Seemthawhnak Thuhmaihruai
Thuhmaihruai
A Min: “Seemthawhnak” hi Hebru Bible Grik aan in an lehmi, #A min Septuagint an ti Aanta Fiansaknak ah zoh. cun Latin aan ih lehsinmi#Latin aan ih lehsinmi:Vulgate tiah an ko. ih ta hmancihmi a ii.
A Ngantu, A Ngan Kum leh A Ngannak Hmun: Kumzabil hleiruknak hnuk in Moses ih nganmi tiah ruah leh zum a ik hang lo nak thu phunphun an suahpi. Moses ih nganmi tlungpi a om kau thok, cun amah om ti lo hnukih zohfel, beengmi khaw an om paan thok. A kum thu ah: tuandeuh a ik ahcun kum 1450-500 BCE, hnukdeuh a ik ahcun 1200-500 BCE ik zum a ii. A hmun thu ahcun ramcar om lioah ngan thawh in, Kanaan phat hnukah khawm leh tum, zohfel leh uh a ik zum a ii.
Seemthawhnak hi Hebru Bible ṭhendan ah Daan bu iklole Zirhnak an timi Torah sungah siah a i nain Daanthu vanin santhuanthu, pupapawl ih thu, thuanthungaai, thilpawl ih hramthawhnak, thilcangmi pakhatkhat ih hrampi, biazai, tipawl cokceem an ii. Thilpawl an om leh an cannak a ruang thu simnak a i tleng. Acui thuanthu cu aanta nolh viangvoin iseh (Seem 27); aantabuur nolh in iseh (Seem 1; 39; 41); thusirhsan nolh in iseh, iklole hmun khat ih a simmi khi hmun ce ah sim sei a hmang—Sarah ih micing ik thok—Seem 11 cu 25; 29 ah—timangin. Thu pakhat khi a hrialah iseh, hmun ce ah iseh, sakhatin maw, pace duau in maw, a simṭhan. Ni thum sungih seemsuahnak 1:3-13 hi ni li in ni ruk tiang ih ta 1:14-31; bung 17 ih thu khi 35 ah timangin.
A Ruangzing: (1) Vanrangkulh seemsuahnak (1:1—2:3); Adam in a thawh ih Abraham tiang a pehtiami pupale santhuanthu (2:4—11:26); leh (3) pupahramle santhuanthu (11:27—50:26) timi thupawl a ruhkal thupitleng ah vua in acu parah ruang a zing. A bu omdan zul tleng loin a thu parin zoh ahcun: Buainak (3-11); Ṭhatsaknak (12-50); Ṭhatsak hnuk Omdan (1-2), ti in iseh, ṭhen hruak a ngah, A sungih thupawl: Santhuanthu Peitleng (1:1—11:26); Abraham (11:27—25:18), Jakob leh a innsang thuanthu (25:19—50:26, Isaak leh Josef thu telin). Israel miphun thawhkehnak, an pupale thuanthu sausawn hi ni a thupit zia a lansak. Josef thu (38) hi thu pace rum pehsak dawt leh Judah (37) rum kalhsak dawt ah thunmi a ii. “Hrinsarle” “thu” “cazin” ti in a cuangmi aanta timi a ruh parah thu pace bel in khaw ruang a zing.
A Thupithlurpawl: (1) Pathian cu vanrangkulh seemsuahtu, a ningcang lomi nincansak tu a ii. (2) A kawh, a rilmi hemih a thutiampawl, thluasuahpawl, ni A cungnunnak leh thungeihnak cu minung ih dawt rilnak leh zum ṭhonak rum an tat khat ringring; a cotu ca ceu ah deng loin, mi ni a zar an to dingmi, mi pace ca-ih ṭhahnem dingmi a ii. (3) Cun Pathian ih mi ril leh mi hman cu an ikcianak parah a ṭhumtia lo, zumnak, thuzulhnak, tuarkhawhnak, tipawl an thupi; soibei in an kimhlang ce lo. (4) Seemsuahtu leh uktu, cawmdawltu leh zokhentu a ik hleiah ziaza a thupitsak, acu parin thu a ṭhen; ngaidamtu leh remduuntu ceu a i lo. Sualnak zoh men in a thlah men lo zia tinik, minungpawl vaicasak remronak, Sodom leh Gomorrah hrawhnak, tipawl in a lansak. (5) Kan omnak vulei, a parih ommi nunnak ngeimi pacece, sungkhat, hrihrai, hrinsar, laiciinpi, innsang, tipawl rum pehtlaihtiak a thupitsak. (6) Innsang buainak in vulei cung pi buainak tiang a suak kho. Acu cu Pathian ni innsang pali—Abraham, Isaak, Jakob leh Josef—parin a ṭhatsakṭhan ruangah hile pali mangin Pathian rum ṭhate-ih pehtlaihtiak a ṭul. (7) A thulaimu ah “thukam” a sia. Noah, Abraham, Isaak, Jakob rum a vuakmi thukam hi ahi laibu sungah ceu iloin hnukne ah a kimsak nengno. Curuangah hi laibu rel tikah: (1) Bung 1-11 tiang hi thilcang taktakmi ah ruatin rel vanin ituruangah ngan an ii ti in leh bung 3-11 tiang sungih buainak hi bung 12-50 tiang sungah “aphi” hrawl ah a ṭhadeuh. (2) Thu pakhat hmun hnih ah pace deuh duau in nganmi hi, a ngantu an pacet ruangah an ngan dawtmi khaw a pace veve ti in tiah piak thok. (3) Khristian thupon mit in rel piak hruak ding tleng a i lo, Bible zate ca-ih hramdomtu a iknak hmu kho ih rel ding cu a thupi.
Thutlaangpi
Hlanlio pi Thuanthu (1:1—11:26)
Seemthawhnak in Tinik tiang (1:1—7:24)
Tinik hnukih Tharsuahnak (8:1—10:32; 11:1-26)
Israel Pupale Santhuanthu (11:27—50:26)
Abraham ih Thu (11:27—25:18)
Isaak ih thu (21:1—26:35)
Jakob ih thu (27:1—37:1)
Josef ih thu (37:2—50:26)
Pašlaik izvēlēts:
Seemthawhnak Thuhmaihruai: KHBF
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Khualsim Holy Bible © Bible Society of Myanmar, 2021.