LUKA 21
21
Ka senti ka mche mkiva
(Mrk. 12:41-44)
1Akavusha meso akwe, akavona vazuri vekigera matasi avo he sanduku ya ndungu. 2Akamvona mche mmwe mkiva efwiiwe ni mme, ekigera ho senti mbiri. 3Akati, “Kididi nimutio, “Uu mche mkiva efwiiwe ni mme, egerire vajinki kukela vose; 4ambu avo vose vetasie vila vyeshele he mari javo, mira uu he vukiva vakwe, egerire vyose ena navyo.”
Yesu erota kukondika kwa Yerusalemu na mkengelejo wa si ii
(Mat. 24:1-31; Mrk. 13:1-27)
5Vantu vasiku aho vekigaya mburi ya nyumba ya mtaso, sa vuntu yehambiwe na mabwe edi ni matasi a vantu; akati, 6“Ivyo mwevirereha, hena misi yeneza, eyo hesikashighwe ibwe wanga he ibwe, lesibomowe.” 7Vakamvwija vekiti, “Mcheji, ivyo vineoka rini’ Kangi, ni luvengo ani lwa ivyo iti vi hafuhi kuoka?” 8Akati, “Rerehani, musireishwa, ambu vajinki veneza he izina langu, vekiti, ‘Mi niye;’ kangi: ‘Igheri lazengelela.’ Musivaratere avo. 9Na unywi mwekinasikia mburi ya nkondo na marenge, musiitushwe; ambu ivyo vyose niresari virongeza, mira ula mkengelejo teunate.”
10Ekikenja, akavati, “Mbaari inevuka kuomana na mbari, na vufumwa kuomana na vufumwa; 11heneketa vididimo vibaha he isanga; na nzota na mahumpa hose hose; vintu vyeitusha na maluvengo mabaha efuma uko wanga. 12Mira ivyo vyose vyesinaoka, venemugura na kumuweriwerisha, venemutonja he masinagogi na kumugera he nyumba ja vichungo, mutonjwe he vafumwa na valao vuntu vwa izina langu. 13Na ivyo vineoka vuomwa he unywi. 14He icho, dindwani ni ngoro, na kusadunganya cho mwenegharusha; 15ambu mi ninemuinka momo na viugho, evyo vala vemurisha vwasi vose vesikaidime navyo neri kuvikinda. 16Na unywi munerengehwa ni vamoghi venyu na vandughu venyu, na va lukolo lwenyu, na vambwie venyu, navo venekoma va kumwe venyu. 17Na unywi munevihiwa ni vantu vose vuntu vwa izina langu. 18Mira neri lujwii lumwe he mitwi yenyu telukateke. 19Na he kugumirija kwenyu, munekija ngoro jenyu.
20Mira aho mwekinevona muzi wa Yerusalemu wajungulukwe ni vankondo, aho manyani iti kukondika kwawo kwazengelela. 21Niho veho Yudea vaahe na he ntuvi, na veho ndeni hewo, vaahe na nze, na veho he mighunda, vasireuingia. 22Ambu misi iyo niyo ya mabigho, nesa vyose vyeandikwe vikoloshwe. 23Vwasi vwa vala vena ndeni na veamwisha iyo misi! Ambu heneketa mavwasi majinki he isanga, na oro inegwia ii mbari. 24Venenyajwa kwa mhandwi wekehe, kangi venetahwa na kutikwa nkore he mbari jose; na Yerusalemu unevatwa ni Vakiisanga, mhaka igheri la Vakiisanga lenekoloka.
25Kangi, henevoneka maluvengo he izuva, na he mweji, na he ntondo; na isanga heneketa vwasi vwa vaisanga, vekihomborera he vuntu vwa mrurumo wa bahari na mkushiko wayo; 26vantu venechuchuntika vuntu vwa fole na kuinda vila vyenezia si ii; ambu nzinya ja uko wanga jineyungayunga. 27Aho niho venemvona Mwana wa Mntu ekiza kwa ijumbi, hamwe na nzinya na ngazo mbahisha. 28Aho ivyo vintu vyekivoka kuvoneka, shangalalwani, muvushije mitwi yenyu, ambu vukomboli vwenyu vwazengelela.”
Kukucheia
(Mat. 24:32-35; Mrk. 13:28-31)
29Akavavwira mfwanano, “Rerehani mkuu na miti ingi yose. 30Igheri yeshoshuja, muvona na kumanya venye iti magheri a lufindiki zaengelela. 31Na unywi nirehuvo, mwekivona ivyo vyekivoka kuvoneka, manyani iti vufumwa vwa Mrungu vwazengelela. 32Kididi nimutio, Lukolo ulu telukaveche, mhaka ivyo vyose vikoloke. 33Wanga na si vinevecha, mira viteto vyangu tevikaveche neri.
34Heicho, kurindeni, ngoro jenyu jisiresindwiiwa ni kuliisha na vuengeji, na mabinuko a moo uu; ula msi ukaremuputukija, sa vuntu mtegho wegurija; 35ambu nivwo vuntu wenezia vantu vose veikaa he vusho vwa si ii yose. 36Heicho, yaeni kiavi magheri ose mwekiomba, nesa muidime kuikaa he ivyo vyose vyenevoneka, na kuimuka mozya ya Mwana wa Mntu.”
37Heicho, kila msi ekicheja he nyumba ya mtaso, na kio ekitonga kushinjia he ntuvi ya Mizeituni. 38Na vantu vose vekiroka chaheyavo kere kutonga he nyumba ya mtaso, nesa vamsikije.
Pašlaik izvēlēts:
LUKA 21: CHSUNT67
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Chasu New Testament © Bible Society of Tanzania, 1967.