Mareka 12
12
1Hakutachika kuhosha nawu nayishimu. Nindi, Muntu wumu wadimini itempa danyivinyu, hakukolekaku ikoli, hakupunda ibukudakukamwina vinyu, hakutuŋa itala dakola, hakudishila akwakudima, hakuya kwituŋa dacheŋi. 2Hachila aka chavinyu hakutemesha ŋamba kudi akwakudima kulonda atambuluku nyikabu yamwitempa danyivinyu. 3Wena hiyakumukwata, hiyakumweta, hiyakumufuntisha makasakasa. 4Hakuyitemeshela cheŋi ŋamba mukwawu, niyena amutapili kunamutu, hiyakumukoŋa chatama. 5Hakutemesha mukwawu, hiyakumujaha. Niamakwawu amavulu, amakwawu ayeteli amakwawu ayijahili. 6Washeli nawumu hohu, yowu mwanindi akeŋayi; nkumininaku hakuyitemeshelayi nindi, Akamwakama mwanami. 7Ilaŋa owu akwakudima hiyakuhosha mukachi kawu nawu, Iwu diyi nswana, twayenu tumujahenu, kulonda wuswana wikali wetwetu. 8Hiyakumukwata, hiyakumujaha, amunatila nihanzi yetempa.
9Dichi owu mwanta wetempa danyivinyu wakela ŋani? Wakenza nakujilumuna owu akwakudima; itempa danyivinyu wakayinka antu acheŋi. 10Munataŋi mazu amumukanda wajila wanasonekuwu nawu, Ilola dalekeli antuŋi, didu delishiluwu namutu wewombu; 11ichi chafumini kudi Yehova, chakuhayama kumesu etu.
12Akeŋeli kumukwata, ilaŋa atiyili woma wezaza, muloŋa elukili nawu chishimu ichi natutili etu. Hiyakumushiya, hiyakudiyila kwawu.
13Hiyakumutemeshela aFwarisi amakwawu niakwaHerodi kulonda amuti namazu akuhoshayi. 14Chanashikuwu hiyakumwila nawu, Eyi Nkuluŋaŋa, etu tuneluki netu eyi wumuntu walala, hiwatiyaloŋa muntu womaku, hiwaakamaŋa mesu awantuku, Ilaŋa chalala walejaŋa antu njila yaNzambi. Kusonka kudi Kesari chaloŋa, tahindi nehi? 15Tuhanaŋa tahindi tuleki? Ilaŋa yena welukili wufwikŋi wawu, hakuyila nindi, Mukuŋesekeladi? Nletelenu idali niditali. 16Hiyakudileta, hakuyila nindi, Ichi chifwikija chanyi, ninŋi nsona janyi? Wena hiyakumwila nawu, JaKesari. 17Yesu hakuyila nindi, Yuma yaKesari inkenu Kesari; yuma yaNzambi inkenu Nzambi. Hiyakumuhayama nankashi.
18Kudi yena hikukwinza aSadusi, elaŋa nawu afu hiyasaŋukaŋaku; 19hiyakumwihula nawu, Eyi Nkuluŋaŋa, Mosi watusonekeleli nindi, Neyi mana kwamuntu wukufwa, hakushiya mumbanda, kushiya mwana nehi, nindi mana kwindi akatambuli owu Iŋodindi, akamuvweli mana kwindi anyana. 20Kwadiŋi amayala atanu nayedi ivumu dawu dimu; wakusambila wasumbwili Iŋodindi, wafwili, kushiya mwana nehi. 21Wamuchiyedi hakumuswana, hakufwa, kushiya mwana nehi; niwamuchisatu chochimu; 22ejima atanu nayedi kushiya mwana nehi. Nkumininaku niyena mumbanda yofwa ni kufwa. 23Hakusaŋuka afu wakekala iŋoda wumwodihi? Muloŋa ejima atanu nayedi wadiŋi iŋodawu.
