HLIMI 30
30
1Hrasyɛli pɔɔ da gáʔà nya woò na pii pèè hin Jakɔbe ma, wɔ̀ɔ na nyɛklonlo hanri wi cɛpii nì we. Wɔ̀ɔ kí yo Jakɔbe ma mà yo: «Maʔa hanri bì pii pèè he má ma. Ná kiì ban, pa mi gu.»
2Jakɔbe wɔ̀ɔ lama gban Hrasyɛli nì we mà yo: «Mí nyɛ Nyɛʔɛlɛ li ná ni yo la lí ma ma kân mò gáa hin ge?»
3Hrasyɛli wɔ̀ɔ yo, na tungɔɔ cɛlɛ Bila wí nyɛ be. Moo kpe jango wi pyɔ wà he wa na kɔgunru na de jango bì pyɔ wà ta wi fanŋa ni ge.
4Wɔɔ wi tungɔɔ Bila kan wi ma wi krɛ̀ʔɛ̀ wi cɔ. Jakɔbe wɔ̀ɔ Bila kpe. 5Bila wɔ̀ɔ acɛnlɛ ta mà bâ he nabii Jakɔbe kan we. 6Hrasyɛli wɔ̀ɔ yo: «Nyɛʔɛlɛ lí ma tanʔa kan ná ma, à li loʔo ná ma mà pyɔ nabii kan ná ma.»
Ki kala na wɔ̀ɔ yele kan wí na mà noo yeri Dan.
7Hrasyɛli wi tungɔɔ Bila wɔ̀ɔ acɛnlɛ là ta nɛ mà pyɔ nabii syɛnwoo he Jakɔbe kan we. 8Hrasyɛli wɔ̀ɔ yo: «Mí ma can gbanʔa na cɛpii nì mòo ja.»
Wɔ̀ɔ yele kan ki pyɔ na noo yeri Nɛfitali.
9Leya wi gáʔà nya wi yeré, wi ìn da hin adi, wɔ̀ɔ wi tungɔɔ Silipa kpe mòo kân Jakɔbe ma jango wi krɛ̀ʔɛ̀ wi cɔ. 10Silipa ŋa Leya wi tungɔɔ wɔ̀ɔ pyɔ nabii wà he Jakɔbe ma we. 11Leya wɔ̀ɔ yo: «Nyaʔa katanʔa gi ga banmɛ ge!»
Wɔ̀ɔ yele kan wí na noo yeri Gade.
12Leya wi tungɔɔ Silipa wɔ̀ɔ ní mà nabii wà he nɛ syɛnwoo Jakɔbe ma we. 13Leya wɔ̀ɔ yo: «Welé, mí ma frɛmɛ ta, mɛjɛn picɛɛ pé bi daʔa nyu bì yo mí ma fɛrɛ.»
Wɔ̀ɔ noo yeri Asɛri.
14Nyiŋi ga na pe dáa akaʔa pibi ba co, pé na bru hanri we. Hrubɛn wɔ̀ɔ kɛri mà yâ madragɔri nya wa kere ni de. Wɔ̀ɔ panʔa ni wi no Leya kan we. Ki nyiŋi na Hrasyɛli wɔ̀ɔ kí yo Leya kan mà yo: Mí na ma fɛn, ma ma pyɔ wi madragɔri wà kan ná ma.#30:14 Madragɔri: Ki hɛɛn pe daá ki honri mà yo madragɔri wi dá bo wɛrɛ di da ti dáa pii kanʔa ge.
15Leya wɔ̀ɔ wí po: «Mo má ma na pɔlɔ kpe cɛnri yo, á ma yo má bi na pyɔ wi madragɔri pibi kpe be kpo ge.»
Hrasyɛli wɔ̀ɔ yo: «Nàʔa po ban, wi ba syɛn wa ma ní ki yebliʔi ga ni ma pyɔ wi madragɔri pibi kala na le.»
