LUKA 18
18
Mlahi esina kitea
1Akavavwira mfwanano, kuti kivatara kumwomba Mrungu misi yose, neri vasiteshe ikuji. 2Akati, “Hekina mlahi masa he muzi uo msiku, temfoleka Mrungu, neri vantu. 3Na he muzi uo hekina mche efwiiwe ni mme, ekinamswia genda, ekiti, ‘Nichwia na mmasa wangu.’ 4Naye akasua kantu kajinki; uko nyuma akaganya he ngoro yakwe, ‘Nziaho simfoleka Mrungu neri vantu, 5mira kila uu mche efwiiwe ni mme enikorishakorisha, ninemchwia kwa kitea, nesa asinifikije kwa kunizia genda.’” 6Mfumwa akati, “sikijani ra sa vuntu uo mlahi mkusu eteta. 7Hamao, Mrungu tekavainke kwa kitea vala vakwe vesaghurwe, vemwiaghia hemsi na kio, naye e mrevarimiria? 8Nimutio, Enemuinka kwa kitea hala indi; mira, Mwana wa Mntu ekineza o, h’ii, enevona mwitikijo he si ii?”
Mfarisayo na mreghuha kodi
9Akavavwira mfwanano uu he vantu vekuvonie venye iti ni vakitea, vekibera vangi vose, 10“Vantu veri vekweie kutonga he nyumba ya mtaso kuratasa, mmwe ni Mfarisayo, wa keri ni mreghuha kodi. 11Ula Mfarisayo, akaimuka na kuomba huvu he ngoro yakwe, ‘E, Mrungu, nikukaza ambu mi sifwanane na vantu vangi: vakibonda, vatungulu, varashinda, neri sa uu mreghuha kodi. 12Mi nichunga kantu keri he juma; nifunya matasi he vila nevona vyose.’ 13Mira ula mreghuha kodi ye akaimuka hae, neri asiidime kuvusha meso akwe noko wanga, mira akakubigha-bigha mpafu, ekiti, ‘E, Mrungu, univoneie mi m’banu.’ 14Nimutio, uu eseie kutonga na kaa hakwe, etaririwe kitea kuvecha ula ungi; ambu ula ekukweja, enesejwa, na ula ekuseja, enekwejwa.”
Yesu einka vana vadoro lutelwedi
(Mat. 19:13-15; Mrk. 10:13-16)
15Vakamwetie vana vadori iti avakunte; mira varateri vakwe vekivavona vakavabohija. 16Mira Yesu akavaitanga vaze heye, akati, “Vashigheni vana vadori vaze hangu, neri musivakinde; ambu vantu sa avo, vufumwa vwa Mrungu ni vwavo. 17Kididi nimutio, Kila mntu esighuhia vufumwa vwa Mrungu sa mwana mdori, tekaingie hevwo ye neri.”
Nkalamo ya kae na kae na kukindwa ni mari
(Mat. 19:16-30; Mrk. 10:17-31)
18Mntu m’baha mmwe akamvwija, ekiti, “Mcheji wedi, nikete ze nesa niidime kupala nkalamo ya kae na kae?” 19Yesu akamti, “Hanini weniitanga wedi? Tehena wedi esire mmwe, Naye niye Mrungu. 20We wemanyije maamoro: ‘Usishinde, Usikome, Usiive, Usitete vuonwa vwa mongo, Vikia vaveo na mlala wenyu shima.’” 21Akati, “Ivyo vyose nevigurishe too vudori vwangu.” 22Yesu ekinasikie huvo, akamti, “Heshele kintu kimwe chekuduikie: Tagha vyose wena navyo, uvaghavie vakiva, nawe unevanza ndungu uko wanga; wekikenja, nzo uniratere.” 23Naye ekinasikie huvo, akasononoya haiwa, ambu ekina mari nyingi. 24Yesu ekinavone huvo, akati, “Ni kiziya venye mari kuingia he vufumwa vwa Mrungu. 25Ambu ni kijangu ngamia kuvecha he ivoro la singano, kukela mzuri kuingia he vufumwa vwa Mrungu.” 26Vala vesikie vakati, “Ni ani ra eneidima kuingia?” 27Akati, “Vyesiidimika he vantu, he Mrungu viidimika.” 28Petro akati, “Rereha, uswi tweshighie vintu vyetu vyose tukakuratera.” 29Akavati, “Kididi nimutio, Tehena mntu eshighie nyumba, kana mche, kana vandughu, kana vamoghi, kana vana, he vuntu vwa vufumwa vwa Mrungu, 30esikaviinkwe kukela, kantu kajinki, he igheri ili, na he ilo isanga leneza, nkalamo ya kae na kae.”
Yesu erota kifwa chakwe ka katatu
(Mat. 20:17-19; Mrk. 10:32-34)
31Akavatika vala ikumi na veri, akavati, “Rerehani, tukwea kutonga Yerusalemu, na vila vyose vyemwindikiwe Mwana wa Mntu ni varoti vinekoloshwa. 32Ambu enegerwa he mikono ya Vakiisanga, enefalajwa, eneketiwa tiri na kutufiwa mate; 33venem’bigha viboko, na venekoma; na msi wa katatu enevuka he vefwie.” 34Mira tevetwarije ivyo viteto neri hadori, icho kintu chekivisiwe hevo, neri tevetwarije icho chetetiwe.
Yesu ebanja ituntu
(Mat. 20:29-34; Mrk. 10:46-52)
35Aho ekifika hafuhi na Yeriko, mntu mmwe ituntu ekiikae si mbaimbai ya nzia, ekitanja; 36ekinasikie mavungano vekivecha, akavwija, “Hena ni?” 37Vakamti, “Yesu wa Nazareti evecha.” 38Akalonzisha ekiti, “Yesu Mwana Davidi, univoneie.” 39Vala verongore vakam’bohija iti ahuje; mira ye akazikalonzisha, “E, Mwana Davidi, univoneie!” 40Yesu akaimuka, akati aetwe heye; ekimfikia, akamvwija, 41“Uenda nikuketie ni?” Akati, “Mfumwa, niidime kuvona.” 42Yesu akamti, “Inkwa ra kuvona; mwitikijo wako wakkubanja.” 43Hala indi akavona, akamratera ekimkaza Mrungu. Na vantu vose vekivona vakam’bumija Mrungu.
Pašlaik izvēlēts:
LUKA 18: CHSUNT67
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Chasu New Testament © Bible Society of Tanzania, 1967.