MATAYO 6
6
Itasi la mpiso
1“Kucheieni, musironge vyedi vyenyu he meso a vantu, nesa murerehwe nivo; ambu mwekiketa huvo temukavone kitumulilo he Vava wenyu wa uko wanga. 2Wekiinkija itasi, usibighe lugunda, sa vuntu valung’ong’o veketa he masinagogi na nzieni, nesa vakazwe ni vantu. Kididi nimutio, ‘Vakenja kughuha kitumulilo chavo.’ 3Mira we wekiinkija itasi, neri mkono wako wa kumoso usimanye icho mkono wako wa kume weketa; 4nesa itasi lako lioke la mpiso, na Vaveo evona kwa mpiso enekutumulila.”
Maombi a mpiso
5“Kangi mwekiomba musioke sa valung’ong’o, ambu vo vekunda kuomba veimuke he masinagogi na he nzia ja matano, nesa vavonwe ni vantu. Kididi nimutio, ‘Vakenja kughuha kitumulilo chavo.’ 6Mira we wekiomba, ingia he chumba chako cha ndeni, ukinafinga luvwi, unamwombe Vaveo kimpiso, na Vaveo evona vya mpiso, enekutumulila.”
7“Neri mwekiomba musirekuhembira sa vantu va kiisanga, ambu vo veti he vuntu vwa viteto vyavo vijinki niho venesikiwa. 8Heicho musifwanane navo, ambu hata mwesinaomba, Vava wen yu emanyije vila mweenda.
Uombo wa Mfumwa
(Luk. 11:2-4)
9Heicho unywi ombani huvu,
‘Vava wetu weho uko wanga,
Izina lako ligimbikwe,
10Vufumwa vwako vuze,
Kikundire chako kifunyanywe kunu he masanga,
Sa vuntu chefunyanywa uko wanga.
11Utuinke yoo kijo chetu.
12Utushighie rando jetu,
Sa vuntu na uswi twevashighia varando vetu;
13Usitugere he mighesho,
Mira utukije he ula mvivi.
[Ambu vufumwa na nzinya na ngazo, ni vyako kae na kae. Ameni.]’” 14“Ambu mwekivashighia vantu mateshanyo avo, hata Vava wenyu wa uko wanga enemushighia na unywi. 15Mira mwekisavashighia vantu mateshanyo avo, neri Vava wenyu tekamushighie unywi mateshanyo enyu.”
Kukuima
16“Kangi mwekikuima, musioke sa valung’ong’o vena mavusho ejingije, ambu veharusha mavusho avo nesa vavonwe ni vantu iti vechungie. Kididi nimutio, ‘Vakenja kughuha kitumulilo chavo.’ 17Mira we wekikuima, uvire mtwi wako mafuta, uoje na vusho vwako; 18nesa kukuima kwako kusivonwe ni vantu, esire ni Vaveo eho mpisoni; na Vaveo evona vya mpiso, enekutumulila.”
Ndungu ya idi
(Luk. 12:33-34)
19“Musikuvanzie ndungu he si ii, hantu jekondwa ni mpeghesa na nkanga, na vebaa na kuiva; 20mira unywi kuvanzieni ndungu uko wanga, hantu hesikondwa kintu ni mpeghesa neri nkanga, neri vakea vesibaa neri kuiva. 21Ambu hantu ndungu yako yeho, niho hantu na ngoro yako yeneikaa.”
Kianga na kija
(Luk. 11:34-36)
22“Taa ya mwiri ni iziso. Heicho, iziso lako lekioka ledi, mwiri wako wose uneketa kianga. 23Mira kakicha iziso lako lekikondika, mwiri wako wose uneoka kija. Ana, kianga checho hewe chekioka kija, si kija icho!”
Mabinuko na kumwitikija Mrungu
(Luk. 16:13; 12:22-31)
24“Tehena mntu eidima kutumikia vabaha veri, ambu enemvihiwa ula mmwe na kumkunda ula ungi, kana enegurana na mmwe na kum’bera ula ungi. Temuidima kumtumikia Mrungu na mari. 25Heicho nimutio, ‘Musibinukie moo wenyu iti mule ni, kana munwe ni, neri mwiri wenyu iti mudoke ni. Moo nhii teukelile kijo, na mwiri teukelile suke?’ 26Rerehani madeghe a wanga! Teehanda neri teefindika, neri teevunganya he gu; na Vava wenyu wa uko wanga earera. Hama unywi temuakelile? 27Ni ani he unywi ekikubinusha eidima kuongeja vueza vwakwe na ere mkono mmwe? 28Hanini mwekibinukia mburi ya suke? Dunganyijieni he virangare vya he mighunda vuntu vyeeha; tevironga ndima neri tevichuma; 29mira nimutio, ‘Hata Salomoni he ngazo yakwe yose tedokiwe sa kirangare kimwe hevyo.’ 30Heicho kakicha Mrungu edoka mani a he mighunda huvo, nao eikaa yo na yavo agerwe he ivivi; tekazike kumudoka unywi kukela, mu va mwitikijo mghere? 31Heicho musibinuke mwekiti, ‘Tule ni? kana, Tunwe ni? kana, Tudoke ni?’ 32Ambu ivyo vyose viendishwa ni Vakiisanga, mira unywi Vava wenyu wa uko wanga emanyije iti ivyo vyose muvienda. 33Mira rongaendani vufumwa vwa Mrungu na kitea chavwo, na ivyo vyose muneongejijwa. 34Heicho musibinukie cha yavo, ambu yavo inekubinukia yo njenye. Ambu kila msi ukolokiwa ni mabinuko awo.”
Pašlaik izvēlēts:
MATAYO 6: CHSUNT67
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Chasu New Testament © Bible Society of Tanzania, 1967.