16Yaakwɔʔɔ na Jakɔbe wi da gâ jɛ wa kere ni mâ pan ge, Leya wɔ̀ɔ nyini mà fɛ mà yɔ́ɔ̀ flin mòo po: «Kí ma yala maa ban mì krugu, mɛjɛn mí ma ma syɔ na pyɔ wi madragɔri pibi nì be.»
Wɔ̀ɔ ko wi ní ki yebliʔi ni. 17Nyɛʔɛlɛ à li Leya wi nyɛrimi loʔo me, wɔ̀ɔ acɛnlɛ ta mà wi pyɔ kɔgunnuwoo he nabii Jakɔbe ma we. 18Leya wɔ̀ɔ yo: «Nyɛʔɛlɛ lí ma na sràʔà kan na ma, mɛjɛn mi dí na tungɔɔ kan na pɔlɔ ma we»
Wɔ̀ɔ noo yeri Isakari. 19Leya wɔ̀ɔ ní mà acɛnlɛ là ta mà pyɔ nabii wà he nɛ Jakɔbe ma we. 20Leya wɔ̀ɔ yo: «Nyɛʔɛlɛ lí ma akmaʔa kan ná ma. Ki tɔ na, na kala lí bi gbɔʔɔ na pɔlɔ ma we, mɛjɛn mí ma nabii noli he wí kan.»
Wɔ̀ɔ noo yeri Sabulon. 21Ki kruʔu ma wɔ̀ɔ bâ cɛlɛ he mà noo yeri Dina.
22Nyɛʔɛlɛ à li lama to Hrasyɛli nì mà wi nyɛrimi syɔ me mòo kân heʔe ní ge. 23Wɔ̀ɔ acɛnlɛ ta mà bâ nabii he mà yo: «Nyɛʔɛlɛ lí ma na fɛrɛ laʔa de na na.»
24Wi dá yele kan wí na noo yeri Josɛfu mà yo: «Bajegɔ Nyɛʔɛlɛ liʔi ta li nabii wà haʔa wa na ma nɛ.»
Jakɔbe wí ma masaʔa ta
25Nyiŋi ga na Hrasyɛli wi da gâ Josɛfu he, Jakɔbe wɔ̀ɔ kí yo Laban ma mà yo: «Ma na yaʔa bì da sye. Mí bi gɛri na klo ni le. 26Ma na cɛɛ ní na pii kan be na ma bee kala na mi dí tunŋu kɔ ma kân ge. Ki tɔ na mí bi da sye, mɛjɛn má ma tunŋu cɛn ga mí ma kɔ má kan ge.»
27Laban wɔ̀ɔ wí po: «Pa mi gban bì haʔama ta má ma yo? Mɛjɛn na nyɛʔɛŋɛɛ ké maʔa tyɛʔɛ ná na mà yo Bajegɔ Nyɛʔɛlɛ lí ma frɛmɛ pa na yrɛbɛ na ma kala na le. 28Ma ma sràʔà nyɛli na kân, pa mi daʔa kanʔa má ma.»
29Jakɔbe wɔ̀ɔ wí po: «Má maʔa cɛn mí ma tunŋu kɔ má kan pomo ma na, ma ajobo pí ma krɛʔɛ na kyɛʔɛ na pomo ma na ge. 30Mɛjɛn ma yrɛbɛ cɛnri ba pi dá bo má ma pí ma nyɛʔɛ ceŋge. Na kala na, Bajegɔ Nyɛʔɛlɛ à li frɛmɛ pa má na ceŋge. Ki tɔ na mí bi gà tunŋu kɔ na go woo kan be nyaʔa nyiŋi na?» 31Laban wɔ̀ɔ yo: «Kí ma yala bì nyaʔa kân má ma?»
