मत्ती 11
11
येशू ओ बप्तिस्मा देहुइया यूहन्ना
लूका ७:१८-३५
1आपन बाह्र जन चेलन उ बात कैक सेक्ल त येशू हुँकन्हक सहर-सहरम मनैन शिक्षा देह ओ खुशीक खबर प्रचार कर गैल।
2यूहन्ना झ्यालखानम रहल समयम ख्रीष्टक करल कामक बारेम सुन्ल त, ऊ आपन चेलन येशूकठे यी बात पुछ पठैल, 3“हमार बट्या ह्यारल ख्रीष्ट अप्न जो हुइटी कि हम्र और केक्रो बट्या हेरी?”
4येशू हुँकन कल, “टुह्र ज्या देखरख्लो ओ सुनरख्लो उ सक्कु बात यूहन्नकठे जाक कैदेओ। 5आन्धर मनै देख्डार्ट, नाङ्गर मनै नेङ्गडार्ट, कोररोग्यन चोखाजाइट, बहिर मनै सुन्डार्ट, मुवल मनै जिजाइट, ओ दुःखीगरीब मनै खुशीक खबर सुन पाडार्ट।#यशै ३५:५-६; ६१:१ 6म्वार कारण विश्वासम पाछ नैहट्ना मनै आशिष पउइयन हुइट।”
7यूहन्नक चेलाहुँक्र जाइलग्ल त, येशू मनैन यूहन्नक बारेम कल, “टुह्र उजार ठाउँम का ह्यार गैलहो? का बयालले हिल्ना नर्कटह ह्यार गैलहो? 8नैहो कलसे, का ह्यार गैलहो त? का मजामजा लुगा घालल् मनैयह ह्यार गैलहो? मजामजा लुगा घालल् मनै त राजदरवारम रठ। 9टुह्र का ह्यार गैलहो त? का अगमवक्तह ह्यार गैलहो? जाट्टीसे मै टुँहन कहटुँ टुह्र अगमवक्तासे फे महान व्यक्तिह देख्लो। 10काकरकि धर्मशास्त्रम यूहन्नक बारेम असिक लिखल बा,
‘हेरो, मै आपन दूतह टुँहीनसे आघ पठैनेबाटुँ।
ऊ टुँहार लाग डगर तयार पर्नेबा।’#मला ३:१
11मै जाट्टीसे टुँहन कहटुँ, बप्तिस्मा देहुइया यूहन्नसे महान मनै आम्हीसम जन्मल् नैहुइट। तर फे स्वर्गक राज्यम जे सबसे कम महत्वक बा, ऊ यूहन्नसे फे महान हो।” 12बप्तिस्मा देहुइया यूहन्ना प्रचार करलठेसे आबसम स्वर्गक राज्य जोरसे आघ बहर्टीबा, ओ जबरजस्ती करुइयनजुन उहाँक राज्यम जोरसे भित्तर जैटीबाट।#लूक १६:१६ 13यूहन्नक पालासम सक्कु अगमवक्ताहुँक्र ओ मोशक व्यवस्था परमेश्वरक राज्यक बारेम अगमवाणी बोल्ल। 14टुह्र स्वीकार कर्ठो कलसे, आइपर्ना एलिया यिह यूहन्ना हुइट।#मला ४:५; मत्ती १७:१०-१३; मर्क ९:११-१३ 15ज्याकर सुन्ना कान बा, यी बात उह बुझी।
16“मै यी जमानक मनैन केहीसे तुलना करुँ? यी त बजारम खेल्ना छोटी-छोटी लर्कापर्काअस बाट, जे आपन सङ्घरेन सोर निकार्क कठ,
17‘हम्र टुन्हक लाग खुशीक बाजा बजादेली
तर टुह्र नैनच्लो।
हम्र विलापक गीत गैली,
तर टुह्र नैरुइलो।’