24Yesu hakuyiia nindi, Chimwabulaŋa kwiluka nyikanda yajila, hela Ŋovu yaNzambi, dihu hafumaŋa kuluwa kwenu. 25Hakasaŋuka antu mudi afu, hiyakasumbula hela kusumbukaku, akekala neyi chekalawu aŋelu amwiwulu. 26Kwinza nsaŋu yakusaŋuka afu, kanda muyitaŋaŋahu dehi kumukanda waMosuku? ohu hatenawu chiputa, hahosheliyi Nzambi nayena nindi, Ami yami Nzambi yaAbarahama, Nzambi yaIsaka, Nzambi yaYakoba. 27HiNzambi yawafuku, hiNzambi yawamomi; enu mwaluwaŋa nankashi.
28Nsoneki wumu hakwinza, hakutiya chakudihujolawu, welukili nindinayakuli chachiwahi, hakumwihula nindi, Lushimbi lwabadika nshimbi jejima lushimbinyi? 29Yesu hakwakula nindi, Lwabadikahu lwolwakwila nawu, Eyi Isarela, tiyaku; Yehova Nzambi yetu, Yehova wudi wumu. 30Keŋaku Yehova Nzambi yeyi namuchima weyi wejima, nawumi weyi wejima, namaaneyi ejima, naŋovu jeyi jejima. 31Lwamuchiyedi hiyolwakwila nawu, Keŋaku mukwenu neyi chiwadikeŋa eyi aweni. Kwosi lushimbi lwakubadika ŋuku. 32Owu nsoneki hakumwila nindi, Chalala, eyi Nkuluŋaŋa; ochu chiwunahoshi neyi yena wudi wumu, kwosi wacheŋi chiŋa yena hohu, wunahoshi chachiwahi. 33Kumukeŋa namuchima wejima, nakashinshi kejima, naŋovu jejima, nakukeŋa mukwenu neyi chiwadikeŋa eyi aweni, chabadika nyilambu yakushita yamukuma, niyimuna yakuketula yejima. 34Yesu chanamoniyi yena naakuli nama ana, hakumwila nindi, Hiwudi kwakulehi nawanta waNzambi uku. Kufuma henohu hikwadiŋi muntu wakwatili wulobu wakumwihula chumaku.
35Yesu chadiŋi nakulejayi antu mutembeli, hakwihula nindi, Ansoneki ahoshaŋa ŋahi nawu Kristu himwana kaDavidi? 36Yomweni Davidi welili mudi Spiritu Wajila nindi, Yehova wamwilili Mwanta wami nindi, Shakamaku kuchikasa chami chachidiilu, nichinamba kayila ayilumbu jeyi hiyadi itanda dakunyendu yeyi. 37Yomweni Davidi wamutenaŋa nindi, Mwanta; indi wukwi kala mwanindi ŋahi? Antu amavulu chadiŋi nakumutiyawu hiyakutiya kuwaha.
38Chayilejelaŋayi hakuyila nindi, Babelenu ansoneki, afwila kwendujola namahina akuluka, nikuyimwosha kuwulandilu, 39nikushakama hamatanda alema mushikola, nihayididi yalema kumawija. 40Adyaloŋa nimatala awambanda anfwila, alombaŋa kulomba kwakudimbana kwakwila lombe-e; kutanya kwawu kwakabadika.
41Hakushakama kwatalaŋana nachikasha chakusha mali; hakutala izaza chidikuumbila mali muchikasha, amavulu adiŋi aheta ombililumu mali amavulu. 42Kwenjili kazweŋi, nfwila wamumbanda, hakúumbilamu tumali twanyanya tuyedi, kuyibomba ashika mukadali kamu. 43Hakutambika atumbanji twindi, hakuyila nindi, Nukuyileja chalala nami, iwu nfwila kazweŋi nombilumu yakubadika ejima adi nakuumbila mali muchikasha; 44Muloŋa wejima wawu anombilumu yakuyuma yawu yasweja kuvula; ilaŋa iwu mumbanda nombilumu yakuwuzweŋi windi yoyindi yejima yadiŋi yakudihandisha nachu.
Pašlaik izvēlēts:
Mareka 12: MW62
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
The Bible in Lunda: Ndembu (Lunda of Kalunda) © B. F. B. S. 1962.