Jakɔbe wɔ̀ɔ wí po: «Mɛ ìn bi yraʔa kà kan ná ma. Nà ma yere ga na mí bi yo, pa mi da ma mbara hanri pe da ti nàʔá. Pa mi da ti kɔrɔsi 32Alaʔa nî mí bi nyari bì ma ajobo pì bɛfu kɔrɔsi. Mbara da tí nyɛ nyogonmo ní, ní mbapiʔi gee ní ké nyɛ wɔʔɔlɔ ge, ma ke fàrà, ma ke tyɛʔɛ namyɛlɛ na, ní wa ma ŋkaa ni bee pé nyɛ nyogonmo ní, ma pe fàrà kpo. Piì bi pí bi bo na sràʔà ge. 33Na sinmi mí bi ba na woʔo yo kpɛndo ni we, nyiŋi ga na má bi gà ba ban bì ba na sràʔà wele ge, mbara da toò nyogonro ní ŋkaa ní be, mbapiʔi gee koò wɔʔɔlɔ, nà ma ba kèe nya wa, paʔa bo na namyɛlɛ na le nikonro kala.» 34Laban wɔ̀ɔ yo: «Kí nyɛ kmaʔa ki hanri nɛ pa má maʔa yo ge.»
35Ki wlɛdege na, wɔ̀ɔ ŋkaa pè bɛfu fara bee pé nyɛ nyogonmo ní mâ po jɛnʔɛ ní ge, pè bɛfu bee pe dá bo finmi nì, ní mbawɔrɔ tì bɛfu ní mà ti le wi najɛɛ pe kyɛrɛ ni. 36Ki kruʔu ma wɔ̀ɔ wlɛrɛ tanri tanʔala kpafoʔo kon wiì nì Jakɔbe nì pe kpafoʔo ni.
Jakɔbe wɔ̀ɔ na Laban wi ajobo pi tɔ naʔa be. 37Jakɔbe wɔ̀ɔ tiri tà kaclabiʔi kon pé na kà yeri pepliye na kà yeri nɛ amade na ki tɔ yeri ge platane. Ti dá bo tipriri. Wɔ̀ɔ ti krɔbɔ laʔala be kpafoʔo, kpafoʔo mà ti finmi yrigi me finmi na. 38Ki kruʔu ma wɔ̀ɔ bâ ki tipiʔi le wa ajobo pi akaba alege ni ge. À pi na ke nyaʔa nyiŋi ga na pi dáa ban mà baa jo ge. À pi na acɛnŋɛɛ taʔa. 39Mbara ti dáa acɛnŋɛɛ taʔa be ki tipiʔi tanla ge. À ti na pii hin. Ki pii à pe na pin nyogonmo ní, ní jɛnʔɛ ní. 40Jakɔbe wɔ̀ɔ mbapiʔi kon ke na. Kee dá bo nyogonmo ní. À kèe ma po wɔʔɔlɔ. Wi ìn ke kpoʔolo Laban wi woro nì de.
Wi daʔá hanri ban mâ ajobo fafaʔa ta ba wi ìn daʔa ta bì pi kpoʔolo wa Laban wi wobo nì be. 41Nyiŋi ga na ajobo ba fanŋa ni pi dáa luru, Jakɔbe wi na tipiʔi tyɛʔɛ wa pi yɛʔɛma wa pi akaba alege ni jango pi da hin be ke tanla. 42Di wi ajobo nà pi waʔa, wi ín je ki tipiʔi tyɛʔɛ ge wa pi yɛʔɛ ma ge. Ki nyiŋi na ba pi dáa bin waʔara à pi na pin Laban wobo. Kpandoro à ti na pin Jakɔbe woro.
Jakɔbe wí ma jɛ wa Laban deʔe na mà fɛ
43Ki naŋa ŋa wɔ̀ɔ na krɛʔɛ masanaŋa ceŋge. Wɔ̀ɔ ajofafaʔaba ta ceŋge, ní tungɔɔ nabii ní cɛɛ ní, ní nyoʔomɛyee ní, ní sofɛnŋɛɛ ní.
Pašlaik izvēlēts:
HLIMI 30: NLK10
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible Society of Côte d'Ivoire