɨ joogt'n oon dɔta lo Jã, na ndulon go Jeju ye, tɔa i Andre ngon kõ Simõ Pierr. 41Dasabang, Andre ngah ngonkõ Simõ, ela an: Kɨ ngah Mesi ad i Krist.
42Ɗe sia ro Jejut, Jeju ooa, na ela an: ĩ Simõ, ngon Jonas; a kuniɨn Kepas (ad i mbal).
Jeju kun Pilip kɨ Natanael
43Loti got Jeju ndig kɨ n'aw Galilet, na ngah Pilip: Ela an: I ndulo gom.
44Pilip i de kɨ Besaidat; Besaida i ɓe lo Andre kɨ Pierr. 45Pilip ngah Natanael, ela an: Kɨ ngah de kan Moij ndang ta loa kam Mberkɨndat, ngékelta kɨ ta Luwaht ndangɨn ta loa kam maktubgt ho ad i Jeju kɨ Najaret't, i ngon Jojep.
46Natanael el Pilip an: Nya mad kɨmaj asɨ tee ko kam ɓet kɨ Najaret't e?
Pilip tura an: I ɗe oo.
47Lon Jeju oo Natanael a ɗe kɨ roat ye elta loa an: Oon Israel kɨ rota, kɨ ndando goto roat.
48Natanael ela an: I gerɨm ko ɗa? Jeju tura an: kete lon Pilip kuni al ɓaitɔ, lon i ndɨn ndil kag mbaiɓoodt la m'ooi ye.
49Natanael tura an: Rabi, ĩ ngon Luwah, ĩ Ngar lo Israel.
50Jeju tura an: Girra kel'n m'eli m'an m'ooi ndil kag mbaiɓoodt la admɨn kami yo? A oo nyag kɨbo tɔi ĩgɨn non.
51Jeju ela tɔ an: Rota, rota la m'ndɨ m'elsɨ ye, a oon dɔrã ɗa tag, na malaikag lo Luwah a alɨn kɨ dõ ho, a ɗisɨn kɨ ber ho kɨ dɔ Ngon det.
Pašlaik izvēlēts:
JÃ 1: MlL
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Mbai Bible Revision © Bible Society of Chad, 2015.