Juan 17
17
Jesúsnö cama ebä nö
bayeli lä nacano wei tä a̦
1Inaja Jesús a fa culunö, fedu jamö a mö fa nonoicunö a wa̦ fama.
—Fabe, Fabemi. Wale taamaö lä bufio wei, fei däjä tä cublou waiquia lä cule. Ijilufä wale doblao da damalalö, cafä bäfä ca̦i doblao dablamaö mö feduo showadaobä. 2Jödödöwä ya täbä juwäbobä, Bada wale malä tablamaleno wei, camiyä nija wa bä bluca lä jöböbeno wei, ba̦limi ya bä tablamabä. 3Cafä Yai Bada wa bejedi cua lä ayale wa daöje ja, camiyä Jesucristo wale lä shömöleno wei wale ca̦i daö mö feduoje ja, ö̦jö tänö bä nia ba̦limi cuo. 4Bita jamö ya cua showalanö, camiyä nija wa tä tamaö lä bufino wei, ya tä jödödöblalema. Inaja ya lä cuaano wei tänö, cafä bäfä doblao damalalema. 5Fabe. Cafä wa lä cule jamö camiyä wale doblao da damalalö. Bita wa tablaö showao mlao däjä, cafä sho bäfäcö doblao lä cuono weinaja showawä.
6’Fabe —a cuma—. Ei bita jamö afä wa bä lä tabono wei, camiyä nija wa bä jöböbema. Wa bä lä jöböbeno wei bä nija, cafä bäfä damalalema. Wa wa̦ nofi cadidibouje. 7Cafänö wale lä dobäö wei tä lä cui, fei däjä tä daöje. Cafä nija showadi ya dobämou. 8Cama bä nija, cafä bäfä a̦no malä wäyäno wei. Wa wa̦no ji̦liamaje. Cafä nijamö ya cuoma ya lä waloqueyoluno wei tä lä cui, ö̦jö tä bejedi ca̦i daöje. Cafänö wale lä shömöleno wei tä ma cui, ö̦jö tä a̦ ca̦i bejedi bufiije.
9’Ö̦jö ya bä nö bayeli nacaö lä cule —a cuma—. Yanowamö ya täbä nö bayeli nacaö ma mlai ma cui, cafänö wa bä lä jöböbeno wei, ö̦jö ya bä shino yai bayelimaö. Afä bä malä cui. 10Iba bä bluca lä cule, afä bä li. Inaja showawä, cafänö wa bä nofi lä ibabole, iba bä ca̦i waiquiwä. Ö̦jö bänö wale doblao dablamaöje. 11Fei däjä, ei bita a lä cui ya nia daaö. Iba bä cuo juo däjä, cafä nijamö ya nia co̦o.
’Fabe. Cafä yami wa yaia —a cuma—. Cafä sho bäfäcö moli lä culenaja bä molio mö feduobä, bä da nowama. Cafä wa lojodenö wa bä nowamabä, camiyä nija wa lojode lä wäyämono wei tä showawä lä cuinö. 12Ö̦jö ya bä ca̦i cuo showao däjä, camiyä nija wa lojode lä wäyämono wei tä showawänö, ya bä nowamadima. Ya bä noshi umaboma. Dodijidawä bä cua lä cule. A nomabä, moli a cuo lä showadaono wei a lä cui, ö̦jö a shino wa̦lidiblaliyoma. Cafä wa wa̦no oni jamö, tä a̦ lä cuu weinaja tä bejedi wawäblou bufioma yalo, ö̦jö tä li cublaliyoma.
13’Ö̦jö ma cui, fei däjä cafä nija ya co̦o —Jesús a cuma—. Camiyä ya bufi doblalou lä culenaja, bä bufi doblalou cuo mö feduobä, eja ya cuo showao däjä ya tä a̦ bluca wäyäö. 14Iba bä nija bäfä a̦no wäyäö ja, bä shomiblaliyoma. Yanowamö täbänö bä nofi wa̦libouje, cama bämi cudeenö. Camiyä ya shomi lä culenaja, iba bä cuwä mö feduwä yalo, bä nofi li wa̦libouje.
15’Bita jamö iba bä lä cublai wa bä co̦aö showadaobä ya nacoimi —a cuma—. Ma. Fecula bada a yai lä wa̦lidii a lä cui nija wa bä noshi yai umabobä ya wa̦. 16Yanowamö täbänö bä nofi taboimije. Cama ebämi. Bä li shomi, camiyä ya shomi lä culenaja showawä. 17Afä dodijidawä bä cuobä, bejedi tä a̦nö bä da yaimacö. Cafä wa wa̦ lä cui, ö̦jö bejedi lä tä a̦ waiquiwä. 18Yanowamö täbä nijamö camiyä wale lä shömöleno weinaja, cama bä ma cui, ya bä ca̦i shömöa mö fedulema. 19Iba ya bä bayeliblabä, cafä nija ya jöböamou. Afä bejedi tä a̦ fa ji̦liläjenö, afä bä dodijidawä yaiobä.
20’Fei iba bä waiquiwä lä cui, ya bä nö bayeli nacaö ayaomi —a cuma—. Cama bä a̦nö wale a̦ nia bejedi lä bufiaö wejei, ö̦jö ya bä nö ca̦i bayeli nacaö. 21Jai moli bä bluca cublobä ya wa̦. Fabe. Camiyä nija cafä wa lä culenaja, cafä nija camiyä ya cua mö lä fedulenaja, inaja showawä camiyä bäfäcö nija ö̦jö bä cuo mö feduobä. Ö̦jö bämacö bluca cublobä. Inaja lä bämacö lä cuaaö wei tänö, yanowamö täbä bufi jaducublobä ya wa̦. Cafänö wale lä shömöleno wei tä lä cui, tä a̦ bejedi bufiabeje.
22’Cafänö wale lä doblaamaö weinaja, camiyänö iba ya bä ca̦i doblao taamaö mö feduoma, cafä sho bäfäcö moli lä culenaja, ö̦jö bä moli cublou mö feduobä. 23Cama bä nija ya culanö, camiyä nija cafä wa ca̦i cuobä. Ö̦jö däjä, cama bä ma cui, moli dodijiwä bä ca̦i cuo mö feduo showaobä. Yanowamö täbä bufi jaducublobä. Cafänö eja camiyä wale lä shömöleno wei wale dabeje. Cafänö camiyä wale lä nofimalenaja, iba wa bä nofimaö mö lä feduo wei tä lä cui, ö̦jö tä ca̦i dabeje.
24’Fabe —a cuma—. Camiyä ya cuobä jamö, iba wa bä lä jöböbeno wei bä ca̦i cuo mö feduobä ya nacou, wale doblao dabladayobeje. Cafänö wale nofimama yalo, ei bita a colo cua showaa mlai ja, wale doblamabou lä showaono wei, wale dablabeje.
25’Fabe, cafä wa lä cadidou wei wa. Yanowamö täbänö wa daö ma mlajei ma cui, camiyänö bäfä daö. Iba bä lä cuinö, eja wale lä shömöleno wei, wale ca̦i daöje. 26Fei bä nija cafä bäfä damalalema. Inaja showawä, bäfä nia dablamaö cuo showao, cafänö wale lä nofimaö weinaja, yanowamö täbä nofimaö cuo mö feduobeje. Cama bä nija ya yai cuobä —a cuma.
Pašlaik izvēlēts:
Juan 17: GUU
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2012, All Rights Reserved