18यूहन्ना खैनापिना नैकरँट्, उहफे टुह्र हुँकहीन भूत लागल मनैया कलो। 19मै मनैयक छावा, खैटिपिटि अइनु त, टुह्र महीह ‘हेरो, खवस्ला, पियस्ला, कर उठुइया ओ पापीन्हक सङ्घर्या’ कैक दोष लगैठो। बुद्धि ठीक हो कना बात वाकर नतिजाले प्रमाणित हुइठा।”
विश्वास नैकरुइयन दण्ड
लूका १०:१३-१५
20जौन-जौन सहरम येशू शक्तिशाली काम कैरख्लह, उ सहरक मनै आपन-आपन पापी मन परिवर्तन कैक परमेश्वरकठे नैघुम्लरलह। उहओर्से येशू उ सहरक मनैन कर्रा बोलीले असिक कल, 21#यशै २३:१-१८; इज २६–२८; योए ३:४-८; आमो १:९-१०; जक ९:२-४“टुह्र खोराजीन ओ बेथसेदक मनैन धिक्कार बा! टुन्हक बीचम करल शक्तिशाली काम टुरोस ओ सीदोन सहरम करल रहट् त उहाँक मनै आघहेँ भङ्ग्रा ओहर्क, भुई घँस्क ओ आपन-आपन पापी मन परिवर्तन कैक परमेश्वरकठे घुमजैनेरलह।#११:२१ पाप कर छोर्क परमेश्वरकठे घुमल संकेतक रूपम उ समयम यहूदीहुँक्र भङ्ग्रा ओहर्ना ओ भुई घँस्ना काम करँट्। 22मै टुँहन कहटुँ, न्यायक दिनम टुरोस ओ सीदोन सहरक मनैन्हक दण्डसे टुन्हक दण्ड झन् सह नैसेक्ना हुइनेबा। 23टुह्र कफर्नहुमक मनै, का टुह्र आकाशसम उच्च पारजैबी कैक सोँचरख्लो? टुह्र त पातालम खेद्वापैनेबाटो। काकरकि टुन्हक बीचम करल शक्तिशाली काम सदोम सहरम कर्लसे, आम्हीसम उ सहर पलरने रह।#यशै १४:१३-१५; उत १९:२४-२८ 24उहओर्से मै टुँहन कहटुँ, न्यायक दिनम सदोम सहरक मनैन्हक दण्डसे त टुन्हक दण्ड झन् सह नैसेक्ना हुइनेबा।”#मत्ती १०:१५; लूक १०:१२
डट्करल मनैन आराम
लूका १०:२१-२२
25उ ब्याला येशू कल, “परमेश्वर बाबा, स्वर्ग ओ पृथ्वीक प्रभु, मै अप्नह धन्यवाद देहटुँ, काकरकि बुद्धिमान ओ समझदार मनैनसे गुप्त ढरल बात अप्न कुछु नैजन्ना मनैन बुझादेली। 26हो, परमेश्वर बाबा, काकरकि अप्नह यिह बात मजा लागल।
27“म्वार परमेश्वर बाबा महीह सब चिजिक जिम्मा देरख्ल। परमेश्वर बाबा बाहेक मै छावह कुई फे नैचिह्नट्। ओ मै परमेश्वरक छावा बाहेक परमेश्वर बाबह कुई फे नैचिन्हट्। तर परमेश्वरक छावक चिह्नाइल मनैभर परमेश्वर बाबह चिह्न्ठ।#यूह ३:३५; १:१८; १०:१५
28“गम्हिर भर्वा बोक्क डट्करल मनै, म्वारठे आओ। मै टुँहन आराम देहम। 29म्वार जुवा बोको ओ महीसे सिखो, काकरकि मै दयालु ओ नम्र बाटुँ। टुह्र आपन आत्मम आराम पैनेबाटो।#यर ६:१६ 30हेरो, म्वार जुवा सजिलो ओ भर्वा हलुक बा।”
Pašlaik izvēlēts:
मत्ती 11: thl
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2020, Wycliffe Bible Translators, Inc. All rights reserved.